Dr. Angela Than Than (B.Th;M. Div; D. Min, Ph D; D.Min;Ph D)

Dr. Angela Than Than (B.Th;M. Div; D. Min, Ph D; D.Min;Ph D)
Dr. Angela Than Than (B.Th;M. Div; D. Min, Ph D; D.Min;Ph D) cu: Chin mi lakah  Doctorate Degree lawngte pali a la hmasa bik nu a si.

Angela Than Than cu a pa Pu Kap Ci le a nu Pi Van Lal Kung nih 1957 kum November 3 ni ah Falam ah an hrin. A pa nih 1978 kum chung ah a thihtaak hna i a nu nih a fale 7 cu a hmeihpi hna. Than Than cu fale 7 lakah 5nak a si. A pa cu palek rian a ṭuan i surgeon tiang a phan. Hakha ah kum saupi an um. Amah cu Hualngo miphun a si i Falam ah a chuak ko nain a ṭhan lianhnak cu Hakha ah a si lengah a pasal cu Hakha miphun a si. Cucaah a chim tawnmi bia pakhat cu, Gangaw pa nih, ‘Ka nu le ka pa cu Lai an si ko nain kei cu Kawl ka si a ti,’ an ti bang, kei zong Hualngo mi ka si ko nain Hualngo holh nakin Hakha holh  tu ka thiam deuh; kan holh in thla zong ka cam kho lo,” tiah a kan ruah tawn.

Amah cu tang sarih tiang a chuahnak  khua Falam ah a cawng i tang riat le tang kua tu cu Yangon ah a vung cawng. Tang hra cu Hakha ah a cawng Hakha in tang hra camipuai cu a awng. Tang hra a awn cangkate cun Hakha Banzung ah L.D.C rian in a lut colh i kum nga a ṭuan hnuah U.D.C. ah a kai. Banzung ah cun kum hleikua tiang a ṭuan i Assistant Supervisor tiang a rank cu a kai.

A pasal cu hlan lio radio hlasak minthang Clifford Van Thang a si i 1977 kum May 17 ni ah an i um. A pasal cu music band rak ngei kaw vawlei nuamhsaihnak ah a caan saupi a rak hmang. Asinain amah he an i um hnu cun thla a campiak lengmang i 1981 kum chung ah Khrihfa taktak ah a hun i cang ve.
Atu cu Pathian rian a ṭuan cang i ordnation zong 1987 kumchung ah a hmu ve cang. Cun an nuva an upat hnuah Baibal Sianginn an kai ṭi i Pathian lamhruainak thawngin 2009 kumchungah Ph.D. degree zong an la ṭi.

An i umnak cu kum 33 a rau cang nain an van a chia i hrinsor fanu le fapa an pomcawi rih lo nain Thlarau fanau tu cu tam nawnte an ngei ve cang. Amah cu 1978 kumchung in Pathian dawtnak a rak thei i a piangthar.
An nupa cu Pathian dawtnak an theih i an pianthar hnu cun CJC bu (atu Believers Church) ah 1983 kum ah an lut. CJC bu an luh hnu cun amah cu Nubu lutlai (Chairperson) ah an thim i kum kul deng a ṭuan.
Amah cu Banzung i kum 19 a ṭuan hnuah Bank Loan kongah tuaitamnak a hung chuah caah a rian cun suspend an tuah. Mah lio caan ah cun India ram ah C.J.C. civui zawh ah a hawile he an kal. An hung tlunlei ah Rih Tidil pawng an phanh ah an mawṭawka cu aa let i an tla.
Mah ah cun a ke le a kut a kiak i siizung ah kum khat reng lo a thlopbul. Siibawite nih “A kut a kiak mi hi cu a dam ṭha ko lai nain a ke hi cu tan loah cun a dam kho lai lo; a thih zong a thi kho men ko.” tiah an ti. Asinain amah nih ketan cu a duh lo.
“Ka ke an ka tan ahcun zeitin cun dah ke khat lawng cun Bawipa thangṭhatnak ah ka laam khawh ti lai; kai thihpi zong le poi hlah,” tiah a ti. Mah ti cun Bahosi Clinic ah cun lungdong le derthawm ngaiin a um lioah raifanh le zawtnak dangdang nih an chuahhnawh ṭhan hoi i umtu awk hngal loin zarh khatchung cu chunzan hngal loin khua a sa.
Siibawite nih an lung a rak dong ngai i ‘zeitikdah’ tiah a thawte lawng zoh cun khua an chim i zankhua an dei. A-tet-ke sii lawngte voi li an chunh i major operation lawngte voi hra an tuah.
Mah cu chung vialte ah cun Bawipa zumtu vialte nih lungdong lote in le lungtakte in anmah le an umnak hmun cioin thla an rak cam cionak aw thawng cu Bawipa nih a theih i duhsahte in a thawchuah le a mit-au hna an hung ṭha deuh i a thimi cazin chung i chiah cangmi le ke tan ding a simi chungin Bawipa nih luatnak a pek  caah duhsahte in damlei ah a hun i chep ciahmah.
A chimmi bia cu, “Siizung ka um chung vialte ah thlacamnak in siseh, chawva ngeihchiah lei in siseh, pumsa hrimhrim in a ka zohkhenhtu le a ka bawmchantu vialte nan cungah ka lunglawmhnak cu hi cauk sunglawi hin ka hun langhter.”

