CHIN KUMTHAR KONG 1 by Pu R. Hram Ceu, CACC Hall, 31. 10. 2020

 CHIN KUMTHAR KONG 1 by Pu R. Hram Ceu, CACC Hall, 31. 10. 2020 (A tang ah a chimmi Video le PDF in Download tuah khawhnak ding LINK ka chiah.

==========================

1.   Nihin “Chin Kumthar puai sunglawi Ni ah aatel kho mi ramchung ramleng nan zapi cung ah Chin Kumthar lawmhnak le thluachuahnak cu nan cung ah tlung ko seh.”

2.   Hi Kumthar puai Ni ah biachim nak caan sunglawi ka ngeih caah ka lawmh ning hi ka chim kho lo, zeicati ahcun Chin miphun kan Chin Kumthar atlau mi kha a rak chuah ṭhan caah kaa lunghmuih tuk i Chin Kumthar kong hi ka theih tawk tuanbia kha chim phuannak caan ṭha ka hmuh ca ah asi.

3.   Keimah cu Sakta khua chuak, Hakha khua sa mi, Atu lio ah Catholic Zaatlangbu (CSO- Caritas - Karuna Mission Social Solidarity ) KMSS- Hakha ah Finance Manager a ṭuan lio mi (Pu R. Hram Ceu) ka si. Chin Kumthar kong hi Chin mi vialte kan nunphung sunglawi asi i kan miphun a hmun zungzal nak caah abiapi tuk, aherh tuk, aa dawh tuk mi asi caah, donh hlei (stage) cung bia chim kel bantuk si lo in ka hmuh ton cia mi cungah ruahnak chuah le forhfial duh nak in ka rak chim lai caah, nan sia remlo ning in ka chim rel sual mi a um ahcun rak ka ruah piak thiam te uh tiah ahlankan in nawl kan duh hna.

4.   Kan kawlram cu Bochoh Aung San lam hruainak in 1947 ah Phunghram suai in 1948 ah luatnak kan hmuh. Democracy phung in a si caah, Chin miphun le Chin ram ca zongah ram uknak le nawl ngeih nak caah “Chin Ziza Council”  an rak um ve i thim mi le nawl ngei mi an rak si. Chin Kumthar kong ah 1949 March 17 ni ah “Chin Ziza Council” meeting ah abiapi tuk mi bia chahnak an tuah mi cu Chin miphun caah, abiapi tuk i asunglawi tuk caah an ṭial ning bak te in karak rel lai, ( Cahmai 14)

“ချင်းရေးရာကောင်စီမှ ရွေးချယ်ထားသော ကော်မတီ အဖွဲ့ ၏ ၁၉၄၉ ခုနှစ်၊ မတ်လ၊ ၁၇ရက်နေ့ နံနက် ၁၁ နာရီ အချိန်တွင်ကျင်းပ ပြုလုပ်သည့်အစည်းအဝေးမှတ်တမ်း၊”

အစည်းအဝေး ကို ချင်းရေးရာကောင်စီ သဘာပတိ ရုံးခန်းတွင် ကျင်းပရာ အောက်ပါ ပုဂ္ဂိုလ်များ တက်ရောက်ကြပါ ကြောင်း။

1.      ဦးဝမ္မသူးမောင်၊ ချင်းရေးရာဝန်ကြီး။

2.      ဦးဆာဝစ်၊ လက်ထောက်အတွင်းဝန်၊ ချင်း ရေးရာဝန်ကြီးဌါန၊

3.      ကက်ပတိန် မန်တုံးနုံး၊ ချင်းရေးရာ ပါလီမန်အတွင်းဝန်၊

4.      ဦးလျန်ထုမ်၊ သဘာပတိ၊ ချင်းရေးရာကောင်စီ၊

အစည်းအဝေးစလျင်စခြင်းချင်းရေးရာဌါန မှတင်ပြသော ချင်းဝိသေသတိုင်းတွင်ချင်းနှစ်သစ်ကူး နှင့်ပတ်သက် ၍ ပွဲနေ့များ ကိုပြည်သူ့ရုံးပိတ်ရက်အဖြစ်သတ်မှတ်ရေးကိစ္စ နှင့်ပတ်သက်၍ တရား ဌါနမှရရှိသော ၁၉၄၉ ခုနှစ်မတ်လ(ရ)ရက်နေ့ စွဲပါစာအမှတ်၊ ၂၈/ဂျေအက်(ဖ်)၄၉(၁၁၅)ကိုဆွေးနွေးပြီးလျှင် အောက်ပါအတိုင်းအများသဘောတူ ဆုံးဖြတ်ပါကြောင်။၊

