Stay at Home: Cawnnak Caan Ṭha ah Hmanthiam I Zuam Hna U Si! (Exo. 2-4) Rev. Ni Cung Thang (Zion)

Stay at Home:

Cawnnak Caan Ṭha ah Hmanthiam I Zuam Hna U Si! (Exo. 2-4)

Rev. Ni Cung Thang (Zion)

Biahmaiṭhi
Moses nih siarem ngai le nuam ngai in khua a saknak hmun, Izipt siangpahrang innpi cu a zam tak. A liannganmi le a ṭhawngmi Izipt rampi in a zam. Midian ram a va phan. A zamnak hmun ahcun Midian tlangbawi Jethro chungkhar he an i tong i Jethro nih a fanu Zipporah kha nupi ah a pek. Fapa pakhat Gershom an ngeih. A nupi pa Jethro sinah tuu le meheh cawngtu dirhmun in khua a sa.

Cu ram i har lengmang in khua a sak cu Izipt siangpahrang ral ṭih ruangah a si bik. Himnak hmuhduh ah aa dor. Nain, a lung re a thei i, a si a vang ngaingai. Nikhat cu, Izipt siangpahrang ral ṭih in aa dornak ram chungah a um mi Horeb tlang-Pathian tlang, timi ah, a tuu le meheh a khalh lio ah, Bawipa Pathian nih a rak ton. Bawipa Pathian he hawikomhnak an hun ngei. Biaruahnak ṭha tein an ngei kho. Cu hnu cun, Izipt siangpahrang ral ṭih ruangah aa dornak hmun, lungre thei le sivang in khua a saknak hmun ahcun a nunnak ah a herh bikmi thil lianngan 3 a cawng colh.

Pathian kong thukdeuh le kau deuh in a cawng.

A biakmi Pathian hi ho te nih an biakmi Pathian dah a si kha a hngalh. A pupa hna Pathian, Abraham Pathian, Isak Pathian, Jakob Pathian a sinak kha a hngalh.
A biakmi Pathian hi min ngeimi Pathian, “Keimah cu Keimah ka si ko” a ti tu, “Yahweh” Pathian a si a hngalh.
A biakmi Pathian hi, bawmtu thiangthuh zong sivai-ngei rul ṭihnung ah a thleng khotu, sivai-ngei rul zong bawmtu ṭha thiangthuh ah a thleng khotu Pathian, midam le miṭhawng zong a zawt ter kho i, mizaw le miderthawm zong a damter khotu Pathian a sinak kha fiang tein a cawn. Zeizong vialte cungah nawlngeitu Pathian a sinak le zeizong vialte tuah khotu Pathian a sinak kha a hngalh.

Minung hawi kong ṭha deuh le fiang deuh in a cawng.

A miphun hawi pawl an sining taktak kha Pathian sinin a cawn. Miphun dang ram ah an temhinnak, rianfak le rianhar tuk ṭuanter an si ruangah an aihramnak le an nganfahnak kong vialte a thar in a hngalh ṭhan.
Cun, a miphun hawi hna a hremtu le a uktu hna Izipt siangpahrang le Izipt miphun hna lungthin put zong kha ṭha tein a cawn chih.
A dawtmi a miphun an sining tak kha a cawn i, hremtu a simi miphun dang pawl lungput taktak zong kha fiang tein a cawn. Lungfim le ralrin nun a cawn chih.

Amah pumpak sining kong tam chinchin in a cawng. Tam chinchin in aa hngal.

Israel mi Izipt ram in chuahpitu dingah cun kei cu ka tlak lo. Ka hmetuk, ka derthawm tuk, mi chambau ka si, a ti. Amah sining taktak aa hngal.
Zapi sin biachim a thiammi ka si bal lo, mikahak, leichum ka-aa ka si, Bawipa nangmah he kan i ton hnu le kan i chawnhbiak hnu hmanh ah pei biachim ka thiam lo cu, a ti. Bawipa Pathian, ka sining taktak cu na hngalh dih ko cu ta. Keimah nakin nangmah nih pei ka sining taktak cu na ka hngalh deu ko cu, a ti. A sining taktak kha thuk piin aa hngal.
Cun, Bawipa Pathian, midang tu thlah ko hna. Keimah nak in a chimthiam deuhmi an um ko lai, a ti. Bawmtu ka herh tiah a chimh. Cu caah, Bawipa Pathian nih Levi mi a u Aaron kha amah bawmtu ah a thlah piak taktak.

Biakilhnak
Lungrethei le sivang in kan umnak hmun cio in Moses bantukin Pathian kong, minung hawi kong le mah pumpak kong tam chinchin in cawn le hngalh i zuam hna u si. Bawipa Pathian sinah i dor hna u si (Slm. 91).

Hi capar hi HBA Hmurka (Thla 3 dan ah voikhat @ Kumkhat voi 4 chuahmi) Vol. 18, No. 2 June (Pur) 2020 i chuahmi chung in tar chinmi a si.