Rev. Sang Fen
Sang Fen cu Sumzuan phun a si. A pa Za Nawi nih Dawt Ṭial a ṭhit i Hreng Tiam, Sawn Dun, Lal Hnin le Ngai Zing an hrin hnuah Dawt Ṭial cu a thi. Mah hnu cun Duh Thai a run ṭhit ṭhan i Khuang Thlia, Than Tum le Sang Fen an hrin hna. Sang Fen cu 1899 kum July 15, Zarhteni ah a chuak. Amah cu kumhnih a ti ah a pa Za Nawi nih a thihtak hna. Khuang Thlia le Than Tum zong an thi i Sang Fen lawng a nu nih a hmeihpi. Tlawmpal ah a nu cu va dang a run ngei ṭhan.
Amah cu a pa-ei nih a rem lo caah cingla rualchan innkip ah ni khathnih cio in a um i rawl a hrawn tawn hna. Kum 12 a si cang nain tawhrolh le angki ngei loin puanchia zun khat te he a rak vak tawn. Paih, lungcheh, tlangper, ṭekbu kah, rua tingtang tum i hlasak tehna hi a huam ngai. Mah ruangah hin a si lai cu, Pathian phungchim rian a hun ṭuan hnuah paih, lungcheh le tlangper an zuam zongah a tei dih tawn hna i hlasak hawi hna ah cun a pahawi, a rianṭuanhawi hna lakah minlang ah a hung i chuah ve. Hlasak ah a aw a rak ṭha ngaingai, hla zong a thiam.
1910 kum ah Saya Maung Lwin cu Zokhua Mission sianginn ah saya rianṭuan dingin a rung tlung, Sang Fen cu umnak rep ngei loin mi inn kip ah a um i a ei ti thawng cu Saya Maung Lwin nih cun a theih i a zaang a fah tuk caah a nu le a pa-ei cu a chimh hna i amah sinah aa umter. Saya Maung Lwin he cun Hakha ah an kal i tawhrolh zun khat ngamu in le banian zun khat tamat in a rak cawkpiak. Zokhua nih, “Sang Fen cu Mirang fate bang, biar le angki a hei hruk ve,” tiah an ti. Zokhua mi lakah tawhrolh a rak i hrolh hmasa bik cu Sang Fen a rak si.
Amah cu Saya Maung Lwin sinah cun a um i sianginn a rak kaiter ve. Bawifa lawng sianginn kai hna seh, tiah rak ti a si nain Saya Maung Lwin nih a sin ummi a si caah a kaiter ve. Ca zong a thiam ve caah 1916 kum ah Kawl ca tang hnih a awng. Saya Maung Lwin nih Carson siangbawinu sinah a hun chiah i thlakhat ah Rs. 3/- a rak pek i tang thum a cawng.
Saya Maung Lwin sin a rak umka tein Pathian cu a bia i Khrihfa ah a cang. Hakha Mission Sianginn i ca a hung cawn hnu 1916 kum November 16, cawn ni 4 ni ah Hakha Baptist Association hmunchung Pidawta sang lei kalnak lampawng hriangkung tangah Rev. Maung Kung nih Van Lo le Jessie (Pa Thuai nu) he tipilnak a rak pek hna. An tipilnak hmun cu tlakrawh in an ser i zapi hmuh awkin lamkam ah an hnuai.1
Saya Maung Lwin nih Sang Fen cu, “Hakha Mission Sianginn in tangruk na awn cangka Bassein khua ah Mirang cacawn ah kan kuat lai,” tiah a rak ti bantukin tangruk a awn cun Bassein khua ah kal dingin rak timh a si. Asinain Carson siangbawinu le Rev. Cope nih, “Sang Fen, Bassein ah cacawn ah a kal lai tiah kan theih. Bassein ah ca cawn loin Insein tu ah Baibal ca cawn ah kal law kan duh ko,” tiah an fial. “Bassein i cacawn cu ka duh ko,” tiah a al hna. Carson siangbawinu le Rev. Cope cu ngaihchia in an kir. A thaizing ah an fuh ṭhan i Carson bawinu nih, “Sang Fen, ka chung chuak ka fa tlukah kan ruahmi na si i Insein tu ah Baibal cacawn ah kal law ka duh ko,” tiah a nawl ṭhan i Carson bawinu cu a ṭap. Carson bawinu a miṭhli tlak a hmuh tikah al awk a ṭha ti lo i Sang Fen cu Insein Baibal sianginn kai awkin aa tim ṭhan. Carson bawinu le Rev. Cope cu an i lawm tuk i thla an campiak. Zokhua ah a vungtlung ta i Insein lei kal hngami vialte an tuahpiak dih hnu 1920 kum May thla chungah Chia Dan nih laa pathum in Van Lo he Kalaymyo tiang a vun thlah hna.
Insein cu an vung phan i an hrum (samtom) tete he an si caah zoh an duh ngai hna. Nawl Tling cu Insein Baibal sianginn ah kum hnihnak a rak cawng. Amah cu mi leklak a si, muisam le pumrua zong a za, pumpululh chuih zong a thiam, hlasak ah a aw a ṭha i thiam zong a thiam caah Baibal cawnpiaktu sayate nih an dawt ngaingai.
