Chuahkehnak
Van Hre cu Hakha Zathang phun Zahmung hrin a pa Pu Mang Nawn le a nu Pi Zing Taang nih 1939 kum March 15 ni ah an hrinmi hna fale 7 lakah upa bik a si. A chuahpi naule hna cu – Za Cung, Ni Chin, Ram Lian, Hmung Luai, Fa Ceo le Mang Bik an si i far pakhat te lawng an ngei.
Khrifa Cannak le Cacawnnak
Van Hre cu khuahrum biami chungkhar in a chuak i a ṭhang a ngan nain 1951 kum amah 12 a si ah Khrihfa ah a cang. Khrihfa a si kum cun Hakha State High School ah sianginn a kai i 1961 kum ah tang 9 a awng.
Tipil Innak
Van Hre cu 1953 kum January thla kumthar zarh ah laitlang a hmanung bik siangbawi Rev. R.G Johnson nih tipil apek. Amah cu tipil a in khawh cangka cun Hakha Khrihfabu mino hruaitu ah an hman i Hakha peng mino hruaitu President zong kum 5 le Seretary kum 3 chung a ṭuan.
Rian A Phunphun Ṭuannak
- Hakha Lung Biakinnpi siangbawi Johnson nih 1962 kum sak hram a thawkpi hna i Lungṭhava i an lak mi lung cu lungahnak seh in Pu NamVung he a rak at-tu bik an rak si. HBC Lung Biakinn saknak i hmanmi lung vialte khi Van Hre ahmi ngawt an si.
- Khuabawi ṭuannak : Baibal ca a cawn hlanah Van Hre cu Hakha Dawrthar sang uktu khuabawi ah cozah nih an thim i 1964 – 67 tiang kum 3 chung khuabawi rian (biaceihtu) a rak ṭuan.
Baibal Cawnnak
Van Hre cu biaknaklei ah pumpek taktak in rian a ṭuanmi mino hruaitu ah hmanlek a hung si caah biaknaklei hruaitu upa hna an lung a ton ngai hna. Cucaah 1968 kum chungah HBA civuipi cu Senthang peng Lungrang khua ah rak tuah a si i mah civuipi ah cun Van Hre cu Insein Baibal sianginn (Kawl) ah cacawn dingin biachahnak an tuah.
Cucaah Van Hre cu 1968- 72 kum tiang Insein Kawl Baibal sianginn (MICT) ah Baibal ca cu a cawng. Mah Baibal course cu a dih in Hakha ah a tlung i HBA nih Upa lai ca chimtu Adult Literacy Project (ALP) timi rian MCC program in rian a ṭuan. Kum 2 chung biatakte in Upa Lai cacawnnak cu a tuahpi hna i tampi a ṭhahnem.
Pastor ṭuannak
Saya Van Hre, Upa Lai cacawnpiaktu Saya a si caah, kum 2 chung 1974 kum tiang cachimtu saya a ṭuan hnu cun HBC nih 1974 kum chung cun caantling (full – time) Pastor ah an lak i mah hnu cu Pastor Van Hre tiah run ti a si Mino hruaitu le Church Secretary rian ah an hman.
Mah hnu cun Pastor Van Hre nih HBC Khrihfabu chungah a lungthin, a ruahnak le a thazaang dihlak in rian a ṭuan i a Khrihfabu innkip ah thla a campiak hna, ngaihchiami, lungretheimi a hnemh hna. Pastor rian taktak (Pastoral Work) a ṭuan.
Ordination Peknak
HBC Khrihfabu chungah kum 4 khengte Assistant Pastor le Church Secretary rian cu a ṭuan hnuah HBA civuipi cu 1978 kum chungah Senthang peng Keizawn khua ah run tuah a si. Mah civuipi ahcun HBC Khrihfabu nih an Pastor Van Hre cu Oridination kan pekpiak uh, tiah an sok.
HBA hruaitu upa pawl nih cun an ceih i Pastor Van Hre cu Ordination pek awkah an lung a tlin caah HBA civuipi Keizuan khua ahcun Oridination cu an pek. Mah hi hram thawk (1978 kum thawk) cun Pastor Van Hre cu Rev. Van Hre tiah run ti a si cang.
Khrihfabu Chung Rianṭuannak
Rev. S. Van Hre cu HBC Khrihfabu chungah 1978 kum in 1985 tiang Assistant Pastor cu a ṭuan. 1985 kum chung ahhin Rev. Jones Mang Hope nih Church Council Meeting ah, "Senior Pastor in Assistant Pastor ah ka ṭhum ko u," tiah a sok caah Rev. Jones Mang Hope cu a rian cun an ṭhumh i Rev. S. Van Hre tu 1986 kum in Senior Pastor an kaiter. Mah Senior Pastor rian cu 1988 kum tiang kum 2 chung a ṭuan.
