Blue December: 1 (Rev. Dr. Lal Pek Lian Thazaang peknak)

Blue December: 1

Christmas thla, December kan phak ahhin cun lungthin aa hliphlau i ruahchannak he kan mithmai a panh tawn. Ngakchia le mino nih laksawng hmuhlai kan i ngaih, nu le pa nih fale caah thilthar kan cawkpiak caan sunglawi a si. Lunglennak a um pah len hmanh ah daihnak le lungthawhnak kan ngei i Christmas hla le phaizawng par hna nih lungthin cawlcanghnak tete an kan pek khawh. Dawr ngei vialte zong thil an manh bik lio caan, an rawlṭuan caan a si i i manh lo ngai in an cawlcangh caan a si ve. Khuate lei tlawn awk a ngeimi nih an khua ah an tlung hna, nuamhnak phun hi chim cawk lo an si. Chin miphun nih kokek puai sunglawi kan ngei kho tuk lo i Christmas, Kumthar, le Thawhṭhan hi kan puai nganpi an si hna i Christmas hi a sunglawi bik in kan hmanmi a si. Kan miphun, kan fingtlang caah a nuammi white Christmas taktak a rak si zungzal. Nikum covid-19 pulrai ruangah nuamsul in Christmas kan hmang kho lo nain thachia tukin kan um hna lo. Kan khua, fingtlang hna le biakinn hna nih cun Christmas kha thanuam lungtho tein an kan don piak ko.

Asinain tukum cu blue Christmas timi ngaihchiatnak mitthli he kan hmanmi Christmas a hung si ai! Khrih chuah ni i kan sunsakmi December 25 ni lawng kha blue Christmas a si ee tiah kan ti lai lo, a thla ningpi in blue December, ngaihchiatnak mitthli a luan thla ti in au usih law a dik bik men ko lai. Naomi le Ruth kha Bethlehem i an rak kir ah khan theih-hngalh cheu khat nih Naomi na si lo maw? tiah an hun zuanhnawh i an don ah khan Naomi ka ti hlah u Mara (a sullam cu a khaa tinak a si) tiah ka au u a rak ti hna (Ruth 1:19-21). Tukum Christmas thla cu Mara tiah auh phu te a si ve, kan caah a nuam kho lo, a khaa ve taktak ko. Mittlam ah a cuangmi an tam i thinlung ah a hung langmi le tuarmi a chah tuk lio a si. Hi lio caan thengte zong ahhin kan fahnak tuar ding in a rami Bawi Khrih nih kan ngaihchiatnak mitthli vialte kan hnawhpiak sehlaw, ruahchannak thar kan pe hram ko sawh seh. Blue December ahhin Khrih he harnak kan lonh ṭi hna lai, a khaami kha kan nunsamhnak in tei khawh kan i zuam hna lai. Nunhrawmhnak le nunsamhnak in blue December hi a thla ningpi in kan hman cio hna lai.

Hi Cabia cu Rev. Dr. Lal Pek Lian nih thazaang peknak ah a ṭialmi a si. Rev. Dr. Lal Pek Lian cu a tu lio ah Immanuel Baptist Church, Hakha ah Lutlai Pastor a ṭuan lio mi a si.

>>> Blue December : 2 >>>