Zaanṭim Email (Rev. Dr. C. Duh Kam 2009)

1976 kum ka dairy

(Hi cabia rel nuam hi 2009 July 10 lio ah kan pa Rev. Dr. C. Duh Kam nih Laiforum Yahoo Groups ah a rak tarmi a si. tangdeh "t" lawng ka remh a rak ṭialning in a si.)

1976 kum Zarhpini zing khat cu ni khua a ṭha tuk.   Mizoram Thingsai tlang lei zoh ah thing le ram hna cu hring dildel in an um.  Pumhnak dar an tum.  Suimilam hmanh ka ngeih khawh lo caah a caan fiang in ka thei lo.  Arkhuan le darkhing tum nih cun fiang in caan cu a kan chim kho fam lo cu teh. Hi lio ah rak uar ngai mi a tai khamh ummi jacket rang kha kaa hruk i biakinn lei ka panh.  Mi dang zong biakinn an panh cio hna. Biakinn thlang bualrawn ka phak ah chak le nichuah lei in meithal he Kawl ralkap cu an rak chuak lulhmalh hna.  An van ka fuh i Saya Duh Kam, minung pakhat ks. 5.00 cawi in bawlung chuih kan i zuam lai tiah an ka ti.  Hi lio ahhin khuate saya nih ni khat ah ks. 5.00 te lawng kan hlawh.  Lam rianṭuan pawl nih nikhat ah ks. 3.50 lawng an hlawh.  Tangka fang nga cawi in bawlung chuih zuam ding cu ṭih a nung ko.  Sungh ahcun ni khat hlawh.  Ramdang kal i dollar hmuh chan a si fawn lo.

Lungler ralkap an si. Bawlung chuih an thiam an ti ka theih tawn. Sungh ding ah kaa ruah cia pah.  Tlanval no lio kan ti fam cu thi a thak pah bantuk ṭung.

Ralpel tlangval kha ralkap he bawliung chuih zuam ding cun ka sawm hna. An duh lo.  Lungler tlangval le Bungkhua tlangval he an chuih caan ah ralkap pawl cu an sual tuk.  Mi vuak an hmang an ka ti ko ai.  Patung no kha ka sawm hna. Ks. 5.00 cio kan hlawh lai ka ti hna.  An ngamh pah ziar lo.  Minung 11 si lo in, 9 in kan chuih lai ka ti hna.  Ka hnek pah nawn hna.  An lung a tling ve. Ralkap pawl cu ka chimh hna.  An i tiim ve. Ralkap cheu khat nih ralbawi ho in biakinn chak tlang hmun kip in meithal he an kan congh. Cu lio cu ral ven le hawl ah an i chawh lio a si.

Kei zong biakinn khawmhnak jacket he cun lek awk a ṭhat lo caah, inn lei ah ka kir.  Bawlungchuihnak fawm in ka rak chuak.  Ka hawi dang an rak chuak cio.  Bualrawn kam ah pumh kaimi vialte cu an ṭhu.  Pum lo in, ralkap he bawlung chuih kan i zuam cu an kan zoh.  Khuapi tein Zarhpini ka buar ter hna.  Pastor ka si lo cu van ṭhat.  Phuah ka tong hnga.  Chuih ding in hmun kan la.  Kei cu a lai ah ka lek.  Hmai (forward) le hnu (back) ka bawm pah hna.  Awl tein tei ding ah  kaa ruahmi kha kanmah team tu nih kawl khat kan van sanh duk ko ai.  Ralkap pawl cu an ṭang ngai.  Sual an thok pah.  An puar deuh.  Ka hmai ah an hmaitli ralkap sen hnih pa nih ka paw lamh chih pah in a ka nam.  No lio titsa ṭhat lio deuh kan ti cu thazang ngei cio kan si tiin kaa ruat pah a si men lai.  Ka thin a hung pah.  Ka hro.  Van ṭhat ah a rak ka ṭih ziar ai.  Ka hmai ah a ra ngam ti lo.  Khat lei ah aa ṭhial. 

Ralkap pawl cu an ṭang tuk cang.  Nam rumro in a kan nam ko cang.  Kannih zong kan ṭang chinchin ve.  Ruah lo in kawl khat kan van sanh duk ṭhan.  Kawl hnih a si cang.  Kan team work a ṭha tuk cang.  Zeitihmanh in ralkap nih nam khawh ding kan si ti lo.  Ralkap cu thinhun in an i la cang.  Kan fullback pa kha an vuak.  Ralpel tlangval bawlung chuih hmanh a ngamh lo mi pawl cu bualrawn tlang in an rak zuang ve.  “Nam in kan sah vek hna lai” an ti.  Ralkap hriamtlai pawl an rak zuang ve.  Meithal in kah ding in mipi lei cu an kan hoih.  Ral an ven lio a si i kah awl te kan si ko.  Ruah ṭhan ah thin a phang pah ko.

Kawl holh ka thiam chun in ralkap pawl cu “Nanmah he bawlung lek hi an duh lo.  Keimah nih ka sawm mi hna an si.  Nanmah sin in bawlung chuih kan cawng lai ka ti hna caah kan in lekpi hna” tiah ka van ti hna.  Ralkap pakhat cu a piangthar kan ti lai maw, a lung a fiang kan ti hnga dek.  Ralkap a hawi le pawl kha “ti hna hlah u” tiah a van ti len hna.  Ral bawipa kha a ra i ralkap vialte cu an tlunnak ah a kal pi hna.  A cheu sentari an cawng ṭhan.  Cu cun kan dai hme cu!

Ralkap pawl hi kan nak in an thiam deuh ngai ko.  Mah le bualrawn te cu kan i ziak tuk ve caah a si.  Laimi caah cun Lairam hi kan rak i ziak ngai.  Kanmah le hmunhma ahcun a ṭhawng zungzal mi miphun kan si ve ko.  Pipu chan in mi nih tei peng mi cu kan si bal lo.  

Hi ralkap pawl nih a tu tiang ks. 5.00 cio a kan bat rih ko.  Kum 33 hrawng a si cang.  Khrih kum zat a si cang.  A karh he cun ks. 10.00 tal a si cang lai.  A liam cia kum 33 hrawng Laimi kan sining le nihin kan dirhmun cu aa dang tuk. Ralkap nih a karh he $10.00 hrawng a kan batmi cu Pathian nih a let tamtuk in a kan cham cang.  Pathian nih Laimi kan sin ah khuaruahhar tuk in aa phuang.  $1.00 cu ks. 1000.00 reng lo a si ko cang.  Kan Bawipa Jesuh Khrih nih changreu dar nga le nga pahnih in minung 5000 rawl a dangh hna bantuk khuaruahhar thil a si tiah ka ti tawn.  Pathian ka thangṭhat.

Pathian nih a kan dawtnak hi thei in a thluachuah rel thiam usihlaw cu, Kawl ralkap nih Laimi a kan batmi nak let tamtuk in Lairam hi kan cham khawh hnga.  Thil ṭha tampi kan ṭuan khawh hnga.  “Khrih caah Laimi” kan si taktak ko hnga!  Nihin ah phan a umbik mi cu “Khrih caah Laimi kan si lo sual lai” ti hi a si ko.

Advertisement

C. Duh Kam

Washington, DC