Rev. Van Lo (1899 – 1999)

Rev. Van Lo (1899 – 1999)

Van Lo cu Zathang (Darkhuah) chung a si i a pa cu Pu No Tiam le a nu Pi Sem Thlia nih Sihhmuh khua ah 1899  kum August thlachung ah an hrin. Van Lo pa cu khuabawi a ṭuan i mirang cozah nih khuabawi fale vialte hna cu Hakha khua ah ca cawng cio hna seh, tiah an ti bantukin Van Lo cu kum 12  a ti lio 1911 kum ah Hakha khua Mission sianginn ah ca a cawng Van Lo he ca a cawngṭi mi hna cu Sang Fen, Bual Hai le Jessi an rak si.

Van Lo cu Hakha Mission sianginn ah ca a cawng i Khrihfa ah a cang. Amah cu Sang Fen le Jessi he1916 kum ah Rev. Joseph Herbert Cope nih tipil  a rak pek hna. Amah cu Carson siangbawinu nih, “Baibal ca Insein ah cawng law ka duh. American ah bawmhnak kan halpiak lai,” tiah a rak lem.
Carson siangbawinu bia al a duh lo caah Baibal ca cawn awkin 1920 kum June thla in aa thawh i Sang Fen he Burma Man’s Bible School  ah an kai ṭi. Kum hnih  an cawn hnu ah Sang Fen cu a dam lo  caah a kir i amah le Tonzang in Vial Nang lawng an kai i 1924 kum March thla ah camipuai cu a tuah i pahnih nak in a awng.
Amah cu Insein Baibal sianginn ah tlamtlingte in a cawng i a awng hmasa bik mi asi. A chuah cang ka cun Rev. Joseph Herbert Cope nih Khuahring tlang, Vanzang tlang, Zahnak tlang, Vailam tlang le Bualpeng zohkhenhtu ah ṭuanvo a pek caah 1924 kum April thla thawk in Fungkah khua ah a um. Fungkah khua ah cun kum ruk a um i Khrihfa ah minung 40 a canter hna. Mah hnu cun 1929 kum ah an khua  Sihhmuh ah an ṭhial.
Amah cu Pathian rian kum hnih a ṭuan 1926 kum ah a hawi ṭha bik Saya Sang Fen he Rev. Chester U Strait nih ordination cu Hakha khua Civuipi ah a pek hna. Rev. Van Lo cu ordination pek a si cang caah nupi ṭhitpiak a herh cang. A pa No Tiam cu khuabawi a si caah  bawi fanu hrimhrim ṭhitpiak a duh. Cucaah Thantlang ramukbawi fanu Sui Fam cu an hampiak. Fungkah khua i a um lio 1929 kum ah ṭhitumnak an tuah. A nupi Sui Fam cu Thawngṭhabia a cawnpiak lengmang i thla ruk hnuah amah nih tipilnak a pek.
[caption id="" align="alignnone" width="960"] Siangbawi Thlaan ah an vui ve[/caption]
Rev. Van Lo cu “Bawipa caah cun,” tiin zei rian paoh a ṭuan ah lungtho te le thanuamte in a ṭuan zungzal. Zeibantuk harnak a ton zong ah lungdong loin kum 40 (1924-1964) Pathian rian a ṭuan hnu 1964 kum, amah kum 65 a phanh tikah amah bawmtu zong Buangkhua ah Rev. Ni Vung le Saikah khua ah Rev. Pa Hrek hna an um cang caah 1964 kum  February thla Ralpel khua civuipi ah pensen laknak a hal hna. Khrihfabu nih an siang hrimhrim lo nain 1964 kum cun pensen an pek. A pensen cu thlakhat ah K.40/- a si.

Pathian rian a tuan kum 40, amah kum 65 a si ah February 1964 kum ah Ralpel khua civui ah pension a hal i an pek. 1997 kum ah Diamond Jubilee Sihhmuh khua ah an tuahpiak. June 5, 1999 kum ah Hakha a fale inn ah a thi. Rev. Carson thlan pawngah Rev. Sang Fen he an vuiti hna.
A fale hna cu:

1. Sang Awi
2. Sui Thai
3. Hrang Nawl
4. Mari
5. Hramh Thang
6. Richard Za Tu
7. Khar Lian
8. Tum Zing
9. Sayamah Ṭial Nawn le
10. Ram Ceu an si.

Note: Van Lo tipilinnak he pehtlai in Rev. Sang Fen nih amah kong aa tial mi “Tlak-um chung lungvar Mansung” cauk i cahmai 14 ah Van Lo le Jessi he Rev. Maung Kung nih tipil a kan pek a ti. Rev. Van Lo kong a ṭialmi chungah Rev. Joseph Herbert Cope nih tipil a pek, Sang Fen he tiah  a um fawn. Hlathlai a hau ngai mi a si.
CACC Laica cawn Level IIIA

Advertisement