Christmas caan kan phan nain hnangamnak le daihnak a um lo, buainak, umnak hmun chuahtaknak, sifahnak, le ṭihphannak thladem tu in a kan phanh. Chungkhar tampi caah, Christmas hmelchunhnak—mei vannak, laksawng le puai hna—cu an um lo. Sihmanhsehlaw, Christmas lungthin cu a thuk deuhmi le a fek deuhmi thil pakhatkhat in a ceu. Cucu intuar khawhnak thazaang a si.
Jesuh chuahnak cu temtuarnak chungah a cang, a thawk. Siangpahrang inn ah si loin caw inn ah a chuak; nawlngeitu hna nih si loin tuukhal hna nih an don hna. A chuah hnu tlawmpal ah, a chungkhar cu thah-nawnnak in luat awkah Izipt ram ah ralzam in an zam. A hramthawk tein, Christmas nih harnak hmelchunhnak a ngei nain ruahchannak zong a ngei.
Nihin kan ram ah, inn ngeilo nulepa hna nih an fale an kilven peng hna, ṭihnung lakah ruahchannak an i tlaih hna, le biakinn an hrawh hmanh ah thlacam awkah aa pum mi zumtu hna nun ah intuar khawhnak hmuh khawh a si. “Hi thil vialte kha a lung chungah a ruat i a ruat” (Luka 2:19) Mary bantukin kannih nih a phi a tlawm (fiang sat loin kan um) tikah zumhnak kha i tlaih peng zungzal a herh.
Intuar khawhnak timi cu fahnak kha i lak in hramhram in tuar-in kha a si lo. Fahnak i ken buin ruahchannak leiah fek tein nun kha a si. Pathian cu Emmanuel a si rih ko ti zumhnak ralṭhatnak a si—ramlak, riahhmun le khuate rawhnak hna zong ah kan sin ah a um ko. Christmas nih Pathian cu nunhrawmh Pathian a sinak a langhter.
Harnak phunkip chungah intuar khawhnak he fek tein kan nung ko tihi tutan Christmas tehte ah cang sehlaw a ṭha tuk hnga. Kan tuahsernak kip ah, Christmas bia cu i nunpi cio u sih: muihnak chungah ceunak a ceu, muihnak nih a tei lo (Johan 1:5).
IBC Fidi Cazual chung ta
Advertisement
EmoticonEmoticon