- 13.8.1942 ah Thantlang peng Khuabung khua ah a chuak.
Khuabung Primary school, Hriphi middle school, Khuabung private middle
school le Hakha State High School ah ca a cawng.
- 1960 ah Matric a awng
- 1960-61 Khuabung private middle school ah sayaci a ṭuan
- 1961-62 in Rangoon University a kai i 1965 ah B.A a
awng
- 1967 January in Trade Deparment ah a lut i in Bogale
Township trade, Hakha township trade ah manager a ṭuan 1976 in 1982 tiang
Chin State Trade manager a ṭuan.
- 1974 Election ah Hakha Township Commission member ka ṭuan.
- 1981ah High Grade pleader camepuai Part I, Part II voi
khat ah a awng
- 1982 August (20) ah Hakha Party unit part time member
caah Hakha peng party unit member pawl nih zapi meeting ah a thim.
- 1983-85 tiang Rangoon Trade department (Mortor thilri
le Seh thilri zuar nak ah Depot manager a ṭuan.
- 1985-1993 tiang Kalemyo Trade department (Mortor thilri
le Sehthil ri zuar nak) ah a ṭuan
- Lai Baptist church Kalemyo ah 1987-1992 tiang Khrihfa
upa le church chairman a ṭuan
- 1987-1988 ah Gospel Baptist Bible sianginn ah, church
history,
- Personal
evangelism le Baptist distinctive subject a chimh hna.
- 1990 Election ah Kalay Distict Commission Joint
Secretary.
- 1993-1998 tiang Hakha ah Department Store Manager a ṭuan
4.8.1997 ah Assistant Director rank a hmuh.
- 1998 ah Yangon Trade Ministry zung ah a ṭhial.
- 1999 February (1) ah, service penson a la
- 1999 October 1, in UNDP project ah a lut i Human
Development
- Facilitater, Towship Facilitater a ṭuan i 2005 March
(14) in Hakha Myone tavuan khan Township Coordinator a ṭuan. 31.12.2008
tiang a ṭuan hnu ah a mah te in a din
- 2001-2017 January tiang Zion Khrihfa upa a ṭuan.
- 2012-2013 tiang Zion Khrihfabu ah Vice-chairman le
chairman a ṭuan.
- 2015 Chin State election commission member ka ṭuan.
- A nupi Pi Sui Ṭial a si i, Fanu pahnih Sui Cin, Iang Zi le Fapa pahnih Sang Nawl Lian le Siang Biak Lian a ngeih hna Tu pali Ruth Ni Men Sui, Dawt Hlei Zing, Esther Par Ṭha Lian le Thang Lian a ngei.
Chuahkehnak
Khuabung khua – Thannganchung
Bawitling hrin, Pu Chia Hup le Pi Ngun Pawng hna i an fa ka si. Ka pa hi unau
pali chuak an si i, upabik cu Pu Hmung Dun a si. Ka pa a changtu ah Pu Khar
Cin, Pu Mang Qhai an si. Ka nu hi chuahpi pakhat Pu Hre Cin, a nau (Pi Doi
Zing) That Mang nu le pa dang fa Pu Sa Mang an si. An phun Lianhlawng
(Hlawnceu) a si. Unau chuakkhat panga kan si. Nutlai ah pa pakhat a si.
Ka nu nih a hrinmi hna pa cu an
ngakchiat an chuahka in an thi dih i, upabik Sui Cin hi va a ngeih kaa
ah a thi. Amah changcu Pi Thluai Par hi fanu pathum fapa pakhat a hrin hnu
28.8.1997 ni Hakha ah a thi. A changtu Pi Nu Tum cu Pu Chan Qial he an i
um i, fapa pathum, fanu pahnih a hrin hna. Keimah a ka changtu Pu Ngun Khuai
hi (Township Income Tax Officer) in pension a la i, fapa pahnih, fanu
pathum a hrin hna. A fa upa bik Cung Hmun cu a tlanvaal ka teah kal (Kidney)
zawtnak in a kan thih tak. A changtu Saya Vai Se hi fapa pali le fanu
pakhat a hrin hna. Ka nu July 1963 a kan thih tak hnu ah Pi Qial Thluai he an i
um qhan i fapa pakhat Pu Thla Hmung a hrin ṭhan. Ka pa cu 16.1.1988 kum, amah
kum 95 a si ah a thi.
Lailei cu pa le nu ca thiamlo lothlo
an rak si i, chuahnak nithla rak qial a si lo. Asinain hoidang qhikhat rual he
ruah chih tikah 1942 ah ka chuak. Hmatpungqin ning in ka qialmi 13.8.1942 hi ka
chuahni tiin ka qial. 2.2.1972 ah Khuabung khuami Pu Vai Kung le Pi Hniar Meng
i an fanu Sui Qial he kan i um.
