JESUH KHRIH CHUAH ADANNAK (Rev. Biak Lian Sum)

Jesuh Khrih ih chuahnak hi biaknak dang pathian he an i lo lo caah Pathian nung asinak le Pathian diktak asinak hi atang lei bantuk in kan vun lang ter lai.

1. Achuah hlan in Bia in phuancia asi. (Isai 7:14)

Zohhman u, Ngaknu thiang nih fa apawilai i fapa ahrinlai lai.

2. Achuah hlan in amin bun cia asi. Isai (7:14) …..amin ah Immanuel an ti lai.

3. Achuahnak hmunhma phuancia asi. (Mika 5:2) ah judah. Asinain nang Bethlehem Ephrathah, Judah mi thawngpi tampi lak ah ahmete si hmansehlaw nangmah chung in Israel hna uktu kha kan caah achuak lai.

4. Mipale nuci tel lo in in asemmi a si. (Luk 1:35)

5. Achuah hlan in ral a ngeilai nak kong phuan cia asi. (Gen.3:15)
Rul, nang mah le minu nan karlak ah ralnak ka chiah lai i na tefa le a tefa zong ral an si lai. Nang nih ake dil na khuai lai ih anih nih na lu an khuai lai, tiah ati.

6. Achuahnak kong ah vancungmi vawlei minung sin ah atu le atu arung lang lengmang.

7. Siangpahrang asinan aniambik satil rawlpeknak ah arung sem. (Luk.2:12)

8. A chuah le cang ka in dodal tu le thatduh tu a ngei. (Mat2:16)

9. Pathian asiko nain minung ah arung cang ih sal dirhmun in a rung chuak. (Phil 2:6-7)

10. Mitampi tlannak ding caah a nunnak pekawk ah ara. (Mar 10:45)

11. A Pa Pathian lungtlinnak nak caah raithawinak pum pekchanawk ah ara. (Heb.10:7)

“Aw PATHIAN ngaihmanh cauk chung ah ka kong tial asi bangin, na duh mi tuahawkah ka ra” tiah ati.

12. Cahlun raithawinak hlun hrawh le thlen awk ah ara. (Heb.10:9)

Cuticun Pathian raithawinak hlun nak vialte kha ahlawt hna ih Khrih raithawinak khan a thlen hna.

13. Atlau mi kawl awk le kham awk ah ara ah ara. (Luk.19:10)

14. Thawngthabia kan thei le kan co khawhnak caah a ra. (Luk.2:10)

Acung ih kan langtermi vialte a tlang kan kawm ah cun Jesuh khrih achuahnak achan cu tinhmi ngeiten le Biaknak dang Pathian chuahnak he alo hrim hrim lo. Cucaah Kan Bawipa chuah lawmnak ah hin vancungram ih khua asa zungzal mi A vanmi hna zawng Jesuh chuahnak ah an theihpi ih Jesuh chuahnak ih ahrampi ih atel mi Mary sin ah siseh, A nun chung ih ava ding ih a lei siangpahrang asi dingmi Joshep sin ah le Mifim pathum sin ah siseh, Tuu khal pawl sin ah siseh an Siangpahrang asi mi Jesuh Van sunlawinak kaltak riangmang in aniambik ih arung sem an hmuh tik ah khawruahhar dawtnak asi ti thei in hla dawh maksak he remnak SIANGPAHRANG cu vancungmi hlarembu nih he hla dawh maksak he an run awih ko. An hla cu “CUNGNUNGBIK AH PATHIAN CU THANGTHAT SISEH LAW LEICUNGAH ALOMMMI MINUNG CUNG AH DAIHNAK UM KO SEH” tiin hla lak ih hla sunglawibik remdaihnak hla cu arun sak. Haleluija..

Minung ih kan herh bik mi le kan daihnak asi.Pathian nih minung caih atinhmi sangbik cu remnak asi… Amah hrimhrim cu kan daihnak, alaifang i thennak vanpang ahrawk i buhnih kha bukhat ah a tuah tu cu Khrih Jesuh Messiah cu asi. (Efesa 2:14)

Cucaah Pathian lungthlitum cu Amah Pathian le asersiam mi lak ih adawtbikmi asunlawinnak ding caah asermi minung he i rem hi a si. A pahnihnak ah cun minung le minung karlak ih huatnak hrawh ih dawtnak le remdaihnak lenter hi a si. Jesuh vawlei ih asemnak achan bik cu remnak asi. Setan nih minung auk, apen tik ah huatnak le ralnak a chuahpi. Cu Setan thlaici cu Jesuh nih ahrawh duh bik mi cu a si. Nihin Mi Piangthar le thar zawng hi holh dan ruang ah siseh, Pengtlang adan ruang men le Bu dangdang kan sinak ruang le duhning pungsan adan deuh ruang le thildang ttuktak men ih kan i then hi setan cu ka rian ka hlawhhling tuk a ti ko lai. Jesuh nih Remdaihnak hi aduh bik mi asi ih anun nak le athisen hi azumtu hna nih man lo ah kan chuah hi cu Dawtu lungthin afak tuk lai mu!

Zumtu le zumtu kan i ral, kan i phai, kan i remlo hi a thliten setan lei kan rak tang ko ti hi kan nun in pem hram ko seh. AMEN

Cucaah Jesuh nih anun apek nak achan hi naca le ka caah Pathian kan ngeihkhawhnak caah Pathian sin ah remdaihnak akan sertu asi ih adawtmi aminung karlak ah remdaihnak hi leng seh ti hi aduh bik mi a si. Van cung ah huatnak aum lo bantuk in leicung zawng ah apem nak vancung pennak (The Kingdom of heaven) asi mi remnak daihnak hi leng cang ko seh. Cu cu Christmas nun cu asi.

Vancungmi nih an sak mi hla hi kan nun ah atak in thleng hram ko seh.

Biak Lian Sum

General secretary

CEF