Kawi Sang le Hnem te cu ca an cawn lio tein pakhat le pakhat hri an rak sih i, sianginn an chuah hna tiang in an dawtnak hri cu cat lo tein an i ṭhi. An i nawl thiam ngaingai. An chungkhar khua saknak kong ah hin chimrel awk fangkhat hmanh an um lo.
Hnem te nih cun kawi sang cu nu le an si hnu pi tiang hin a mit hram te ah hin umter a duh zungzal. Kawi Sang zung a kai caan hmah ahhin zokzok tein caan le suimilam hi dih sehlaw i tong zau cang usih ti lawng hi saduh a that camcin ko.
Tlawmpal te zungṭum a hnut te hawikom in hna i a lan caan hmanh ahhin Hnemte cu aum kho lo i, aatengle le dir thannuam lo le ṭhut thannuam lo in a um.
"U Sang, a tu hi maw na ṭin caan a si tawn? Mi umhar lai le awlokchong lai zong ruatpah ikpak lo in nazi paruk zong a si deng cang."
"Nihin cu ka zung rian a tam tuk i dahkaw kei mah zong tuan tein rak ṭin ka duh ko na tein ka rak ṭin thiam lo cu. Na um a har tuk maw," tiah a ti pah in Hnem te kut cu tlaih a van timh i, Hnemte nih cun a phih vurmar.
"Ka hmuh lomi cu zeiti paohin chim law a poi lo a tu cu keimah mit hrimhrim in kan hmuhmi a si ai," a ti i Hnemte cu a mitthli a tla hnik. Kawi Sang ar aa bang ar ko in a dir i," Zeidah a si?… ka palhnak a um ahcun hung ka ngaithiam … zeidah a si."
"Ngaknu he duh paoh in va tlon riangmang in innchung le sinah mah tluk lihchim cu dah ngai… Mah nu khi cu kom ti hlah kan ti lo maw," ati i ik lengmang in a ṭap ṭhan.
Aih… Nu Iang he kan rak i zulh cu dara na thin a hung hoi hi. Hi ka kan innpawng te hin dahkaw kan rak i zulh ko. Bia hmanh kan i ruah manh lo heih. A… mah cu maw a si.
Khah … na thin i dai cang kun… na mawh lo, a ning cang ṭha tein na theih lo caah a si… ra kun… rawl hna na hminh cang maw… ei tuah u sih…," tiah a ban in a vun hruai hnik, nai sai… Hnem te nihcun a duh deng lo.
"A tu lawng a si lo, a zungzal in mah nu sin lawng ah an um. Mah ti nan um lengmang ahcun ka duh ti lai lo, Maak i na ka maak ṭung lo ahcun."
Ai… Hnem te sian lo, na thin phan a fawi tuk ai, nangmah le keimah ṭhen tiangthiang hna cu chim awk a si lo. Bia hi a hleitluat tuk chim cu a ṭha lo. A tu tiangah dahngai ngaknu le tlangval lungthin in kan i kom rua ti awk zong na theih lo e.
Hi vialte khua kan sak chung zongah hin mah tluk lawm mam tiangin zumhawk tlak lo i umnak zong dahngai ka hngalh rih lo e.
"Mah tluk mi zuangzam le mitpar ngeimi a si hi na hngal lo maw?"
"A duh ah zeipaoh si ko ngat seh. Bia ṭhi ṭha lo hna na chim sual lai. Inn le pa zong an si fawn i, mah bantuk cu a ṭha lo, zei setsai lo ah mi zong nih an i si i ti zongah an kan ruah sual lai, ma cang ko u sih kan bia hi zeitik dong ding a si fawn ṭung lo," a ti i, a kal tak.
Hnem te cu Kawi Sang kha a mah lawng te nih ngeih a duh. A dik ko, amah lawnglawng hi a ngei tu ding cu asi hrim ko i, a ngei tu zong cu a si rih ko. A dawt tuk ahhin a dawtnak hi midang nih an ka chut sual lai maw, an ka chut sual lai maw tiah thinphan dai lo in a um zungzal.
Saruh thanuam ngai in a sehmi uico nih lamlat nawn in a rami uico dang a hmuh tik hna ah a saruh cu a thiah riangmang i, a ni a hlih i a ngir ko khi a lo. Hnem te hi uico he tahchunh awk a si lo nain a ziaza hi cu tahchunh phun zong a si nan ti ve ko lo maw?
