THIHNAK NIH A KAN ṬHEN TIANG IN Biahmaisa

BIA-HMAI-SA

          “Mah pa hi kawl taktak cu a si lai lo, ti cu hngalh khawh a si ko. A sinain a caṭial ning hi caṭial thiam ngaingai pawl caṭial phun a si.” Hihi Yangon Art & Science University kan um lio i, Eassay ṭial zuamnak ah a tu kan caṭial tu pa nih hin pakhatnak a rak hmuh lio ah, kan saya pa nih a chimmi a si.

          U Hniar Kio nih, Laimi a hohmanh nih an ṭial bal lomi, “THIHNAK NIH A KAN ṬHEN TIANG IN” timi ca-uk a kan ṭialpak tikah hin, a zuamnak a teirialnak le a thil tikhawhnak cungah hin thangṭhat loin kan um kho lo. Chungkhar a si ciomi, a si laimi vial te zong nih a cungah nan lung aa lawm cio ṭheu lai tiah ka zumh.

          Carel tam cu fimnak a si an ti. A sinain, thih nak nih a kan ṭhen tiang in timi cauk hi cu, fimnak lawngsiloin, na nunnak ca taktak ah direct in ṭhat hnem nak an pe tu ding a si. Chungkhar nuam si na duh ah cun voikhat rel lawng zong siloin an kut tleih hreiha ah na hmannak hnga kan forh ko.

          “Phungki hna nih vawlei cung duhnak vialte hlawt tak in  rawl an ulh thla an cam tikah khin thil biapi ngai a si. A sinain mah zong khi ṭha tein rawl a chuang. Inn a phiak i chungkhar rian tlam tling tein a ṭuanmi Inn teek nu he tluk ceo in kan thangṭhat hna lai tiah Pathian nawlbia a um” tiah Martin Luther King nih  a rak ti. Cu caah Innchungkhar tlamtling khuasaknak cu, nuamhnak lawng a si lo i, Pathian he a kan naih tertu a si caah, biapi bik pakhat a si hi, chungkhar chungtel (Member) vialte nih kan philh awk a si lo.

Mr. & Mrs. Hre Lian Kio (Biahmaisa ttialtu)

Hre Lian Kio (B.A., L.L.B., B.R.E)
Higher Grade Pleader

THEIHTERNAK

          Nu le va cu 1+1 =1-2 si lo in, 1+1=1 a si lo ah 1×1=1 kan si awk a si. A tu hi cauk ka ṭial tikah hin mah hna lawng hi innchungkhar khuasaknak a za ti si lo in, mah hna zong hi a herhmi an si tiah nan ruah nak hnga ka duh.

          Hi cauk ka ṭial tikah chungkhar dawtnak le nuamhnak pakhat lawng ruahchan loin, “Ram pakhat i a rian zong innchungkhar in a thawk i. thlennak vialte zong hi chungkhar in a thawk mi ai,” ti chirhdan cung dir khawh nak ding zong hi ka ṭial nak chan biapi a si. A pathumnak ah lai holh in cauk Pakhat a si ve hrimhrim awk ah ka duh. Kannih Laimi cu pahnihthum kan i hmurtonh tikah, zeidang kong ceihding le ruahding kan ngei lo i kan hngal lo. Mi thangchiat le mi soiselnak, capo bia dah ti lo hi cu ceih awk Subject kan ngei ve hrimhrim lo. Cucaah Laimi nih Lai ca in ca rel awk kan ngeih khawh awk hi ka saduhthah nganbik pakhat s si.

          Hi cauk ka ṭial tikah, nan lung a sinak zong a um lai i, nan lung silonak zong a biafang in siseh, aum len lai.Cucaah keimah caah kaa chapnak hnga, zaangfah nak tein nan duhnak zawn zong a si ah nan lung silo nak zawn zong a si ah pumpak in siseh ca in siseh, nan ka theihter ahcun ka lung aa lawmbik hnga.

Hmaitar:Chan Peng(tleicia),Ral Khar,Ni Hei(tleicia), Ahmawi,Mang Lian (Zokhua,,tleicia),S.Tha Bik,That Mang
Hnutlar:Van Thio,C.R.Hniar Kio (tleicia),Hre Lian Kio,Lian Uk,R.Siang Lian,Ca Lian Thang,Richard Zatu
Hnubiktlar: Tuan Hre (Safi,tleicia),Chum Awi,Sang Awr ( tleicia ),Daniel ( tleicia),Za Kham

          Anmah lo in mah cauk hi tuahkhawh a si hnga lomi, U Hre Lian Kio, Anthony Ngun Uk, U Ca Lian Thang le a Staff, Saya Ar Cung le a dang hawikom tampi hna cungah tampi ka lung aa lawm. Kum riat chung kan nunnak lam harnak chung ah ka pawng tein a ka kalpi zungzalmi, ka inn chung nu cung zongah, kan Lainu le va hna nih lunglawm te i an caan an hman khawhnak hnga a phunphun in a ka zuam pi nak cungah tampi kan lung aa lawm.

“KAN LAI HLOH IN VAWLEI ROCO USIH”
Rev. Carson Hniar Kio (B.A., L.L.B., B.R.E)
Higher Grade Pleader
(Cauk chuahkum: 2001, August 28, Hakha Deirel Press)

Rev. Carson Hniar Kio nih "THIHNAK NIH A KAN ṬHEN TIANGIN" timi cauk i biahmaisa i a ṭialmi a si.

Advertisement