United Nations Organization (UNO) (Ram Zakomh Bu)

United Nations Organization (UNO) (Ram Zakomh Bu)
Thawhkehnak Tuanbia

Image result for united nations organisation

Vawleicung Ralpi Pakhatnak (The First World War) asiloah German ralpi cu 1914 kum in 1918 kum tiang a tho. Mah lioah cun American President cu (Thomas) Woodrow Wilson (1913-1921) a rak si. Amah cu a voikhatnak President a ṭuan kate ah ralpi cu a tho i America ram cu ‘Ho sin ṭang lo ram’ (ဘက္မလိုက္ႏိုင္ငံ) in um dingah thawng a thanh.
Asinain German cozah Hitler nih Mexico cozah sinah ‘America ram cu na doh ahcun hlan Mexico ram a simi Texas Ramkulh (1845 kum) le New Mexico Ramkulh (1912 kum) i an Ramkulh ah an laakmi na Ramkulh hna cu an in pek ṭhan hna lai,’ tiah thlithup thirhri a tukmi cu President Wilson nih a tlaih.
Cucaah American ral tilawng vialte ralhriamnam bunh dih dingin awdar a pek hna. Mah cangkate cun German tichungpil tilawng nih American tilawng 3 cu an hrawh hna i an pil dih.
Mah hnu cun President Wilson nih Congress meeting a auh zokzok i an dihlak hnatla in German cu doh dingin April 6, 1917 ni ah an chah i thawng a thanh colh. German he cun an i do i German cu sunghlei an panh caah November 11, 1918 ni ah an hriamnam an chiah; German cu ral an sung.

Image result for List of united nations organisation Members

Cu tikah France ram Paris khua ah Peace Conference an tuah i a kaimi hna cu: Italy ram uktu Orlando, Great Britain ram uktu Lloyd George, France ram uktu Clemenceau le America ram uktu Woodrow Wilson an si.
Mah Peace Conference ah cun American President Wilson nih ‘League of Nations’ timi ကမၻာ့ႏိုင္ငံေပါင္းခ်ဳပ္အသင္းႀကီး ဖြဲ႕စည္းေရး cu a dang 13 points he a fianter hnuah 14th ah League of Nations kong cu hitihin a fianter.
‘Ram nganpipi zong an siah, ram hmetete zong an siah, anmah le an ram cio zalongte le luatte in an um i an ram chungah hnahnawhnak um lote in an um cio nakhnga, ‘Vawleicung Ramkip i Komhnak Bu’ (ကမၻာ့ႏိုင္ငံေပါင္းခ်ဳပ္အသင္းႀကီး? League of Nations)’ tuah dingin a fianter.
Cucaah atu i United Nations Organization cu (Thomas) Woodrow Wilson nih a rak thawkmi a si nain Vawleicung Daihnak caah rian pipa an ṭuanmi a rak um lem lo.

Vawleicung Ralpi Pahnihnak (Second World War) cu 1939 kum in a hung tho ṭhan i Japan Ral ti a si. Mah ral lioah cun Vawleicung pumpi harnak le thihlohnak hun ton dih a si. President Franklin Roosevelt (1933-1945) a thih hnu President Harry S. Truman a kaika Hiroshima khua cu August 6, 1945 le Nagasaki khua cu August 9, 1945 ni ah Atomic Bomb a thlak hna caah Japan ral cu a dai.
United States of America President thimnak cu 1944 kum donghlei ah an tuah i President Franklin D. Roosevelt nih a voilinak President ah an thiam ṭhan i 1945 kum January thla chungah Biakamnak a tuah.
Mah hnu cun February thla chungah Russia ram Nitlak Thlanglei Yalta khua ah Winston Churchill le Joseph Stalin he Vawleicung daihnak kong khua an khang. Mah an meeting ah cun President Roosevelt nih First World War dih hnuah U.S. President Woodrow Wilson nih League of Nations timi bu a rak thawkpi hna nain ṭhiṭha in rianṭuan khawh a si lo caah atu cu United Nations Organization (UNO) tiah a min thleng usihlaw a ṭha hnga, tiah a chuahpi i an hna a tla dih.
Mah U.N.O. kong ceih dingah 1945 kum April 25 ni meeting tuah ṭhan dingah an hna a tla. Asinain President Roosevelt cu a bat tuk ruangah 1945 kum April 12 ni deilei suimilam 4 le minut 45 ah a thi.
President Roosevelt a thih hnu cun Vice President Harry S. Truman cu President ah a kai i President Roosevelt a thihnak ni 13 ni ah UNO kong ceih dingah President Truman cu a kai i United Nations, Ram Zakomh Bu cu tuah dingin an fehter.