17.1.1973 cacawn ninga ni zinglei
suimilam 10:30 ah Sui Cin a chuak. A pahnihnak Iang Zi hi 24.12.1976 cacawn
nikhat zaan 10:30 ah a chuak. Sang Nawl Lian hi 24.10.1980 cacawn ninga ni
zaanlei 4:40 pm ah a chuak. A hniangbik Siang Biak Lian hi 31.7.1984 cacawn
nihnih zaan 8:45 ah a chuak.
Pathian
thluachuah Fanu Fapa hna
Pathian zaangfahnak thawngin Pathian
nih ka fale thluachuah a pek hna i ca zong a tanglei bantuk in cawnnak an ngei.
1. Sui Cin B.A Nurse (USA)
2. Iang Zi M.Min (Bangalore) (USA)
3. Sang Nawl
Lian M.E (Aeronotical) (USA)
4. Siang Biak
Lian B.A
Sui Cin hi va a ngei cang i a va cu
Surkhua khuami Pu Sui Mang le Pi Ni Awi i fapa Tin Thawng a si. Fanu pahnih an
ngei i an min ah Ruth Ni Men Sui le Dawt Hlei Zing an si. Sang Nawl Lian hi
1998 tanghra camepuai ah Distinction pathum a hmu i, Laitlang a phimi chungin
pakhat nak a rak hmu. A cozah nih laksawng an rak pek. Sang Nawl Lian hi Nute
he an i um i fapa Thang Lian an ngei. Pu Siang Biak Lian hi Helena Ruby he an i
um i fanu Esther Par Qha Lian, fapa Thawng Cung Lian le fanu Nelly Ni Par Lian
an ngei.
Ka Ca
Cawnnak
1949-1950 in Khuabung sianginn ah
tangkhat cawn kaa thawk i, 1952-1953 ah tangli ka awng. Cacawn kaa thawkka
ahhin Sianginn kai ka duh lo i, ka rak qap lengmang i, Pu Lian Cin nih sianginn
ah a rak ka kaipi tawn. Leitak ah 1953 kum ah a cozah tangli camepuai ka rak
tuah. Supervisor cu Saya Hnok Cin a rak si. 1953-1955 ah Khuabung ah Hre Ling
(SIP) he kumkhat special kawlca kan cawng.
1954-1955 in 1956-1957 tiang Hriphi
SMS ah mirang ca tangli in tangruk tiang ka cawng. Hripi ca ka cawn lio ah Saya
a quanmi hna cu Sayaci That Dum, Sayaci Biak Mang, Saya Hrang Nawl, Saya Hrang
Kap, Saya Ngun Hre, Saya Ral Cung, Saya Bawi Hnin, Saya Bang Lian, Saya Sui Thuai
le Saya Len Nawn an rak si hna. Kawl ca chimtu ah private in Gangaw peng in
Saya Ye Naing, Saya Maung Maung, Saya Thein Pe an rak lak hna. Saya Ngun Hre hi
PAT a si i, tangsarih lawng a awng mi a si ko nain, kanan a thiam tuk i tang 5
in tang sarih tiang amah nih kacaan (Arithmatic) a chimh hna.
Hriphi ca kan cawn lio ahhin Bawda
ah kan rak um i, Aalu hmun kanmah tein kan rak i ser i, vawlei cung rawl thaw
timi le mi kip eimi timi Aalu kan rak ei hmasa ve. Voikhat cu tangruk ka cawn
lio ah thakpherh nih a kan tlunh ciammam i, zingka January hawhra a tlak lio ah
kan thawh cangka in tikhawr ah Sayaci Bawi Mang nih tikik in zarhkhat chung a
kan khawlh ter. A kik tuk i kan rak celh na loin zarhkhat hnu ahcun kan
thakpherh cu a rak dam ve. Bawda in kan ti thannak hi a hlat lengah a cho tuk i
U Van Lain he ngakchia bik kan si caah Baltin pakhat kha kan liang in kan rak i
zawnh i, an kan than ter tawn. Meh haang a har caah Reng phum_tuu ah Mangkhawng
ka tuah i fur ahcun cakei neh kan rak hmuh pah tawn i kan qih pah bu te cun kan
rak veen tawn. Aalu hmun te zong kan rak i tuah. Cu lio rak ei mi Aalu cu a
thaw khun.
