Rev. Joseph Nun Tum (Aive) (1927 - 2010)

Rev. Joseph Nun Tum (Aive) (1927 - 2010)
Chuahkehnak
Nun Tum cu Hakha peng Aive khuami a si i 1927 kum chungah a pa Pu Al Ling, Hauling chung le a nu Pi Hniar Kim nih an hrin. A chuahpi uanu hna cu a u ah Pi Nu Har le a nau ah Pu Ṭial Mang tiah pathum chuak an si. A pa nih kum 4 a ti ah a thihtak hna.
Lai ca cawnnak
Nun Tum cu mah lio ah cun Aive khua ah sianginn a rak um rih lo caah Dauchim sianginn ah 1940 kum in tangkhat a cawng i 1947 kum ah tangli a awng. Japan ral kha 1942 kum Kawl ram chung ah an lut siang inn vialte an khar dih i 1945 kum lawngin an hun ṭhan caah mah kum tiang hi a rauhnak a si. (caṭialtu)
A mah cu hi Dauchim sianginn i ca a cawn chung vialte Aive khuami nih an zohkhenh; an rak bawmh.
Baibalcacawnnak
Laica tangli a awn hnu cun Rev. Nawl Tling nih Hakha ah baibal cacawn dingin a rak forhfial. Ngakṭah fate a si caah Baibal cacawn cu a duh ngai ko nain cawng kho ding pawl a si lo caah Rev. Nawl Tling nih cun Hakha siangbawi Johnson le an nu a nawl piak hna i thlakhat ah K. 20/- in an bawmh i MiE Peng nih K. 5/- an bawmh ve i mah hnu cun Baibal sianginn cu 1954 kum in a rung kai.

Nun Tum cu Baibal ca cu kum hnih a cawn i mah hnu cun Hakha Baibal sianginn cu Falam ah an run ṭhial. Falam i an ṭhial hnu cun tang sarih a awng lomi cu Baibal cacawnnak nawl pek a si lo  caah Nun Tum cu Baibal ca a cawng kho ti lo.
Mirang Sianginn cacawnnak
Nun Tum cu Falam Baibal sianginn ah ca a cawn khawh ti lo caah siangbawipa nih cun a tawlrelpiak i Hakha State High School ah 1957 kum in Mirang ca tangnga a cawng i 1959 kum ah rang sarih a awng. Amah cu Hakha i ca a cawn lio ah khualmi Fellowship ah upa a ṭuan i Boarding Master zong a rak ṭuan. Khrihfa lei zongah an rak hman ngaingai i hlacawn le hlasak ah cun amah tel lo cun tlam a tling lo bantuk a rak si.
Nupi ṭhitnak

Nun Tum cu nupi ṭhit a hung zat cang caah nupi cu an khanpiak i 1952 kum  chungah Suntei (chuntei) phun Pu Tawk Dun le Pi Men Dong i an fanu upa bik Nu Ui Nawn he a thiangmi ṭhitumnak an tuahpiak hna. Fapa 3 le fanu 9 Pathian nih rosung thlua a chuah hna.
Falam Baibal cacawnnak
Pa Nun Tum cu Hakha sianginn cu tang 7 a awn hnu cun Falam Baibal sianginn ah peh ṭhan dingin siangbawi Johnson nih cun a tawlrelpiak ṭhan i 1960 kum ah Zomi Thoelogical School cun Dip. Th. Course cu a lim. Mah lio i an Principal cu Rev. David Van Bik a rak si.

Pastor rianṭuannak
Pa Nun Tum cu Falam Baibal sianginn cun Dip. Th cu 1960 kum a awn hnu in MiE pengah rian a ṭuan i Aive khua ah a um. Mah hnu cun Pastor Nun Tum run ti a si.
HBA GS ṭuannak
Pastor Nun Tum cu Aive Khrihfabu sin i rian a ṭuan lio 1961 kum chungah HBA Triennial civuipi cu Hakha khua ah an rak tuah. Mah tiangah hin HBA an thawknak in kum 13 hrawng a si cang nain caantling Secretary an thim i Pastor Nun Tum cu HBA General Secretary an thim. Cucaah amah cu a hmasa bik General Secretary a ṭuan mi a si.

