Thlennak: 3 by Rev. Dr. Lal Pek Lian

==================

Kan ram te zong cu thlennak chung ah a hun kal ciahmah ve; election zong mizapi nih kan hun ngei kho ve rih lai. Thimfung meenan pe cio cang lai. Meepek a duh lomi zong nan um kho men; asinain khrihfa ṭha, rammi sinak a upatmi nih cun thimfung cu kan thlak ve hrim ding a si. Pastorte le phungki pawl meethlaknak nawl kan ngeih lo mi tu cu zeiti awk ṭha, kan ram policy a si ve i alnak nawl kan ngei lo. A ngaingai ti ahcun phungki pawl hi tuanbia le politics taktak cu thukpi in a theimi an si, cathiam zong an si i, an mifim bik bik tampi an um. Cun kan ram le miphun caah ka fimnak le thiamnak, ka pahrang le thazaang ka chuah ve lai, ti in hruaitu rian aa lak duhmi vialte zong upatnak kan in pek hna. Ceihcumnak tampi le lunghrinhnak tam lak te a um ko timi, nan hngalh bu tein nan min nan i pekmi a si caah uar nan um ngaingai ko.

Kawlram huap cun chim awk kan ngei kho lai lo, Laitlang Chinram huap in saduh thah kan chim ve a si ahcun: mitam deuh khrihfa kan si i Laitlang cu khrihfa ram a si tiah kan ti khawh ve bantukin; meekan thlak tikah Pathian politics (dawtnak, dinnak, thianhlimnak, le ngaithiamnak), Bawi Jesuh politics (biatak, dawtnak le daihnak) le Thiang Thlarau politics (fimchimhnak le biakhiah pinak) hna hi thukpi in kan ruah chih a herh. Meethlak tiang lawng hin kan rian aa lim lo; kan thlakmi hruaitu nih uknak rian a ṭuan tikah, a ṭuanpi tu, ṭuanvo a lakpi tu kan si chih ti hi philh hna hlah usih. Mirum bik, mifim bik, mi sifak bik le mihrut bik zong kan meetlak khawhnak kan tinco mi a zat cu pakhat cio a si i aa tluk dihmi kan si kha kan philh fawn hna lai lo. Thiang Thlarau he biakhiahnak ngei ve law na thimfung te kha Amah chiti rak thuhter ve te ko kun.

A cung cabia hi Rev. Dr. Lal Pek Lian nih A Facebook Time Line ah a tar mi (amah nawl onnakin) chung in tar chinmi a si.