Emmanuel ti cu Pathian kan sin ah a um tinak a si (Mtt. 1:23)
Voikhat cu America President Eisenhower cu Denver khua i dinhnak caan a hman lio ah tadinca pakhat amah ton a duhmi kong aa ttialmi a hmuh. Cucu ngakchia pa kum 6 a simi cancer zawtnak in a dam kho ti lomi Paul Haley nih a thih hlan ah an Presidentpa ton ta a duh ning kong a tial mi a si. President pa nih a rian a tampi lak ah cu ngakchia pa ton ding ah aa timtuah.
Advertisement
August thla zarhpi zing voikhat cu ruah lopi in President citmi motor cu Haley te inn hmai ah cun a dir. Cu tik ah Paul Haley a pa Donald Haley nih innka cu a vun hun. Zing a thawhka a si i, hmurhmul, met lo, zaan ihnak thilthuam he innka hram ah a dir. A fapa Paul Haley cu a pa hnute in a dir. President pa nih Paul Haley cu “ka fa ton na ka duh ka theih ca ah ka ra,” a ti i a kut a tlaih. President citmi motor cu a zohter. Laksawng a thenh i thazaang peknak bia a chim hnu ah a kal.
Haleyte chung le a innpa hna nih President nih ruah lo in an inn a rak lennak kong an i.ceih lengmang. Asinain aa lawm kho lomi cu Donald Haley a si. Zeicah tiah an President pa a inn ah zing thawhnak thilthuam he a innka ah a don ruang ah a si. Dawtmi u le nau hna kanmah cio zong zeitik caan paoh kan bawipa ton ding ah timhcia in um zungzal u sih. Asinain aa dannak cu kan Bawipa cu a kan tlawngtu, a kan leengtu Bawi a si lo. Kan sin ah a ummi Emmanuel Pathian a si kha philh hlah.
England Siangpahrangnu Queen Victoria (1837-1901) a can lio ah hin mi sifak deuhdeuh a hawi tthirual nu hna sin ah a leeng tawn hna. Voikhat cu nuhmei nu pakhat sin ah a leeng i sau nawn khrihfa hawikomhnak an ngei. Hi nuhmei nu hi zumtu ttha a si i Bawipa Khrih dawtnak kong, a innpa hi a chimh tawn hna. A innpa cu zumtu setsai an si lo i, Siangpahrang nu a lennak kong kha serhsat zawmhtaih nawn in hitihin an hal,” Tarnu, na mi leeng ahhin ahodah na upat, na sunsak bikmi a si?” tiah an hal. Annih an ruahnak ahcun,” Jesuh Khrih” tiah a kan leh lai tiah an ruah. Asinain tarnu nih,” Siangpahrang Queen Victoria” tiah a leh hna. Annih nih,”ziah na chim tawnmi Jesuh Khrih a si lo maw?” an ti. Tarnu nih, a si lo, ka Bawpi Jesuh Khrih cu mi leeng a si lo, hika ah a ummi a si,” tiah a leh hna.
Dawtmi u le nau hna, kan Bawipa Jesuh hi mi leeng ah ser ti hlah u sih. Kan sin ah a ummi Bawipa a si. Bawipa min thangtthat si ko seh.
Pu Din Lian (Ca ttialtu) kong rel na duh ahcun hika Paragraph hi click
Thlarau Thazaang cauk a chuahmi chung in lak chommi a si.
EmoticonEmoticon