Thlichia Hraan Ah Jesuh Kan Hawi Tha
(John 15: 13-14)
Pastor Thawng
Lian Uk
Kan nunnak ah kan
herhbik mi ti hi a caan hoihtu in a rak si. Asinatein, zeitik caan paoh ah kan
auh le kan sawm awk tu cu a um. Cucu Jesuh a si. Kan theih cio bang Ekkapol Ake
Chantawong cu Thailand lungkua chung i aa hrengmi hna bawlung chuih phu hna i
an thihruaitu (couch) a si. Kum (35) a si. June 23 in an i hreng i ni (18) rauh
hnu July (10) lawngah an lak/ khamh khawh hna. Amah hi a hnubik lawngah a
hungchuakmi a si. A chungkhat pa nih, “a chimmi cu an hruaitu pa hi mitha tuk a
si, ngakchia a daw tuk, a zohkhenh duhtuk, mi teima tuk, le manphalh loin mi a
bawm tawn tu a si,” tiah a chim. Tipilh in a chuahtu hna zong nih an chim mi
cu, hi pa nih amah rawl a pek hna ruangah a thazaang a der bikmi cu amah a si
an ti. Dai tein um i thlacam le lungkua chung lungpang in a luangmi tidin daan
zong kha a chimh hna. Ngakchia nu le pa sin ah “A tha bik in zohkhenh ka zuam
lai tiah bia ka kam. Bawmtu vialte sin ah ka lawm tuk, cun ngaihthiam zong kan
hal hna” tiah ca a tial. “Nangmah le nangmah cu i mawhchiat duh hlah, fale tu
kha nungdam tein khamh an sinak tu kha i zuam ko” tiah ca an leh ve. Naihniam
ngaimi a hawikom zong nih, “amah nakin hi ngakchia pawl hi a dawt deuh hna,”
tiah a chim.
Mah nakin a
sunglawi deuh tuk mi cu, Jesuh nih minung dawt khawh mi leng tiangin a kan
dawt, a hawikom ah a kan ser i a nunnak hmanh kha a chim bangin a petu a si
(John 15:13). Ka ruat tawn, Jesuh hi dawtnak in rak i langh hlah sehlawh zeidah
ka nun hi a lawh cang hnga. Zeipi khi dek a cangcang ko hnga. Thlizil a hraan i
lawmh caan, thlichia a hran i ngeihchiat caan le zei bantuk caan zong ah Jesuh
auh le hawikomh ah i serh hi a biapi tuk hringhran. Hawikom cheukhat cu
rawhralnak ah a phanmi silo le pakpalawng biachim lawngah an thathnem lioah,
unau nak hmanh in a fek deuh mi hawikom an rak um theo (Phut. 18:24). Chungkhat
unau nak hmanh in Jesuh cu kan dawt deuh taktak awk a si ko. Ngakchia (12) a
hruaitu pa zohkhenhnak kong hi kan caah zohchunhtlak in chuankhanawk a si.
Lungkua khan a leek tak khawh ko hna. Ruahchannak ngei lo in a chiah tak khawh
ko hna. Cu he ralkah in, an sinum a tim, a rawl zong a cheuh boh hna i an harnak
aa hrawm. Lawmhdaihnak cu harsat temhinnak in a ra ti hi a hmaan ko. Hruaitu
(tukhal) pawl zong hi, thil khi a zaangtuk in a phor mi kan si lo. Mi thilrit
chan cu Jesuh nih a kan chawn ve ko ti hi philh lo ding a si. Phunkhatkhat cu
thilrit kan phorhmi hi a um hrimhrim ko. Cucu Jesuh cungah khin hna u sih law
kan thil cu a zaang ko lai (Matt. 11:28-30)
Computer holh in
chim u silaw, Jesuh cu kan sawm ahcun kan chungah a lut lai i kan harnak vialte
(problems) kha scans a tuah lai. Lungretheihnak kha a edits dih lai. A phi kha
a downloads lai. Na lungretheihnak vialte a delete dih lai i an khamh lai. Hihi
mino nih fawituk in fian khawh ding ah Facebook ah an tial mite a si.
Paul nih, “Harnak kan innmi zongah hin
kan i lawm ko, zeicahtiah harnak nih cun in khawhnak kha a kan ngeihter i
inkhawhnak nih cun ziaza a kan ngeihter i ziaza nih cun ruahchannak kha a kan
ngeihter, ruahchannak nih cun a kan deuh lo” a ti (Rom 5:4). Temhinnak hna hi
hmailei sunparnak he cun tahchunh awktlak hmanh an si lo (Rom 8:18). Jesuh
ruangah cucu kan hmuh ding a si caah lawmh lo awk a tha hrim lo.
Jesuh nih hawikom tiah a kan auh ding
hi cu a sunglawi tuk hringhran ko. Hawikom cu zei bantuk caan hmanh ah hna ngam
tertu, hnemtu, thazaang petu an si. A mui tuk mi lungkua pi khi hei ruat hmanh
usih. A muihnak le a kinnak, cu chinchap ah tupi chung i lung kua hei si rih,
cuchung i mah lawng hei um lai cu zei tluk khin dek tih a nun hnga. Asinain mu,
hawikom he cun hmuhbal lomi pi lungkua, a muihnak bik hmun cu a nuamhnak bik
(adventurous) ah a cang ko. Hawikom si a thlum zia a lang chin. Khite khi um
rih ko seh, a lianngan bik Jesuh i a hawi kom si lai cu a va sunglawi tuk ko
lai.
Hawikom umnak hmun hi tlam a tling. Jesuh he i hawi komh hi tlam a
tling chin. 1736 ah, England in Georgia lei ah ti lawng (1) in rili cungah
khual a tlawngmi mibu (1) an um. Rili cung an um lioah thlichia a hrang i ruah
a sur. A tap na, ai hram na an si. Tihphannak a khat. Moravian Missionary pawl
nih dai ziahmah in thlichia lakah cun hla an sak. Cu tluk thihnak ton hnek lio
i ral tha tein le dai ziahmah tein hlasaknak nih mi pakhat cu Khrih ah nun
thlennak a ngeihter. Cu a lung a thleng i vawlei cung Khrihfa tuanbia ah philh
awk tha loin a min thang mipa cu John Wesley a si. David le Jonathan i
hawikomhnak cu thil bantuk in thitchih a si. Ṭhitchih mi cu a karlak ah
zeihmanh a tenh kho lo. Jesuh he kan i hawikomhnak cu cunak hmanh i a fehfuan
deuh le a that deuh ding a si ko. Jesuh nih ka hawi kan ti hna a ti tikah a
cawnpiaknak bangin le a chim tak bangin a nunnak tiang hmanh kha a pek. Hawile
caah dawtnak nganbik cu nunnak pek hi a si a ti mi kha a tlinh. Jonathan zong
nih khan amah nunnak a dawt tluk in David cu a dawt ve. Cucaah hawikom tak
sinak hi a sangtuk i si ko.
Nang le kei caah
tah Jesuh hi hawi tha a si taktak maw? Harsatnak phuntling in a khat mi
thlichia a hran caan ah Jesuh hi kan sawm ko lo maw?
Hi
capar hi HBA Hmurka August 2018, Vol. 16, No. 3
chuak chung in tar chin mi a si.
Advertisement
EmoticonEmoticon