Bawi Jesuh cu Pathian le Minung kan i chawnhnak Vancung Telifon a si!
Nihin aho kan tak he hmanh aa tthen lo bikmi cu Telifon a si. Aho nih dah hi telifon a ser ti bel cu kan ruat bel tuk lai lo dah.
Telifon hi 1876 kum ah kum 29 tlangvalpa Alexander Graham Bell nih a rak ser. A ser kum bak ah a ser chan, a dawt bik a nungak, Mabel Gardiner Hubbard a tthit beh. Zeidah telifon ser le nupi tthit cu aa sai kan ti men lai. A taktak ah cun hi thil sunglawi a sernak hrampi hi dawtnak a si kan ti khawh.
Alexander Gramham Bell cu 1847 kum ah Scotland ram Edinburg khua ah a chuak. A ule pahnih hi TB in an thi i Bell zong hi a nung ding si lo, tiah sibawi nih an ti. Cucaah an fapa hniang nundamnak caah khuati a ttha deuh an tinak, Canada ram ah a nu le a pa nih an tthialpi. Cuticun a hung dam i America ah hnachet cachimtu a hung si. Boston Sianghleirun cachim tiang a hung si.
Sianghleirun sayapi nih cun ca a chimhmi a siangngakchia nu te Mabel a duh ai. Hnachet tthit lai cu tiin a nu le a pa nih an khen len nain khen awk ttha an si lo. A dawt bik Mabel nih zeitindah dawtnak bia ka ruahmi a theih khawh lai tiin chawnh khawhnak thilri ser cu aa hruhpi caah mi nih a hrut cang tiin Bell Mimolhpa (Crazy Bell) an ti i cucu nihin tiang a min bantuk ah a cang lan. 1876 kum ah dawtmi ruangah aa hruhpimi thilri ser a hlawh a vun tling. Aa lawm tuk i Mabel cu a tthit beh. Cu thilri te cu “a lang aw” telifon an hun ti.
Dawtnak bianem a phai tti kho ballomi hna mah kut chuak telifon tein dawtnak bia an vun phai ahcun an hnangam tthat cu chim awk ttha hlah. Mabel zong cu Bell min pu in Mabel Bell tiah hun theihmi, a hmasa bik telifon compani haotu (President) a si. Telifon kan chawnh tik i “Hello” kan timi hmanh hi Bell nih a dawt bik Hubbard a auhnak, a hmasa bik telifon chung biafang a si an ti. (Nain dictionary tam deuh nih cun Thomas Edison hman hmasa bikmi si, an ti)
Pathian cu telephone sertu a si. Minung cu biatak a thei kho lomi hnachet kan si. Minung ah a cangmi Jesuh Khrih cu Pathian he kan i chawnhnak kan telifon a si. Jesuh in Pathian dawtnak biatak kan theih.
An vale he i thitumnak thawngin kan nupi le nih ka pale kha “ka pa” an ti khawh ve hna i an vale nu le pa inn ah an um khawh i an va pale ro an co khawh bantukin vawlei ah thlahmi Bawi Jesuh he i thit, i um, i pehtlaihnak thawng lawngin Pathian rocotu kan si kho, a van inn ah um khawhnak kan ngei i “Abba ka Pa” tiah ka auh khawh. Cucaah:
- Bawi Jesuh cu Pathian dawtnak aw kan theih khawhnak Telifon a si. Pathian he chawnhnak telifon lawng hlah:
- Hmuh khawh lomi Pathian sining kan hmuh khawhnak kan mithmaan zong a si.
- “Keimah a ka hmumi paoh nih ka Pa an hmuh.” (Jn 14:9)
- Pathian sin kan kai khawhnak ding caah vancung le vawlei kar donhmi kan van kainak hlei zong a si.
- “Van aa hun i mi fapa cungin vanmi an ttum an kai nan hmuh lai.” (Jn 1:51).
Asinain cu tluk a sunglawimi Vancung telifon nakin vawlei telifon tu hna he kaa pehtlai deuh tawn.
Zing kaa hlauh sinin Pathian he chawnhnak vancung Telifon Jesuh he i pehtlaih ta loin vawlei telifon tu ka mit hnuai pah in ka dap deuh tawn!
Chun nitlak ka umkalnak ah Vancung Telifon Jeuh ka sinah um maw ti cu ka ruat lem lo nain vawlei telifon ka philh ahcun thatlung loin ka um i ka kir hnawh len tawn!
Kan ih lai ah vancung telifon Jesuh he a thukmi chunglei pehtlaihnak caah a bia rel lo le ka zanmang zong ah man ning tiah a aw thlum ngai ta loin ka caah santlai theng lomi vawlei telifon chung thil sawhsawh men tu caan tlau in ka mitkuh hmanh vuai loin ka bih ka hoi tawn!
A poi tuk! A poi tuk! A poi tuk!
A poi tuk! A poi tuk! A poi tuk!
Andrew Bonar:
- Zingka kaa hlauh bakin Bawipa he tonnak caah ka khuk nih zeltuang a tongh hlan, zeihmanh ka tawng lai lo.
- Zingka kaa hlauh sinin ka mit nih Bawipa Bia a rel i ka hna nih Bawipa aw a theih hlan, zeihmanh ka zoh lai lo, zeihmanh ka ngai lai lo.
- Zingka kaa hlauh le caangka ka lei nih Bawipa a chawnh hlan zeihmanh ka kaa nih a chim lai lo.
Advertisement
EmoticonEmoticon