Mah meeting cu 1945 kum April 25 ni in June 26 ni tiang an tuah i mah an meeting ah cun ram 50 in kuzale tlingte in an kai. Thlahnih chung Ram Zakomh Bu nih zulh awk phungphai vialte cu tlingte in an suai i, June 26 ni ah cun ram 50 i kuzale cio nih cun hnatlaknak min an thut dih. Meeting i a kai kho lomi Poland ram zong a hnuah hnatlaknak min a thut i an dihlakah UNO chung i a lutmi cu ram 51 an tling. Mah Ram Zakomh Bu (UNO) cu fehternak min an thutnak in thla 4 hnu 1945 kum October 24 ni thawk in run fehter a si. Hi UNO a thawktu le minbunhtu cu US President Roosevelt a si ko.
Tinhmi:-
Ram Zakomh Bu i aa tinhmi cu:

Ramkip daihnak le hualhimnak, zohkhenh ding
Ram khat le ram khat karlakah daw le remte in i komh khawhnak, ṭhanchoter ding.
Ramkip ṭhanchonak, zatlang nunphung (လူမႈေရး), nunphung (ယဥ္ေက်းမႈ) le minung nawlngeihnak buainak vialte hmunkhatte ah ceihmaiṭi ding.
A biapi bikmi Department:
General meeting (အေထြေထြညီလာခံ)
Hualhimnak Council, (လုံၿခဳံေရးေကာင္စီ)
Ṭhanchonak le zatlang nunphung council, (စီးပြားေရးႏွင့္ လူမႈေရးေကာင္စီ)
I zohkhenhnak Council (ထိန္းသိမ္းေရးေကာင္စီ)
Ramkip he aa pehtlaimi Biaceihnak zung (အျပည္ျပည္ ဆိုင္ရာတရား႐ုံး)
Secretary - General Office (အေထြေထြအတြင္းေရးမွဴး ခ်ဳပ္ရုံး)
Secretary - General Office:

Secretary - General zung cu a dang department vialte zohkhenhtu zung ngan bik a si. Mah department dang hna nih ṭuan dingmi rian an suaimi vialte cu a tawlrelpiak hna. Mah cu Secretary - General zung i lutlai a nganbik cu Secretary - General a si.
Secretary - General cu General meeting ah Hualhimnak Council (Security Council) nih ruahnak an chuahpimi cungah an thim i ṭuanvo an pek. Secretary - General nih a rian tampi lakah ramkip i daihnak le hualhimnak a hrawkhraltu a si ti a ruahmi paoh cu Hualhimnak Council ah a chim khawh.
Secretary - General zung ah ramkip in rianṭuantu an chiah cio hna. Anmah cu mah Ram Zakomh Bu chungah caantling chungtel a simi ram in an ra cio i Ram Zakomh Bu ṭhanchonak caah anmah le an ṭuanvo cio a simi rian cu an ṭuan.
Mah Ram Zakomh Bu chung i rian a ṭuanmi hna cu zeibantuk cozah, zeibantuk aana a ngeimi pakhatkhat nih zung rianṭuan ningcang halnak vialte cu an nawl ka zul lai lo, tiah Baibal ca tlaih in biakamnak an tuah. Secretary - General le zung rianṭuan hna i an rianṭuan ningcang le umkalning vialte cu Ram Zakomh Bu chung i aa telmi ram khat cio nih nawlngeihnak i zuam lo ding tiah zulh awk phungphai tuahmi 100nk bantukin ṭuanvo an laak cio.
Ram Zakomh Bu nih an tonmi buainak cu aa dan cio bantukin Secretary - General le zung rianṭuantu hna i ṭuanvo zong an i khat cio lo.
Mah rian hna cu:

