Voi tam nawn phungchimnak ah kan theih tawn mi bia cu “Nichuahlei Mifim hna nih an fimnak an i rinh caah Herod siangpahrang an fuh i ngakchia thisen luannak a chuahter, minung fimnak hi cu pakpalawng a si,” an ti. Hihi Baibal hrilhfiah phun ah an ṭial bal ve ko rua, asinain mifim hna kong hi aho ngaingai nih thukpi in kan hngalh chap mi kan Baibal ah kan rel khawh mi a um lo caah ‘minung fimnak i rinh in’ ti mi bia hi aphi hmaan kawl awk a hun har ngai. ‘Minung fimnak i rinh in’ ti mi hi minung khuaruahnak le lungput in hrilhfiah hna sehlaw a dawh. Matthai 2 hi voi tam nawn kan rel, ka nolh ṭhan lengmang tik ah Nichuahlei Mifim hna kong ah thil kan fian mi tete an um:
1) Van arfi an zohnak in Pathian aa phuannak an hngalh i Judah siangpahrang a chuak lai ding mi kong kha Cathiang rel awk an ngei lo nain an hngalh. Pathian nih minung kan sin i aa phuannak hi a thuk hringhran.
3) Herod sin an phaknak nih Herod siseh, Jerusalem khua mi hna si hna seh, phungbia cawnpiaktu saya hna le tlangbawi hna kha awlokchong in a umter dih hna. Khualipi a hnih dih cikcek.
4) Herod sin an phaknak nih Biakam Hlun, Cathiang chung bia, profet chimchung mi kha tlangbawi upate nih Herod an chimh chin caah profet biaphuan a tlinnak a si i cucu Matthai thawngṭha ṭialtu nih fel tein Cathiang aa chirhchannak a langhternak a si.
5) Khuaruahhar deuh a si mi thil a cang mi cu tlangbawi hna le phungbia cawnpiaktu saya hna nih an hngalh tuk ko bu in Bethlehem ah an kal ve lo mi hi a si.
6) Herod nih cun mifim hna sinah naute kong cu va hlat ulaw ka chim ṭhan u, kei zong nih ka biak ve lai a ti; Jerusalem khua mi nakin tlawmpal te cu kherhlai duhnak a ngei deuh mi a lo.
7) Mifim hna nih Jesuh cu an va hmuh, an khuk an i bil i an biak, laksawng an pek fawn. Zan an mang ah lam dang kir ṭhan awk a si kha an hngalh caah Herod sinah an kir ti lo. Nawlngai mi an si.
Pathian fimnak nih mifim hna kha a hramthok tein a dongh tiang a hruai ko hna ti cu Matthai 2 hi voi tam nawn nolh in kan rel ahcun kan lung a fiang kho ngai mi a si. Minung fimnak in Pathian an dohnak Matthai nih fiang tein a ṭialnak cu a um rua lo.
Pathian fimnak upatnak le Nichuahlei Mifim hna nih khukbil bu in Jesuh an biaknak tu hi fak deuh in ruat hna u sih law, profet bia a tlinnak kong zong in Baibal hi rel ṭhan hna u sih. Phungbia cawnpiaktu saya hna, tlangbawi hna le Jerusalem khua mi hna bantukin lungthin innka aa kharkanh lo mi kan si a herh. Kannih cu Bethlehem khua ah kal ve ko hna u sih. Pathian fimnak nih arfi kan hmuhter ve ko sawh seh.
IBC nih zarhkhat voi 1 an chuah mi fidi cazual chung ta tar chinmi a si.
Advertisement
EmoticonEmoticon