TLAIHHREM SULLAM PHUN 3 Rev. F. Za Thang

TLAIHHREM SULLAM PHUN 3 Rev. F. Za Thang

"Pa bon lo nih nu tlaihhrem, Biaknak hruaitu bon lo nih khrihfabu tlaihhrem, Vawlei uktu bon lo nih ram le miphun tlaihhrem,"

1. Tlaihhrem timi biafang cu zumtu caah nunzia dawh lo nak in a langmi biafang a si. Zakhat ah sawmkua cu Pa nih nu ngakchia kum tling lo, nungak, nutar tibantuk vialte an duh lo buin nupa sualnak tuahpi ahcun tlaihhrem tiah ti a si. Cozah lei zong in tazacuai le thongthlak, asilo ah sahring thi le liampal he remnak tuah a si tawn. Vawlei cung ram cheukhat ahcun pa lei lawng nih si lo in nu 3 nih pa pakhat an tlaihhrem tibantuk zong kan theih pah tawn.

Hi nunzia hi aa dawh lo tukmi nunzia a si. Zumtu pakhat dirhmun in fih zong a nung i kan hrial, kan i sum cio hrimhrim ding a si. Miṭha nih nupa sualnak ah mi an tlaihhrem bal lo. Miṭhalo nih nu/pa tlaihhrem timi ah i tel hrimhrim hlah usih.

2. Biaknak lei hruaitu zong Pathian kan tanh, kan i bochan cu a ṭha tuk nain a herh lo tiangin khrihfabu tlaihhrem kan hmang. A cunglei ah tlaihhrem cu cohlan lo, duh lo buin kanmah duhmi tuahpi ti a si bantukin, kannih hruaitu cu a chia a ṭha lei khel, asilo ah, kan hruaimi hna nih duhthimnak an ngeih khawh nakhnga cawnpiaktu lawng kan si. Pathian nih Eden dum ah ei ding thingkung le ei lo ding thingkung a chiah bantukin cu tiang lawnglawng cu kan rian a si ve.

Duh zong duh lo zongah hihi tiah an ban in tlaih i rawt chih, hnuh chih ding kan si lo. Pathian thangṭhatnak hlasak tikah na laam hrimhrim lai, na kut na beng hrimhrim lai kan ti ahcun vaih 3 hla le ngaihchiatnak hla phun ah laam le kutbengh awk a ṭha lomi hla tampi an um.

Thlacam tikah Hallelujah voi 3, 7 kan au lai, na kut na thlir lai, na khuk na bil lai kan ti ah cun cucu tlaihhrem phunkhat a si ve. A hmunhma, a caan zohthiam in anmah le duhthimnak “rights” tu kan pek hna ding a si .

Na tuah lo ahcun na ban a thi, a zeng lai, a ro a car te lai ti phun in kan vun thih chih hna tikah lungtho lo taktak, thilrit tuk in an nun khing  kan rihter. Zu ding zu tama timi hna zong duhsah tein sumnak ngeihter ding a si nain chikkhat bak ah an duh na lo le a si kho na lo in tlaihhrem phun in thlacamnak he ngolter kan timh hna ahcun an nunnak a dih zau kho. Kanmah bu le rianṭuannak ah na um ahcun khamh na si lai tbk vialte khi  Biaknak lei hruaitu bon lo  nih zumtu le khrihfabu tlaihhrem phun cu a si.

3. Kanmah chanchung hmanh ah ram tampi uktu hi i thlen pah lengmang cio a si. Mee lemsoinak an tuah lio ah cun mi zapi duhnak zauk phung in rian kan ṭuan lai an An kutcung ah uktu sinak a hung phanh ah cun mi zapi duh,  duh lo kha biapi ah an chia kho cio ti lo. Uktu bawi kan si, kanmah khuaruah duhning in ram le miphun cu kan uk kan hruai ding a si, tiin an biahram mee lemsoi lio chimmi mi zapi duhning timi  kha an philh.

Kan duh lo nak langhter ahcun tlerhkhawnh, hrem, thongthlak tiang ton khawh a si caah hmur i huh i celh lo bu tein thin daihter a hau. Cu bantuk in mi zapi a ukmi hna cu uktu bon lo nih ram le miphun an tlaihhrem tiah ti khawh a si.

Careltu le caṭialtu nang le kei zong a cunglei “Tlaihhrem” timi sullam pa 3 hi midang caah ngaihchiatnak thilrit a phorhtu  kan si ve sual nakhnga lo sawm kan duh hna.

Hi capar hi HBA Hmurka (Thla 3 dan ah voikhat @ Kumkhat voi 4 chuahmi) Vol. 18, No. 2  June (Pur) 2020 i chuahmi chung in tar chinmi a si.

Advertisement