1957-1058 ah Khuabung UVPMC (United
Private Villages Private Middle School) an rak dirh i kan khua ahcun tangsarih
ka rak cawng. Khuabung sianginn cu Saya Hram Mang nih Khuabung, Ngalang,
Lawngtlang, Zephai, Hlamphei bawmhnak tuah ding in heh tiah a rak sawm a rak
cawlcangh pi hna. Saya Hram Mang cu Khuabung sianginn tuah ding ah a thawkpitu
lawng siloin Khuabung kan ah conco tuah ding a rak thawkpi tu a si. Conco thil
cu Mandalay ah an va cawk i Hakha tluk in thil man fawi tein an rak zuar khawh.
Cazin tlaitu cu Pu Khar Tum a si. Saya Hram Mang cu CE cawlcanghnak zong ah
fakpi in a rak tel pi hna.
JAT training Kan Be STCT ah kumkhat
a kai i a dih hnu a rak tlun 1956 April ah ruah lo piin pawfah zawtnak in a
thi. Khuabung nih bochan bikmi mifim Khuabung bawi Pu Kip Khar fa a si. 1956 a
thu hnu ah Saya Qial Khuai nih sianginn a dir khawh tiang a rak qanpi hna. Kan
Saya hna cu Sayaci Ral Hmung, Saya Za Bawi le kawl ca a chimtu Saya San Lone
hna an rak si. Tangsarih cu cozah camepuai a si i chaklei Laitlang a phimi
lakah pakhatnak ka rak hmuh. Khuabung sianginn in pariat kan awng i chaklei
Laitlang ah a awngmi a buaktlak in first kan hmuh.
1958-1959 ah Hakha ah tangriat ka
cawng. Classmaster cu Saya Hrang Hlun a si i, Sayaci cu Van Ci a si. 1959-1960
ah tanghra ka cawng i Sayaci cu G.R Iyer a si. A bawmtu cu Saya Thawng Do Zam a
si. 1960 ah kumkhat nak in tanghra ka awng. Tanghra a awngmi pali kan si.
Keimah le Do Thawng kumkhatnak in
kan awng. Pu Thla Cung le Pu Qha Bik cu HSF a awng ciami an si. HSF a awng mi
hna cu Pu Huat Chum, Pu No Kio (Tleicia), Pu Cuai Sang (Tleicia), Pu That Duh
(a lenglei a phimi), Pu Kaung Luai (a lenglei a phimi) an si. 1960-1961 ah
Khuabung Private Middle School ah Sayaci ka ṭuan. A ka bawmtu cu Pu Sang Hei a
si.
1961-1962 ah Rangon University ka
kai i, 1965 ah B.A ka awng. Cu lio Old System a si i, B.A cu English, History,
Economics le Maths subjects in ka awng.
Ka rianquannak
0965-1966 Trade Department
(Kungtwezi) ah rian ṭuan ding
ah Phaungyi Training School le Rangon Central Trade Training School ah training
ka kai. 16.1.1967 Bogale Township Trade ah Department Manager in ka quan. Culio
ka lahkhah le ka rank cu Myouk le Vuanthok kar lak a si. Bogale Township Trade (Myone
Kungtwezi) ah 16.1.1971 in 31.3.1971 tiang ka quan hnu ah 1.4.1971 in Hakha
Township Trade ah Department Manager in kaa qhial. Bogale ah rian ka quan lio
ah Trade Corporation (3) quanvo an ka pek i tisatam zuar ding ah 1' in 6'
karlak a nung in ka cawk i Rangon ah ka kuat. A nganmi cu a phaw in ka cawk,
Atu Taketa i Tisatam an zuarnak inn ahkhan an rak zuat.
Hakha Township Trade ah 1.4.1971 in
May 1973 tiang ka quan hnu ah Township Trade Manager tavuan cu 22.5.1973 in an
ka pek. Vuanthawk rank lahkhah cu 30.12.1974 in an ka pek. Township Trade
Manager ka quan chungah voikhat cu Hakha ah facang zarhkhat ei lawng kan ngei
cang. Kalemyo in facang kuat ding a um fawn lo. Town People's Council member Pu
Tei Tling he Kalemyo ah kan kal. Kalemyo ah facang tlaipa Zonal Manager cu qha
tein kan nawl i, a sin ahcun RTC mawkawka panga phor cu a um. RTC tavuan khan
pa va chim uh law, zanlei sang ah facang Godown ah va qin uh law Kalemyo riak
loin zaan ah va lan colh uh an kan ti. RTC tavuan khan pa nih mawtawka panga a
kan pek i, zanlei sang khua mui lai ah facang cu kan qin i kan rak i thawh
colh. Hakha ah facang cat hin lo tein kan ei khawh i, a hmaizarh cu Ayerawaddy
peng in an kan kuatmi facang a rak phan colh ve.
