-->

Sayaci Dr. Bawi Hu

- June 11, 2019


Sayaci Dr. Bawi Hu

Sayaci Bawi Hu cu:
  • 1 Chin mi lakah English- Chin – Myanmar Dictionary a tuah hmasa bik tu a si.
  • 2 Chin mi lakah Chin- English- Myanmar Dictionary a tuah hmasa biktu a si.
  • 3 Chin mi lakah Myanmar- Chin- English Dictionary a tuah hmasa biktu a si.
Amah cu Chin Ramkulh, Hakha Peng, Zokhua miphun kekte, Sumzuan phun a si. A pa cu Lai ram chungah hmaisung hmawngthiamtu Pastor a simi Rev. Sang Fen a si i a nu cu Zokhua Thanghmun chung Pi Kawl Dong a si. Amah cu 1933 kum, April 1 Zarhteni chunlaicer suimilam 12 ah a chuak. A pa nih Bawi Hu le Khual Hmung tiah a min aa sak. A sul le lam cu, "Siangbawi hnu zultu ka si ve, siangbawi huham in ka nung i khual zeitikhmanhah ka ṭhing bal lo," ti nak a si.
Bawi Hu cu 1941 kum May 7 ni in Zokhua Lai Sianginn ah a lut i Sayaci Zo Mawng nih Admission No. 209 in tangkhat ah a min a rak khumh i 1942 kum ah Laica tang khat a awng. Japan ral a thawh ruangah kawlram chung dihlak sianginn an khar caah ralchung vialte cu cacawn loin a um i 1945 kum ceoin Sianginn cu an hunṭhan caah tanghnih ah a lut i 1948 kum ah Laica tangli a awng. Zokhua Lai Sianginn i a sayaci cu Pu Hrang Hmung a si i tangli camipuai cu Hakha, Thantlang le Matupi Myone ah pakhatnak in a awn caah a sayaci Hrang Hmung nih vok a rak thahpiak. 1948 kum cun Hakha Private Middle School ah Mirang ca tangli a hung kai i 1952 kum ah tang sarih camipuai cu pakhatnak in a awn caah cozah nih Scholarship in Pre-medical Course, Central State High School (atu လသာ-၁), Yangon ah ca an rak cawnter. 1954 kum ah Pre-medical camipuai cu a sungh caah Cushing Christian High School ah tanghra cu a cawng i 1955 kum ah a sungh ṭhan caah Zokhua Private Middle School ah 1955-56 kumchung sayaci a ṭuan. Thlakhat ah thlahlawh cu Ks. 120/- an pek. 1956 kum in Maymyo Colgate Memorial High School ah tang hra cu a nolh ṭhan i a sung i 1958 kum ceoah Roll No. MMO 372 in a awng.
Amah cu tanghra a awn cangkate cun cozah nih Falam Peng Tibual State Middle School ah JAT in an kuat i  kum khat a ṭuan hnu 1959 kum ah Hakha peng Zokhua State Middle School ah a hmasa bik JAT Headmaster in an ṭhial. Amah hi Zokhua State Middle School ah a hmasa bik sayaci a ṭuanmi a si. Mah a ṭuan lioah cun a nu cu pawpi cancer in a zaw i a thih laite ah a nu nih a duh bikmi sayama Sa Tum, Thantlang Primary School ah PAT a ṭuanmi, a halter hna i biatlaknak an tuah hnu ni 6 ah a nu cu a thi.
Amah cu 1960 kum June thla in Mandalay Teachers Training College ah JAT training kai dingin Saya Thla Kham he cozah nih an auh hna. Mah JAT training cu kai aa tim ko nain Sayama Sa Tum nih, JAT training kum hnih kainak cun University ah kum hnih cu kai law tang 12 na awng lai i hmailei kan khuasaknak caah a ṭha deuh lai, tiah ruahnak a cheuh. "University kai cu ka duh ko nain zohtu, cawmtu ka ngei lo. Honihdah a ka zoh hnga?" tiah a ti. "Keimah nih kaan zoh lai. Ka lahkhah hi K. 128/- a si i, thlakhat ah tangka K. 80/- in kaan zoh lai i kei K. 48/- in nun khawh kaa zuam lai," tiah a ti caah JAT training kai loin University tu ah kai dingin aa tim ṭhan.