Dam ahcun le a hnu zulh khawh ahcun Banzung ah rian luh ṭhan khawh ding a si ko nain, Bawipa a duhpiakmi lam dang a rak um caah a si lai cu, a rian in an dinhter. Mahlio, thihnak thlanmual tlangri i a um lio le thitha derthawm ngaiin a um lio caan i a rian in an dinhternak thawng a theih ah cun a lung a rak fak hringhran i, “Bawipa, zeidah na ka khaukhihmi a si?” tiah thlaza a rak cam.
Bawipa nih, “Ka fanu,  nangmah nih na ka thim lo, keimah tu nih kaan thimmi na si; ka rian tu ṭuan deuh ko, Baibal sianginn ah na kai lai,” tiah a rak ti. (John 15: 16)

‘Vanchiatnak hi lam  khat lawng in a ra lo,’ ti mi  Mirang phungthluk hi a hmaan ko rua. Amah cu siizung in a ṭum tlawmpal ah, vansan tuk lio  kan ti fam cu, ramdang khoika maw ah va i thlop ning law ti saduhthahnak he ‘blind faith’ in passport a tuahter hna.
Vanchiat kan ti cu, passport kong ah amah he min aa lomi nu tlaih dingin an kawl liote (cu an kawlmi nu cu a rak zaam manh) a si caah amah le nu dang 2 an tlaih hna i a hmatuampi he cun thong ah thla khat an thlak. Cu zong cu Bawipa remruat a rak si ko.
888 lio i minung 3 a thah ruang ah thong a tla mi ‘888 Daw Ohn Mya’ ti mi  nu le a hawile minung 10 hna cu thong inn chung i Thawngṭha a chimhnak hna thawng le thla a campiaknak hna thawng in Khrifa ah an cang. Thong ah rak thla hlah hna sehlaw hi nu hna hi Khrihfa ah an cang hnga lo. Thong ah cun thla khat khengte an thlak i an chuah hnu cun an inn ah aa thlop.

