Rev. F. Za Thang: Christmas Kaa Ngaihning Aa Thleng (Sermon)

Ka ngakchiat lio Christmas kaa ngaihning cu khaihriatkual ngeih, phangphang puah, zaanvah i chang danghmi ei lai, thil thar hruk, sazawh, capo saihmi zoh le nih, drama zoh le a dongh zaan i laksawng an kan chuahmi hlam le laam hna an si. Cu kaa ngaihmi chungin ngaihchiatnak ka ton tawnmi cu khaihriatkual kan vun i kah i a miaklei si lo in a sunglei si, phangphang puah i tloh, a dongh zaan laksawng chuahmi ah pakhat te hmanh a ho nih an kan chuah lo tibantuk ah nihin i Jesuh ngei lo pawl nak hmanh in ka awlok a rak chong deuh ti tluk khi ka si tawn.

Tlawmpal ah tlangval dirhmun ka hun phan ve i kaa ngaihning aa dang than. Kan khua ah tangli tiang lawng sianginn a um caah khual ah ca kan rak cawng. Kan nih tlanval lio ahcun zureu minthan lio si kaw laangkhat te tal Christmas i khua tlunpi ding ka ngeih lo ahcun Christmas hi ka caah sullam a ngei lo tluk khi a si tawn. Zeidang lak ah a ma na lo hin a hmasa bik ah laangkhat ca cu tuaktan hnu ah nungak laksawng le a herh dangdang ruah a si zungzal. Rit ngaingai nak in ka kaa zurim nam nawn tein zaan ka vah khi Jesuh ngeih le tluninn onh tluk te ah ka rak ruah.

Pathian dawtnak chung taktak i um hnu ahcun Christmas kaa ngaihning hi aa dang than. Kum khat ah thla 11 chung ka nunning a dik lo mi vialte ngaihchih buin thla ka cam. A ho nih dah ka hna an ka ngamter lai ti nak in keimah tu midang caah santlaihnak zeidah ka ngeih khawh lai ti lei in khua ka ruat. Mah chungkhar, rualchan cingla, hawikom cia nak in santlai lo mihrut pum tlamtling lo le keimah nak in sifak harsa deuh laksawng pek ding kaa zuam. Thlacam buin hla thar fungkhat tal phuah le midang thazaang pekhotu thawngthabia chim ding timhtuahnak ka ngei. Tukhal hna nih an tuu kaltak in naute Jesuh chuahnak hmun tiang an kal le mifim hna nih laksawng put in an kal hnawh bang, thla dang lak ah pumh , thlacam le naute Jesuh can ah a cunglei i laksawng chuah ding ka timi hna hmuhkhawhnak tiang kaa zuam. Thancho timi hi kan ngeih bal lo mi ngeih, kan hngalh bal lo mi hun hngalh tbk lei lawng si lo in, Jesuh nih van sunparnak kaltak in vawlei nun aa hrawm bang kanmah nak in santlai lo, sifak harsa sin nun va hrawm khawh khi thancho taktak ah ka ruah.

Mirum nih rawldawr ah mirum hawikom dang he zaanriah hrawm, Bawi nih mah he reng aa khatmi riantuan hawi he tlonlen duh zungzal i Christmas laksawng hna i chuah len ti khi tu kum Christmas ah cun kaltak cio hna usih law, Mirum pakhat nih lai khuate in a rak tlungmi seibai te he ba lengmang in a tlungkal mi sei chung te ah an hnulei in dawi i a thli tein laksawng sanhpiak, a si lo ah sabuti le
rawldawr pipa deuh zongah dangh, kan sang kan veng ah hmeinu hmeipa sifak harsa innka pawng ah arpi pakhat hna zaantim ah hrenpiak i a hngawng cung ah caku tein Christmas laksawng a si ei ding ah tih hlah uh tiah ca te zong tial chih,Blankket puanlum ihphah lun hna an innleng ah Christmas laksawng tiah chiahpiak ti bantukin Christmas hmang cio ding kan sawm hna.

Kei cu kum tam nawn “Christmas Kaa Ngaihning Aa Thleng” cang.

By Rev. Francis Za Thang

(Rev. Francis Za Thang hi Haiphai khua ah a chuakmi a si. Atu ahcun Hakha Olive Baptist Church ah Lutlai Pastor a ṭuan lio mi a si. Hibantuk ruah a tlakmi thawngṭha a kan hrawmh caah kan i lawm.. Khrihfabu rian a ṭuannak ah Pathian nih thluachuah ko seh. 2018 lio i rak tial cangmi a si caah chan he aa dangmi tete a um kho men.)