Thir cincik a ser tu pa (Pu Din Lian)

Thir cincik a ser tu pa

Pu Din Lian

Hlan lio French ral a thawh ka hrawng ah Louis mi ṭhawng pa a rak um. Cupa nih cun French Li le thal a kap tu pawl ca-ah likuk a ser piak hna. A ser mi likuk cu a ṭhat tuk ca-ah a ho hmanh nih an khiak bal lo.

Ni khat cu French pawl nih cu an ral pawl kha an tei hna i a tam pi an tlaih hna, Uktu Bawipa nih Louis cu a auh i, “Kan tlaih mi hna an tam tuk i, Thong nih a tlumh ti hna lai lo; cu ca-ah thir cin cik a fek mi na ser lai, cu lo ah cun an chah lai i an thli sual lai.” a ti.

Louis cu thir cincik a ser bal lo nain “ka ser khawh ko lai tiah ka ruah, zei cah tiah thir a ṭha ngaimi ka ngei i mei ka linh i ka hah ter ah cun a hohmanh nih an chat kho lai lo dah” tiah a leh.

A mah cu a chim bantuk in a tuah tu mi fel a si. Thir cincik a fek tatak mi kha a tuah. Thong bawi pawl nih thir cincik a hlun vialte kha an hlawt hna i, Louis a tuah mi thir cincik in fek ṭhup thawngtla pawl cu an khih hna.

Caan zei maw zat ah Louis cu mah ram rawi nak thil sual pa khat a tuah ruang ah thawngah an thlak ve. A kut an khih nak thir cincik cu a zoh i a khua ruah a har.” Ah! ka thil tuah hi a rak ṭhat tuk ṭung! Keimah khihnak tu lila ah a cang mu! keimah khihnak ding ti rak thei ning law cu, phun dang in ka hei ser hnga mu” tiah ati.

An khihnak thir cincik cu a fek tuk i. A hohmah nih chah khawh ding a si lo. A mah ser mi lila a mah kut nih a hruk! Zaang fak tuk a va si dah!

Nangmah le keimah ve zong, kanmah tuah cia mi lila sual nak nih a kan thih ve tawn. Ni fa te kan tuah tawn ni ziaza ṭha lo, nifate a ṭhang cuahmah mi kan sualnak hna nih chah khawh lo mi thir cincik ban tuk in a kan khih ve. Thir cincik a kual bantuk in ka ziaza òha lo, kan sual nak hna nih kan thlarau nunnak cu ruahchannak ngeih lo in a khih. Luat nak lam a um nga maw?

A si a um ko; a kan luatter kho tu Khrih chung in Pathian sin ah kan pum i pe u sih; kan khamh nak ca-ah a mah lawng zoh u sih; sualnak thladem nih a kan naih tik poh ah a mah cu a kan chuahnak ding ca-ah au u sih. A mah nih luatnak cu a kan pek ko lai.

__________

oo0oo

Pu Din Lian nih Thlarau Thazaang Vol 1 a ttialmi chung in ka tar chinmi a si. Amah kong rel na duh ahcun hika link hi click chih te.