Pu Geaffrey Biak Nawl (1945-2012) Tuanbia

Pu Geaffrey Biak Nawl (1945-2012) Tuanbia
Chuahsemnak: Hakha Khuahlun Farhual sang um Pu Al Khar (Zathang Darkhuah) le Pi Mang Caan (Cinzah) i an fapa hniang a si. Japan ral thian hnu 1945 kum December 2 ni ah Hakha khua, Cawbuk ah a chuak. Chuahpi unau, nifar hleiriat an si i pa 5 le nu 6 an nung. Pu Al Khar hi chuahpi unau le nifar a ngei lo i Pi Mang Caan zong hi Pi Nak Iang (Thanda nu) timi u pakhat te lawng a ngei. Cucaah Pathian nih tefa thluachuah a pek hna, tiah an chim tawn.
Sianginn kai nak: 1953 kum in sianginn kai hram aa thawk i 1964-65 cacawn kum ah tanghra a awng. Cu lio caan ah cun tang li, tang sarih le tanghra hi cozah camipuai lawngte an rak si dih Titcuar nih aa zawhphanh lo caah College ah pehzulh khawh loin a cacawn a baan.
Rianṭuannak:1965 kum ah Hakha Township Trade office ah cazi (L.D.C Stock Account) a ṭuan i 1967 kum ah rian thar, Joint Secretary, Hakha Township Workers Council ah aa ṭhial. 1967 kum ah Hakha Township Party Unit E.C member ah an thim. Hakha Township Workers Asiayone le Workers Convention deligate cu a kemhchih. 1981 kum ah Hakha Party Unit Secretary ah an thim i 1988 kum tiang a ṭuan.
Training kainak: 1965 kumchung ah Trade Account Training, 1967 kumchung ah workers Cadre Training, 1973 kumchung ah Party Cadre Training le Basic Political Science Training, 1973 kumchung ah Party Cadre Refresher Course, ti in tlamtlingte in cawnnak le awnnak a ngei.

Nupiṭhitnak: 1976 kum July 30 ni ah Nu Sem Thluai he an i um. Nu Sem Thluai cu Farhual sang um Pu Tei Thuan (Kingbawl) le Pi Ngun Baang (Sangpi chung) i an fanu hniang a si. Amah cu Hakha Township Administration office ah cazipi (U.D.C) a ṭuan liomi a si. Amah he fanu pakhat le fapa pahnih an ngeih hna.

A fa le:

1. Pi Monica Ṭial Len Zing + Pu Zai Ṭha Kung, an fa le ah (1) Joshua Mang Chawn, (2) Solomon Cung Ceu Thawng le (3) Rachel Van Biak Thluai an si i atu hi a tu an umnak cuUSA Texas state, Ausatin ah a si.
2. (Philemon Sui Cio )
3. Gideon Zai Ṭha Hnin + Pi Fam Hniang, an fa le ah (1) Peter Siang Hlei Hmung, (2) Stephen Van Biak Thang le (3) Susana Far Tum Sung an si i atu an umnak cu Hakha ah a si.

Music cawnnak: 1956 kumchung ah sang Khrihfabu tuahmi Tonic Solfa Siangbawinu kuttang ah hlahruaitu le hlaremh satu sinak cu a laang in a cawng. Cu hnuah 1960 kum in Western Music cu biatakte in cawn hram cu aa thawk i, vocal music, instrumental music cu kum sarih chung lung saute in study cu a tuah. Kum thumchung Works study he kum hra a rau. 1960 kum ah a hmasa bik a phanmi hla cu. “I Tim Cang Tuah U.” timi hlaremh a si. Hla fung 5000 reng lo a phan i vawleilei hla hi fung 1000 hrawng cu aa tel ve. Music lei rianṭuannak hi Ministry pakhat khan in aa ruahchih caah, hlasak cawnpiaknak voi 200 reng lo, hlaphan cawnpiaknak 25 le instrumental cawmpiaknak voi hra hrawng a cawnpiak cang hna. Cu lengah Chin Christain College ah kum kulchung music a cawnpiak cang hna.

Khrihfabuchung rianṭuannak: 1960 kum in HBC ah C.E upa a ṭuan i 1965 kum in Hakha peng C.E. rianṭuannak ah aa tel ve. 1972 kum ah HBC nih Khrihfa upa ah an thim i chairman ah 1986 kum tiang an hman. 1991 kum in HBC zung-uk le Account rian a ṭuan. 1999 kum in HBC music director (musician) rian ah aa ṭhial. 2005 ah rikhiahmi kum in kumtling Pension a si cang nain HBC nih an sian lo caah kumkhat voikhat lengmang in bawmh an hal ia thih (2012) tiang a ṭuan.

