Chin Hmaisuang Hna Tuanbia Biahmaiṭhi

Biahmaiṭhi

Saram lakah a ngan bikmi vuipi nih amah kalnak sulte a ngeih bantuk le zuu lakah a hme bik ngaicim zong nih amah kalnak kongte a ngeih ve bantuk in, minung zong mi lian mi ngan le mi minthang hna nih tuanbia dawhdawh an ngei i, zapi zaraan mi sifak pawl zong nih mahle sining ciote in tuanbia rak ngeih cio a si ve. Tuanbia a ngei lomi minung hohmanh um a si lo.

Mah bantuk cun a tu i kan hun ṭialmi “Chin Hmaisuang Hna Tuanbia” ah minung 31 le “Chin Minlang Hna Tuanbia” ah minung 9 hna zong hi an tuanbia le an sining an i dang cio. Chin miphun hi, miphun dang ka hngal hna lo, mahle tuanbia ṭial hi zeiah a rel deuh lomi miphun kan si. Kan pale mi fimfim, mi thiamthiam le saya ṭhaṭha hna zong an liam i tuanbia dawhdawh an i liampi dih ko. Atu ah hnu hun zulh awkah an har ngaingai cang. Hmailei ah hi bantuk tuanbia hun ṭial duh tikah harnak kan ton nakhnga lo tuchan minung nih mahle tuanbia cu fale caah ro pakhat roh ah hun ruat cang usih. Nu le pa tuanbia cu fale caah rosung a si zia hun fiang cang usih. Mah an tuanbia hun ṭialmi minung 40 lengah hin ṭial awkin ka ruahmi an um leen rih nain an tuanbia ṭial tlak tiang hngalh fiang lomi le hngalh khawh lomi an si.

Fianternak: Chin Hmaisuang Hna cu Chin miphun caah Rolung a phun hmasa biktu an si i, Chin minlang hna tu cu Chin miphun nih theihhngalh deuhmi le miphun caah rianṭuan kho deuhmi an si.

Nihin tiang Chin mi nih tuanbia rolung ṭha a phunmi cauk le magazine kan i ngeih cangmi hna cu:

1. Falam High School Diamond Jubilee (1906-1981) Magazine.

2. Tedim BEHS No. 1 Golden Jubilee (1948-1998) Magazine.

3. Hakha BEHS No.1 Golden Jubilee (1948-1998) Magazine.

4. Falam Christian Literature Society (F.C.L.S), 2006 kum-chung chuahmi “Chin Mi Langsar pawl le Pathian kutneh Mawizia” timi cauk.

5. Hakha Chin Association for Christian Communication (C.A.C.C), 2006 kumchung chuahmi “Chin Sining Tuanbia” timi cauk.

6. “U.S. Presidents Tuanbia,” 2009 kumchung chuahmi cauk.

7. “Lautu Thluachuah,” 2009 kumchung chuahmi cauk.

8. “History of Catholic Mission in Chin Hills Diamond Jubilee (1934-2010), 2010 kumchung chuahmi magazine le

9. “Chin Hmaisuang Hna Tuanbia,” 2011 kumchung chuahmi cauk hna an si.

“Vawleicung Minthang Hna Tuanbia” timi cauk cu 2012 kumchung chuah dingin saduhthahnak ngeih a si i minung 146 an tuanbia ṭial dih a si cang; minung 200 leng an tuanbia le an hmaanthlak ciote he hun chuah a si lai.

Motto: “Teinak cu Bawipa ta a si” (Jonah 2:9)

Dr. Bawi Hu

2011