Vawlei Thar: 3 (Rev. Dr. Lal Pek Lian Thazaang peknak)

Vawlei Thar: 3

===========

Kan Baibal chungah “Pathian nih vawlei hi a dawt hringhran caah a fapa ngeihchun te kha a pek, cucaah amah a zummi paoh cu zungzal nunnak an ngei lai,” (Johan 3:16) tiah a kan cawnpiak. Satan nih hin vawlei hi ka ta a si tiah aa ruah i vawlei pennak vialte zong hi keimah kut ah a ummi a si ti in aa ruah; vawlei hi ka duh paoh in ka lawrlamnak hmun a si ti phun te in a lung kalning cu si kaw kan Bawipa Jesuh Khrih hmanh kha “Na kuk i bil law ka bia, hi vawlei thilri, pennak, le rumra ngeihnak vialte kan pek lai,” a rak ti bal ve kha. Pathian nih vawlei thar nunzia kha a fapa Jesuh Khrih in a hun kan sersiampiak. Daihnak, dawtnak, le dinnak in a khatmi vawlei thar kha a thisen in a kan serpiak. Cu a vawlei thar chungah cun mi vialte, miphun vialte a kan tlumter dih, sermi thilnung vialte zong an i tlum dih. Lawmhnak in a khatmi hmun a si.

Satan nih sualnak in a rak thuamhmi vawlei cu Khrih thisen nih a ṭawl; ruahchannak thar chungah a kan luhpi. Khrih a zum i ka sualnak ka ngaithiam tiah ngaihthiam a halmi hna nih Khrih khamh lawmhnak cu an co i an nunning hlun (vawlei hlun) kha a lo i nunning thar (vawlei thar nunzia) ah kal hram, nun hram an i thawk. Vawlei thar le van thar tlamtling tein an hun kal ṭi hlan chung (Biathlam biaphuan a tlin dih cikcek tiang) cu Satan ṭhawnnak a pelpawi a taang rihmi nih harnak le fahnak phunkip cu a kan pek khawh cuahmah rih ko lai. Asinain ṭih ding a si lo, Jesuh Khrih nih cu vialte cu a tei dih cangmi an si i Khrih i zohchih in a kalmi, Thiang Thlarau lamhruainak aa bochanmi nih cun Satan tukforhnak cu tei khawh a si. Paul nih cun hi vawlei kalning in kal ve hlah u, vawlei he hin i ṭom hlah u tiah ralrinnak a kan pek (cf. Rom 12:1-2).

Hi Cabia cu Rev. Dr. Lal Pek Lian nih thazaang peknak ah a ṭialmi a si. Rev. Dr. Lal Pek Lian cu a tu lio ah Immanuel Baptist Church, Hakha ah Lutlai Pastor a ṭuan lio mi a si.