Sang Fen cu Saya Maung Lwin khua, Watawgyi i a kal lioah thisen chungtlik zawtnak in a rak zaw. Saya Aung Dwe te khua Mukuk ah an kalpi i a ṭha hlei lo. Bassein siizung ah an chiah, a ṭha hlei lo. Thlakhat a um hnuah Insein Baibal sianginn Sayaci Mr. John McQuire nih thirhri a hei tuk i Yangon siizungpi ah an chiah. Thla thum a um i a ṭhat hlei lo caah Meiktila siizungpi ah an kuat. Meiktila siibawipi nih, “Sii cun na dam lai lo. Meiktila tidilpi hi na vel khawh lawngah na dam lai,” tiah a ti caah mah tidil cu ni 48 a vel i siizung ah thla hnih a um hnuah siizung cun a chuak. Laitlang ah a tlung i Falam siibawipi nih Baibal ca a cawng ṭhan kho ding a si ti lo, tiah Insein Baibal sianginn ah thirhri a tuk caah sayate nih, “Sang Fen cu a ziaza zong a ṭha, kum hnihnak zong hmah sang bik in a awn caah kum li awng in lehhmah (Certificate) kan tuahpiak lai,” tiah an ti caah ‘kum li a awng’ tiah Certificate cu 1922 kum ah an kuat.
A dam hnu cun Falam Mirang Vuanthok nih a auh a cabuai hnawttu ah a chiah i lahkhah Rs. 35/- a pek. Cozah rian a lawn tikah kaan ṭuanter te lai, tiah a ti. 1923 kum January thlachung ah Rev. Cope cu Falam a va phan. Sang Fen cu a auh i, “Pathian rian na ṭuan cang lai. Thantlang peng Lungler khua ah na um lai,” tiah a ti. Vuanthok bawipa nih a duh lo. “Na kal ahcun lahkhah kaan pekmi le thilpuan kaan pekmi vialte na ka khirh ṭhan dih lai,” a ti. Anih nih, “Lahkhah cu ka ṭuan man a si caah kan khrih ṭhan lai lo. Asinain thilpuan belte cu kaan khirh dih lai,” a ti i a khirh dih hnuah Rev. Cope he Hakha ah an tlung.
1923 kum February thla in Thantlang peng, Zahnak tlang, Lungler khua ah a kal. Lungler khua ah cun saya rian he phungchim rian he a ṭuan i an dawt tuk caah aa nuam ngai. Chawn Tur he an rak um. Zaangtlang khua ah paih an zuam i a tei dih hna caah phung a rak chimh hna. Lungler khua i a umnak inn cu a kangh caah 1924 kum April thla in Zokhua ah an ṭhial.
Zokhua a phanh hnu cun Zokhua mi Hai Hlei le Nun Duh fanu Kawl Dong a ṭhit i Rev. Cope nih Hakha khua ah kutsih lehthahnak a tuahpiak hna. Amah cu 1926 kum ah Hakha khua ah Baibal Conference a rak kal. Tedim le Falam lei an tlung dih. Mah tan ah cun Rev. Dr. Chester U. Strait nih ordination a pek.
Hakha peng ah ordination a hmu hmasa bik a si. Mah hnu cun Saya Sang Fen cu Rev. Sang Fen run ti a si cang. Pathian rian a ṭuan chungah harnak tampi a tong. Pathian salṭha a si caah a thih tiang a Khrihfabu sinin mithmai ṭha a hmu. Pathian rianṭuantu vialte lakah Rev. Sang Ling he an i rup bik. An min fak in an i au bal lo.
A nupi Pi Kawl Dong cu mi dam lo ngai a si. Fapa panga le fanu panga an dihlak ah fale pahra an ngeih hnu 1959 kum May 31, Zarhteni ah an nu nih a thihtak. Mah hnu cun 1959 kum July thla chungah Zokhua mi Pi Phawt Bil a run ṭhit ṭhan i amah he cun fa an ngei ti lo.
Amah cu 1923 kum in 1968 kum tiang kum 45 chung Pathian rian a ṭuan i 1968 kum February 25, Zarhpini ah Zokhua Peng Khrihfabu nih pensen an pek. Pathian rian a ṭuan chung kum 45 chungah zumtu 2805 tipilnak a pek hna. Amah cu Pathian rian a ṭuannak in kum 54 a tlin hnu 1977 kum January 9 Zarhpini ah Zokhua pengpi nih Golden Jubilee cu Zokhua ah sunglawi ngaiin an tuahpiak.
Amah cu Hakha khua um a fale a tlawn lio hna 1988 kum December 23, cacawn ninga ni in paralyse (zen zawtnak) in a zaw i kumkhat leng a kuah hnuah 1990 kum January 3, cacawn ninga ni ah Pathian sinah aa din.
A ruak cu Carson le Cope siangbawi hna thlaan, Hakha khua sinah an ihter. A fale hna cu-
- Pi Sui Pen
- Pu Siang Uk
- Pi Ca Thluai
- Pi Nak Iang
- Sayaci Dr. Bawi Hu
- Dr. S. Hre Kio
- Pi Far Can
- Pu S. Ṭha Bik
- Pi Pawng Ki
- Pu Chit Thwe
Advertisement
EmoticonEmoticon