PI SUNG CI (Mrs. Rev. Nawl Tling)
Pi Sung Ci cu Hakha Farrawn khuami Pu Hlawn Ceu le Pi Hniang Sung fanu a si. Pu Hlawn Ceu cu Chuntei (Suntei) phun Duh Mang hrin a si. Unau pakua chuak an si nain a ṭa Pu Sang Zul le amah lawng hi a nungmi an si.
Pu Hlawn Ceu cu khua upa ah tlangpi rian a ṭuan lio ah khuabawi pa caah meithal an rak sawk lio ah a hrum (a or) a hma i, Falam sizung ah Pu Thawng Kian nih a rak kalpi i, sibawi pa nih na dam kho ti lai lo a ti caah khua ah an kirpi.
Advertisement
Pi Sung Ci cu a pa Hlawn Ceu thih lio ah hin kum riat lawng a rak si. Hringtu a nu Pi Hniang Sung sin ah kum 17 a si tiang Farrawn khua ah a rak um. Pi Sung Ci kum 17 a si lio ah hin Farrawn khuami nutar pakhat nih mang a rak manh.
Tarnu nih cun Pi Sung Ci cu Mupi nih a rak cawi i a zuanpi thluahmah kha a rak manh. Cu tarnu mang a manh hnu tlawmpal ah Pi Sung Ci cu Hniarlawn khuami Rev. Nawl Tling caah Mie peng pastorte nih an hal.Pi Sung Ci cu nuhmui fa a si caah bochan awk an ngei lo nain pa bantukin a lung a ṭhawngmi a si. Sia a congh pah ah hin chai le ṭolhṭang he ram lakah a khua a sa.
Mie peng pastorte nih Rev. Nawl Tling caah an rak hal lio ah hin, “Zeitindah “Ka pa,” tiah ka auhmi cu ka vat hnga,” tiah a rak ti. Asinain Mie peng pastorte bia al awk a ṭhat lo caah 1941 (asiloahcun 1942) kum ah Rev. Nawl Tling cu a run vat.
Pi Sung Ci nih a hrinmi fale cu pa pariat le nu panga an nung. Kum 2000 tiang ahhin Pathian thluachuahnak in tu 43 le tuchin 11 a hmuh hna. Pi Sung Ci cu Rev. Nawl Tling he kum 40 hmunkhat ah khua an rak satti i, 1984 kum ah Rev. Nawl Tling nih a thih tak.Rev. Nawl Tling nih pi Sung Ci a ṭhit hlan ah hin nupi pahnih sin in fa pali a rak ngei. Fapa pakhat a thih hnu ah fa-ei pathum cu Pi Sung Ci nih a run zoh hna, a cawm hna.
Pi Sung Ci nih nihin tiang a philh khawh lo bik mi cu Siang Ling hi a si. Amah hrin he a fa-ei tete hi minung 7 nih an thih tak i, cu lakah cun Siang Ling lungput le bochan awk ṭha ding a si lai ruah ahhin a philh in a philh kho lo. Vawlei ka luh hnu lawngah ka philh te lai, a ti.
1946 ahhin Hniarlawn Baptist Khrihfabu Nu Bu hi rak thawk a si. A thawktu cu Pi Thuam Thluai, Pi Sung Ci, Pi Tha Cuai, Pi Sung Ci, Pi Hme Cuai hna hi an si.
Nu Bu thawktu kan nule pahnga an rak si i Pi Sung Ci hi Nu Bu thawktu ah aa tel vemi a si. Nu Bu thawktu kan nule lakah Pi Sung Ci le Pi Hme Cuai lawng a nung rihmi an si.
Pi Sung Ci cu fimthiamnak a ngei lo nain sii sayama an rak ngeih hlan ah hin fahrin lei ah fa a ngeihtertu le fahringmi nu zohkhenhtu a rak si. Mizaw damlo an um paoh ah a khul a rang.
Rev. Nawl Tling nih mizaw inn a phak hlan ah hin, mizaw inn ah a rak phan hmasa tawn i thla zong a camh tawn hna. Pi Sung Ci nih a duhmi hla hna cu: Khrihfa hlabu No. 222, 192, 269 an si.Pi Sung Ci hi a chuahpi a ṭa pakhat te lawng a ngei i cu a chuahpi a ṭa Pu Sang Zul nih cun 1991 kum Farfawn khua ah a thih tak. Pu Sang Zul hi mitha tuk a si.
Lehtama rian a thiam i mi nih inn an sak tikah siseh chungkhar herh thilri ser le remh hi man lak loin a tuahpiak tawnmi hna a si. Pu Sang Zul nih cun Farrawn khuami Zing Pam a ṭhit i fanu pahnih le pafa pakhat: Zing Hnem, Ṭial Dun le Hniang Sung a ngeih hna.
Za Hnem cu mi lungtling tuk a si lo caah vangei lo in a um. Ṭial Dun nih cun Farrawn khuami Sui Hnem a ṭhit i Ni Cer, Biak Ṭha, Ceu Lian an ngeih hna hnu ah Pu Ṭial Dun cu pawfah damlo in a thi.Hniang Sung nih cun Farrawn khuami Mang Cung a vat i Peng Awi, Hram Thluai, Ṭa Kam le Biak Zel an ngeih hna i Farrawn khua ah khua an sa.
Pi Sung Ci (Mrs. Nawl Tling) cu amah kum 87 a tlin (2012) kum ah hi vawlei nunnak in a nunnak a liam.
Kawlram caan Zarhpi zaan ah Rev. Nawl Tling tuanbia Hika ahhin rel khawh a si. Hmanthlak cheukhat balte an rawk pah i an cuang kho lo.
(Hlan lio kan nu le kan pa le nih cun aa rem lomi kha hmunkhat ah fonh ter an i zuam lio ah Nihin kan chan ahcun zeitin dah kan i cheu lai ti rumro khua kan khaang... Hihi Zumtu kan pi le kan pu le nih an rak zulhmi lam le an rak thih hnawh mi Pathian rian cu a si rua lo tiah ka ruah.)
EmoticonEmoticon