THAIZING AH CUN A TLAITUK CANGLAI
Pastor Van Tling Thang
Biahmaiṭhi
Vawlei cung
mivialte hi nu le pa lo in a ho hmanh a chuak i aa semmi kan um lo. Mifim le
mirum zong nih nu lep a an ngei, sifak santlai lo zong nih kan ngei ve. Nain
honih dah nu le pa lung a lawmhter i honih dah an ngeih an chiatter hna. Hi
vawlei cung kan nun caan tawite ahhin kan nu le kan pa hi an ngeih kan chiatter
in an mithli kan tlakter sual hna maw tihi mino nih kan ruah a herh ngaingai.
Atu kan ngeihmi kan caan te hi sungkhun in kan nu le kan pa dawtnak ah kan hman
ding a si.
Nu le pa dawtnak
Voikhat cu kum 80
renglo a simi tarpa le kum 40 hrawng a simi fimthiamnak sang ngai a awng cangmi
a fapa he milengkhaan sofa thutdan ah an thuti. Cu lioah cun ruah lopi khin an
thlalangawng cungah pithlung te kha a rak i fu. A pa nih cun a fapa cu “zeihme
a si?” tiah a hal. A fapa nih cun “pithlung a si” tiah a ti. Tlawngpal ah khin
a pa nih cun “zeihme a si?” a ti than, a fapa nih cun ka pa “ pithlung a si kan
ti cu” tiah a leh than. Tlawmpal a rauh ah khin a pa nih cun “zeihme a si?”
tiah a voi thumnak a hal than. A fapa cu a thin a hung cang i “voi zeizat hme
kan chimh lai, pithlung a si kan ti cu” tiah aw sang taktak khin a van ti.
Tlawmpal a rauh hnu ah khin a pa nih cun a hal than hoi “zeihmesi?” tiah. Cu
vial ahcun a fapa cu a ingpuaan le a thinhan a celh ti lo i a pa cu a hro bak
in a hro cang, “mihrut! Hal bon peng hal lengmang cu, voi zeizah dah “pithlung”
a si kan ti lai, na biahal a tamtuk” tiah a hro chih. Tlawmpal hnu ah khin a pa
cu ihnak khan ah a va lut i a fapa kum 3 a si lio i a rak ṭialmi diary hlun
nawn he a rak chuak ṭhan, a fapa pawngah cun a va ṭhu ṭhan, cahmai pakhat a kau
i a fapa cu “mah ca hi van rel ta” tiah a fial i hitihin a rel: “tuchun cu ka
fapa kum 3 a simi he kan sofa ṭhutden ah kan ṭhu i cu lio ah kan thlalangawng
cungah pithlung fate a rak i fu i ka fapa nih cun voi 23 bak “ka pa zeidah si,
tiah a ka hal. Kei nih, thinhung lo te le lungsau tein a ka halmi cu kuh bu le
hnamh bu in ka leh, a cungah dawtnak tu ka ngei chin e” timi ca a si. Cu tikah
cun a fapa cu a biang cungah a mitthli a luang i a pa cu a ku pah in “ka pa ka
ngaithiam mu” a ti.
Nu le pa dawtnak
cu a thuk in a kau hringhran ko. A sumh tah awk a ṭha lo. An dawtnak kan cham
hna lai tiah nunnak pek tiang cham awk a ṭha lai lo. An dawtnak kan cham
khawhnak ding a lam pakhat cu Bawipa dawtnak theih hi a si.
Kan nunnak
Vawlei hi a
ningpi in kan co zongah kan nunnak kan thlarau kan sungh ahcun san a tlai maw?
Pathian bia nih a tlai lo a ti. Vancung ro sung kan ngei cang maw? Atu ah kawl
hna usih. A tu ah Pathian fuh panh hna usih. Caan a um rih.
Biadonghnak
Effesa
5:15 ah kan hmuhmi cu, “atu kan nikhua hi caanchia a si caah, caan ṭha nan
hmuhmi paohpaoh kha man ngei te in hman i zuam uh,” tiah a kan cawnpiak bantuk
in mino vialte hna kan caan ngeihmi hi nu le pa dawtnak, u le nau dawtnak,
Khrihfabu caah, Pathian he hawikomhnak caah a hmangmi si ko hna usih. Caan dang
kan ngei ti lai lo. Atu bak hi kan caah caan ṭha a si.
Hi capar hi
HBA Hmurka December 2017 (Vol. 15, No. 3)
an rak chuahmi tar mi a si.
Advertisement
EmoticonEmoticon