A saruh thlak riangmang in ngir lennak cha cun an ka chuh sual lai ti a phan ahcun saruh kha fek tein seh chinchin seh law a ṭha deuh hnga lo maw?
Kawi Sang leng i a chuah tikah hin a zum hrimhrim lo. Nu he an i ton i, bia an i ruah sual citcet te cu, bia hi leh cawk loin vaikurang zat in a hal tawn. Hi ti a um caah Kawi Sang hawi te pawl zong nih an ti hram tawn i, Kawi Sang le a nih cu cuticun an um.
Lam an leng ṭi tawn tiah a phunphun in an ti hram tawn. Ngaknu hmantlak zong khi a angki zal hna ah an sanh ziar tawn i, rolung chia an bunh ter tawn hna.
Kawi Sang cu mi tha a si i, mi um lo kar ahhin cun Hnem te i zeitluk a ti zong ahhin a ngaihthiam ko nain hawi um hngan ahhin cun faktuk cun hung ka ti hlah seh ti a duh. A si nain mi um hngan ko ahhin ṭha lo te in ti tawn kaw, Kawi Sang cu ningzah caan a tam tawn ko.
Hi ti a si caan ahhin Kawi Sang cu nu lawng si lo, pa hawi kom zong nihhin tlumtha tein an kom ngam set ti lo. Kawi Sang zong nih cun hi tihin cun a si kho lai lo, ka rengh pah cang lai a lem tuk ai a ti i ngaknu kong i a lunghrinhnak kong a chim zongah "A si bak ko" tiah a leh men cang.
Hri zong khi kan dorh tuk ahcun a ngerh dih i, kan rengh tuk ahcun a cat ve tawn. Cucaah cun nem tein cawnpiak khawh lo mi hna cu a harnak in ti a hau ve ko cang, a ti i, a duh paoh in a um ve cang.
Hi ti i, Kawi Sang aa tuah hin Hnemte cu a lung rawh a zual chin ciamman hoi fawn i, mah bantuk va ngeih le ngeih lo hi, nupi le zeiah a rel lo le a sunhsak lo mi va sin umnak cun kan i ṭhen ah a ṭha deuh lai. A duh ahcun a mak in hung ka ma seh a ti ve hoi i, a duhduh in a um chin lengmang.
Hnemte lungthin hi Kawi Sang nih a hngalh tikah, "Mah tluk ka dawt le ka tlaihchan hngal ko nain mah ti aa tuahmi a duhah kal seh, ka zei a poi lo," ti lei in a la va cang.
Rawl an ei zongah chawn lo bia loin hing fur in an um, len lai le kal lai zongah chim le ruah um ti hlah. Hi ti Kawi Sang ruahnak nih hin Hnemte kar hlan cu a sau ter chin lengmang ve i, Hi tluk ka sian lo le ka dawt bu i, mithar ton i, mi hlun philh hmang mi cu zei ah dah ka tuah lai, a ti i, a kar hlan bon ahcun a pehchin lengmang ve i, a donghnak ahcun kan chan cu mah vial hin si ko cang seh, an ti i zungzal a tong ti lo si dingin an i ṭhen.
Mah hna nu va hi hlan ahcun a daw tukmi le mizong nih chim thiam tukmi an rak si ko nain atu cu lam ton hmanh ah a zoh duh ti lo mi le thihnak le nun nak tiang in a thlak ti lomi le an si ko cang. Ngaihchia ngaingai an si.
A i dawt tukah fahnak a chuak. An i daw leh lo i hen pei an i ṭhen cu nan ti hnga. Mah tluk a daw cia mi an i ṭhennak kong hi a phi a um ahcun a tuaknak cu a um ve ṭheo lai ta.
"A hram a ṭhat ahcun a par zong a ṭha ve," tiah phungthlukbia a um ko nain a hram a ṭha ko nain a lai fang a ṭhat lo ruang ah a par a ṭha lomi zong a um. Kanaan kan tuah tikah a hram thawk in a tuahnak vialte kan thiam ko nain a laifang hrawng ah number fangkhat kan palh sual ahcun a phi chuakzong palh thai a si ko.