Amah cu Zokhua State Middle School Headmaster cun a chuak i Mandalay University ah a kai i Sayama Sa Tum nih cun K. 80/- a bawmh. A har caah University Training Corps (UTC) ralkap ah a tla i a nambat cu Tah/5721 a si. Ralkap uniform tlingte in an chuah hna caah mah uniform he cun nifate sianginn hi a kai tawn. Thlakhat ca rawl man ah K. 43/- le cacawn man ah K. 15/- a dihlak K. 58/- a pek i K. 22/- lawng a hman awk ah a taang tawn i sifak hringhran in ca a cawng. Science combination a la i cawn awk ca cawknak hmanh a ngei tawn lo. Mah kum 1960 – 61 chung caah Mandalay University Chin Students Association meetingpi an tuah i Vice President ah an thim. Kharpi camipuai cu Roll No. 1272 in a run tuah i I.Sc (A) cu 1961 kum ah a awng. A har tuk caah Matupi i D.J.S. a ṭuanmi Pu Kio Hlun te sinah a hung kal i bawmhnak a hal hna i thlakhat ah K. 40/- an bawmh. Sayamah Sa Tum bawmhmi hecun K. 120/- hman awk a ngei. Matupi cun a rung kir i ralkap training cu Maymyo khua ah April le May thlachung a tuah i lahkhah K. 82/- an pek i thla 2 ca K. 164/- a hmu. Mah kum cu Yatanabon Hall, Room No. 21 ah a um. Maymyo in Americk Signh le Ne Win he an um ṭi.
Sianginn cu run hun a si ṭhan i I.Sc. (B) a kai i Mr. Lal Lin he Shwepyiaye Hall No 19 ah an um. Tangka zong siarem deuh in hman awk a ngeih cang caah Bank ah Pass Book a tuah i a hman hleimi tete cu Bank ah cun a khon lengmang. Amah a kan chimhnak ahcun, "University Siangngakchia nih Bank ah tangka a chiami cu keimah lawng ka si," a ti. Mah cacawn kum caah meeting pi cu an run tuah i amah cu President (1961-62) ah an run thim. Cun Mandalay University Students Christian Movement (SCM) ah Secretary an thim ṭhan. "University Siangngakchia mi fimfim le mi thiamthiam hna lak i upa rianṭuan cu kaa harh ngai tawn," tiah a kan ruah tawn. I.Sc. (B) camipuai cu 1962 kum March thla chungah a tuah i April le May thla chungah UTC ralkap training cu Mandalay khuachung ah an tuah. Awnsung a chuak i I.Sc. (B) cu awn sawhsawh in a awng.
Sayama Sa Tum cu Sianginnlei rianṭuanmi a si caah chungkhar i rian dangdang ṭuan cu a nuam lo a ti i, Rangoon Institute of Education (ပညာေရးတကၠသိုလ္) ah Adm. No. N.S. 44158 in a lut i B.A. (E.d) I a cawng. Tagaung Hall No. 59 ah Tint Lwin he an um. Rangon University Chin Students Union i thiam caan a cu i Union Hall ah thimnak cu tuah a si i amah cu President ah an thim. "University i cacawn caan kumli chungah President voi hnih a ṭuanmi cu Chin mi lakah keimah lawng ka si," tiah a kan ruah tawn. President cu tlawmpal a ṭuan hnu July 7 ni ah Ne Win cozah nih University siangngakchia cu vokkah le arkah in a kah hna caah umtu awk hngal loin khua an sa. Amah nih cozah (ပညာေရး၀န္ႀကီး) sinah vanzuanglawng hlannak nawl a hal i vanzuanglawng pali an hlanh i Rangoon in Kalaymyo ah Chin Siangngakchia vialte a tlunter dih hna. Chin mi caah rianṭuan ngam, pa ralṭha pakhat cu a si ko. Sianginn vialte an khar dih nain annih sianginn cu an khar lo caah ca cu ṭhate in a cawng ko.
B.A.Ed I camipuai a tuah khawh cangkate in Sayama Sa Tum he lehthah ding a si caah khualei ah Gangaw tiang Vanzuanglawng in a tlung i an sinum Pu Tei Cawn nih Gangaw cun a rung don i an tlung. A pa nih lehthahnak ca vialte cu a rak tawlrel dih i 1963 kum April 14, Zarhpini ah Rev. Mang Kung nih Zokhua Baptist Biakinn ah leh a thah hna. B.A.Ed. I camipuai result cu a chuak i School Hygiene ah distinction in a awng i B.A.Ed. II cawn ah aa thawh ṭhan. Sayama Sa Tum zong cu Bualtak sianginn cun Zokhua sianginn ah an ṭhialpiak ve. B.A.Ed. II cu a vung cawng i 129, Thaton Hall ah a um i Shwebo Hall No. 78 ah a ṭhial ṭhan. Camipuai a tuah lioah fanute, 1964 kum March 4, cawn nithum ni ah a ngeih thawng a theih i aa lawm tuk. A pa nih Ni Nawn tiah min a sak.
