JAPAN RAL (1942 - 1945)
Vawlei cung Ralpi Pakhatnak cu kum 1918 ah a dih i, Mirang le German cu Versailese khua ah biakamnak an tuah. Cu biakamnak cu German Nazi cozah cu a lung a tling kho hrimhrim lo.
Cucaah cun kum 1939 September thla ni khat ah Adlolf Hitler nih Austria ram, Czechoslavakia ram le Poland ram cu a hun tuk hna. Cu tikah cun British le France ram hna nih cun an kan tuk ṭhiamṭhiam ve lai ti an hngalh caah German cu ral an hun thanh ve i vawlei cung Ralpi Pahnihnak cu a hung tho.
Cu lioah Japan ram cu General Tojo nih a rak uk lio a si. Gen. Tojo cu Italy Mussalino le German Hitler lei ah a ṭang i 1941, December 7 ah American kha ral a thanh i Pearl Harbor (Pearl tilawng dinhnak) kha ruah lo ah bom an vak thlak.
Cu tikah cun America zong cu British lei le France lei ah cun a ṭang ve i Japan cu ral a thanh i vawlei cung Ralpi Pahnihnak ah cun a lut colh ve. Japan nih cun Asia Nichuahlei ram hna cu ram khat hnu ram khat in a hun lak duahmah hna.
Tuluk, Thailand, Indonesia, Singapore, Filipin, Guan le Malasia ram hna cu 1942 kum ah a hun lak dih hna i, Kawlram ah a a hung lut colh. Kum 1942 thawkka ah Rangoon le Pegu hna cu a hun lak hna i, Kawlram Chaklei cu a hun nam thluahmah colh hna.
Cu lio i Kawlram ah a ummi Mirang ralkap hi a thazaang a der ngaingai. Cucaah cun Japan nih cun fawite in a rak tei hna i Mirang ralkap vialte cu India ram ah an zam i, Chindwin chaklei vialte zong Japan nih cun a hun lak dih.
CHIN LEVY:
Chinram ah Mirang nih Japan ral tukter dingin ralkap an rak phuanh i cu ralkap hna cu "Chin Levy" an ti hna. Levy ralkap cu phun hnih in an tuah hna i 'A Levy' le 'B Levy' an ti hna. B Levy cu hriamam tlai loin khua ralvengtu sawhsawh an rak si. A Levy cu hriamnam a tlaimi an si i Japan cu an rak dohter hna.
Japan nih Kawlram an hun tei tikah Laimi Kawlram i ralkap a tlami hna cu tlangcung leiah an hung zam; a cheu an meithal he an hung zam kho i, a cheu cu meithal loin a hung zammi zong an um.
Kum 1942, October thla ah cu hna cu Mirang nih an auh ṭhan hna i, A Levy he cun an fonh hna i hriamnam an pek hna hnu ah Japan cu an tukter hna. Maj. H. Braun cu A Levy Batalian hruaitu ah an rak chiah i Fort White in Tahan lei ah a kalpi hna i Japan ral cu an rak kah hna.
Sukte ralkap pawl cu Thawng Za Khup nih a hruai hna; Hakha Levy hna cu Van Kulh le Za Hu (Zokhua) nih an rak hruai ve hna. Laimi lakah cathiam hmasa bik a simi Thawng Cin Thang, Vung Suan, Siah Luai, Sum Mang, Khai Mun Mang, Gin Za Taung le Pau Za Kam te hna nih cazi an rak ṭuanpiak hna i Japan ral cu biatak tein an rak tukpi hna.
Kum 1942 ah Japan cu Chinram leiah cun an hung kai cang i, Chin Hills Batalian le Levy ralkap hna cu Kawl le Lai ramri (Ruan) in an rak i tlar i Japan cu an rak kham.
Chin Hills Batalian nih atu Vuibulah zawn khin an rak bawh hna i, Levy ralkap nih cun Nahchawng le Pamuanchawng hrawng khin an rak bawh hna. Japan an hung phak taktak tikah cun an kham kho ti hna lo i an zam.
Asinain a thli in lamhruang in an bawh hna i an kah ṭhiamṭhiam hna. Ralthli in an doh hna caah Japan cu tampi an thah hna i an hriamnam le an meithal zong tampi an chuh khawh hna. Japan cu an tan a rual tuk caah an tei kho hna lo i Laitlang leiah cun an hung zam i Japan nih an hnu in an hun dawi hna.