(က) အောက်တိုဘာလ ၂၆ ရက်နေ့ မှ ၂၈ ရက်နေ့ အထိ ၃ ရက်ကို ( Kumthar) ကွမ်ထာရ် ခေါ် ချင်းအမျိုးသား နှစ်သစ်ကူးပွဲနေ့ ဟုခေါ်တွင်သတ်မှတ်ပေးရန်။ ကွမ်ထာရ် ဟု ခေါ်တွင်ရခြင်းကြောင်း နှင့် ရည်ရွယ်ချက်များ၊ ချင်းဝိသေသတိုင်းတွင် နှစ်စဉ် နှစ်တိုင်း ကောက်ပဲသီးနှံများကိုရိတ်သိမ်းပြီး၍ ကျေးရွာ တိုင်းရှိ ချင်းအမျိုးသားများသည် စားသောက်ပြီးလျှင် ထုံးတမ်းစဉ်လာ အရ ထိုနေ့ရက်များ တွင် နှစ်သစ်ကူးပွဲအထိမ်းအမှတ် အဖြစ်ဖြင့် ဆင်ယင် ကျင်းပကြပါသည်။

5.   Acung i karak rel bantuk in 1949 thok in Kumthar cu an rak tuah lengmang i October 26, 27, 28, ni 3 chung cu zungkhar arak si. Asinain Kan ram uknak cu Democracy phung si hmanh seh law, Miphun ngan pakhat nih tlang cung miphun tlawm deuh pawl kha, hloh dih duhnak thlaici kha 1956 ah (U Nu) ah an rak tuh mi cu, “Kawlram chungah Miphun pakhat lawng, Biaknak pakhat lawng, Holh pakhat lawng” siter an rak timh ruangah buainak arak i thok i nihin tiang asi ko. 1962 ah ralkap nih uk nak an lak tik ah 1964 kum thok in kumtin zungkhar ni October 26-28 rak tuah tawn mi Chin Kumthar puai cu October thlapa lai ni, kawl Tadincut he fonh in tuah siseh tiah an rak ti caah Chin kumthar cu atlau i zungkhar ni cu Kawl Tadincut zungkhar ni he an kan fonh piak cang caah mah ni ah, Khuado puai lawng pehzulh in an rak tuah khawh cang. Mah kong hi Pu Kim En Mang (Zipeng Hlun) nih 1951 kum chuah mi “Chin Ziza Council” bia chahmi record cauk, biahmaiṭhi ah atanglei bantuk in arak ṭial, abiapi tuk caah aning in karak rel ṭhan lai;

“တရံရောအခါ ရုံးပိတ်ရက်အတွက်ပြည်နယ်အတွင်း တစ် နှစ်လျှင်တစ်နိုင်ငံလုံး

2020 Chin Kumthar tuahnak

ဆိုင်ရာရုံး နှင့်အလုပ်ရုံများ ပိတ် ရက်များအပြင် ရှစ်ရက်ထိပင် အထူးခွင့်ရရှိဘူးကြောင်းတွေ့ရှိရသည်။ အထူးသဖြင့် ခွါဒိုပွဲကို နှစ်စဉ် အောက်တိုဘာ ၂၆ ရက်နေ့မှ ၂၈ ရက် နေ့အထိ ၃ ရက် ဆက်တိုက် ခံစား ခွင့်ရရှိခဲ့ရာမှ ၁၉၆၄ ခုနှစ်မှစ ၍ သီတင်းကျှတ်ပွဲ နှင့်တွဲပေး လိုက်ရခြင်းခံရသည်။ ခွါဒိုပွဲသည် တလင်းတက်ပွဲ (မိုးရာသီကောက်ရိတ်သိမ်းပြီးပွဲ) ချင်းနှစ်သစ်ကူးပွဲ ဖြစ်လေရာ နောင်လာနောက်သားများ အနေဖြင့်ယင်း ၃ ရက်များအတိုင်းပြန်လည် သတ်မှတ် လိုသော ဆန္ဒရှိ လိမ့်မည် ဟု ယုံကြည်ပါသည်။”