1976 ahcun Township Trade hrawh a si
cang lai caah minung tlawmte lawng Trade Department ah an um lai. A dang kha
hmunhma an ngei setsai ti lo. Kawlram a cozah hna tlaknak in Department a dang
ah a lawnnak hmun a um ahcun Trade Department in a hlei pawl rian quanmi nan
cohlan hna lai a ti i, a lawnnak hmun tete ah an rank pawl Headquarter in
an kan kuat. Laitlang Township (Myone) dang pawl i a quanmi nih an sawk lem cio
lo. Hakha cu ka rianquan hawi pawl sok ko uh ka ti hna caah sohluah Rangon ah
ka phorh i ka hei pek hna. Pathian dawtnak thawngin Palaka, Incom Tax,
Coorperative, Law Department, Telecommunication Department, Education
Department ah rian quanmi (Staff) tampi an i qhial kho. A tangmi zong Trade
Department a lawnnak tete ah hmun an hmuh ve caah a hohmanh pension pek an rak
si lo. Hakha lawng lawng nih a dang Department ah qhialnak nawl kan rak hmuh. A
ruang ch sohhluah a caan teah ka kuat khawh i, Bawipa nih thluachuah a pek caah
a si. Department dang ah aa qhialmi zong a hnu ahcun an quannak hmun ah
promotion an hmu cio dih.
1976 June thla in Chin State Trade
ah kaa qhial i Township Trade an hrawh caah hmunhma ngei ti loin Township pakua
cu pension an pek hna. Minung (96) pension hmuhnak caah a herhmi ca vialte
qialmi Rangon Pension zungpi ah kuat a herh. Cu vialte cu caku bawm in kan tom
i cazi Pu Elizah he Rangon ahcun kan kal pi. Pension kong ka tuah bal lo caah
Pension zungpi ah Director U Ngunt Maw kan va nawl. Miqha tuk a si i, a chambau
mi vialte tuah ding ah qhutnak hmun a kan pek, a kan chimh. Zarhkhat chung ah
minthut, kutnam, pungsan a baumi vialte kan tuah dih. A herhmi a kan chimh, a
kan bawmh dih. Laitlang Pension a la mi vialte kawlram hmun dangin pension a
lami nak in chikhat te ah an hmuh colh dih.
A cozah nih May 1.1981 ah an tuahmi
High Grade Pleader camepuai, Part I, Part II voikhat ah ka awng.
Myanmar Socialist Lanzin Party Hakha
Party Unit Party member pawl zapi meeting a voi (12) nak ah Party Unit Member
(Part-time) in an rak ka thim ve i 1982 August (20) in quanvo pek ka rak si.
1983-1985 kum tiang Rangon Vahicles
ah Machine Trading (Motor le Seh thilri zuarnak) ah Depot Manager ka quan.
Kalemyo ah Depot Manager le Boarder Trade ah Manager ka quan. Kalemyo rian ka
quan lio ah Lai Baptist Church Khrihfa Upa (1987-1989) ka quan. 1989-1992 tiang
Lai Baptist Church Chairman ka quan. Atu kanmah Lai Baptist Church khi 1996 ah
Foundation kan rak thawk. Foundation chiah lio ah thluachuah a kan hal piaktu
cu Rev. Thang Hlun a si. 1987-1988 ah Gospel Baptist Bible sianginn ah
Principle Micheal Hrang Sam nih a rak ka sawm i part-time in ca ka rak chim ve
hna. Church History, Baptist Distinctive le Personal Evangelism subject ka rak
chimh hna. Ka cawn ve lomi a si caah zaan ah heh tiin ka zoh, ka ciah. Mirang
holh in Lecturer practice ka tuah. Ka cacawn lakah a harbik. Sihmanhsehlaw
Bawipa nih thlarau thazaang a ka pek. Nihin ni tiang thlarau thazaang in a ka
daw i a ka cawi sangtu Micheal Hrang Sam Pathian nih thluachuah pe ko seh. Cu
lio ahcun Micheal Hran Sam, Principle Saya Khuang Lam cu fulltime an si i,
keimah le mirang holh a chimtu Allen cu part-time kan si.
Kalemyo ka quan lio ah 1990 thimnak
ah Election Commission Kale District ah Joint Secretary ka quan. Mee-lehhmah,
Kale District ca le chaklei Laitlang ca Mee-lehhmah cu Rangon Central Election
Commission zung ah ka va thoh. Kale ah chartered van-lawng in ka rak phorh.
