JESUH KHRIH A NGEIMI HI MIRUM KAN SI (Matt. 16: 26)
Pastor Van Tling Thang
Biahmaiṭhi
Nunnak hi Pathian sin in hmuhmi a si. Cu nunnak cu Pathian nih a ka pek a timi nih lunglawmhnak le hnangamnak an tinco. Pathian a ṭihzah lomi nih cun an nunnak kha anmah duh ning in an hman tikah a donghnak ah ngaihchiatnak nih a zulh tawn hna. Beidonghnak le nun zuam lo tiang in khua an ruat tawn.
Baibal nih rumnak a timi
Matthai 16:26 ah fiang tein kan hmuhmi cu, "Mi nih hin vawlei pumpi hi co hmanh seh law, a nunnak a sungh ṭung ahcun zeital a miak hnga maw? A miak lai lo. A nunnak kha zeihmanh in a caw ṭhan kho lai lo" tiah a ti.
Nunnak kan timi hi sui ngun chawva in cawk khawh a si lo. Cu nunnak cu Pathian nih a ngeihmi a si. Cu nunnak cu Pathian caah a hmangmi cu hi vawlei cungah mi vanṭha le mi rum an si. Keimah hi keimah ka si lo, Kei cu Pathian ta ka si ti aa hngalmi cu mirum an si.
- Tangka in Cawnpiaktu le Pastor hlan khawh a si ko nain,
- Thiang Thlarau cu Tangka in hlan khawh a si lo.
- Tangka in Crusade, Camping cu tuah khawh a si ko nain,
- Thlarau Revival taktak cu tangka in tuah khawh a si lo.
Voikhat cu mirum pakhat dum nganpi a ngeimi a um. A dum ah John timipa rian a rak ṭuan ve. Nikhat cu chuncaw ei caan ah, mirum pa cu dum chung ah aa chok i, a rianṭuantu pa John nih KFC a ei lai teah Pathian sinah ka lawm tuk rawl na ka pek caah tiah thla a cam lio kha a hei hmuh. A dih hnu ah mirum pa nih, " John kei sining law $ 10 man hmanh a si lomi chuncaw ca ah cun thla ka cam hnga lo, lawmhnak zong ka chim hnga lo" tiah a ti i John nih a let lo a ei dih le cangka khin a boss pa cu "Zahan ka mang ah mirumpa kha vanmi nih a nunnak kan hung laak cang lai tiah an ti, tiah a chimh" i mirumpa cu a lau tuk.
Mirumpa cu a ṭin zokzok i body guard, doctor le zohkhenhtu tampe he aa conghter hna. A lungre a thei tuk, zan a si, a mui deuhdeuh a lungre theih a zual, khua a dei tiang hngilh lo in a um nain a thi lo. A nuam tuk hringhran. Cu lio ahcun a rianṭuantupa pakhat a rak ra i, boss nizan ah na rianṭuan a simi John timi kha a thi tiah an rak chimh. Cu tikah mirumpa nih aa fianmi cu, "Vanmi nih mirum an timi hi vawlei chawva ngeih a si tung lo, Jesuh Khrih ngeih pei mirum an si ko hi" ti a van i fiang.
Kanmah ta a si rua kan timi hi kanmah ta a rak si lo. Jesuh ngeih hi mi vanṭha kan rak si. Vawlei thil cu zungzal ca a si lo i Jesuh Khrih ngeihtu hi a hmunmi rumnak cu a si.
Jesuh Khrih Kan Zeizong
Mi dermi hna caah Jesuh Khrih kan ṭhawnnak, sifakmi hna caah kan rumnak. Retheimi hna caah Jesuh Khrih kan ṭhawnnak, ngaihchiami hna caah Jesuh Khrih kan lawmhnak. Harnak tongmi hna caah Jesuh Khrih kan i dornak, chiatserh mi hna caah Jesuh Khrih kan Thluachuahnak. Muihnak ummi hna caah Jesuh Khrih kan ceunak, lamtlau mi hna caah Jesuh Khrih lamhruaitu.
Kebei mi hna caah Jesuh Khrih kan kalnak, micaw mi hna caah Jesuh Khrih kan khua hmuhnak. Mi zawmmi hna caah Jesuh Khrih kan damnak, a thimi hna caah Jesuh Khrih kan nunnak. "A inmi dantatnak in luatnak kan hmu i an tuknak vual in damnak kan hmu". Isaiah 53:5.
Alexander the Great nunnak nih lawmhnak le rumnak a fiantermi
Alexander the Great hi BC 356 ah Greece ram ah a chuak. Vawlei ralbawi le uktu, mino mirum minthang bik pakhat a si. BC 323, Bagdath khua a hawipa inn zanriah an einak ah a zaw i ni hra hnu ah a thi. Zeiruangah a thih hi an thei kho lo.
A thih lai ah thil pathum a cah ta hna: 1) Ka ruak hi a ka thloptu sibawi nih rak ka zawn hna seh, 2) Thlan kalnak lam kha sui le ngun, lungvar man sung ka khawmhmi hna in rak kulh uh, 3) Ka kut hi ka ruakkuang leng ah nan chuahter lai.
A robia cahmi suallam an hal i sibawi nih ka ruak pu hna seh ka timi cu, zei sibawi hmanh nih nunnak an khamh kho taktak lo, thlan lam ah sui le ngun in khahter uh ka tinak cu nun chungah thi lo nung lo in kan kawlmi rumnak le power hna nih kan ruak an dawi kho lo, ka kut kha ka ruak kuang lengah nan chuahter lai ka timi cu kan nu pawchung in taklawng in ka chuak i tak lawng in ka kir ṭhan timi hna kha mipi nih theih hna seh ti ka duh a rak a rak ti (eyewitnesshistory).
Jesuh Khrih lawnglawng nih nunnak tak a kan pek, Khrih lawnglawng nih rumnak tak a kan pek i Khrih lawnglawng nih zungzal nunnak a kan pek. Kanmah ca lawngah ka tuahmi thil paoh cu kan i thihpi dih lai. Khrih bantukin mi cungah dawtnak le tordornak kan langhtermi paoh cu midang sinah a nungpeng.
Zeidah kan herh taktakmi cu a si
Rev. Dr. Gabriel Cung Hu nih cun a tanglei bantuk in a langhter:- A rum i thil a ti kho bakmi nulepa nakin Pathian a ṭih i Thiang Thlarau hruainak in a kalmi Nulepa hi fale nih kan herh deuh hna.
- Nulepa caah phaisa tampi a pe kho mi fanu fapa nakin Thiang Thlarau i hruai khawhmi le Pathian a ṭihmi fanu fapa hna hi nulepa nih an herh deuh hna.
- Pathian a ṭih mi pasal hi nu pawl nih a herh bik i Pathian bia ningin nun a hmangmi nupi hi pa pawl nih kan herh bik fawn.
- Mirum le thiamsang Pastor nakin Thlarau tlau dawtu le Pathian rianah pum aa pemi Pastor hi Khrihfabu nih a herh deuh i Mirum le thilti khomi member nak in Pathian a ṭih i Pathian rianṭuantu a dawmi members pawl hi Pastorte nih an i bochan deuh hna..
Biadonghnak
Cu caah rum vialte lakah a ṭha bikmi cu Thiang Thlarau in rum hi a si. Khrih ah a rummi cu cathiang nih, "Vawlei nih harnak an pek hna lai, siseh ṭih hlah u vawlei cu ka tei cang" a ti. Khrih a ngeimi cu vawlei teitu nun a ngeimi kan si.
Advertisement
EmoticonEmoticon