B.A.Ed.II camipuai cu 1964 kum ah a awng i Chin Usi zung in riansoknak sohhlua an kuat i S.M.S. Surkhua le S.M.S. Thantlang Farrawn ah a sok nain Zokhua S.M.S tu ah an chiah i 1964 kum Septemper 14 ni in a rian ah a lut. Ni Nawn nu he an ṭuanṭi caah an i nuam ngai, a pa sinah an um. Zokhua ah cun kum hnih a ṭuan hnu S.M.S. Tlauhmun ah an pahnih in an ṭhial hna i 1966 in 1968 kum tiang Tlauhmun ah an ṭuan i Zokhua ah an ṭhial ṭhan hna. Tlauhmun an um lio 30.3.1967 ni cawn ni 4 ni zinglei suimilam 9 ah fapate a ngei i a min ah Lian Peng tianh a pa nih a sak. Zokhua ah cun 1968 kum in 1971 kum tiang a ṭuan i B.Ed. camipuai zong a leng in a phit pah. Cun Zokhua peng nih Hakha – Gan lam cu mawṭawka lampi in an tuk i mah Komiṭi ah cun Ohkaṭhah (1968-1971) zong a ṭuanpiak hna. 31.5.1969 ni zing suimilam 9 ah fapate an ngei i a min cu Pu Chan Hmung nih Tluang Za Tu a sak. Hakha –Gan mawṭawka lam cu 1971 kum May 14 (Friday) ni ah Zokhua ah phunhpuai an tuah.
Sayaci Za Dun nih Zokhua um cu a rak sok caah a chungkhar dihlakin Lungngo ah ṭhial dingin awdar an chuah caah 1971 kum May 17 ni in Zokhua in an pok i May 25 ni ah Lungngo cu damte in an phan. A kan chimh tawnmi cu, "Lungngo cu umnak ah cun a nuam ve ko nain sifak khua an si caah, Gangaw, Matupi, Tingsi, Balei, Vauti le Senpi khua hna ah atu le tu purphiar ah ka vak i seihnamphir in fangvoi hi ka phawr tawn i ka keng zong hi a bo dih tawn," a kan ti. "Lungngo cu Letsa hna ah a um caah nga an tam i zarhteni fate sur he nga kan chep i tampipi kan tlaih ko; ngasa  tam bik kan einak khua a si," tiah a kan ruah tawn. Amah nih a kan ruah tawnmi pakhat cu, "Khuate ah hin kum 14 khengte sayaci rian ka ṭuan i Lungngo caah hin rian tam bik ka ṭuan. Sianginn le sayaci inn ka sak. Lotaw khualu in Lungngo in Vauti tiang mawṭawka lam a lingment (လမ္းအူေၾကာင္း) ka zoh i Lotaw in Lungngo phaklai tiang lampi cu kan tuk. Khuachung lam furlong 7 tiang pe 12 tla in kan tuk i nihin tiang Sayaci Bawi Hu lam an ti," tiah biaro a kan ruah tawn. Zokhua sayaci a ṭuan lio i a phitpahmi B.Ed. camipuai zong cu a awng. Lungngo an phanh hnuah fapate pathumnak cu 1971 kum September 8 ni zan suimilam 7 ah an ngei i a min ah a pa nih Hmung Luai a sak.
Lungngo khua ah kum 3, thla 3 le ni 2 an um hnu 1974 kum September 2 ni in Surkhua ah an i ṭhial i September 4 ni Surkhua an phan. Rawl ei awk an ngeih lo caah Phaizawng ah purphiar ah a kal i September 12 ceoin rian a lut. Surkhua State Middle School ah kum 3 (1974-77) chung sayaci rian a ṭuan. Mah chungah cun sianginn pe 120 in dot 2 a sak. Rawl a har caah Dumva lam leiah lohmun a hal ve hna i Pu Kio Dun lopawng an pek i lo a thlo, fang a cin i tang 40 leng a ngei; zil le mai le fangvoi zong tampi a ngei.
1975 kum March 15 Zarhteni zanṭim suimilam 12:30 ah fanute pahnihnak a ngei i a pa nih Ayemya Zing Caan tiah min a sak.