6.   Khuado puai hi Chin Kumthar asi ko ti nak alanghter leng ah Chin kumthar cu 1949 ah Chin vialte zulh ding ni sunglawi in kan pupa le nih an rak zaum cang nain, kan pengtlang phun cio hawih in akonglam hi keimah ka theih tawk te chim ka duh; Chin mi phun vialte nih kan sunlawi ter tuk mi kumkthat voikhat sunglawi bik in kan tuah tawn mi puai phunphun kan ngei cio dih i, kan min sak le kan tuah ning aadang cio nain amuru (အနှစ်သာရ) cu acunglei Kumthar puai hi arak si ko. 

Kan auh nak le kan tuah ning hna cu aadang cio;

(1)   Tidim nih “Khuado” an ti i sunglawi taktak in kum fatin nihin tiang an mah phun bu cio in an tuah.

(2)   Falam lei nih “Fang Er, /Dawngpui” an ti i sunglawi taktak in an tuah zungzal i atu ah “Kumthar” tiah min sak in an tuah nak hi kum 10 reng lo asi cang.

(3)   Mindat le Kanpalet lei nih “Kumci” an ti i kum fatin sunglawi in an tuah ve lengmang.

(4)   Palewa lei nih “Ta ai cha pawi” anti i kumtin sunglawi in antuah i atu kum fatin December Ni 1 ni ah sunglawi ngai in bukhat te in an tuah nak hi kum li/nga tluk asi cang.

(5)   Matupi lei nih “Kho tui” an timi hi July 15 ah an tuah i “Cang zom” antimi hi November 15 ah sunglawi in an tuah tawn.

(6)   Zotung nih “Tho/ Inn sua kae” an ti i Jan/ Feb ah an tuah.

(7)   Kanmah Hakha le Thantlang chung a um mi miphun pawl nih puai aphunphun kan ngei cio, kan minsak le kan tuah ning pawl adang nain, abiapi bik in tuah nak chan amuru cu Kumthar/ Kumvoi caan ah sunglawi ngai in tuah mi THO puai hi a rak si ko.

(a)    Lautu/Zophei/Mara nih Khua hna kai/ lam naichai/khua hna ke an ti.

(b)   Senthang nih Tha kau thu an ti.

(c)    Mi E le Khualsim nih Tho an ti i sunglawi tak le sullam ngei in kum tin an tuah.

(d)   Lai aa timi kan mah pawl nih Hlukhla/Hniang/kuut/ Tho tiin puai min phunphun an rak ngei ve i, Tho puai hi kumthar caan, thlaithar a zat caan ah abiapi bik in tuah mi a rak si tawn nain pehzulh in tuah ti lo in atlau nak asau ngai cang.