1993-1998 Hakha ah Department Store
Manager ka quan. Ka quan chungah kum fate Hakha Department Store zeitik hmanhah
kan sung bal lo. A kum fate kan miak. Keimah zong 4.8.1997 ah Assistant
Director rank promotion ka hmu. Ka quanqi hawi pahnih hna zong promotion an hmu
ve. Pathian zaangfahnak in kan zate, kan pathum in promotion kan hmu dih. 1998
in Department Store an hrawh qhan caah Rangon Vuanzi zung ah kaa qhial i,
Assistant Director in 1998 June in Policy Section ah ka quan. Assistant Director
ah promotion a ka petu le ka qhut um dirhmun a ka zohpiak lengmang tu hi a ka
dawtu Director General U Khin Maung Oo a si.
Ministry of Commerce zung ka quan
lio ah ASEAN chungtel mi ram pawl thil cawk/zuar tikah mah ramchung le ASEAN
ram chung chuak mi thil pawl custom duty luatnak tuah ningcang (Procedure) ka
qial i Trade Council nih approved an tuah. Cun Rules and Regulations for
Private Enterprises, an rak qialmi mirang holh cu an kan remh ter (edit) i ka
remh dih. Cu cauk cu remh rih lo in caan saupi an hman.
1999 February ni (1) in Trade
Department ah kum (32) ka quan hnu ah Service pension ka la.
UNDP Project 0999 October 1, i
UNDP/CDRT/MYA/ 99/009 ah ka lut i, Hakha Township ah Human Development
Facilitator ka quan. 2000-2005 tiang UNDP/CDRT/MYA/01/02 Project Hakha ah
Township Facilitator ka quan. 2005 March (14) in Hakha qhiamqhiam ah Township
Coordinator (Myone qavuankhan) ka quan. 2008 December 31 tiang ka quan hnuah
dinh ka zaa cang ka ti i ka rian in keimah tein kaa din. Ka rianquan lio ah a
rak ka bawm biktu cu, ka luhka ah Area qavuan khan Nepel pa J.N. Parasain le
Myone Qavuankhan si hnu ah tangka tlai Daw Pan Pwint hna an si. UN project ka
quan chung a ka dawbik tu cu NPC (Nation Project Coorsinator) U Myint Than le U
Tha Htun Oo an si. Anmah nih an ka dawt ruangah Myone hmu ka hmuh zong ah qhial
lo in Hakha ah an ka chiah ko.
Rian ka quan chungah khuate ka
quannak khua hi khua (52) a si i, a tam deuh cu ke in rak kal a si. Cycle cit
ka thiam lo caah a ka thlahtu an um lo caah kum 6 chung ka ke in tam deuh ka
kal. Pathian nih a ka zaangfah i damnak a ka pek caah ka kum a upa ko nain
tlangvaal tluk in ka kal kho ve ko.
Pathian nih a ka zaangfah, Private
Saya kum (1), A cozah rian kum (32), UNDP ah kum (9) a zate kum (42) zong ah
sualnak um hin lo tein Bawipa zaangfahnak in ka quan khawh caah Bawipa ka
thangqhat ko. Ka zunte zun hi ka harh deuh caah sibawi ka zohter hna i, zunte
zunnak ziah a hau lai an ti. 2006 January (15) ni ah Rangon Bahosi Clinic ah
Uro Surgeon Dr. Min Thu nih ka zunte zunnak cu suimilam pakhat chung a rak ka
ziah piak. UNDP Myonehmu ka quan lio ah harnak tampi tong hmanh ning law Bawipa
nih a ka bawmh caah ka rian ka ngol ni tiang hi rian cu tlamtling in khuami
caah ka quan ta ko.
A voi hnihnak 19.10.2016 ah
Shwe-la-min Clinic ah Prof. Kyaw Zwa Hlaing nih ka zunte zunnak cu a ka ziah
qhan.
Kum 2001 in Zion Khrihfa upa caan
sau pi ka quah rih. Keimah lei in zeihmanh Bawipa caah qhathnemnak ka ngei lo
nain Bawipa nih nihin tiang a rian quannak ah a ka telh ve rih caah Bawipa
sinah chim cawk lo le cham khawh lomi lei ka ba.