Mah cun Zokhua State Middle School ah an ṭhial hna i 1977 kum June 15 ni in an i ṭhial. Zokhua sianginn i a ṭuan lioah တိုင္းတပ္တြင္းပညာေပးသင္တန္းအမွတ္စဥ္ (၄၉) cu Mandalay ah September 12 ni in October 22 ni tiang a kai. Mah kum December 4 ni ah Hakha Party Unit zung ah chuah awkin Palik Ṭial Cung nih a rung auh, Buhmuci Lu Maw hruainak in Detah Party Komiti tlingte in an chuak i Myone Kuzelelawng caah bia an hal hna. Amah nih a kan ruah tawnmi cu, "Party Unit Ohkathah khanchung ah cun an ka auh i ka vung lut. Buhmuci Lu Maw, Buhmuci Ye Myint le bawi upa vialte an rak ṭhu i an hmai i ṭhutnak ah cun ka vung ṭhu.
Buhmuci Lu Maw, ခင္ဗ်ားနာမည္ဘယ္လိုေခၚပါသလဲ။ ကြ်န္ေတာ့္နာမည္ ေဘြဟူးလို႔ေခၚပါတယ္။
Buhmuci Lu Maw, ဘာအလုပ္လုပ္သလဲ။ အလယ္တန္းေက်ာင္းအုပ္လုပ္ပါတယ္။
Buhmuci Lu Maw, အလယ္တန္းေက်ာင္း အုပ္ဆိုတာ ေက်ာင္းသားေတြ သီခ်င္းသင္ေပးတယ္ မဟုတ္ လား၊ ဟုတ္ကဲ့သင္ေပးပါတယ္။
Buhmuci Lu Maw, လုပ္သက္ ဘယ္နွစ္ႏွစ္ရွိၿပီလဲ၊ ဆယ့္ေလးႏွစ္ရွိပါၿပီ။
Buhmuci Lu Maw, သီခ်င္းဆိုတတ္သလား၊ ဟုတ္ကဲ့ ဆိုတတ္ပါတယ္။
Buhmuci Lu Maw, ဆိုတတ္တယ္ဆိုရင္ ဆိုျပႏိုင္မလား၊ ဟုတ္ကဲ့ဆိုျပႏိုင္ပါတယ္၊ ကမၻာမေက်၊ ျမန္မာျပည္ … အဖိုတန္ေျမ tiah awn ukmak in ka sak.
Buhmuci Lu Maw, ခင္ဗ်ားသီခ်သ္းဆိုတတ္တာဘဲ၊ ဟုတ္ကဲ့၊ သီခ်င္း၀ါသနာပါပါတယ္၊ဆိုတတ္ပါ တယ္။ အသံေတာ့မေကာင္းဘူး။
Buhmuci Lu Maw, ေက်းဇူးတင္ပါတယ္၊ ဒါေလာက္ဆိုႏိုင္ရင္ေတာ္ပါၿပီ၊ ဒီေလာက္ပါဘဲ၊ ထြက္ႏိုင္ပါၿပီ၊ ဟုတ္ကဲ့၊ ေက်းဇူးတင္ပါတယ္။ ka ti i ka chuak. Kei cu Myone Council Executive Committee Secretary cu ka fimnak le ka thiamnak in ka hmuhmi a si lo, ႏိုင္ငံေတာ္သီခ်င္း in ka cawkmi a si," tiah a kan ruah tawn.

Bia le lam aa phak ahhin a chim tawnmi cu, "Kei cu aana duh ah Myone Council kai cu ka duh lo. Hakha-Gangaw lam tuk le Laica tuah duh ah ṭuan cu ka duh vemi a si," a ti. Zokhua ohsuh in Myone Kuzale cu an tar i 1978 kum January 2 ni ah Zokhua le Pumlen nih sianginn ah mee cu an thlak i mee thla hngami minung 369 chungah mee 354 a hmuh caah Myone Council ah cun a kai i mah kum March 2 ni ah thimnak cu an tuah tikah Myone Council E.C Secretary an pek.
Laica tuah hramthawknak: 1978 kum March 22 ni ah Pu Chum Awi (atu cu Rev. Dr. Chum Awi) he an i tong i Laica tuahnak kong an i ruah. Lai Carel Tang cheu in Tang li tiang tuahnak kong E.C ah a chuahpi i Pu Chum Awi tavuan pek dingin biachah a si caah sianginn kharchung ah uk 23,173 chuah ding, tiah khiah a si i Pu Chum Awi cu ṭuanvo pek a rak si i, Deirel press ah Pu Zung Hlau he an tuah i a saduhthahmi pahnih lakah pakhat a hlawh a tling cang. Cun mah kum April 25 ni ah E.C meeting an tuah i Hakha-Gangaw lam kong biatung a dirh i meeting 17/78 nak biachahnak 114.A, 114/B le 114/C an tuah hnuah amah cu a bik in ṭuanvo pek a si. Cucaah a saduhthahmi a hlawh a tlin ṭhan caah aa lawm tuk hringhran.