7.   Vawlei cung ram hruainak ah hin abiapi bik in; (1) Ram khel lei uknak (နိုင်ငံရေး) (2) Nuncan paw cawmnak (စီးပွါးရေး) (3) Zathlang nun phung (လူမှုရေး) hna an si i mah pa thum hi ram miphun caah hruaitu ṭha nih an kan hruai an ṭuan lawng ah kan ṭhangcho i ram mi kan ni nuam. Apa thum nak Zatlang nun phung kong hi acaan asi caah atam deuh in chim ka duh. Kan khua sak tintuk ning, Fim cawnak, ngandamnak, ca le holh, thilthuam, puai le lam, zanglek tbk hi tampi a um i, Chin miphun pawl nih khahlaan te in thlamtling te in miphun tling kan si nak kan langhter mi asi. Kum 70 chung Kan ram hruainak aṭhat lo tuk ruangah kan sifah a zual chin lengmang i kan nunphung kilven tharchuahnak zong ah kan chambau ngai. Keimah ka theih tawk, Chin Kumthar he pethlai in ka chim cang bantuk khan arak tlau mi kha anung ṭhan cang. Kumthar bantuk in, Nunphung pakhat asimi Kan thil thuam kong ah caimainak le sersiam nak tampi tuah ahau ve rih, Nu thilthuam cu chim hau lo in aṭhangcho tuk cang nain, abik in Chin papawl thilthuam le tawhrawlh kong ruah ahau ngai mi asi. 1973 ah “Angki angei lo miphun” tiah University Lai Siangngakchia Mekzain ah kan rak ṭial bal, post card ah kan rak chuah bal, Pa pawl Tawhrawlh kong ah 2003 kum ah ZNB nih 25.5.2003 meeting biachahnak 28/2003 ah, kan rak timh nain kan pehzulh kholo. (Muko Mekazin 2004 March thla ah “Lai pa le Tawhrawlh” tiah hmanthlak he kan rak ṭial bal cang) ZNB cawlcanghnak in 6.10.2004 Chin Kumthar kong ah Seminar ah paper kan chuahpi mi 2005 September chuahmi Muko mekazin ah “Lai Kumthar” tiah page 35 ah kan rak ṭial bal cang. Abik in “Lai Tho” in “Chin Kumthar” tiah ZNB Hakha Khuanupa nih kan rak cawlcangh nak hi tam deuh in chim ka duh.

(1)   2001 kum ah Rev. S. Van Hre nih Kan nunphung dawh sunglawi atlau lo nak caah Lai Tho tiah amah inn Dinlo sangah arak tuah. Mah thok cun Hakha Zatlang Nunphung bu ( Khua nu pa) hruainak in Chin mi vialte akan fumtom tu, Chin miphun zapi caah thluachuah hal Thlacam nak, le nunphung sunglawi kha tharchuah ding ah biatak te in kan ni hmaithlak i, pehzulh in sunglawi in tuah kan rak i zuam.

(2)   2002 Kum Oct ni 2 ni ah Khua hlun tleicia Pu Kio Mang inn ah kan rak tuah i Rev. Ral Uk nih Laimi phun zapi caah Thluachuah hal thla acam. Pu Lian kung, Rev. S Van Hre THO tinh mi kong bia chim nak an rak tuah. Lai Chang le lakphak ti vuai te in kan rak din i Lai Lam kan rak lam i a rak sunglawi ngai.

(3)   2003 Kum Khuathar sang nih ṭuanvo lak in pehzulh in Zatlang Nunphung Bu (ZNB) hruainak in rak tuah asi. ZNB hruaitu Rev. S. Van Hre nih mual akan liam tak caah Keimah (R. Hram Ceu 2003-2012) kha ZNB lutlai le Hakha khuanupa Chairman ah an rak ka fial caah. Abik in kan nunphung tharchuah hi karak i hmaithak tuk mi asi ve caah saduhthahnak le kan rak cawlcangh nak khatlawmpal chim chih ka duh.

(4)   2004 kum ah hin ZNB nih, acunglei kawlca in karak rel cang bantuk khan. Chin mi zapi nih kan mah duh cio sak mi min le tuah ningcang hi Kumthar in nunter awk le i hrawm khawh dih ding ah caihmai nak (seminar) voi hnih kan rak tuah.

(a)    Avoi khatnak, 6.10 2004 ni ah Zion Biak inn ah kan tuah i Hakha khua upa rinhtlak 51 an rak kai chun nitlak caihmai nak kan tuah. Mah ah cun Pu Taan ki nih THO athawh kehnak kong, Pu Chawn Kio nih THO tuah ning le Kumthar can asi ning, Keimah (Pu R.Hram Ceu) nih Tho hi Kumthar tiah amin thleng in tuah usih law Chin miphun funtom tu le nunphung tharchuah nak puai ngan pi zungkhar ni tiang in izuam ṭhan usih tiah Cathluan ( Paper) kan rak chuahpi. Hakha le Thantlang peng chung um mi miphun phun 8 ai awh in upa 8 nih THO le KUMTHAR kong an phun hawih in amin le tuah ning cang le ruahnak tam pi an rak chim cio leng ah meeting akai mi upa vialte zalong tein chimrelnak tampi arak um.

