Pu Van Mang & Pi Tial Nawn By Pu Chawn Kio

PU VAN MANG KONG:

Pu Van Mang cu Sangte bawi Lian Mo fa a si caah Ramuk bawi cu a si i, Mirang an kai tikah an zoh i, mi uk kho dingah an ruah caah anmah aiawh in uktu ah an chiahmi a si. Khuachiah rawlrel le nawl ngeihnak he Mirang nih an chiahmi a si ko nain mi kut tang um kha a duh lo i, 'Laimi hi mi kut tangah a um balmi  kan si lo' a ti caah Mirang cu a doh hna i Lai-ral a thawh pitu a si.  Cucaah cun Mirang nih an tlaih i thong ah an thlak. A bia cu an ceih i hiti hin bia an chah:

"Vanmang and Ṭialnawn, son and daughter inlaw of Lian Mo, sentence respectively to death; and transportation for life in Session Trial No.1, 1918-19 under section 121 I.P.C.; Former sentence comuted."[1]
Sd/-
C.B.Smith
(Van Mang le  a nupi Ṭial Nawn, Lian Mo nau fa, cu  1918-19 Bia Ceihnak No.1, Upadi No.121 ning in an sualman caah Van Mang cu thah siseh law, Ṭial Nawn cu thih hlan lo Ramdang ah thawl si seh. A hmasa biaceihnak kha cu hrawh si seh), ti a si.

Hlan ah cun catial a rak um lo caah Pu Van Mang hi a chuah kum le a  bawi ṭuan caan hi fiang in hngalh khawh a si lo.  Asinain kum 1958 ah a nupi (Nutlai) Sun Zing he khuang an cawi i, hihi a khuang cawi hmanung bik a si an ti. Khuang a cawi a kumvui ah (3.10.1958)[2]  a thi i,  a lungphun ah "Pu Van Mang, a kum 75" tiah an ṭial caah kum 1884 ah a chuakmi a si ti hngalh khawh a si(1959-75=1884).

Van Mang a pa Lian Mo hi mifim a si i Sangte bawi lakah a lian bik a si
 A pa Lian Mo chan ah Mirang an hung kai hi a si i, Mirang kai hnu ah uknak a laak caah Ramuk rian a ṭuan hi cu 1900 hnulei ah a si lai. Kum 1890 ah Mirang nih Halkha peng cu an rak lak i an uk hna tikah, Ramuk bawi dang hna cu Mirang cu an ṭih hna i dai tein an kut tangah an um. Asinain Pu Van Mang cu Mirang kut tang um cu a duh lo caah Halkha, Mi-E le Senthang peng kha a pumh hna i, Lairal cu a thawhpi hna.

Cucaah cun Mirang nih cun an tlaih i Monywa thog ah an thlak. Pu Van Mang cu thong ah tla hmanhselaw, a nupi Ṭial Nawn nih Laimi cu a thithruai hna i, Sakta khua i Lairal thawhnak meeṭing an rak tuah lio zongah hin Pi Ṭial Nawn cu Mi-E peng le Zokhua peng chimchawntu dingah ṭuanvo an rak pek. Cucaah cun Pi Ṭial Nawn cu Pu Van Mang naupa Pu Kim Hmung he an rak tlaih hna i Monywa thong ah cun an kuat ve hna.

Monywa thong ah kum 3 an thlak hna hnu ah Pu Kim Hmung le Pi Ṭial Nawn cu an thlah hna i Pu Van Mang cu Tiddim thong ah an hun ṭhial.  Pu Van Mang cu Tiddim thonginn ah cun kum 4 an thlak ṭhan i, Lairal cu a hung dai.  Lairal a hung daih caah cun Pu Van Mang cu an ngaihthiam i 1923 kum ah an chuah ṭhan.

Pu Van Mang hi 'thah ding' ti a si ko nain miralṭha le miṭhawng a si caah Mirang nih anmah aiawh in uktu caah an duhmi a si caah an ngaihthiam than.  Khuangli bawi Pu Sang Cung Nung he hin Monywa thong ah an rak thlak ṭi hna i, Pu Sang Cung Nung cu Kawlholh thiammi a si caah Pu Van Mang i a cawngnak puan kha thonguk bawi a rak thenhpi i thonguk bawi nih a dawt caah Tiddim thong ah an hun ṭhialnak kha a si.[3]

Pu Van Mang cu thong a tlak karah a innpi lam 60 cu Mirang nih an rak ṭheh i siangngakchia umnak inn (Boarder) ah Dawrhlan sang atu Pu Bachit innhmun ahkhin an rak sak i, khua kipin khuabawi fa le Ramuk fa cacawngmi pawl umnak ah an rak hman.

Pu Van Mang le Pi Ṭial Nawn cu Lairam an dawt ruangah uknak le nawlngeihnak vialte kal takin ram caah an nunnak le an ngeihchiah vialte an pek ngam caah Laimi caah cun General Van Mang le Brigadier Ṭial Nawn ti awk an tlak.
SANGTE BAWIFUNG:

Pu Van Mang cu thong ah an thlak caah cun  Sangte bawi a ṭuantu ding cu an um ti lo i, a nau milai pa Mang Ceu kha Falam ralkap ah a tlami a um i,  Mirang nih Mang Ceu cu ralkap cun an phuahter i Van Mang bawifung cu an pek. Mang Ceu a thih tikah Van Mang cu a thong in a hung chuak cang ko nain a bawifung cu amah nih ṭuan awk a si ko nain Mirang nih, Van Mang kan pek ahcun ral a thawhpi than sual hna lai ti an phan caah Mang Ceu fapa Pu Kio Mang tu kha 1931 kum in Sangte bawifung (Ramuk rian) cu an pek. Pu Kio Mang nih kum 1931 in uknak a lak i 1948 kum, Ramuk rian a dih tiang Sangte bawi (Mi-E chief) cu a ṭuan.

Zohchih mi Cauk
Headman Register:  Signed by C.B.Smith, Haka Sub Division Officer
Pu Kio Mang dairy (The latest Sangte chief): Read on 13.12.1987
Pu Ral Sai Lo, son of Sangcungnung: Interviewed on 27.12.1988
[1] Headman Register:  Signed by C.B.Smith, Haka Sub Division Officer
[2] Pu Kio Mang dairy (The latest Sangte chief): Read on 13.12.1987
[3] Pu Ral Sai Lo, son of Sangcungnung: Interviewed on 27.12.1988
Hi tuanbia hi
Pu Chawn Kio: Chin Miphun Thawhkehnak Tuanbia chung in lakmi a si.

Advertisement