“A dawtmi hna vawlei ahhin remnak um ko seh” (Luke 2:14)Kan Bawipa a hrin zaan ah vancungmi nih, “A sang bik van ah khin Pathian cu sunparnak hmu ko seh, cun a dawtmi hna vawlei ahhin remnak um ko seh,” tiah an ti. Amah cu daihnak Bawi a si. Cucaah Amah kan nunnak chungah a um tikah daihnak kan ngei kho. “Zumhnak thawngin thiam coter kan si caah kan Bawipa Jesuh Khrih thawng in Pathian he kan i rem,” a ti (Rom 5:1).
Thinghmui zawtnak a ngeimi lak ah rian a ttuantu missionary pa nih thinghmui zawtnak a ngeimi pa cung ah khuaruahhar Bawipa rian a ttuannak kong hitihin a chim. Baibal chungah thinghmui zawtnak cu pumsa in zawtnak lawng si lo in sualnak he a tahchunh. Cu zawtnak nih cun pumsa cheu te hna a ei dih i cu zawtnak a ingmi hna cu, hnar, hnakhaw, kutdong, kedong te hna a bul dih. A cheu cu zawtnak nih an taksa cu minung lo ti lo in a merh dih hna. Zawtnak lakah a chiabik, minung fihmi, thleimi an si.
Missionary pa nih a chimmi cu, cu thinghmui zawtnak a ngeimi zohkhenhnak le thlopnak hmun ahcun voikhat a pum cheu deng thinghmui zawtnak nih a ei cangmi, zoh ah minung hmanh a lo ti lomi mipa pakhat a ra a ti. Cu pa cu missionary pa nih a zawtnak lawng si lo in a thlarau nunnak cu muihnak nih a khuh kha a hmuh. Cu pa cu a pumsa bawmh ding caah a ra. Missionary pa nih ahohmanh tongh duh lo pa, dawtu a ngeihnak kong a chimh. Cu tik ah mizaw pa nih, “Kei cu ka ti a hal i ti din awk ah zapi dinmi tikhor ah ka kal zong ah ka ding kho lo. Mi nih an ka naih tik ah ka kut in ka kaa kaaphih i, ka thiang lo, ka thiang lo, ti in ka ttap. Ka dawtbikmi ka chungkhar zong he ka ittti kho lo i an sin zong ah rawl ka ei kho lo,” a ti.
Cu tikah missionary pa nih, “Nangmah an tawng ngammi mipakhat ka theih. Cucu Jesuh a si. Amah nih an dawt tuk,” tiah a ti.Missionary pa nih daihnak bawi, misual a kan khamhtu Jesuh Khrih thawngttha a chimh. Khuaruahhar in a thinghmui zawtnak a dam i Khrih ah nunnak thar a hmuh tiah a chim. A kum a hung upat deuh tikah anmah holh tein, “Hi nak in a ttha deuhmi hmun a um” timi hla a sak tawn mi ka theih tiah missionary pa nih cun a chim.
Dawtmi u le nau hna, cu bantuk daihnak le nunnak cu kan caah a chuakmi “Daihnak Bawi” nih a tuah khawh ve. Cucu kan ruahchannak a ngan bik a si. Christmas lawmhnak, daihnak, hnangamnak nan cung ah tlung ko seh.
Pu Din Lian Thlarau thazaang chung in lakmi a si (Amah hnatlaknak in)
Advertisement
EmoticonEmoticon