Mah ah cun thiahcia ning in

a)      Hakha Aiawh in Pu Hram Cem,

b)      Thantlang aiawh in Pu Hrang Tiam,

c)      Zokhua Aiawh nih Sayaci Boi Hu,

d)     Senthang Aiawh in Pu Ral Lian,

e)      Mi Ee Aiawh in Pu Nah Luai,

f)       Zophei ai awh in Pu Hre Mang,

g)      Mara Aiawh in Pastor Za Khar,

h)      Lautu aiawh in Pu Thein Hteih,

hna nih an mah phun le peng tlang cio in an tuah ning le asullam pawl fiang ngai in an chim cio. Chun nitlak nuam ngai in caihmai nak kan tuah nain kan tinhmi aphi kan chuah khawh lo caah;

(b)   Avoi 2 nak seminar caihmainak cu, 23.10.2004 ni Imanuel biak in ah kan tuah ṭhan. Chun nitlak zalong te in kan chim cio dih i adong nak vote kut thlir nak nih “LAI THO” tiah auh siseh timi nih atei caah 28.10.2004 ni Dawrthar sang tuah mi ah LAI THO tiah kan rak taar. ZNB Hakha Khua nupa nih Kumtin tuah siseh, Sang paruk kha kumkhat cio in athiah in i thiah i tuah siseh tiah biachahnak kan rak ngeih caah 2004 cu Dawrthar sang nih ṭuanvo alak hmasa bik i, Dinlo Rev. S. Van hre in ah kan rak tuah. Chin mi vialte caah thluachuah hal thlacam nak cu Rev. D. Ngun Thawng Mang nih akan cam piak i, Chin State Acozah lei in Chungtel Zehmuci Ohn Myint nih tha peknak bia chim nak akan ngei. Pu Hre Mang nih THO kong achim i, Roca pek nak, Hla saknak le laamnak sunglawi ngai in kan tuah i Dawrthar sang nih vok 2 in rawl sunglawi ngai in an kan dangh. Lai miphun vialte sinah Lai Forum le Rungcin hna ah kanrak taar cang. Puai tuah nak a Ni caan kong ah October thla pa Lai hi timh deuh mi asi caah ramdang kan fale pawl nih ramdang in calendar le thlapa lai cu kan theih khawh zungzal ṭung lai lo an ti caah aa naih bik can October 19,20, 21 hin siseh, mah mah ni hlan zarhkhat/mah hnu zarh khat chung ah kan umnak cio siarem ning in Acozah nih zungkhar an kan tuah piak hlan cu tuah si seh tiah bia chahnak kan rak ngei.

(5)      2005 Kum Pyidawtha sang nih 17.10.2005 SHS 3 ah sunglawi tak in an kan tuah piak i, Chin mi vialte caah thluachuah hal thla camnak cu Rev David Shwe nih akan cam piak, Chin Pine Acozah lei in Chungṭuan Lt. Col Ong Myin OO nih bia akan chimh. Roca peknak, Thilthuam hmuhsaknak, Laam le hla sak nak aphunphun, chuncaw Lai Chang ei cawk lo Pyidawtha sang inn kip nih an rak cuah pi, zanriah an kan dangh. Mah kum ah hin LAI KUMTHAR philh lonak caah Postcard kan rak chuah ramchung ramleng kan rak phawtzamh dih.

(6)      2006 Kum Dawr Hlun sang nih ṭuanvo lak in Carson Hall ah asunglawi chinchin in, chan tiluannning in kan fa le mino pawl nih lungtho taktak in an kan lawmh piak. Lai Chang ei cawk lo in innkip nih an rak chuahpi. DVD zong in kan tuah nak nan rak hmuh cio ko lai dah.

(7)      2007 Kum Cawbuk sang CCU ah kan tuah. Lai chang cu innkip nih ei cawk lo an rak chuahpi ṭhaimṭhiam. CM Pu Hung Ngai nih thapek nak bia akan chimh Rev. Dr. Hlah Aung nih Thluachuah hal thla akan cam piak. Kan tuah kel in sunglawi tak in kan tuah khawh.