Mirang nih cun hmunrawn le tlang ramri, atu Khaikham hmun khin an rak kham ṭhan hna. Vuibulah kha a voi khatnak an khamnak a si i, Khaikham hmun cu a voi hnihnak an khamnak a si caah 'No.2 Stockade' tiah an ti.
'Voihnih khamnak' tinak a si. Kum 1942 December 23 ah Japan cu No.2 Stockade cu an hung phan i cuka ah cun fakpi in an i kap. Cuka an i kahnak ah cun Japan ralkap minung 12 an thi.
Asinain Japan nih an tei ṭhan hna caah Mirang ralkap le Chin Levy pawl cu an zam ṭhan i, atu No.3 Stockade hmun khin an rak kham ṭhan hna. 'A voithumnak khamnak' tinak a si. No.3 Stockade ah cun Artilery ralkap Batalian pakhat, Chin Levy Platoon pakhat le Gurkha ralkap Company pahnih nih an rak kham hna.
Japan cu Chin tlang ah cun an hung kai cang i 1942 kum, May thla ah No.3 Stockade cu an hung phan. No.3 Stockade ah cun Mirang Artilery ralkap Batalian pakhat,
Chin Levy Platoon pakhat le Gurkha ralkap Company 2 ah rak um i, Japan he cun fakpi in an i kap ṭhan. Japan nih an tei ṭhiamṭhiam hna caah Mirang cu Tidim ram tiang an zam. An hnu in an vun dawi hna i 1943, Semtember thla ah Fort White Ralhau an lak i Kennedy tlang an phan.
HAKHA LEI:
Hakha Levy ralkap hna cu Hakha, Hata khua le Lungngo khua ah an rak umter hna. 1942 November thla ah Japan ralkap Batalian pakhat cu Kaan lei in an ra i Hakha in men 40 a hlatnak Simpi khua ah Levy ralkap nih cun an rak kah hna.
Cucu Chin Levy le Japan an i kah hmasa biknak a si i, Japan ralkap 50 hma an pu. Asinain Japan nih cun an tei ṭhiamṭhiam hna caah Laitlang leiah an hung zam. Japan ralkap 300 hna cu Kawl ralkap 100 he Tinthe khua ah an hung riak.
Chin Levy pawl cu hlatpi ah an zam lai tiah an ruah caah hnangam in an riak i sentary hmanh an i cawng lo. Chin Levy pawl nih cun cuka ah an riak ti thawng an theih caah an hun peel hna i ruah lo ah an hun nam ciammam hna i Japan ralkap 132 an thi.
Asinain an kham khawh ṭhiamṭhiam hna lo caah Japan ralkap cu phauva hrawn in an hung kai; Rinpi le Haiphai i a ummi Levy pawl zong nih an kah pah hna nain an kham kho hna lo i, 1943, November 8 ah Falam an lak. A cheu Hakha leiah an ra i Hranhring in Hniarlawn in Noveber 12 ah Hakha an lak ve.
Japan ralkap Hakha khua an hung phak ah hin Gurkha ralkap lawng an rak um i, atu Dawrhlun sang ah khin Japan le Gurkha ralkap cu an rak i kap ciammam i, Gurkha an ral a ṭhatning hi chim awk a ṭha hrim lo; meihal cun an i kap lengmang i Gurkha pawl cu an zenkuan a dih cang.
Sihmanhselaw zam an duh bak loh. An meithal parah namte (Sword) an i bunh zau i Japan cu an rak chunh len hna. Sword zong nih cun a zo hoi ti hna lo i a hmanung bikah cun Kukri nam an i chuah i Japan cu an rak sam hna. Sihmanhselaw meithal cu namtong nih cun tei khawh a si lo caah Gurkha ralkap cu Timit leiah an rak zam.
Japan nih cun an hei dawi hna i Gurkha rakap cu Chin Levy nih an hun bawmh hna i Titava in an rak bawh hna. Tita lungpang lak ah cun an hun i kap ṭhan i, Japan zong cu an tlawm ve cang caah Hakha lei ah an kir ṭhan.
Japan cu Thangtlang an phan ti lo; zeicah tiah Japan nih an i tinhmi cu Tidim le Tamu in Imphal leiah kal i India laak ding a si caah Thantlang ah phak ti lonak cu a si.