Pastor Nun Tum nih HBA GS cu kum 6 a ṭuan hnu 1967 kum chungah HBA civuipi cu Senthang peng Lungrang khua ah rak tuah a si. Mah civuipi ahcun MiE peng nih an hal caah Pastor Nun Tum cu GS rian cun aa din. Mah hnu cun HBA Chairman kum 23 chung an ṭuanter ṭhan.

Saya Nun Tum cu HBA GS a ṭuan lio ah Baibal ca zohṭhantu komiṭi le hla komiṭi te hna ah aa tel lengmang; hla a thiam, a aw a ṭha.
Rianṭuanmi dangdang
Rev. Nun Tum nih a chim tawnmi bia cu, "Bawipa nih hin Thlarau ca lawngah rianṭuan a kan fialmi a si lo, ram le miphun ca tiangin thilṭha tuah dingah ṭuanvo a kan pekchih," tihi a si.
Cucaah Aive khua ahcun Private in Lai sianginn a hun tuahpi hna i amah hrimhrim nih ca chimh cu a bawmh hna. A khuami hna cu, "Inn ṭhaṭha le hnipuan dawhdawh ngeih nakin fanu fimfim le fapa thiamthiam tu ngeih deuh i zuam dingin," a forh zungzal hna.
Aive khua cu a vuaksak a ṭhat lo caah an khualu tlungrawn hmun ṭhat deuh nak Sayaci Nawl Hrang le khuabawi he an i bawm i an khua cu an hun ṭhial. Ti an ngeih lo caah UNICEF lei upa, ṭuanvo ngeitu hna an nawlphiar hna i ti cu UNICEF nih an lak piak hna i din awk ti cu duhdimte in an hman i, an i lawm tuk hringhran.
Mah hnu cun khua mi cu, "Bawipa caah innṭha bik kan sak lai," tiah a timhlampi ṭhan hna i MiE peng chungah Biakinn ṭha bik an run sak fawn. Hruaitu ṭha i ngeih cu vanṭhat pitawp a si.
Rev. Nun Tum nih a Khrihfabu a cawnpiak tawnmi hna cu – "Kannih Aive khua cu kan thing kan ram a chiat lengah ramkau kan ngeih lo caah kan thlawhṭuanmi tu chungin eikhim le dinkhim kan hmuh ngakhnga le Bawipa thluachuah kan don zungzal ngakhnga –

1. Cheuhra cheukhat hmaante in nan pek lai i Bawipa nih nan rawl buk le nan haan cu khat cikcek in an rawnh ko hna lai.
2. Khualtlung salam nan dawt lai i nan theih loin vancungmi nih thluachuah an ṭhuamhthlak hna lai, tiah a cawnpiak zungzal hna. Cucaah a khuami nih Rev. Nun Tum cu mithmuh lo khuazing ah an ruah i an i bochan ngaingai.

Rev. Nun Tum zawtnak thihnak
Rev. Nun Tum cu a dam lo ruangah 1990 kum in Pastor rian in aa din i innchung nu Pi Ui Nawn nih mah kum May 14 ni ah thlaanmual a liamtak hna. A dam lo ruangah siizung panh fawi deuhnak Hakha ah 1992 kum in an chungkhar dihlak an i ṭhial.

Rev. Nun Tum cu Aive Tipil Khrihfabu nih 1998 kum ah Jubilee puai an tuahpiak. Amah cu 2003 kum in pumzen zawtnak nih a tlak i hawi hngar in kum saupi a kuah hnu 2010 kum November 22 ni chungnu sml. 2:00 ah a rian a ṭuanpiakmi a Pa Pathian ṭaang cungah hnangamte in aa din.

A ruak cu HBC nih November 23 ni ah HBA thlanmual ah an vui.

Cherhchan :
1. HBA Golden Jubilee (1948 – 1998) Mngazine, page 100 – 103
2. Rev. Nun Tum ruak cung caan hmannak bulletin.
(Hi tuanbia sung hi HBA nih Pathian rianṭuantutleicia hna le Pension a la cangmi hna tuanbia chung in ka char ṭhanmi a si.)(Hi tuanbia sung hi HBA nih Pathian rianṭuantutleicia hna le Pension a la cangmi hna tuanbia chung in ka char ṭhanmi a si.)

Advertisement