Cucaah cun mah hna nu va hi an hramthoknak cu a ṭhami zong a rak si ko lai nain a laifang an umtu zia an sual ruangah an nunnak cu ngaihchia ngaingai in a tlang an kawm ko.
Cucaah cun a hram thawkin a lai fangin a dongh tiangte a ṭhami si awk ahcun a zungzal ralring tein kan um a herh ngaingai. Nu le va hi, Bawi Jesus nih, Pathian nih a kawmh mi hna cu ahohmanh nih ṭhen ti hna hlah seh," tiah a ti tikah hin a ṭha tuk hringhran.
Nu le va hi thihnak lo nih cun zeihmanh nih ṭhen awk kan si lo. Hihi saram cung i kan cuannak zong a si. Cu ti si loin kan duh tiang poh kan i umh i kan duh tik poh ah kan i ṭhen lengmang ahcun minung hi sa ram hlei in kan thiang hnga hlah i.
Hlan lio lung chan te hna ahcun nu le va hi a tu bantuk in an rak um lo. Chungkhar ti awk hmanh hi an rak ṭha lo i saram ko an lo. Minung kan hung thang i, vawlei cung fimnak a karh bang chungkhar khuasaknak zong hi a sang chin lengmang i, a tu chan ahcun nu le va ṭhen le hna zong hi a tlawmchin lengmang i, chungkhar dawtnak le hmunhnak hi an i zuam chin lengmang. Hi hi minung kan sannak le kan ṭhan nak, saram he kan i thlau chin lengmang nak a langhnak a si ve.
Nepoleon Siangpahrang nupi zong hi mi bia tam tuk le mi lunghrinh hmang ngaingaimi a rak si. A nupi nihhnin a phunzai hnawh zungzal. Zung chung ah ram ca rian a ṭuan len lio hna ahhin ngaknu dang he bia nan i ruah hrimhrim ti ko seh law rolung chia a hung bunh tawn.
Zeipoh ahhin amah hi aa upat i, a va hi tangchiah rumro te a zuam caah a va pa zong nih a celh ti lo i, a siangpahrang inn le hmun cu a nu pi kha a kiamh i a kal tak.
Rumra ṭha ngai in siangpahrang rianṭuannak cha cun a nupi uk le teinak phun hnawh le hranhnawhnak in luat a duh deuh. Cucaah cun chungkhar khuasaknak hi, zeitluk biapi dah a si ti cu hngalh khawh a si ko.
Russia ram i caṭial a thiam ngaingai, minthang pa, Tolstoy zong hi a nupi nih a rak phun zai thawh tuk i, zeitik hmanhah thanuam le um rua thaw tein a um ter bal lo.
Veikhat cu Tolstoy nih cun an nu he an ngaknu tlanval lio i an rak i dawtnak le an rak i nuamhnak, chungkhar an hung si tik vial i an i nuamh lo le thinlung kuai hnik zungzal i an umnak kong kha tuanbia bantuk in a ṭial i an nu cu a hei rek piak tikah cun, an nu cu a ngaih a chia tuk i, a mitthli a tla thluahmah ve an ti.
Tolstoy cu kum 82 a si ah a nupi ziaza cu celh hrat ti hlah kaw, ramlak ah thilpuan loin a vak i, Russia ram cu khua nih kiktuk fawn ṭung kaw, khuasik nih a tlaih i a thih zong a thih phah.
Tolstoy nih cun, "mah bantuk nupi he hin cun zei zung hmanh ah i tong ti hlah u sih," tiah ro a vuih tak, a nu pi cu a va a thih hnu ceo in a lung a pem i, thinlung chir in van sang auh len zong ah zei a ṭha hnem ti lo.
A thih lai teah a fa le sinah, "ka fa le, kei cu ka thi cang ko lai, nan pa athihnak kha keimah ruang ah a si, nan nih cu nan innchung sin nan thin a hun can hmanh ah sum hun i zuam uh," tiah ro a vuih hna.
America ram siangpahrang Abraham Lincoln zong hi nupi ṭha lo tiap te a ṭhit sual ve i, hawi dang zung an tum can i an fa na nupi le nih an rak dan hna le zungkai ṭhan kai hmanh an zuam ti lo ah, Lincolh cu inn hmanh ah tin ngam loin, Hotel ah thlaruk tiang hna a rol tawn.