Ramkhat le ramkhat lung i khah lonak cu tazavunte in remchunhnak,
Daihnak a um khawh nakhnga i zuamnak,
Ramkip cozah kuzale pawl he ceihkhanṭinak,
Vawleicung ṭhanchonak le tonmi harnak vialte dothlatnak,
Mi ca ṭhathnemnak le leichung chuak thilri chuahnak hmunhma hlathlainak,
Ramkip ah Conference kawhauhnak,
Hmuhtlak theihtlak vialte khawmhsuatnak,
Hualhimnak Council le a dang department cio nih an biachahmi vialte zeitluk dah an ṭuan cio, tiah thawngpang khawmhnak,
Meeting i biachimmi vialte holh dang in lehnak,
Zung rianṭuanmi vialte holh dang in lehnak le
Ram Zakomh Bu i thawngpang vialte cu Vawleicung Thawngthanhnak zungkip ah kuat dihnak … te hna rian pawl an si.

Secretary - General a ṭuanmi hna:
Acting Secretary - General – Hubert Miles Gladwyn Jebb
1945 kum October 24 ni United Nations Organization thawk ni in 1946 kum February 2 ni tiang Alaang Secretary - General rian a ṭuanmi Gladwyn Jebb nih First Secretary - General Trygve Halvdan Lie, Norway mi sinah Secretary - General ṭuanvo vialte cu a hluai.

1st Secretary General - Trygve Halvdan Lie
1946 kum February 2 ni in 1952 kum November 11 ni tiang Secretary - General rian a ṭuan. (A voihnihnak ṭuan caan a tlin hlanah a chuak).

2nd Secretary - General - Dag Hjalmar Agne Carl Hammarskjold
1953 kum April 10 ni in 1961 kum September 11 ni tiang Secretary - General rian a ṭuan. (Mah ni ah cun vanzuanglawng in a tla i a thi).

3rd Secretary - General - U Thant
1962 kum November 30 ni in 1971 kum December 31 ni tiang Secretary - General rian a ṭuan. (Ṭuan caan voi hnih tlingte in a ṭuan)

4th Secretary - General - Kurt Waldheim
1972 kum January 1 ni in 1981 kum December 31 ni tiang Secretary - General rian a ṭuan. (Ṭuan caan voi hnih tlingte in a ṭuan. A voithumnak caah ṭuanvo pek ding an duh ko nain Tuluk ram nih Vito Aana in an phiat).

5th Secretary - General - Javier Perez de Cuellar
1982 kum January 1 ni in 1991 kum December 31 ni tiang Secretary - General rian a ṭuan. (Ṭuan caan voi hnih tlingte in a ṭuan)

6th Secretary - General - Boutros Boutros – Ghali
1992 kum January 1 ni in 1996 kum December 31 ni tiang Secretary - General rian a ṭuan. (Ṭuan caan caan khat lawng ṭuannak nawl a hmumi cu Secretary - General lakah amah pakhat lawng a si. A voihnihnak ṭuan caan caah cun America ram nih Vito Aana in an phiat).

7th Secretary - General - Kofi Annan
1997 kum January 1 ni in 2006 kum December 31 ni tiang Secretary - General rian a ṭuan. (Ṭuan caan voi hnih tlingte in a ṭuan)

8th Secretary - General - Ban Ki – moon
2007 January 1 in 2016 December 31 tiang Secretary - General rian a ṭuan.

9th Secretary – General - António Manuel de Oliveira Guterres
2017 January 1 in nihin tiang a ṭuan lio.

Cc. Sayaci Dr. Bawi Hu UNO Secretary - General hna tuanbia.