Vawlei Thar: 5 (Rev. Dr. Lal Pek Lian Thazaang peknak)

Vawlei Thar: 5

============

Lot le a chungkhar kha vanmi nih khualipi kangh-uhnak chungin an zampi hna, vanmi nih nan hnulei nan i mer lai lo tiah bia an riahmi kha Lot nupi nih a ngai lo i cite tung ah aa cang, timi tuanbia hi Genesis ah tling deuh in rel khawh a si. A tuanbia kalning ahhin mitthitnak in Lot nupi nih hei zoh sehlaw, zaangram tuk sehlaw a dawh; tuchan mit in cuanh ahcun a mawhlo van ti awk te khi a si ve. Atu lio kannih kan tonmi kangh-uhnak cu Pathian dantatnak ruangah a si lo i lungfah tuk awk, zaangram tuk awk a si hrim ko; vuivai len awk hmanh khi a si ko nain Thantlang, Rialti, Thlanrawn, Ṭaal, le Hakha i inn kang a tongmi hna nih an vuivainak bia kan thei hrim lo. Lot nupi bantukin hnulei aa mermi an um bak lo. Pathian zong an mawhchiat lo, Jesuh Khrih kha lam kan hruai ko, kan kaltaak hlah ti tu in thlacamnak in an nun an ap.

2015 July thla kha philh awk a ṭha lo. Laitlang, a bik in Hakha khua ah mincimhnak, hartonnak nganpi kan rak tuar. Thil a can dih hnu ah profet biaphuan phun in Pathian dantatnak a si tiah a rak chimmi kan phungchimtu cheukhat zong an rak chuak i ningzak taktak khi kan rak si, kha bantukin bia a chimmi kha an i ngaichih taktak cang ko rua, tutan kangh-uhnak, miphun nih kan tuar ahhin cu bantuk profet biaphuan phun cu a hun um lem lo ti awk a si i thlarau lei le zumhnak lei ah kan fim deuh, nutling patling kan hun si deuh tinak a si. Fawi tuk in biaphuan kan hman tawnmi hi Baibal kan rel taktak lo le Khrih dawtnak nih kan nun a ciah lo bia tu a rak si deuh tawn. Mah duhning paoh in thlacam a hmangmi, thinlung cawlcanghnak paoh Thiang Thlarau rianṭuannak a si tiah a puhmi kan si tawn, hihi kan i ralrin taktak ding a si. Khrih nih a rak i putmi vawlei thar nunzia ah cun thla kan cam tik ah Pathian duhnak tu kawl hmasat a si, Pathian nih bia a kan ruah hmasa; kanmah nih kan duh paoh in bia kan ruah hmasa lo, kan diriamhnak in Pathian kan bia lo. Fawite hlek in hihi khakha tiah kan tonmi hna hi Pathian dantatnak a si tiah kan chim lo. Khrih vel a ngan tukmi nih a kan umpi, misual a kan pomhlawm i kangh-uhnak kan ton hmanh ah vuivai lo tein a kan umter kan ti. Lot nupi bantukin kan hnulei kan i mer lo, van lei ah kan mitthli he Dingthlu Lairel Pathian tu kan zoh.

Hi Cabia cu Rev. Dr. Lal Pek Lian nih thazaang peknak ah a ṭialmi a si. Rev. Dr. Lal Pek Lian cu a tu lio ah Immanuel Baptist Church, Hakha ah Lutlai Pastor a ṭuan lio mi a si.