Blue December: 2 (Rev. Dr. Lal Pek Lian Thazaang peknak)

Blue December: 2

Ngaihchiatnak Christmas timi blue Christmas ti cu hlacuang zong ah kan rel khawh, kan sak khawh i blue December timi belte hi cu an hman bal ve men ko lai nain ka rel bal lo; tulio kan sining le boruak he aa tlakmi a si tiah ka ruah caah a thla ningpi in blue December tiah biafang ka hun hmannak a si. Voi dang tawn i nuamhnak le lawmhnak he kan hmanmi Christmas thla kha kan caah a si kho ti lo i kan ngaihchiatnak kha Jesuh sin kan ṭhumhnak, Jesuh kan theihternak caah blue December tiah ka hun auhnak a si. Bawipa nih a kan mawhchiat lai lo tiah ruahchannak ka ngei ko, dinnak caah a luangmi mitthli he Christmas kan donnak a si caah sullam thar zong a ngei kho ve te ko lai.

Israel mi nih an sunsak bikmi puai cu Lanhtak Puai (Passover Feast) hi a si. Hrelh lo in kum fatin nan tuah lai tiah Moses sin in Pathian nih nawl a pekmi hna a si. Tlawlh lo bak ding a simi kha an tuanbia kan rel tik ah an rak tlawlh bal; an Cathiang (Phungbia Cauk) kha biakinn chungah an fim i an rel ti lo; siangpahrang Josiah le tlangbawi ngan Hilkiah nih biakinn remh le thianh an fial hna i an thianh lio ah Phungbia Cauk cu an va hmuh, an rel ṭhan tikah Lanhtak Puai an rak ulh lo, an tuah lo kha an i hngal (2 Siang. 22:1-20). Anmah daithlan le sining an rak i philh pah ruangah a si. Asinain kannih nih atu lio i kan tonmi blue December hi cu kanmah daithlan le tlawlh ruangah Christmas tuah kan tlawlh cu a si ruam lo. Siningpi nih a kan phakpi, a kan tonpi i kan tuar bia tu a si, asinain hla phuahtu nih ka thlarau caah an ṭha dih ko (it is well with my soul) a ti khawhmi hun ruah ahcun blue December le blue Christmas hi kan tuanbia ah kan chim ve te ding cu an si ko lai.

Hi Cabia cu Rev. Dr. Lal Pek Lian nih thazaang peknak ah a ṭialmi a si. Rev. Dr. Lal Pek Lian cu a tu lio ah Immanuel Baptist Church, Hakha ah Lutlai Pastor a ṭuan lio mi a si.

<<< Blue December : 1 <<<

>>> Blue December: 3 >>>