Ka chuahpi
Unau hna;
1. Pi Sui Cin
(tleicia)
2. Pi Thluai
Par (tleicia) + (Pu Hram Mang)
Pi Ni Sui
Pi Mang Zi
Pu Siang Ling (Pu Mang Lo)
Pi Hlawn Qial (Pu Mang Lo)
3. Pi Ni
Tum +
(Pu Chan Qial)
Pu Robin
Pi Ye Ye Myint
Pu Saw Lin
Pu Aung Lin
Pi Naing Naing Maw
4. Pu Ngun
Khuai + Pi Iang Bor
(Pa Cung Hmun)
Pi Hnem Sung Chin
Pa Biak Hnin Lian
Nu Mu Mu Ngun
Nu Ngun Len Zing
5. Pu Vai
Se + Pi Mah Khin
Pu Siang Lian Cung
Pu Sang Za Lian
Pa Ngun Hnin Thang
Nu Sui Tin Sung
Sang Ling Mang
6. Pu Thla
Hmung + Pi Hlawn Zi (Ka nu a thih hnu ah Pi
Qial Thluai he an hrinmi)
Fapa 3 le fanu 3 an ngei.
Ka Nu Unau hna;
1. Pi Doi
Zing + Pi Chia Er
Pu Sai Luai
Pi Sui Par
Pi Zing Thluai
Pu Van Uk
Pi Qial Bor
2. Pu Hre
Cin + Pi Ngun Si
Pi Sui Zing
(Pi Zai Iang)
Pi Za Tang
Pi Nu Hoi
Pi Sa Thluai
3. Pu Sa Mang
(Pa dang hrin) + Pa Sa Tum
Pu Mang Hlup
Pi Ngun Ca
Pu Za Cung
Pu Sui Hup
Sa Pawng
1977 ah Taungzalat lam Dawrthar sang
ah thinginn dotkhat 30'x20'x9' coka 12'x10'x9' kan rak sak, Cun 2005 ah nogging
(tlakrawh) inn le 2007 ah thinginn dothnih veve in kan sak qhan.
Tintuk khuasaknak ah siseh, inn le
lo zalhnak ah siseh Pathian lei zumhnak ah siseh a ka qhihruaitu nu can ah a ka
dirpiak zungzal mi cu ka dawtbik kan nu a si.
UNDP Project kaa dinh hnu 31.12.2008
hnu ah keimah ka tuanbia tawi hi ka rak qial. Atu hi bet ding tete a um caah ka
chuah qhanmi hi a si. Zion Khrihfabu ah 2001-2021 tiang Khrihfa upa ka quan.
Caan khat cu Church Chairman zong ka quan. Cu pin ah Zion nih zarh fate
Darkhing cazual an chuahmi ah capar ka qial tawn i capar tambik a qial mi chung
ah telh in voi (2) laksawng an rak ka pek. Sermon tete zong facebook ah ka
thlah kho pah tawn.
Pathian dawtnak thawngin Sermon
tling le Sermon tawi pawl, thawngqha caan ka hmuh lio ah ka rak chim mi le ka
relmi chung in – (1) Khamhnak thawngqha (2) Khrihfanun le Thlarau thazaang (Vol.
1,2,3,4 & 5) tiin a zapi uk (7) ka rak chuah khawh. Cu cauk vialte cu Hakha
Lian Computer nih an ka qialpiak hnu ah Yangon Pu Khua Kam Ebenezer Press nih a
ka nam piak. Cauk namnak caah a dihmi vialte hi Ram leng ka fa le nih an pek
chanhmi a si i, cu cauk ka chuah khawhmi hna cu ramchung ramleng man loin ka
rak phawt zamh khawh hna.
Cu cauk pasarih (7) te ka chuah
khawh ruang ah Zion Tipil Khrihfabu nih 20.2.2020 ah Upat nak ROCA le laksawng
an rak ka pek. Vawlei Bawi rian ka quan bal lo nain Hakha ah a voikhatnak
Council thim lio ahkhan Township Election Commission member ka si i 1990 kalram
pumpi Election lio ahkhan Kalemyo District Election Commission Joint Secretary
ka rak quan. 2015 Kawlram pumpi thim lio ah Hakha khuanu khuapa meeting i min
peknak in Chin State Election Commission member ka rak quan ve.
Ka khualtlawnnak
Ka fa le US i a ummi Pi Sui Cin,
Iangku, Pu Sang Nawl Lian sawmnak thawng in anmah tlawn awk ah kan nu Sui Cin
nu he Yangon in 4.11.2016 5:30pm ah kan i thawh i Tuluk Kwankyu 2hrs 30min
Flight kan zuan hnuah kan phan. Cu hnu ah vanlawng kan i thleng i suimilam
14:30 kan zuan hnu ah vawlei cung Airport nganbik New York JFK airport kan
phan. Airport ah suimilam pathum (3) kan i dinh hnu ah kan fa le umnak Florida
Jacksonville ah kan zuang qhan. Cu Flight ahcun nikhua qhat lio te a si i, New
York khua cung in kan zuang i hmuh khawh zat New York khua a lang i a ngan tuk
hringhran. Suimilam pahnih le cheu tluk kan zuan hnuah kan fa le ummnak
Jacksonville cu 6.11.2016 ni ah kan phan. Florida cu a umnak khua a si i,
hawhra a tla bal lo.