CCC le CACC Rianbawmhnak: 1990 kum thawk in CCC cu an dirh i Music Lecturer cu caanlaang in a bawmh hna. CACC rianṭuannak zongah calei rianṭuannak, nunphung lei, hlalei le audio-visual rianṭuannak ah a bawmh pah lengmang hna. Baibal ca, hlaca le Lai Dictionary le Grammar zohfelnak zongah a bawmh pah lengmang hna. “An chim Duh Mang le Dar Din bang” timi film kha a tuanbia in a ṭial i scrip writer zong amah a si.
HBC Khrihfabu rian pipa ṭuannak: 1970 kumchung ah HBC tangka tawlrelning le zung rianṭuanning a chuahpi. 1979 kumchung ah HBC Phunghram, phungphai, phung tengnge le phung mumai te hna a chuahpi i mah rian commission ah Chairman a ṭuan CCC tangka tawlrel ningcang zong a suaipiak hna i tangka zong kum thum chung a tlaihpiak hna.

Upat peknak: 1994 kum February 23 ni HBC Sunday (HBC kum 86 tlin ni) ah hlaphantu upat peknak le laksawng le Certificate,
1999 kum February 28 HBA nih tuah mi Chin Evangel Centenary, Chuncung ah laksawng medal le Certificate cu hla tam bik a phantu ti upat peknak in;
1999 kum April 1-4, ZBC tuahmi Chin Evangel Centenary, HBC ah hla pipuam phantu upat peknak laksawng le Certificate,
2001 February 18 ni HBC Sunday ah (1972-1995) tiang kum 23 chung aa peh in Khrihfaupa ṭuan upatpeknak laksawng le Certificate,
2001 kum November 17 ni YMCA Golden Jubilee, Yangon, Kawl ram pumpi hlaphan zuamnak ah Jubilee Anthem (English) in 2nd Prize a hmuh i laksawng le Certificate,

2001 kum December 23 ni ah HBA, HBC Church School Fellowship nih Hlaphantu upat peknak laksawng cio le Certificate pakhat cio,
2002 kum February 10 ni ah Immanuel Baptist Church, Hakha nih hlaphantu upat peknak laksawng le Certificate,
2002 kum November 4 ni ah Bethel Baptist Church, Hakha nih hlaphantu upat peknak, laksawng le Certificate,
2003 kum February 15 ni ah a voi 15nk Triennial Civui, Dauchim ah HBA nih hlaphantu upat peknak, laksawng, Laithuam le Certificate;
2003 kum March 21-23 ni tiang ZBC Golden Jubille le ZTC Silver Jubilee ah ZBC nih hla pipuam phantu upat peknak laksawng le Certificate;
LBC, Yangon Minobu le Music Komiti nih upat peknak roca le a dangdang upat peknak a ngeih.
2009 kum March 8 ni ah CCC a voi 16nk Degree pek ni ah CACC nih upat peknak. Master of Arts in Music degree an pek.

Hringtu nu le pa keneh zulhnak: Hringtu a nu le a pa hi Hakha ah Khrihfa a si hmasa an rak si ve i, HBC an rak dirh lioah kum 10 hrawng mino ngakchia in a pa cu a rak i tel ve.
An thih tiang an Khrihfabu chungah anmah le an ti khawh tawkte in an rak ṭuan ve. Pu Al Khar cu Rev. Sang Ling chan in Johnson siangbawi chan 1960 kum tiang Khrihfa upa a ṭuan i Pi Mang Caan zong nubulei ah a rak i tel vemi a si.
Pu Al Khar cu 1952 kum October 31 ni in November 1 ni tiang rak tuahmi ZBC Constitution Drafting Committee chungtel a rak si. Pathian dawtnak le zaangfahnak thawng in Hringtu a nu le a pa keneh dawh cu Pu G. Biak Nawl nih a zulh khawh.
Pu Geoffrey Biak Nawl a thihnak: Pu Geoffrey Biak Nawl cu amah kum 67 (2012 September 9) ah (ေရယုန္) zawtnak (Laiholh in Rizun zawnnak) in a nunnak a liam.
Rosung Chiah Taakmi:

• Khrihfa Hlabu chung ah a hla phanmi fung (17) aa tel.
• Nunphung le caholh kong cu capar (74) a kan ṭialpiak mi HBC nih an chuah.
• Cun Lai Pupa Fim Thiamnak timi cauk 1 a chuah.
• Tonic solfanotation ning cang tein cawnnak cauk mirang ca he Laica he tlamtling tein a kan roh taak.
• Cun Hlaphanning cauk zong sianghleiruun tiang cawntlak in Mirang ca in a kan roh taak.
• Zei miphun hmanh nih an ngeih rih lomi Psalm hla fung 1nak in 150 tiang a aw a kan bunh piak i a cauk in a kan roh taak.