(8)      2008 kum Khuahlun SMS siang inn ah kan tuah, Acozah lei upa thapek nak in sunglawi te in tuah kel in kan tuah khawh ṭhiamṭhiam, Paih kan tuah hnik nain ruahpi asur i kan tlawlh.

(9)      2009 kum cu, Khuathar sang nih SHS 2, Cawnbik hall ah 21.10.2009 ni ah sunglawi taktak in kan tuah piak, ZNB nih tuah ding in kan va sawm hna lio ah a har ngai nain puai kan tuah taktak tik ahcun Chang ei cawk lo Rawl dum ṭi nak le CM Pu Hung Ngai tha pek bia chim nak, le thluachuah hal thlacam nak, roca pek nak, Laam le kan fale aw ṭhaṭha nih ram hla dawh phunphun sak piak nak le Lai Paih zuamnak zong sunglawi tak in kan tuah khawh.

(10)  2010 kum cu sangkip atling cang caah kum hra tlin nak kha Carson hall ah kan tuah. Kumhra tlinnak asi caah, Carson Hall ah zapi fonh in kan tuah, Thluachuah hal thlacam nak biachim nak laam le hla, roca peknak, Lai nunphung rawl sathluak in sunglawi in kan rak tuah. Kum fatin mah ning cun pehzulh in kan rak tuah leng mang i atu cu kum 20 nak asi cang. Lai Kumthar (THO) tiah hman ti lo in “Chin Kumthar ( Tho)” tiah kan rak hman cang.

8.   Hakha khualipi ah ZNB le khuanupa nih Chin Kumthar cu sangkip thiah in kum 6 chung pehzulh in kan tuah khawhnak, kan hlaawh atlin nak bik a muru cu uknak lei sang khuabawi tlangpi pawl nih lungtho tein nunphung tharchuahnak le mi phun dawtnak in zuam pinak in tuah asi caah an mah thawng in sunglawi, pehzulh in kan tuah khawh nak asi. Inn kip nih Lai Chang fun an ni harh lo ning kan hmuh tik ah minung hi miphun dawtnak hi kan rak ngei dih ko, hruaitu ṭha zumhtlak nih miphun dawtnak in lam hruai aherh tuk timi hi kan ni fiang ngai. Asinain Hakha khua chungah tuah kho hmanh usi law uknak lei khuate le khua kip nih rak tuah cio ding ah tampi theihthiam le izuam ahau rih. Atu thim lai asi bantuk in miphun adaw taktak mi nunphung sunlawi ter mi nih an kan hruai i acozah zung khar ni thum official te in aran nak in kan hmuh khawh ahcun “Chin Kumthar” cu vawlei cung vanrang tawi ah a um mi Chin mi vialte nih sullam ngei le sunglawi tak in ka tuah khawh ve hrim hrim lai tiah ka zumh ko. Hmailei zong ah Chin ram uktu lu bik thok in sang le veng, oksuh khua bawi khuate khua bawi tiang in tha pek nak a um hrimhrim kan herh ko lai.

9.   Chin Kumthar kumtin Chin mi vialte nih kan umnak cio ahcun sunglawi, sullam ngei in kan tuah thawng in donkhan tu a um lo lengah pupa chan in anrak tuah tawn mi atlau mi kha kan tharchuah asi leng ah, miphun tling pakhat kan sinak le aṭhat nak lei tampi kha atanglei bantuk in kan hmuh khawh;

(1)      Kan pupa nih an tuah tawn mi an sunlawi termi aherhnak le timh mi a muru kha kan philh lo i kan tharchuah kan zulh kha asi.

(2)      Khuakip hmun kip ah kan rak tuah cio thawng in Chin mi vialte lungnget nak le dawtnak ipehtlaih nak kha a fehter lai.

(3)      Biaknak lei in hlaanlio kan ruah sualmi nunphung ning in Kan biak mi Pathain kha thangṭhat khawh asi ko kha chantiluan ningin Pathian biak thluachuah hal kha kan thleidan khawh lai.