Mirang ralkap hna cu Japan Tita an phan ti an theih caah Tlangkhua i a ummi hna nih an hriamnam inn le an rasen (Ration) inn an duah tak i India lei ah an zam ve.
Laimi cu lamhruang in rak bawh i kah hi an hman tawn zungzalmi a si caah Japan zong cu lamhruang in an bawh hna i an kah tawn hna. Stevenson nih 'Chin Levy nih Japan 214 an thah hna' tiah a ṭialmi zong hi lamhruang in an bawh hna i an thahmi hna lawngte an si .
TIDIM AN LAKNAK:
Kum 1943, September thla ah Japan nih Fort White ralhruang an lak i Kennedy tlang hrawng tiang an hung phan nain Gen. Cowan hruaimi Kala ralkap 17th Division hna nih Japan cu an hun nawr ṭhan hna i Tidim cu an hun lak ṭhan.
Cu lioah cun India lamco minung 5000 nih Tidim-Tonzang-Cikha in Imphal tiang lam pemh an i tim i an hun cawh thluahmah lio a si
Japan ralkap 33rd Imperial Army cu Lt. Gen. Yanagida hruaimi an si i, Yanagida ralkap 2000 hna cu 1944 March thla 6 ah Tidim ram chaklei kam in an ra i Tonzang khua thlang Run tiva a ummi Mirang ralkap hna cu ruah lo ah an hung kah hna.
Japan 31st Division ralkap hna zong Homalin pawngin Chindwin tiah an hun tan i phu 8 ah an i ṭhen i, Tungdun in Tidim cu an hun nam ve. Cuti a si caah cun 17th Division Kala ralkap hna cu 'Imphal ah ram zam u' tiah order an hun pek colh hna.
Kir an hun i timh tikah cun Run tiva in 33rd Division nih cun an rak bawh hna. 31st Division nih cun Taungduh lei cun an hun nam ve hna tikah 17h Division Kala ralkap cu kalnak um ti loin nichuahlei le nitlaklei in an erh tonh cang hna.
Chim awk an hngal ti lo i 'An kan hlawm dih cang lai' tiah Inphal ah thawng an hei thanh hna. Cu tikah cun Imphal in 23rd Division pahnih can hun thlah zohzok hna.
23rd le 24th Division pawl nih cun an hun phak hna i, Run tiva cun Japan 33rd Inperial army cu an hun tuk hna. 17th Division cu a cheu nih Tidim in defence an lak i a cheu nih Run tiva i 33rd Japan imperial Army cu an hun tuk ve hna.
Cuti cun Japan 33rd Imperial army cu chaklei le thlanglei in an hun tuk tonh ve caah Japan cu an tei hna i thih le nun ri in lam cu an onh khawh. Gurkha ralkap an ral ṭhatning cu hitan zongah hin fak tlak ngaingai an si ko; an zenthong a dih in sword in an chunh hna i sword nih a zawh ti lo hnu ah kukris nam an i chuah i Japan cu an saam hna. Cuti cun 17th Division ralkap cu an chuak kho i 5.4.1944 ah Imphal an phan.
Japan nih an i tinhmi cu 17th Division kha lam kham i Division dang nih Imphal kha kulh i, Imphal an lak hnu ah India ram chungah luh ding a si. 17th Division cu an kham khawh hna lo caah an hnu cun an hei dawi lengmang hna i 1944 April 4 ah Naga khuapi Kohima an phan.
15th Division Army hruaitu Lt. Gen. Renya Mutagukhi nih a ralkap hna sinah a chimmi cu: "Nan kal lai i Delhi nan va laak lai. Nan zenkuan a dih tiang nan kah hna lai i, nan kuan a dih ahcun nan kut hmang u.
Nan kut a kiah ahcun nan ke in doh hna u. Nan kut le nan ke a kiah dih ahcun nan ha hmang u. Nan pum chungah hman awk a um ti lo a si ahcun nan thlarau in do hna u. 'Hriamnam a um lo ruangah an kan tei' ti bia hrimhrim um hlah seh," tiah a ti hna.
[caption id="" align="alignnone" width="621"]
Kohima ww2[/caption]Japan ralkap Maj. General Kotuku Sate hruaimi 31st Division ralkap 20,000 hna nih cun 4.4.1944 ah cun Kohima cu an hun tuk. Kohima ah cun Mirang ralkap Batalian ralkap (Minung 1000) le Chin Levy, Naga Levy le Assam Regiment nih an runvenmi a si caah saupi an i kap i Japan an sungh caah Dimapur ah an lan.