Mah hnu hin Rev. Van Hre nih Khrihfabu thar, a tu i Zion tipil Khrihfabu khi, dirh a duh caah a si khawh tawkte in a hun cawlcang. Biakinn saknak hmun zong cu Hakha Township People's Council Executive Committee nih an hun tawlrel i mah hmun ahcun Biakinn cu an hun sak. Kum tampi an rauh hnuah a minsak dingah an hung buai ṭhan i a hnu bik ah, "Zion Baptist Church" tiah min an hun sak i HBC nih 1991 kum July 14 ni ah Blessing a pek i mah ni hramthawk cun Rev. S. Van Hre nih Senior Pastor rian cu 2001 kum February 11 ni tiang a hun ṭuanpiak hna.
Pension laknak
Rev. Van Hre cu mi ngandam a si i cumpi tlangrai in dah ti lo zawtfah ṭha loin zawt hi a ngei lo. Khrihfabu chung zongah a duh tawkte in rian a ṭuan kho rih ko nain le Khrihfabu zong nih na sian lo hnin HBA upadi le phunghram nih a hun tlaih ve caah HBA BM meeting cu 2001 kum February 11 ni ah Tinam khua ah tuah a si i mah kum cun pension pek a si.
Asinain Rev. S. Van Hre cu a Khrihfabu nih an sian lo caah a rian in i dinhter loin Khuahun Pastor (Emeritus Pator) ṭuanpiak dingah upatnak he an nawl bantuk in athih ni 2003 kum September 8 ni tiang a Khrihfabu caah rian a ṭuanpiak hna.
Nupi ṭhitnak
Rev. S. Van Hre cu HBC ah caantling Pastor in rian a ṭuan hnu 1974 kum July thla in cingla rualchan nih an khanpiakmi Pu Chan Tlung le Pi Chia Iang hna fanu Nu Par Iang he ṭhitumnak an tuah. Mah inn chungkhar an hun dirh hnu cun fapa 2 le fanu pakhat an hun ngei. An fale hna cu Ngun Tum, Za Khar le Ngun Tlung Mang an si.
Rev. Solomon Van Hre Thihnak
Rev. Van Hre cu pension a lak tiang mingandam pakhat a si. Asinain nikhat cu Hakha in amah rian herh ah Surkhua lei ah a kal i Sakta an hei lonh ah an motor cu a tla i amah cu a khawgdeng lo, tiah an ti nain Hakha an rak phanh hnu tlawpal ah Lawngtung saih a fial hna i Bungzung ah a kal. Mah nak cun a ṭiaṭum lo i Hakha a hung phanh hnu cun Hakha siizung ah aa zohter i "na lung a ṭha lo, a phing" tiah an rak ti.
Yangon ah maw Mandalay ah dik kalpi ulaw a ṭha lai, tiah siibawite nih an ti caah an nau Mang Bik nih Yangon ah 2003 kum August 23 ni ah Hakha in a kalpi i Yangon General Hospital ah an vung um.
Yangon siizungpi ah cun thla cheu hrawng an um hnu 2003 kum September 8, cawn nikhat ni zinglei sml. 2:30 ah a rian a ṭuanpiakmi a Pa Pathian ṭaang cungah hngangamte in aa din.
Ruak vuinak
Rev. Solomon Van Hre ruak cu Lai Baptist Church Yangon nih an Biakinn ah pumhnak an tuahpiak hnu ah chunhnu sml. 1:00pm ah motor in Mandalay ah an hun tlunter i Mandalay Lai Baptist Church zong nih pumhnak an tuahpiak hnu ah Hakha lei ah an tlunter. A ruak cu Hakha a miphun a khua le a Khrihfabu sinah 2003 kum September 10 ni zinglei caan ah an hun phanhpi i amah nih a rianhtakmi a innpi chungah an suan.
Rev. Solomon Van Hre ruak cu Zion Tipil Khrihfabu (amah nih a rak dirhmi a Khrihfabu)nih a hmanung bik upat peknak caan hmannak cu 2003 kum September 11 ni chunleicer sml. 12:00 ah Zion Baptist Church ah an tuah i amah a dawmi Hakha pi nih a ruak cu an humh i pumhnak caan cu an hman.
Pumhnak caan a dih in Rev. Van Hre ruak cu tlorkuang in Khrihfa upa nih Bogyoke lamthluan in an put i amah rovuih bantuk in Pastor te vuinak hmunah vui loin mi vialte thlaanhmun ah a hawile sinah Rev. R. Vai Al. AGS, HBA nih a vui. A ruak cung Thawngṭha chimtu cu Rev. Dr. Jones Mang Hup a si.
Cherhchan:
- A hmanung bik Upatpek Pumh caanhmannak Program, Zion Baptist Church, September 11, 2003 Bulletin
- Pu Ram Lian (Rev. S. Van Hre nau) Chimmi bia
Advertisement
EmoticonEmoticon