(4)      Kan nunphung puai ni, nisunglawi asi mi Kumthar caan ah kan biaknak ning cio in kan Pathian nih akan thluachuahnak caah biaknak le thlacamnak kha a sullam ngei in hmun khat in kan tuah khawh lai.

(5)      Kumthar caan le puai sunglawi asi bantuk in kum hlun chung i kan nun ning le tuahsernak ṭha lo mi kha hlawt le remh tharchuahnak caan ah kan hman khawh.

(6)      Hi kumthar caan ah hin Chin miphun paoh nih khua zei ka kan um hmanh ah Chin miphun nunphung philh lo nak caah puai le thlacamnak kan rak tuahcio thawng in miphun dawtnak le lungngetnak le i hmuhton nak thawng in itheihthiam nak kha akarh chinchin lai.

(7)      Hi kumthar can ah khuapi in maw, sang in maw, miphun huap in maw, Hawi kawm dawt mi rual he maw, mah cingla rualchan phun chung cio in maw, Innpa chakthlang inn chungkhar cio in maw, pumhnak, rawldumṭi nak le mah le siaremnak phun adangdang cio in hawi komhnak kha kan tuah thawng in dawtnak le zumhnak pehtlaihnak kha akarh ter chinchin lai.

(8)      Kumthar caan ah puai kan tuah lai ti intimhtuahnak hmuhton nak, khua khan nak kan tuah thawng in Thluachuah phawrtu le, kan sipuaizi pum cawmnak caah zuam duh deuhnak lungthin le miphun dang i an tuahser ning zong kha aṭha mi pawl kha kan i lak khawh ve lai i kum khat hnu kum khat asunglawi deuh le aṭha deuh in zuamnak lungthin kan ngei lai,

(9)      Kan nunphung puai kha sullam ngei le sunglawi ngai in kan tuah khawh ahcun miphun dang pawl zong nih upatnak ṭihzahnak an kan ngeih deuh lai.

(10)  Hi Kumthar puai can ah biaknakbu le zumhnak idang cio hmanh usilaw Chin mi phun khat laitlai thisa khat kan rak si ve ko caah hmun khat in thlacam ṭi le puai kan tuah ṭi nak asi lai caah itheihthiam nak akan ngeih ter chin lengmang lai.

(11)  Kan cunglei upa lam hruainak lei zong in kan nunphung ca le kan miphun caah atam deuh in zonruahnak le bawmhchanh nak a um kho deuh lai.

(12)  Hi tin kan tuah thawng in vawlei cung khuazei ram kan um zongah vawlei adongh tiang Chin miphun kan lohthlau lonak caah akan hmunh ter zungzal tu asi lai.

10. Zeitindah kan tuah cio lai ti mi he pehtlai in Ram chungah uknak lei hruaitu, nawl ngei pawl nih kan miphun caah abiapi tuk mi puai asi kha sunglawi taktak in kumtin tuah usih timi khuakip peng kip ah tlang au in rak tuah cio ding forhfialnak cu abiapi taktak, Ram leng ahcun kanmah Chin miphun kan umnak cio ah hruaitu pawl nih kum khat voikhat kan Kumthar cu thluachuah hal thla camnak le hmunkhat i hmuh tonnak nuam te in eidin ṭinak cu tuah cio aherh ngaingai, ahmun, a caan le kan si can ning le kan miphun cio huap in zalong te in tuaktan in khahlan i Chin Miphun paoh nih kan sunlawi ter tuk mi nunphung puai an rak tuah tawn cio mi miphun dawtnak, asunlawinak a muru kha cu philh lo in kumkhat voikhat cu sunglawi tak in tuah khawh cu aherh ngaingai ko.

(1)   Kumthar cu Chin Miphun vialte lungnge tein, zungkhar ni 3 asi te cang lai caah Chin Kumthar puai ni caah hin chungkhar cingla iton caan, inuamh ṭi caan, thluachuah hal thlacam caan ah hmang hna usih. Ramchung ramleng, Khuapi khuate um mi, rualchan cingla, unau, dawtmi hawi kawm, itong hna usih. Nuamte in puai hmang ṭi hna usih.

(2)   Kan KUMTHAR caan ah Kum hlun athurhnawm mi innchung, inn leng, khuachung lam le sul pawl, thenh hlemh le thianter nak tuah hna usih.