Thongchung cun a chuak cang si kaw, harnak le lungretheihnak vialte a in dih hnu cun Baibal ca a cawnnak kong hun ṭial duahmah cang tuah usih. A cunglei ah langhter cang a si bantuk in ‘Bawipa nih Baibal ca na cawng lai a ka ti,’ tiah a pasal le a hawile pawl a chimh tik hna ah an nihsawh, capo ah an thlak.
Asinain bawipa biacahmi a si caah Baibal sianginn ah kai awkin aa tim i G.F.A.B.C (atu BCBS) ah zakceh ṭhiangṭhunh he a kai i mah sianginn cun B.Th. degree a lak hnuah MEGST Baibal sianginn ah M.Div a kai ṭhan i a awng ṭhan. M.Div a awn hnuah mah Baibal sianginn ṭhiamṭhiam ah cun Bawipa le upate bawmhnak thawng in Registrar rian kum 2 a ṭuan.
Registrar rian a ṭuanmi ah cun aa nuam ngai ko nain, a lung in saduh a thahpengmi cu ramdang ah kal i doctorate degree pakhatkhat va cawn i va lak kha a si. Cucaah ramdang cacawnnak sullam a hngalmi sayate le a hawile kha a hal chun tik hna ah a caah lam a um lo bantuk in an ti cio.
A sul le lam bik cu ‘Mirang holh’a thiam lo caah a rak si. Asinain a lung a dong lo i bawipa sinah hehlawh tiah lungtakte in thla a cam. Cucaah ruah lopi in 2004 kumchung ah a pasal cu Manila ah Doctor course cawng ding in an thim i a kal. A pasal a kal khawh cang caah amah zong cu kalnak lam a awng ve te ko lai, tiah ruahchannak nganpi a ngei.
An pa cu Manila ah  cun a hei chawnh i, ‘kum voi cu ka ra kho ve hnga lo maw?’ a hei ti. An pa nih, ‘Keimah lawng hmanh nikhat rawl voi khat lawng ka ei. Na rat ahcun kan i cawm kho lai lo,’ tiah a rak ti caah a lung a dong ngai.
Asinain Bawipa nih ka caah thil  ṭha a khan te ko lai, tiah a ti i duhsahte in an ngeihmi innchung thilri vialte, TV, salawng le seṭee tiangin a zuar dih hnuah amah te nih Manila kalnak khua cu aa khan i 2005 kumchung ah Manila khua cu a va phan ve.’ Manila khua a va phanh hnu tu cun Pathian nih hawikom tete a kawlpiak hna; a pasal zong cu cachimtu ah an hun hman.
Cun an pahnih cun assistant pastor ah hmun hnih ah an hun hman hna. Cucaah an khuasaknak zong a hun i ning deuh ngai leng ah D.Min le Ph.D. an cawnnak ah  an lohma zong cu tluangtlamte in Pathian thawngin an chuah khawh veve.
Ma Angela Than Than cu D. Min. degree a hmuh hnu cun Dr. Angela Than Than ti a si cang lai. Doctor degree a hmuh cu lunglawmh awk a si lioah, khatleikam in ngaihchiatnak nih a rak tlunhhnawh ṭhan. Zeidah a si tiah, a nu nih, ‘Ka derthawm cang, sau ka nung ti lai lo, hung tlung ta law ka duh,’ tiah a cah.
Tlunnak tangka an ngeih lo caah tlun khawh loin a um i a nu cu a bia bantukte in caan sau nun loin zawtfak lote in a thihtak taktak. A thih hnuah hawikom bawmhnak in Yangon ah cun a tlung i a nu thaw a tanh ti lo hmanhah a ruak te lawng a tanh. A nu he bia i ruah ta manh lote in a liamtak caah nihin tiang a nu zuunngaih in khua a sa.