A J Beveritao ngai a si i, Tlawm te bia an i al hniar ahhin innpa theih in au a hmang tawn. A kut a zaang ngaingai i, a va hna hi zei set lo ah ṭha lo tein a velh tawn. Mi um ko ah a sopawt a zual."
Hi a cunglei vawlei cung minthang hna chungkhar khuasaknak kong kan zoh tikah, ingpuan le phunzai tam tuknak te hna hi zeibantuk dawtnak hmanh nih a celh lo i, mah bantuk nupi cu an ngeihchiah le an chawva, an rian le an lianhngannak vialte zong zaangram lo le hmarngai loin an hrial i an kal tak ko.
Nu le va zungah kumhleikhat rian a ṭuanmi pa Bessie Hambuger nih, "Nu le va a simi le aa ṭhenmi hna lakah 75% cu nu ṭhat lo ruang ah a si" tiah a rak ti.
America ram Chicaco khua ah Judge Jose Sabath an timi pa hi, nu le va aa rem lomi hna remh a thiam ngaingai. Nu le va aa si i zung a ra phanmi 49,000 lakah 20,000 cu a remh khawh hna.
Hi pa nih a chimnak ah cun, nu le va ṭha lo tein an i sik le zung tiangtiang hna an hung phanhnak cu, thil hme tete ruangah a si tiah a ti. Reno an ti mi hmun hi nu le va a ṭhenmi hna biaceih a tam ngaingainak a si i, zarhkhat chungah niruk cu nu le va kong ceihnak ah an hman i, buaktlak in tuah tik ah Minute pakhat ah bia pakhat ceih lengmang a si. An biaceihnak hmunah va kal theng i, an bia va ngaih set ahcun thil hme tete ruangah a si ko, timi bia hi tam bik theih khawh a si.
Biatak a si, thil hi a hmet te lio i zeiah kan rello ahcun thil nganpi ah a chuak tawn, Ti zong khi a dor te te in a tla nain saupi kan donh ahcun pungnganpi khat lakin a dil khawh ve ko.
Cubantuk cun innchungkhar kong zong ah hin thil hme tete zong hi òha te in kan i ralrin awk a si. Kan laiholh ah, "Nu phun le fa zai," an timi bia zong nih chungkhar dawt lonak le lung ton lonak tam pi a chuah termi cu a cunglei tuanbia ah kan hngalh cang.
Cucaah nu hna caah ralrin awk ngai ngai herhmi cu, nan phunhran tamtuk hlah seh" Uico zong nih saruh cu a duh ngaingai ko nain saruh in na cheh ahcun a zam ṭhiamṭhiam ko lai. Cucaah chungkhar chungah i hro len le i suk chih le i norh chihlennak cu zei bantuk dawtnak hmanh nih a celh lo i a zam tak zau ve lai.
A HRANG TAWN RUN INNAH
1. Kan cung deirel arfi hna cu, Lawm in an lengṭi tawn. Keibel maw hi vawlei cungah, Ngaihchiat a dai lai lo.
A hrang tawn run inn ah, Pawpi hrum ai thawng bang,
Run chung tang hrinhniang rual hna cu,
Leng ah an zam delmal.
- Chun ni tang lo rianram ṭuan le, Run chung tang lairel ah, Thai nunnem a tel lo ahcun, Ṭuanrel a tling kho lo.
- Nitin, Zantin run inn chung ah, Chim thli pi a hrang tawn. Kei bel maw hi vawlei chungah, Thai lung lian ral ka phang.
- Hawikom unau rualchan hna cu, A par tlanh ah an ra, Ramsa hliam bang, Run chung tangah, Hmaisen in a hrang tawn.
- Leicung lianhnak le rumnak nih, Ka lung a hnem kho lo. Runchung tang i thai nunnem he, Awi te ṭuan rel lo cun.
Rev. Carson Hniar Kio nih "THIHNAK NIH A KAN ṬHEN TIANGIN" timi cauk i biahmaisa i a ṭialmi a si. Rel na duh ahcun Click chih te.
Dam tein ni kan liam ah cun Hmaizarh ah "ZEIDAH A KAN DAWN LEM" timi tlangtar in kan peh tthan te lai.
“KAN LAI HLOH IN VAWLEI ROCO USIH”
Advertisement
EmoticonEmoticon