(3)   Kum hlun chung i kan ni lunghmuih lo mi kan lungthin ziaza ṭha lo mi pawl a um ahcun i ngaihchih nak le iremnak ingaihthiamnak ni ah hmang hna usih.

(4)   Kumthar puai zeitin dah can kan hman lai tiah hmuitinhnak ahlankan te in phaisa in maw, thliri in maw, timh tuah chungnak ngei kho hna usih. Zauk phung tlamtling in ka si ahcun, kan khuasak sican aṭha deuh cang lai, miphun dawtnak taktak angei mi nih an kan hruai cang lai, lam le sul, pehtlaihnak aphunphun a ṭha deuh cang lai i khua pakhat ah keimah nih kumthar ka dong lai, khua caah thluachuah hal kumthar puai cu ṭuanvo ka lak lai tiah sican ṭha deuh mi nih dawtnak in an rak titawn bantuk in ati mi an um lai, Laimi nih kan nunziadawh asi mi khuami zapi dodangh duhnak lungput cu kan ngeih dih ko caah atikho mi nih acuh hmanh in anrak i cuh te lai. Khua pakhat sang pakhat dodanghnak caah vok pakhat le facang tun hnih/thum cu kan kumvawi aṭhat caah maw, ramdang fanau le thluachuah nak thawng in maw, atuah kho mi an har lai lo. Inn kip nih Lai chang fun kan ni fawih tuk, puai ca le mah innpa rualchan hawikawm he eidin tti ding ah kan sican cio ning in zalh le tuah khawh tuk mi asi. Cung Pathian sin thluacuah hal thangṭhat caan asi bantuk in, Kan hmet lio kan nunphung puai le kumthar puai cu kan rak ingaih tuk tawn bantuk caan kan phaan te ko lai.

(5)   Ramchung ramleng Chin miphun khua zei hmun kan um zong ah uknak lei hruaitu nih maw, biaknak lei hruaitu nih maw, Zatlang phu nih maw, kan phunchung upabik nih maw, thawngthanh nak le forhfialnak le lamhruai nak tuah izuam hna usih.

(6)   Kan biak mi cung Pathian sin ah kan miphun caah thluachuah hal thlacamnak ah hmang hna usih.Thangṭhat lawmh nak Roca pek nak can ah hmang hna usih.

(7)   Eidinnak le nuamhaih nak pawl cu kan mah le kan ti khawh tawk cio in ahmun le acaan zoh in tuah cio ko hna usih. Asi khawh ah cun kan Chin rawl phunphun, thilthuam phunphun, zaanglek zuamnak phunphun zong hman khawh nak izuam usih. Aniam bik ah Lai chang cu itel kho peng seh, sathluak, sabuti, fashion, Paih, laam aphunphun, hla sak nak, pawl kha kan si khawh chung in tuah izuam usih.

11. Cucaahcun, Vanrangtoi um Chin miphun vialte nih Chin Kumthar puai kan tuah cio thawng in kan miphun, kan biaknak, kan ca le holh hloh an kan timh mi kha kan tei lai i kan miphun tlaulo nak caah abia pi tuk mi asunglawi tuk mi kan puai nganpi anung zungzal mi asi lai. Chin Kumthar cu, Chungkhar in maw, rualchan hawih in maw, sanghawih in maw, Khuapi in maw, biaknak bu in maw, Zatlang bu in maw, pawngkam hawikawm tel in maw, kumtin tuah khawh izuam cang usih tiah forh kanduh hna.

12. Kan MP thar le Chin ram Acozah thar nih zungkhar nithum cu arannak in kan zuam piak ko cang u, Thim thar mi MP le khuakip khua bawi thim thar mi uktu pawl zong nih Chin mi kan thawhkeh ka te in kan nunphung sunglawi Kumthar cu sunglawi taktak in hman zungzal khawh cang ding ah izuam dih canghna usih tiah nawl kan duh hna.

Ka lawm.

Pu. R. Hram

PDF in lak a duhmi caah Hika hi click khawh a si.

Video in a chimmi ngaih na duh ahcun a tang hi a si. 

Advertisement