Pu Geoffrey Biak Nawl nih A nun chung ah tuanbia roling tampi a kan chiahta mi KAN PA pakhat a si. Laimi nih Tonic Solfa lei ah philh khawh lo dingmi KAN PA pakhat a si. Bia le Hla lei ahcun amah tluk in bochanmi KAN PA hi Laimi lak ahcun an har cang ko lai. Hi tuanbia hi 2019 hringtu pa le upat peknak can ah tiah kan tar mi a si. A roling tuanbia hi kan miphun chung ah nung hram seh.
CC:

1. Sayaci Dr. Bawi Hu Chin Hmaisuang tu hna tuanbia Section 2 No. 1, 2011
2. Saya Stephen Hniang Ceu Ling (HBC) Pu G. Biak Nawl kong chimmi 2019

A tang ah 2002 Muko Editor Salai Joel Ling nih biahalnak a tuah mi ka taar chin... An sian lo si le ka hnawh tthan te lai.

Kum 2002, May thla i Muko Editor Salai Joel Ling nih interview a tuah lio ah, Pu G. Biak Nawl nih a hla phuahmi fung zeizat dah a si ti a chimmi ah, “Zuun hla he, ram hla he, biaknaklei hla he a dihlak ah fung 4,000 (THONGLI) leeng an si lai ka ti” tiah a chim.  “Pu G. Biak Nawl hi a hla phuahmi, fung 5000 hrawng hmanh a si lai a timi an um hna i, khawmhpiak tthan khawh i zuam ding a si” tiah Pu Lian Uk nih a chimchap.
Biaknaklei hla remk awk cauk a kan ttialpiakmi lakah, “Salm” cauk i a dal le a caang vialte khi Tonic Sol-fa a bunh dih hna i Chinmi caah ro sunglawi tuk a ka tlempiak ta.
Hakha – Laiholh in ‘Khrihfa Hlabu’ English Text in a leh rak palh sualmi pawl, tharchuahtu (revise) ah hriam bang an rak hmanmi a si. Hi hlabu remhnak kong he pehtlai in a nun lio ah a rak chimmi, “Rev. Dr. Van Bik nih a ka fial tawnmi cu, ‘hi Khrihfa hlabu ahhin, English Text ning in rak leh theng lomi le Laiholh aa sengtlai tuk lomi tampi an um i, HBA hla komatti hi na bawmh hna ah a ttha, a ka ti. Tahchunnak ah: ‘Na bia zumh lo ahcun, an rawk ngaingai lai ta; hi bia kha kan sak lai ta’; ‘Amah nih a thi,’ ‘Sual thlahnak daihnak a lian’, “A ngan sibawi a si ko,’ timi Laiholh aa sengtlai lomi tete tampi an um” tiah a rak ti. Hi a rian le a bia nih hin Pu G. Biak Nawl hi Mirang le Laiholh hrimhrim a rum ngaingaimi a sinak an langter.
Hi tluk in music a thiamnak uar a um khunnak cu, chimtu saya ngei hmanh a si lo, amahte nih ai zuamnak kha Pathian nih kan miphun, Music World ah suttungpi bang dir dingin thluachuah a peknak hi a si. A nun lio ah a rak chimmi bia: “Musical Courses hi kum 6 chung study ka tuahmi a si. Cawnpiaktu ka ngei lo. Cauk tialtu hna le a lang in courses a ka kuatu hna hi ka saya cu an si ko” tiah Muko Editor Joel Ling sin ah a rak chim.
A miphun chung in hla hruaitu, hla sakthiam le hlaphuahtu sin ah biacah a rak chim balmi:
Hla Hruaitu sinah, “Khrihfa kan caah Choir cu biapi bik a si caah, Choir hla a pipa deuh sak i zuam le tthanchonak ngeih ding”
Hla Sakthiam sinah, “Choir sak hi biapi bik ah chiah ding. Musical notes thiam khawh i zuam ding. Cun, solo, duet, trio, quartet ti bantuk saknak ah a si khawh chung in i tel ve ding”
Hla Phuatu sinah, “Notes thiam ta hmasa loin, hla phan le, mi hla cia i cawn (imitate) i laak chih (borrow) cu hrial khawh chung in hrial ding. Midang sinah cawnpiak kho ding in hla phanning (composition course) study tuah a herh” tiah a bia beuh duhmi cu a si.
Source: Joel Ling I Tonnak

Advertisement