Amah cu 1978 kum October 3 ni in Shan State, Pinlong State High School Headmaster ah promotion an pek i sayaci rian cu a laang  in a lut, Myone Council E.C Secretary rian cu a ṭuan ko. Lahkhah tu Headmaster lahkhah a la. Amah cu Hakha-Gangaw lam cawhnak caah tawlreltu ṭuanvo pek a si bantukin 1979 kum January 5 ni thawk in lam ah a riak i lamcotu vialte i an herhmi facang, cite, ngapih le hriamnam vialte a tawlrelpiak hna i mah kumchung ah cun Zokhua, Hakha in meng 22 tiang mawtawka lam cu an tuk. A kum voi 1980 kumchung ah Lamtuk tiang ah tuk. 1981 kumchung ah Lamtuk in Lungcawi, Bungzung lei an tuk liocah Cozah nih a lak i an ngol.
Amah cu Mr.Neil Armstrong nih  Thlapa cungah a hmasa bik 1960 kum, July 20 ni ah a ṭum i, a pahnihnak ah Mr. Buza Aldrin a si bantuk in Tinam khua cu 1975 kum May 13 ni ah mawṭawka, jeep car in a phan hmasa bik a si i, a pahnihnak ah U Tin Ngunt, Amyopa a si. A kan chimh tawnmi cu, "Pu Khua Thawng Jeep car cun kan kal i Ruavan le Tinam cu an khuapite in an chuak i mawtawka cu an zoh, khua dang bang a rawl a ṭaam lai, tiah ram cu an pe lo," a ti tawn. Mah hnu cun 1979 kum May 19 ni ah Tinam khua ah Hakha-Gangaw lam phuhpuai cu an tuah. "Ka tumtahmi Laica le Hakha-Gangaw lam cu lung um lote in ka ṭuan khawh caah ka lung a tling ko," tiah a kan ruah tawn. Mah lioah cun a tu Tinam khua khi a si lo. Meng 3 a vung hlatnak an khuahlun ah a si.
Amah cu tavuan pek a si bantukin Lamtuk in ramri Tare tiang minung 16 he lamhmaiṭhi cu 1980 kum March 10 ni in an i thawh i an zoh dih hnuah March 30 ni ah Hakha an phan ṭhan.
A mah cu Secretary a ṭuan caan cu a dih cang caah Zokhua Ohsuh cun a voi hnihnak Council Kuzale ca ah cun 1981 kum October 4 ni ah Zokhua Ohsuh nih mee an thlak ṭhan i mee a thlami minung 380 chungah mee 369 a hmu. Cucaah Myone Council ah cun a kai ṭhan i mah kum November 9 ni ah i thimnak cu an tuah i Hakha Myone Council Work Inspectorate Komiti Chairman ah an thim i a thaizing November 10 ni in Myone pumpululh chuih zuamnak ah Tedim ah a kalpi hna i Falam Myone he final an kai i November 21 ni Falam he cun an chulh i an tei hna caah 1st an hmu i seal he Hakha ah an tlunpi hna i Hakha khuami nih sunglawi ngaiin pangpar ṭhirual he an don hna.
Cun a kan ruah tawnmi pakhat cu, "1983 kum January 28 ni ah Rev. Hrang Tin Khum (ZBC, GS) le Rev. Robert Hniar Ceu (HBA, GS) nih CCOC ram thar rianṭuannak caah hla fung khat in kan tuahpiak, tiah an ka fial i Ho dah kal lai? (Who will go?) timi hla ka tuah i mah kum April 17, Zarhpi zan ah CCOC palai 70 nih Thantlang khua ah an sak i mitthli a tla lomi cu mi tlawm an si, kei zong ka mitthli a tla ve," a ti. Amah cu 1985 kum November 8 ni cun a rian in aa din. Shan ram Pinlong ah kal cu a duh lo caah I.S (Lawibual) zung ah in an chiahchung. Cun amah cu 1986 kum February 5 ni in No.2 State High School, Tedim ah an kuat i February 10 ni ah Lawibual High School ah cun a ṭuan thawk. Lawibual State High School i a ṭuan chungah School compound ah farkung kung 3000 a cintak i 1987 kum November 17 ni in No. 1 State High School, Hakha ah an ṭhial i November 23 ni ah a rian ah a lut. Cun 1988 kum April 24 ni ah Chin Christian Literature Society (CCLS) ah thimnak an tuah i amah cu President ah an thim. Cun amah cu 1989 kum July 3 ni in No.1 State High School, Falam ah an ṭhial ṭhan i 1991 kum February 15 ni ah Township Education Officer (TEO) in Setoketaya ah promotion in an kuat. Mah hnu cun 1994 kum August 26 ni ah Hakha Township Education Officer in an ṭhial ṭhan i 1995 kum August 26 ni in penson a la. A thaizing August 20 ni zing suimilam 9 in CACC zung ah Chin Literature Director rian in a lut colh i kum 11 a ṭuan hnu 2006 kum March 31 ni in aa din. Amah cu cozah rian kum 31 le Chin Literature Director rian kum 11, a dihlakah kum 42 ram le miphun ṭhanchonak caah rian a ṭuan.
