Thluachuah
Hal Piaktu Ka Pa
Pastor Van Tling Thang
Nulepa caah phaisa tampi a pe kho mi fanu
fapa nakin Thiang Thlarau i hruai khawhmi le Pathian a ṭihmi fanu fapa hna hi
nulepa nih an herh deuh. Pale lawmhter nakding ah tangka ngeih a herh lo. Pale lawmhter
nakding ah degree sang ngeih a herh lem lo. Pale lawmhter nakding ah fim le rum
zong a rak hau lem lo. A rum, a fim, a thiam, a ṭhawng nain pale ngeih
chiattertu a rak tampi. Cucaah pale lunglawmhter cu, Bawipa dawtnak theih” a si
ko. Bawipa dawtnak a theimi fale nih zeitik hmanh ah an nu le an pa an ngaih a
chiatter bal hna lo.
Voikhat cu Pastorpa nih thawngṭha a chim
lio ah, "nan lak ah sualnak in a zawmi nan um i, thlacam piak a duhmi nan
um a si ahcun nan kut thlir u" tiah a ti. Cu cangka in tlangval pate a rak
dir,"sualnak in ka zawtnak a sau tuk cang i, a ka simh tuk cang, keimah
caah thla ka cam piak" tiah a ti.
Pastorpa nih thla a campiak tikah
tlangvalpa cu kum riat chung sualnak ah a rak tlaumi a si kha a hngalh. Cucaah
a nu le a pa sinah Bawipa nih a nunnak a thlennak kong cakuat ṭial dingah a
fial. Tlangvalpa nih cun a ṭial colh ve. Caan sau nawn a rauh hnu ah a nu sin
in cakuat a hmuh. Asinain cu ca cu ngaihchiatnak aa telmi cakuat a si.
Tlangvalpa nih cakuat cu mitthli he a rel. A cakuat cu, "ka dawtmi ka
fapa, na ca kuat nih a ka lawmhtermi nakin a caan lio ah kan tonmi
ngaihchiatnak nih a lonh. Zeicatiah, na cakuat nakin, na langhtermi Khrih na
cohlan caan lio hrawngte ahkhan na pa nih a nunnak a kan liam taak ve ee. Na pa
cu a thih lai ni chun nitlak cu, a hrum ai pah in, Bawipa ka Pathian, ka fapa,
zuripa hi nihin hrimhrim ah kan khamh piak sawh ko, tiah thla a cam, a au. Dai
tein i din ko tiah ka thlauh bu zongah Bawipa ka fapa ka khamh piak ko tiah a
chim buin Jesuh Khrih sinah aa din," tiah a ṭial.
A cakuat donghnak ah a nu nih a ṭialmi cu,
"tuzan i Khrihfa zumtu na canmi cu na pa nih, a thaw a dih tiang Pathian
thlah lo in aa tlaih peng caah a si," ti in a ṭial chih.
Nu le pa nih fale a kan dawtnak hi an thaw
a dih cuahmah zongah Khrih sinah an langhter. Nunnak cauk chungah fale min aa ṭial
lo ding hi an phang. Nu le pa lunglawmhter kan timi cu, "Khrih dawtnak
fale nih theih" hi a si ko.
Advertisement
EmoticonEmoticon