Pu Thawng Za Khup cu: Tedim peng dihlak aiawh in Kawl ram luatnak kongkau ceihmai dingah Pinlung kha i tuahmi Conference a kai i minthu hmasa biktu a si.
Thawng Za Khup cu a pa Pu Do Tual (mi-uk) le a nu Pi Tel Za Kai nih 1907 kum March 15 ni ah Tedim peng Saizang khua ah an hrin.
Thawng Za Khup cu Mawlaik Government Middle School in tang 7 a awng. Amah cu Kawl ca a thiam ngaingai.
Tang 7 a awn hnu cun Tedim Government Anglo Vernacular Middle School ah saya rian a ṭuan.
A pa cu 1928 kum April thlachung ah a thi i a saya rian cun a chuah hnuah a pa rian (mi-uk-rian) cu a ṭuan.
Vawleicung Ralpi Pahnihnak (Japan ral) chungah Western Chin ‘A’ Levies a phunh i Japan ralchung ah Sukte Independent Army he a thlite in pehtlaihnak an ngei i Japan ral pawl cu an doh hna i Manipur Nitlaknak lei khua le ram vialte a zohkhenh hna.
Western Chin ‘A’ Levies ah Coy. Commander a ṭuan i Sukte Independent Army he Japan ral cu an do.
A uk chung khua le ram vial cu dai le remte in a uk hna ruangah Mirang cozah nih minṭhatnak A.T.M. an pek.
Pu Thawng Za Khup cu 1947 kum January 24 ni ah Falam Zipeng bawipa nih Shan ram Pinlung khua ah Kawl ram le Tlangcung ummi vialte lungngete in bia i ruahṭinak ngei ding thawng a thanh bantukin Tedim peng ummi minung dihlak aiawh in Shan ram Pinlung khua ah cun a kal.
Falam peng aiawh in Pu Hlur Hmung le Hakha peng aiawh in Pu Kio Mang zong an kal ve. Holhlettu ah U Vum Kho Hau, U Sa Vut le U Ngun To zong Pinlung khua ah cun an kal ve i 1947 kum February 6 ni ah an phan.
1946 kum March 29 ni i rak tuah ciami Kawl ram le Tlangcung ummi i hawikomhnak le bia an ceihnak kum khat tlinnak chingchiahnak caah 1947 kum February 7 ni ah Pinlung khua ah lunglawmhnak puai an tuah i Lai mi a kalmi vialte zong mah puai ah cun an vung i telh khawh ve caah an i lawm ngai.
1947 kum February 9 ni ah Buchoke AungSan cu Pinlung khua a phan. A phanh zan ah Lai mi aiawh in a rami mi pathum he i tonnak an ngei i biaruahṭinak an tuah.
Buchoke Aung San nih, “Mirang pawl nih an kan uk ruangah Kawl le Lai hi i theihthiamnak um loin sa le ral bantukin kan um.
Kawl mi le Lai mi cu Mongoloid miphun kan si bantukin pakhat le pakhat unau kan sinak ah dawte le remte in umṭinak caan a phanh cang caah i ṭhen khawh kan si lo. Hmunkhatte ah lungngete in kan um lai,” tiah biatakte in a ruah hna.
1947 kum February 11 ni ah Kawl, Kachin, Shan le Lai mi palai pawl vialte cu i tonnak an ngei ṭhan. Kawl ramchung ummi miphun vialte caah thantaar (tmvHawmf) tuah dingah lungtlinnak an ngei.
Buchoke Aung San nih Kawl ramchung ummi miphun dihlak luatnak (လွတ်လပ်ရေး) kan hmuh i Mirang kuttang in kan luat a si ahcun khua le ram ṭhanchonak ding le kan i uknak ningcang vialte fiangte in a chimh dih hna hnuah hmailei ah kan kalnak ding konglam zong a chimh dih hna.
Mah zan ah cun an dihlak lungrualte le thatho ngaiin i hawikomhnak ah zanriah an hmangṭi hna i nuam an ti cio.
1947 kum February 12 ni chun suimilam 11:00 ah Pinlung khua i an biaceihmi lungtlinnak roca chungah an ram le an miphun cio aiawh in minthutnak an ngei cio. Minthumi lakah Kawl miphun cungin Buchoke Aung San tel in aiawhtu 23 an si.
Lai mi aiawh in Tedim peng in Pu Thawng Za Khup, Falam peng in Pu Hlur Hmung le Hakha peng aiawh in Pu Kio Mang nih an min cu an thut.
1947 kum February 12 ni cu Kawl ramchung um miphunkip lungngete in Kawl rampi luatnak lak dingin lungtlinnak ni (Pi thawngsuh ni) tiah min an bunh i nihin a tu caan tiang Kawl ramchung um miphun zakip nih upat bikmi ni ah a cang i cozah zung vialte zong khar dih an si.
Pu Thawng Za Khup le Ram-uk le mi-uk dang vialte zong mah caan hramthawk cun an rian a dih cio ko nain Pu Thawng Za Khup cu Saizang khua ram-uk ah an thim ṭhan.
Kawl ramchung Democracy uknak phunglam in uk a run si hnu zongah No.10 Circle chairman ah ṭuanvo an run pek ṭhan i 1960 kum tiang khua le ram zohkhenhtu a rung si.
Pu Thawng Za Khup cu Falam siizungpi ah 1966 kum May 18 ni ah fanu 3 le fapa 3 tantak in hi vawleicung in a kal. A ruak cu a chuahnak Saizang khua ah linsa ngaiin an vui.
Hakha zong ah Lammin pek a si. A lam umnak cu Pyidawtha sang Pu Zung Ceu inn in Vankulh lam (Phungki sianginn pawng) ah a chuakmi lam kha Thawng Za Khup Lam tiah min pek a si. A tang Hmanthlak.
Pu Thawng Za Khup, Pu Hlur Hmung le Pu Kio Mang hna cu Hakha khuacuanhnak hmun ah a mui milem zong toh an i tim. A tang hmanthlak hi Milem tohnak caah an chiahmi a si.
CC:
Tedim BEHS No.1 Sianginn Golden Jubilee Magazine (1948-1998) p. 633.
Lairam mi langsar pawl le Pathian Kutneh mawizia. P. 281 - 283.
EmoticonEmoticon