NUNTLEH THEIH
Nuntleh ti cu zeidah langhter duhmi a si hnga.
Nun timi cu nunnak hi a si i, tleh timi hi lam hnih in a
sullam fian khawh a si. Tleh timi cu a tlep, a uai, lohralh hram aa thawk tinak
a si. Cun, tleh timi cu a tleek, a bauh, a rawk tinak a si fawn. Cucaah, nuntleh
timi cu nunnak rawhralh hram aa thawk le a rawhralh taktak hi chim duhmi a si.
Laimi kan zumhning ah nuntleh theih timi hi a um.
Mi pakhatkhat kan nu kan pa,
kan pi kan pu, kan fanu le fapa, tufa hna, unau chuak khat nifar tibantuk, thisa
aa naihmi, an thih lai ah siseh, an thih hnuah siseh, cu nunnak huham nih thil
a langhtermi a um i, cucu nganfahnak, zawtnak bantuk phun khin a ra ti a si.
Pheitan vialte ṭhom dih, mizaw bang uaihnaang in um, mitkuh hnaṭam in um
tibantuk te hna khi a si.
A thi hngami thih hlan deuhte ah, a nuntleh cu unau
chuakkhat cingla hna chungin a rak thei chungmi an um i, a thih hnu nuntleh
zong, cuticun theih a si ve ṭhiamṭhiam. Minung huham nunnak sawhsawh, a vung
rawh lai cu minung nih theih lo awk a ṭha lo, an ti.
Cu hmanh ahcun, hringtu nu
le pa, unau chuakkhat fanu fapa an thih lai ahcun an nuntleh cu an theih awk a
si, ti hi chim duhmi a si. Cucu, zeitindah a si khawh? Zeinihdah zeitindah a
chuahter? tiah cun, si khawh a si lomi khi a si hnga.
Nuntleh theihnak cu, hrik
le ṭhah vorh zong in a si, ti a si fawn rih. Ka nu a thih lai ah hin, kan
chungte khar in hrik le ṭhah nih a kan tlunh. Ṭhah ṭaam hrik ṭaam lawngte an si
khun i, khoika in dik ra hna seh law an lo.
Lai zumhning ah cun a thi hnga
dingmi nih a kan vorh ti khi a si ko. Cu ti a si caah, hi nuntleh theih a um
hi, i dawtnak hri a cat cang lai ti hngalhnak le dawt hri cah a har, a fahning
langhtertu intuarnak a si, ti khi a sullam cu a si.
A si kho, a si kho lo,
tinak in, cu nuntleh theih nih kan lungthin le nunnak a rak iap khawhnak nih
khan, cu thil cu a langhtermi a si ko lai. Zeitikhum in kan hei ruah zongah, kan
i dawtnak hri cah lai taktak a har kha, nuntleh in rak theih chung a si, timi
hi zumhnak nung pakhat cu a si ko.
A cung cabia hi 2015 lio, HBC SMD nih Tleicia Pu G. Biak Nawl nih Article a rak ttialcia mi pawl an khawmh i cauk in an chuahmi chung in theihtlei ah tiah ka hun tar chimmi a si. A cauk ning in Chin Library ah chiah ding in nawlngei tu le cauk, capar a ngeitu nih sianh a si cang nain a format tlawmpal remh a haumi a um caah chiah colh awk a ttha deuh rih lo.
Hi cauk chung ahhin Laiholh theihtlei tete tampi aa tel, Kan thlau cang mi holh, kan palh tawnmi holh sullam hna tampi aa tel. Cu vialte a ttialtu Pu G Biak Nawl kong rel na duh ahcun hika hi click in rel khawh zong a si.
Advertisement
EmoticonEmoticon