30th Nov. 2016 in 13th
December kar lak ah kan tufa le kan chungkhat an umnak Indianapolis le
Washington kan tlawng hna. Sui Cin nu he kan mah pahnih lawng vanlawng round
trip lehhmah an kan cawkpiak i tluang tein kan kal kho ko. Washington capital
Hill an timi Hluatdaw Building le White House le a pawng hrawng vialte cu chun
nitlak kan i chawk kan zoh kho ve. Florida kan um chungah Orlando ah John F.
Kennedy Space Centre thlapa an kainak khua pawng ka phan ve. Space Cantre zong
an kan zoh pi. A dang zoh ding tampi a ummi zong an kan zoh pi. Vawlei cung
tourist tampi an phanhnak khua a si ve.
Indianapolis ah voikhat ka kal qhan
i cu ahcun 24.2.2017 ah ka tu le pawl he chuncaw kan i phorh i, Ohio State ummi
Dayton khua ah Vanlawng Airfor Museum an kan zohpi. Vanlawng an chiahnak cu inn
nganpi panga a si i chun nitlak deng zoh khawh a si. Vanlawng an ser ka in
uptodate raltuknak vanlawng an sermi hmuh saknak hmun a si. Khuaruahhar a simi
cu luhnak man an la lo. Vanlawng pawl cu vanlawng ralkap hlun pawl nih an kan
hmuhsak. Cucaah Japan nih Atom bomh a rak thlami B-29 le bomb sample te kha an
rak chiah. Vietnam ral i minthang A-6 Intrudor, F-4 Phamton, A-4 Sky hawk
tibantuk ka hal hna. Chikkhat te ah an ka piak i (ec-airforpersonal) vanlawng
ralkap lei ah rian na rak quan bal maw an ka ti. A silo, Vietnam ral lio ah
khan Time le Newsweek megazine ah nan vanlawng kong kha ka hawipa mirang holh a
thiam tukmi carel huammi nih a ka relpi tawn i ka theih mi a si, Kei cu Myanmar
ram remote area te in a rami ka si ko ka ti. Cu ka hawipa ka timi cu Sayaci Al
Ci (A Hmun pa) a si. Cu hnu cun vanlawng dang Rader a tlaih khawh lomi F-22
zong kha an kan piah. Cun President John F. Kennedy aa citmi Vanlawng zong kha
an kan piah i hi vanlawng hin John F. Kennedy ruak lawng si lo in President
Lyndon B. Johnson ruak zong a rak phawrh an ka ti. Cu hnu cun an ka kal pi i
World War II a dih lai i Yalta Conference ah England Prime Minister Winston
Charchill le Soviet Russia President Jaseph Stalin he ton ah a kal lio i President
Franklin Rooseveit aa citmi vanlawng pi zong kha an ka piah. A kan zultu ka tu
nu te nih ka pu mirang holh na thiam lawng si lo in vanlawng kong na theih caah
nangmah lawng an in zulh duh ko e a ka ti. Ka fa ca kan rak rel caah a si ko ka
ti. Ka dih hnu ah a leng ah a leng i idinhnak hmun an tuah mi te ah kan chuncaw
cu nuam ngai in kan ei hna. Nikhua zong a rak qha tuk.
Ka fa le nih khua zei ah dah kal na
duh rih an ka ti i, ka nunnak ah Pathian bia in tambik a ka cawmtu "Sword
of the Lord Foundation" ah kal ka duh ka ti hna. 8.3.2017 ah ka fanu
Iangku, ka fapa Sang Nawl Lian he 9:15 am ah Jacksonville in kan i thawh i 586
miles kan kal hnu ah Sword of the Lord Foundation umnak Tennessee State,
Murfreesboro khua cu 7:00pm ah kan phan.