Dr.Angela Than Than cu Manila Theological College & Graduated School in D.Min. degree cu a la i a ṭial mi dissertatian tittle cu, “The Impact of Church Management, Leadership  & Pastoral Care on Church Growth in Selected Christian Churches in Metro Manila: An Assessment,” ti a si. Cu hnuah a Ph. D.degree a laknak ca i dissertatian tittle cu, “The Philosophical Insight of Jesus Chrst’s Teaching: A Theological Perspective,” ti a si.
Mah hnu cun Dr. Dennis Shu Maung Coordinator a ṭuannak, Lai mi tam bik an kainak, sianginn minthang Union Theological Seminary ah D.Min a kai ṭhan i a pahnihnak D.Min dissertation cu “The Significance of Some Buddhist Practices in Thinkyan for the Formulation of Christian Mission Strategy in Myanmar,” ti a si. A tu cu D. Min; Ph. D; D. Min, tiah Doctorate degree lawngte phun thum a la cang. A tu cu a hnu bik Ph.D a laknak kong ka hun ṭial ṭhan lai.
Dr. Angela Than Than cu, a dangah cun ka hngal lo, calei ah cun mi duhfak, doctor pathumthum cu a za cang hei ti awk te. Kei hei sininglaw doctor phun hnih a za cikcek, duhfah tuk cu Bawipa zong nih a duh lai lo, ka ti hnga. Asinain anih cu a si lo.
Cun thil dangah a duhfak sehlaw cu uar a um hnga lo. Atu cu hohmanh nih zuam ngam phun a si lomi calei ah, a duhfah hi ka uar chin lengmang. Miphun a kan cawisangtu duhfakmi Chin mi nusal ṭha pakhat a si.
Hakha ah a hung kan tlawn ah ka vung leeng hna i a doctor hmuhnak kong cu a ka ruah i ka khuaruahhar lei ah doctor mah zatzat hmuh cu, ‘ka cheu ve’ tiah ka hal nain mi duhfak kan ti cu a ka cheu duh lo. Miphun ca i duhfah cu Bawipa zong nih a duh ve ko lai. (caṭialtu)
A donghnak bik Ph.D a cawnnak sianginn cu Philippine Christian University a si i Manila ah University min thang bik pakhat a si i 2007 kumchung ah kum zakhat tlinnak Jubilee zong an tuah.
Tuition fee zong a tam hin. Nihin tiang a cacawnnak leiba nih a zulhpeng rih ko. Mah ka University cun Christian Education in Ph.D a la. A sayate nih, “PCU hin Christian Education in Ph.D a lami hi kutbor khat zat lawng an si rih, nan ram caah vai zuam,” tiah an cah.
A Ph.D degree hmuhnak ca i a ṭialmi dessertation cu, “Transforming Human Life by the Renewal of the Mind: Developing a Relevant and Effective Christian Education Program for the Churches in Myanmar,” ti a si.
Harnak le ningzah ngaihchiatnak a rak ton len lioah khan cun Noami bang “Mara” tiah kawh tlak in a rak i hmu. Atu ahhin cun hlan lioah a rak tonmi ningzah ngaihchiatnak, fahnak le aihramnak vialte kha Pathian remruat lawngte an rak si ti aa fiang cang.
Hi a tuanbia ṭialmi a reltu vialte hna zong nih harnak nan tonmi cu Pathian nih hmailei nan nunlam caah thil ṭha a chuahtertu dingin aan tontermi hna a si, ti hi zum ngam cio u law ti a duh. (caṭialtu)
Dr. Angela Than Than Biacah : Kan pa he tartoi ah Ph.D kan laakmi hi kan Lai mi nih fimcawnnak caah  kum tar ti a um lo, ti kan theih, kan zumhngamhnak caah tette si hram seh ti ka duh.
Cu lawng si loin ka hmuhmi doctorate degree hna zong hi ka thiam ruangah si loin Bawipa nih ka zumhnak cungah hlawhtlinnak a ka pekmi an si caah Pathian bochan bute in ca kan cawn ahcun, “Ka zumh lo nih chi ka barh,” timi kan Lai Phungthluk bang kan phut lo degree hna zong Pathian bawmhnak thawngin hmuh khawh an rak si ko, ti kha ṭhangthar mino hna nih an theih ka duh fawn.
Thiam ruangah si loin Pathian veel le zaangfahnak thawngin ka hmuhmi degree hna hi uanthlarnak caah si loin amah Pathian sunparnak lawngte ah ka hman khawhnak lai hi capar a rel tu paoh nih thlacamnak in ka bawm cio u kai lawm.
Lunglawmhnak: Calei rianṭuannak ah kan Hakha miphun chungah minthang bik a simi kan pa Dr. Bawi Hu nih cauk sunghar a ṭialmi chungah a ka telh ve caah a cungah keimah lawng si loin kan chungkhar dihlak in kan i lawm hringhran. Bawipa nih nunkhua saunak thluachuah ko seh. Than Than.
cc : Than Than nih a mah tuanbia a ṭialmi chungin.
Hi tuanbia hi Sayaci Dr. Bawi Hu nih Chin Hmaisuang hna tuanbia a ttialmi Section 1, 2011 lio i a rak chuahmi chung in kan lakmi a si. A tang ah Catialtu tuanbia le biahmaitthi a ttialmi LINK in ka chiah. 
Cattialtu Sayaci Dr. Bawi Hu Tuanbia hika ahhin rel khawh a si.
Biahmaitthi rel na duh ahcun Hika catlang hi click

Advertisement