Amah cu 1964 kum ah B.A.Ed; kum 1971 kum ah B.Ed; 1998 kum ah B.R.E a awng i, 2006 kum February 25 ni ah International College of Bible Theology, Sekeston, Missouri, U.S.A nih Doctor of Divinity degree an pek.
Cun amah nih kan Chin mi caah rian pitum a kan ṭuanpiakmi le ro sunglawi a kan rohmi hna cu:
  1. Chin-English-Myanmar Dictionary cu 1992 kumchung in a hun thawk i 2008 kumchung ah a cauk in a hun chuah; kum 16 aa rauh. Cahmai 336 a chah i biafang 15681 a khumh.
  2. English-Chin-Myanmar Dictionary cu 1997 kumchung in a hun thawk i 2007 kumchung ah a cauk in a hun chuah; kum 10 khengte aa rauh. Cahmai 1709 a chah i biafang 40385, Idioms 3092, Phrasal Verb 1646 a khumh.
  3. Myanmar-Chin-English Dictionary cu 2000 kumchung in a hun thawk i 2009 kumchung ah a cauk in a hun chuah; kum 9 aa rauh. Cahmai 588 a chah i biafang 25568 a khumh.
A ṭuanmi rian hna cu:
  1. 1955-56 Secretary Zokhua Peng C.E. Union
  2. 2.1958-59 I.A.T State Middle School, Tibual
  3. 1959-60 Secretary Zokhua Peng C.E. Union, J.A.T. Head Master- Zokhua Middle School
  4. 1960-61 President Zokhua Peng C.E. Union
  5. 1960-61 Vice President Mandalay University Chin Student's Association
  6. 1961-62 President Mandalay University Chin Student's Association
  7. 1961-62 General Secretary Mandalay University Student Christian Movement
  8. 1962-63 President Rangoon University Chin Student's Union
  9. 1964-65 President Zokhua Peng C.E. Union
  10. 1964-78 Headmaster State Middle School, Zokhua, Tlauhmun, Lungngo, Surkhua
  11. 1966-71 President Zokhua Circle Youth Association
  12. 1968-71 Ohkathah Hakha-Gan Motor Road Construction Komiti
  13. 1978-81 Secretary Hakha-Gangaw Motor Road Construction Komiti
  14. 1978-81 Secretary Hakha Township People's Council Executive Komiti
  15. 1979-91 Chairman Lai ca Tuahtu Komiti
  16. 1981-84      President                Hakha Phaizawng Tennis Club
  17. 1981-85      Chairman               Hakha Myone People's Council Work Inspectorate Committee
  18. 1985-91      Headmaster           No.2 Tedim, No.1 Hakha Falam Basic Education High School
  19. 1988-89      Chairman               Hakha Myone ႀကီးၾကပ္ေရးေကာ္မတီ။
  20. 1988-89      Treasurer               Hakha Baptist Association
  21. 1988-91      Chairman               Chin Christian Literature Society (C.C.L.S)
  22. 1991-92      Gen. Secretary       Chin Christian Literature Society (C.C.L.S)
  23. 1991-95      T.E.O                    Setoketaya le Hakha Townships
  24. 1995-98      Director                 Adult Literacy Project (A.L.P)
  25. 1996-2004  Treasurer               Hakha Baptist Church Deacon
  26. 1996-2005  Lecturer (Chin)      Chin Christian College, Hakha
  27. 1997-2000  Asst. Treasurer      Hakha Baptist Association
  28. 1998-2006  Director                 New Readers Project (N.R.P.)