[caption id="" align="alignnone" width="1000"]
Kohima WW2[/caption]IMPHAL RALTUKNAK
General Tsumoro Yamamoto le a ralkap hna nih Imphal cu an kulh i a kam kipin an bawh hna. Ke ralkap nih a kam kipin an hun nam hna lioah cun cungin vanlawng in an hun kah chih hna.
Mirang nih Imphal ral a sungh ahcun India ram pumpi sungh ding khan a si cang caah vawlei ralkap he vanlei ralkap he hacang rial in an tuk ve hna. Cuti cun Japan nih cun chuak kho loin an kulh hna i cunglei he tanglei he fakpi in ni tampi an i tuk tikah, Japan pawl cu an riahcaw a dih cang.
Gen. Mutu Gachi nih cun 'Hriamnam a um lo ruangah ral kan sung ti hrimhrim um hlah seh' tiah a ti ko nain, ti lo le rawl loin thih dih an i zal cang. Sau tuk an i kah cang caah cun an ralkap 3,000 an thi i 4,000 hma an pu cang.
Cu tikah cun an celh ti lo i Imphal ral cu an sung. Cuti cun Kohima lei in an kir. Japan ralkap Kohima leiah an ra ti an theih tikah Kohima i a ummi Mirang ralkap 14th Batalian nih an hun nam ve hna.
22.6.1944 ah 14th Batalian he cun an i kap ṭhan i, cu lioah cun Imphal lei in an hun nam ve hna. Cuka ah cun ni 74 chung an i kap i, cuka ah cun Japan ralkap cu chim cawk lo ti awk an paam.
Imphal raltuknak cu Ralpi Pahnihnak raltuknak le a kahnak vialte lakah a fak bik tuknak a si ti a si. Japan ralkap cu 17,000 an thi i, 55,000 hma an pu.[1] Japan cu ral an sungh caah cun Tidim ram in an hung kir i, an hnu in Mirang nih cun an hun dawi lengmang hna caah an i kap ṭhan lengmang i lampi ah 1,316 an thah ṭhan hna. Chinram chung le Imphal ral ah Japan ralkap a thimi dihlak cu 50,000 an si. Mirang ralkap nih Cikha le Tonzang karlak Tuirial an hun phak ah American nih Nagashaki le Hiroshima khua ah Atom bom a thlak i Japan nih an celh ti lo caah Japan cu 1945, August hla ah ral an dai.
Ral a daih cang caah Mirang rakap nih cun Tuirial ah cun an motor le an thilri vialte an kaltak i an ram leiah an kir dih. Tuirial ah cun nihin ni tiangah motor a rawkmi le a thilri rawkmi tampi a um rih.
Japan hi vawlei cungah upat awk tlak pakhat an sinak cu, raltuk an laknak paoh ah an ziaza a tha. An lakmi ram paoh kha zeitindah kan uk khawh hna lai tiah tha tein an zohkhenh hna.
Laitlang an rak phak lio zongah zeitindah kan uk khawh hna lai ti ruah ah an cakapian pa kha, "Laimi nih zeidah an duh lo bik?" tiah an rak hal i, cakapian pa nih cun, "Laimi cu an nu tawnghpiak an duh hrimhrim lo," tiah a rak chimh hna.
Cucaah cun Japan nih cu bia cu an rak zulh i, Lairam i an um chungah ahohmanh nu leiah zohchia in an rak um hrimhrim lo. Kala ralkap hna cu tlaihhrem an hman caah Japan ral chung i Kala ralkap Lairam i an um lioah Lai nu cu thing hmanh an phawr ngam lo ti a si.
Japan cu, cu bantuk cun an si hrimhrim lo, Kuli phawrh an fial tik hna zongah a man kha ṭha tein an pek hna.
Hi ca bia pawl hi Pu Chawn Kio nih Lai Miphun thawhkehnak tuanbia a ṭialmi (pp 330-336) chung in ka tar chinmi a si.
Catialtu Pu Chawn Kio Kong rel na duh ahcun Hika hi click te (Video in a chimmi aa tel chih
[1] Vumson, Dr. : Zo History p.170
EmoticonEmoticon