"Sword of the Lord" hi
1934 September 28 ah Dr. John R. Rice nih a Secretary nu Dr. Viola Walden he
zarh fate ca an rak chuah. December 20, 1980 kum 85 a thih tiang kum (46) chung
editor a quan. Dr. John Rice hi caqial thiam tuk mi a si. A thih tiang ah hin
cauk (200) leng a qial i 20th century mightiest pen an ti i nihin ni
tiang Pathian bia cu bantuk a qial khi mi a sal an chuak rih lo. A caqial mi
hna hi a qha tuk i kei zong thlarau lei in a ka cawmtu a si ve. "Sword of
the Lord" Paper hi sermon tambik qialmi a si i US ram chung State (5) leng
vawlei cung hmun tampi ah an kuat khawh. Kei zong Pathian zaangfahnak in ka tu
le nih a man an ka pek piak i thlakhat ah voi hnih lengmang ka hmuh. Atu bel cu
kan ram ruang ah ka hmu kho lo. Pathian bia chuahmi ah a qha bik.
An Foundation an ka luh pi tik ah
Dr. John R. Rice a qhutnak, a cabuai, a hmanmi thilri, a library hna cu a
mahning tein an chiah ko. A hmai ah a ummi cabuai le qhutdan hi tah a ho
qhutnak dah a si tiah ka hal hna. Hihi cu Secretary nu Dr. Viola Walden qhutnak
a si an ti. Amah cu kum (90) tiang a nung i April 29, 2007 ah a thi an ti.
Sword of The Lord Foundation aa thawk 1934 in a thih tiang kum (72) le thla
riat, Pathian rian a quan an ti. Ca cawn ni (5) ni zanlei tiang a qial liomi ca
cabuai cung ah an chiah ko. Ni ngani a rianquannak in a qin hnu zarhpi ni ah
ruah lo in Pathian sin ah a kan kal tak an ti. Pathian rian quan tu hna pa (2)
an quanmi, an qialmi ca le an bia vawlei a culnak hmunhma ka phanh le ka hmuh
tikah ka mitthli a luang. An Foundation hi a rummi an si lo. An hmuhmi zat
Bawipa bia phawtzamhnak caah a hmangmi an si. Kafa le zong nan si khawh tawk
nan Khrihfabu bantuk in rak philh hrimh hlah u ka ti hna. Biaruahnak caan te le
a rianquannak vialte an ka hmuhsak dih.
Kan kir lei ah, chattanooga khua kan
lut pah i chattanooga i Pastor minthang Lee Roberson a qialmi "Coming to
chattanooga soon" timi cauk ka rak relmi kha a tak in ka phan mu ka ti.
Bawipa ka thangqhat. Atlanta khua ah vawleicung thawngthanh nak a nganbik a si
mi "CNN" zung zong kan zoh pah. Philh lonak ah an CNN hrai le Ballpen
pakhat ka cawk pah.
US ah ka fa le sin ah thla (5) ka um
hnu ah kan kir lei cu Sui Cin nu ta Pu Thawng Hmung (Japan) ah taang pah u sih
tiah kan Air-ticket return cu a dang kan cawk i 4.4.2017 ah US in Japan ram
Tokyo khua ah kan zuang i Tokyo khua cu 5.4.2017 zanlei 2:00 pm ah kan va phan.
Japan kan pu sin ah zankhat kan riak. A thaizing Tokyo Japan Narita Airport in
kan i thawh i Yangon cu 6:30pm ah kan phan. Kan i citmi JAL vanlawng cu minung
280 hrawng a phor mi a si nain passenger 100 hrawng lawng kan si. Kan cawkmi
Ordinary seat ah qhut ter lo in a man a fak deuhmi qhutnak Economic class seat
ah an kan qhut ter. Bawipa a qha ko.
Japan Cherry a par lio a si. Tokyo
khua cu Cherry nih a qamh lio a si i aa dawh khun. Japan Motor parking a um lo
caah Tlanglawng lawngte in an vak an tlung kal cio. An minung zoh hna nak hin
an mar a zaang, an mithmai a panh, duh nung tete lawng khi an si ko. Airport ah
an chawnh biak an dealing a qha tuk. Tuluk Airport staff he cun an i dang ko.
Bawipa nih kum 80 leng tiang
nundamnak a ka pek rih caah kaa lawm. Vawlei caan tawite kan nung chungah
Bawipa rian ah ka ti khawh mi te quan le a bia qial phun khawhnak a ka pekmi hi
a sunglawi tuk hringhran ko. Mi caah thilrit ka si sual nak hnga lo ka thlacam
tawnmi a si. Hi ka tuanbia tawi ka qialmi hi minung lei i porhlawtnak si loin
Lothlo thingphur te santlai lo zong Bawipa nih a kan philh lo ti langhternak caah
dawtmi chungkhar hawikom zong nih philh lo nak caah ka qialmi a si.
2023
October
EmoticonEmoticon