  29. 2008-          Treasurer               Hakha Myo Zatlang Nunphung
  30. 2008-          Chairman               Hakha Myo Education Retire Fellowship
  31. 2008-          Ohkaṭhah              Tinam-Malsawm-Ruan Motor Road Construction
  32. 2010           Chairman               Hakha Myone Commission အဖြဲ႕ခြဲ။
Image may contain: text
A ṭialmi cauk hna cu:
  1. Pathian Thangṭhatnak Hlarem fung 850 (Volume 1-9) a chuah
  2. Lengkhawm Hla fung 200 (solfa) a chuah
  3. The History and Culture of Zokhua a chuah
  4. Lai ca (Grade 1-5) cawn awk Text Book a chuah
  5. Adult Literacy Project cawn awk Text Book a chuah
  6. New Reader's Project cawn awk Text Book a chuah
  7. C.C.C Lai ca cawn awk Text Book (Grammar) a chuah
  8. The Source and Development of the Chin Writings a ṭial i a chuah
  9. How to Learn the Chin languate a ṭial i a chuah
  10. The Bible in Pictures for Little Eyes a leh i a chuah
  11. Lai ca Ṭialning (Orthography Vol.1-3) a chuah
  12. Don't (Tuah Hlah Hen) a leh i a chuah
  13. Good News (Thawng Ṭha Vol.1-5) a leh i a chuah
  14. Tuksapur Lainawn (The Savage Truth) a leh i a chuah
  15. U.S. President (44) Tuanbia a khawmh i a chuah
  16. English-Chin-Myanmar (Lai holh) Dictionary a chuah (1997-2007)
  17. Chin-English-Myanmar (Lai holh) Dicitionary a chuah (1992-2008)
  18. Myanmar-Chin-English (Lai holh) Dictionary a chuah (2000-2009)
 A ṭial liomi cauk hna cu:
  1. Chin Hmaisuang Hna Tuanbia (2011 kumchung ah a chuah lai).
  2. Vawleicung Minthang Hna Tuanbia (2012 kumchung ah a chuah lai).
Hi bantuk in ca tampi a ṭial khawhmi cu a innchung khorkhar caah lung retheihnak zeihmanh ngeih lote in lungpumte in ca a ṭial khawh lengah a innchung nu Sayama Sa Tum nih a bawmh khawh tuk caah a si. Cu lengah tangka lei in a herhmi vialte Rev. Dr. S. Hre Kio le chungkhar le a fale nih chambau lote in an bawmh caah a si. A kan chimh tawnmi bia cu, "Kei ka hawi ṭha bik cu caṭial hi a si ko. Ballpen ka vun i tlaih i ca ka vun ṭial hnu ahcun umhar le lileen zong ka thei ti lo, rawlṭaam zong ka thei lo. Kei cu nihin ni tiang hi zei sii hmanh ka ding bal lo. Nifate lamleen le caan hmaante in caṭial hi ka sii ṭha bik, ka damnak bik cu an si ko," a ti. Atu zongah 2012 kumchung chuah dingmi "Vawleicung Minthang Hna Tuanbia" cu a ṭial cuahmah ko, hnarcheu leng pi a ṭial dih cang.
Amah cu caṭial lawng hi a pahrang a ngeihmi a si lo. Hla zong a duh ngaingai i 1966 kum tiang cu hlahruaitu a si zungzal. Mah kum thawkka cun typhoid zawtnak in a zaw i Hakha siizung ah caan saupi a kuah. Mah a zawtnak nih cun a aw thahri a hrawh a si lai cu, hla a sa kho ti lo. Cucaah Tlauhmun sianginn i an ṭhial hnu Falam ah a va kal i a nau Rev. Stephen Hre Kio, mah lioah cun Falam Baptist Church ah Pastor a ṭuan liomi, sinah a va tlung i, "Hlasak ka duh tuk nain hla ka sa kho ti lo. Cucaah Pathian Thangṭhatnak Hlarem a cauk in chuah ka duh, thla na ka campiak ahcun ka duh ko," tiah a ti. Rev. Hre Kio nih cun, "Fung zeizatdah chuah na duh?" tiah a hal i, "Fung 1000 in," tiah a ti caah Pathian sinah a nau Rev. Hre Kio nih cun thla cu a campiak. Mah hnu cun U Thawng Khaw Hau type K.800/- in an cawk i Tlauhmun khua ah a tlung.
Mah kum (1966) hramthawk cun hla cu a hun tuah lengmang i a tanglei bantuk hin Pathian Thangṭhatnak Hlarem fung 850 cu Volume 9 in a hun chuah khawh i fung 150 cu tuah khawh ti loin a tolh.
  1. Volume 1 Fung        100, May 11, 1968 Falam
  2. Volume 2 Fung        100, March 31, 1969 Falam
  3. Volume 3 Fung        100, November 11, 1970 Falam
  4. Volume 4 Fung        100, September 12, 1982, Hakha
  5. Volume 5 Fung        100, February 10, 1983, Hakha
  6. Volume 6 Fung        100, July 30, 1983, Hakha
  7. Volume 7 Fung        100, January 15, 1984, Hakha
  8. Volume 8 Fung        100, January 15, 1988, Hakha
  9. Volume 9 Fung        50, December 31, 1990, Hakha
  10. Volume 1-9 Fung        850, May 11, 1986 in December 31, 1990 tiang kum 22 chung.
Image may contain: text
Hi Pathian Thangṭhatnak hlaremh fung 850 tiang a chuah khawhnak caah a nau Rev. S. Hre Kio nih a si khawhchung in a bawmh. Volume 4 tiang hi cu a chuahtu Bawi Hu & Hre Kio tiah an ti.
