PATHIAN RIANṬUANTU ṬHA (Genesis 1:26 and 2:15) Pastor Ni Hre Lian,
Carson
Advertisement
Biahmaiṭhi
Kan
Bible chung sernak tuanbia kan zoh tikah Pathian nih van le vawlei, ceunak le
muihnak, le thingkung le saram phuntling a ser hna. Cu thil vialte a ser dih
hnu lawngah Pathian nih minung a ser. Phundang in chim ahcun, minung kan nun i
kan ngan a dam khawh nak ding caah kan herhmi thil vialte tling te in a ser hma
sa. A sermi thil vialte a zoh tikah a lung a tling ngaingai i a ṭha tiah a ti.
Sermi thil vialte nih cun anmah le an sining cio in minung hna kan caah ṭhatnak
le dawhnak an ngeih leng ah Pathian sunparnak a langhtertu an si. Cu sermi thil
vialte i an i dawhnak le an ṭhatnak vialte i hrawm awk ah Pathian nih minung a
ser.
Pathian Mui Keng in Sermi Minung le a
Rian
Pathian nih minung a ser tikah hin
sermi thil vialte he i dang khun in a ser. Amah muisam keng in a ser i nunnak
thaw a pek. Pathian nih minung cu amah mui lo in a ser hna ti tik ah minung hi
Pathian he kan mui (physical appearance)
aa khat/lo ti nak a si lo. Minung nih Pathian cu kan lo kho lai lo. A chim
duhmi cu thlarau lei (spiritual nature)
in Pathian kan lawhnak tu kha a si. Zeiruang ah dah Pathian nihhin minung hi
cubantuk sinak ngei in a ser hnga? Cubantuk a hlei khun in sermi minung cu
Pathian nih tinhmi ngei tein rian nganpi a khinh. Genesis 2:15 chungah kan
hmuhmi cu “Cun Bawipa Pathian nih mipa cu
a lak i Eden dum chungah cun dum cu a thlawh awk le ven awkah a chiah”. 
Minung cu sermi thil vialte zohkhenh le kilven ding kha kan rian a si. Sermi
thil vialte lakah minung sang cem i cawi a si hnawhchan cu sermi thil vialte ṭha
tein a zohkhenh a kilven khawh nak ding caah a si. Hihi Pathian nih minung a
khinhmi rian cu a si. Pathian mui keng in ser kan si nak nih sermi thil dang
vialte cungah Pathian aiawh tu ah a kan ser. Pathian aiawhtu kan sinak nih a
langhtermi cu sermi thil vialte hna hi amah Pathian thengmang te ra in zohkhenh
le kilven a hau ti lo, kanmah minung nih kan zohkhenh kan kilven mi kha aa rinh
ti nak a si. ‘Thlawh le ṭuan’ timi biafang hna nih an langhtermi cu vawlei ṭuan
kha si ko. Asinain, biaknak lei mit in vun zoh ah cun hi biafang hna nih an
sawh duhmi cu Pathian rian ṭuan kha a si. Chim duhmi cu minung hna nih sermi
thil dang vialte zohkhenh kilven nak rian kan ṭuanmi hi Pathian nih a kan
fialmi rian kan ṭuan a si kha a langtermi a si. Pathian nih sermi thil vialte a
zoh tik ah ‘a ṭha’ tiah a ti ‘a tling’ tiah a ti lo. Cu nih a langtermi cu
Pathian kutzung dawh sermi thil, thing le ram, ramsa hna tizu ngacel vialte hna
hi sertu Pathian ai ah minung hna nih pehzulh in kan zohkhenh kan kilven ding
kha a si. Pathian nih amah rianṭuantu ṭha si ding kha a kan duh piakmi a si.
Rianṭuantu (steward) nih a sawh duhmi cu amah ta a si lomi thil kha a ngeitu
nih a fial ning in le a a ngeitu lungtling tein a ṭuan piak tu le a zohkhenh
piaktu kha a si. Kanmah ta a si lomi Pathian kutzung dawh hna kan zohkhenh kan
kilven nak ah a sertu le a ngeitu Pathian lungtlin hi a biapi mi a si.
Genesis 1:26 chungah kan hmuh mi cu
Pathian nih minung rian a khinh tikah thlawh le kilven lawng si loin uk ding
zong nawl a pek. Uktu dir hmun kan ti tikah mah duh paoh in sawksam le
hrawhhralh ding a si lo. A sertu Pathian hmanh nih lungtling ngai in ‘a ṭha’
tiah a ti bantukin sermi thil pakhat cio nih an ngeihmi sinak te kha kan upat i
kan conglawmh hna awk a si. Pathian nih niruk nak ah saram vialte le minung a
ser hna mi nih a langtermi cu pakhat le pakhat an i pehtleihnak
(interdependence) le cabuai pakhat chung rawl a dumṭi mi kan sinak a langhter.
Cucaah zeibantuk sermi thil hmanh amah lawng in a nung khomi le a ṭhudir khomi
an um lo. Sermi thil vialte pakhat le pakhat kan i pehtlai dih, kan i herh dih
bantukin a hman mi pehtleihnak in kan i pehtleih awk a si.
Biatlangkawm
Nihin kan pawngkam kan khua caan
zoh tikah mithmuh kuttongh in thil tampi aa thlengmi kan hmuh khawh. Kum khat
hnu kum khat a lin chin langmang. Minung kan karh chin langmang, hmun tampi
ahcun dum tuah le thlai cin cu chim lo dinti hmanh kan i za ti lo. Van ruah
zong a caan te ah a sur ti lo. Kan herh lo caan tu ah tam tuk in a sur i
mincimh le ti lian hna, minung kan caah harnak a kan petu thil tampi an
chuahter. Saram dang cu chim lo vate koko hmanh an um ti lo. Chai le tolhṭang i
put in va a pelmi zong ka hmu ti fawn hna lo. An lo dih an tlau dih, an rawk
dih an ral dih cang. Nihin kan pawngkam ah a cang thluahmah mi boruak ṭhalo hna
hi cu raung kha ruang theng te ah a cang ti cu kan chim kho lo, asinain
pawngkam zohkhenh le kilven kan daithlan ruangah a cang mi an si. ‘Thingkung
cin caan ṭha bik cu a luan cia mi kum 20 kha a si, pahnihnak cu a tu hi a si’
tiah Africa nih phung an thuk. Pawngkam zohkhenh kilven nak caah caan ṭha bik
kan ngeihmi cu kan rak tlawlh diam cang. Asinain pahnihnak caanṭha kan ngei
rih. Atu kan thawk a si ahcun hmailei kum 20 a rauh tik ahcun kan caan ṭha bik
kan hmanthiam a si hnga.
A cungah kan langhter cang bang, Pathian nih minung cu
sermi thil vialte lakah cungnung bik ah a kan chiah. Amah Pathian mui keng in
ser kan si. Cu ti ser kan sinak cu sermi thil vialte cung ah nawlngeitu kan
sinak le Pathian aiawh tu kan si nak a langhter. Pathian aiawh tu kan si nak
nih a langhter mi cu Amah Pathian ai ah sermi thil vialte zohkhenhtu,
kilvengtu, le rianṭuantu kan sinak a langhter. Rianṭuantu kan sinak nih a
langhtermi cu kan mah ta a si lomi sermi thil vialte a ngeitu Pathian lungtling
te le duhning tein a ṭuantu kan si ding kha a langtermi a si.
Hi capar cu HBA Hmurka Vol. 18, No. 2 June (Pur), 2020 i chuahmi chung in tar chinmi a si.
EmoticonEmoticon