Amah cu February 7, 1991 kum in Township Edcuation Officer rian in Setoketaya ah a kal caah hla cu a tuah thiam ti lo i nihin tiang hi a ngol. Pathian sinah leiba hla fung 150 a ngei rih ko. Mah hnu cun Dictionary tuah hram a hun thawk i a tanglei bantuk in a chuah.
  1. Chin-English-Myanmar Dictionary page 336, biafang 15681, 1992-2008.
  2. English-Chin-Myanmar Dictionary page 1700, biafang 40385, Idioms 3092, 1997-2007
  3. Myanmar-Chin-English Dictionary page 594, biafang 25568, 2000-2009
Dictionary phun thum a tuahnak ah hin kum 17 thlipthlep te a rau. Mah hnu cun U.S. President Tuanbia le Tuksapur Lainawn le Lai holh cawnnak cauk te hna a hun chuah i Chin Hmaisuang Hna Tuanbia (2011) le Vawleicung Minthang Hna Tuanbia (2012) chungah  chuah ṭhan aa tim. Amah cu 1956 kum in capar (article) Hill-Chin Student's Union Annual Magazine ah ṭial hram a thawk i 2011kum March tiangah capar 107 a ṭial i mah zong cu 2013 kum chung ah hei chuah te dingin saduh a that. Hi capar hi a khawmh khawhmi vial 107 an si i a khawmh khawh lomi tam nawn an um.
Cun a innchung nu Sayama Sa Tum cu 2005 kum January thla thawk ka in cancer zawtnak nih a phanh ve i, Yangon ah kum khat le thla li a cawngh hnu 2006 kum May 25 ni ah Yangon an inn ah a nunnak a liam i Lai Baptist Church, Yangon le Mandalay Lai Khrihfabu nih an Biakinn ah pumhnak an tuahpiak hnuah a ruak cu Hakha ah a tlunpi i May 27 ni an phan i amah he an sakmi tlakrawh inn tharchung ah a ruak cu a suan. May 28 ni ah a ruak cu Hakha Baptist Church nih an vui. Amah he fapa pathum le fanu pahnih an ngei.
Atu cu Hakha a inn ah a tule le a fale he an um i zeihmanh panghai lote in nuamte in khua an sa.
Certificate of Appreciation
to
Dr. Bawi Hu
Congratulations in the name of our Lord and Savior
Jesus Christ from the family of
Myanmar Evangelical Graduate School of Theology (MEGST)
in Yangon, Union of Myanamr.
We are very thankful and grateful to you for the speical gifts
(English-Chin/Myanmar [Lai Holh] Dictionary and Chin-English-Myanmar [Lai Holh] Dictionary)
that you made available for our Library
We admire and appreciate very much for your great contribution
for the development of literature in Myanmar.
Indeed your historic efforts will never be forgotten
by the generations to come. You have shown a great example
to your children and grandchildren. Your available contribution
will make a great impact on serious students and people
who love literature. We all are challenged to follow
your footsteps in order to do something beautiful
that will challenge not only our own generation
but also our future potential leaders
in our respective communities and societies
May the Lord grant you a peaceful and long life.
We know that you could still expand your horizons
to our own beloved people since you have full potential.
With a debt of gratitude, we do recognize you
as Who's Who in our beloved Nation.
Rev. Aung Mang, M.Th; D.Min; Ph.D.
Yangon           President
October 23, 2007.MEGST
Image may contain: text
Sayaci Dr. Bawi Hu cu Certicicate of Honour, Certificate of Appreciation, le Upat Peknak Roca le laksawng lawngte 23 an pek.
2019 kum ah CCU nih Master of Leterature an pek. (Beet chap)
Image may contain: 3 people, people standing, hat and suit
A Motto cu: 1. Na rian hmaizah law, na caan upat.
  1. Ni khat lam khat Pagan aa ṭhial bal lai lo.
  2. Teinak cu Bawipa ta a si.
Note: Hi tuanbia hi Chin Hmaisuang hna tuanbia Section 1 (2011) chung ta kan char mi a si.
Advertisement


EmoticonEmoticon

 

Start typing and press Enter to search