A HMASA BIK KHRISMAS HLA (Hymnology)
Khrihfa mizapi nih Biakinn chungah mah le holh tein hlasaknak le Pathian biaknak caan hman hi, hlan lio Khrihfabu chan ahcun a rak um kho. Latin holh hi holh thiang ah ruahmi a rak si caah, Pathian biak pumhnak sakmi hla le biaknak caan hmanmi vialte hi Latin holh lawng in sak le hman an rak si.
Cucaah, mizapi hlasaknak (congregational singing) hi, biaknak lei hruaitu hna nih nawl an pekmi hna lawng nih Latin holh cun sak an rak si. Hla awrem timi hi AD 1000 hnu ceo ah a hung um i, cu zong cu hlavaih ṭhen (rhythm) ngei lomi hla tlaitluan (plainchant) lawng hman a rak si.
Cu bantuk sining a khupthal a lettu cu Martin Luther an timi paṭhawng hi a rak si. Martin Luther cu AD 1483 kum ah Germany ram Harts tlanghram i a ummi Eisleben (pron. Aistaben) khua hmete ah a rak chuak. Misifak chungkhar an si i, a pa hi khor co (miner) a si.
Martin Luther cu mi lungvar a si i, aa leklak ngaimi a si. A no lioah midang hruaikhotu a rak si i, a aw a ṭhat leng ah, tingtang le thonglawi tum thiam ngai a rak si caah, ngaknu nih an rak zohthla ngaimi a rak si.
Eisleben khua le a pawngkam hrawng ah hin a hawile he Khrismas caan ah an i chok i, naute Jesuh chuahnak thawngthanh le hlasak hi an rak thawk i, cucu zapi zong nih a ṭha tuk in an hmuh cah, an runpi in cuticun an i lawm, an aukhuang.
Tingtang le thonglawi tum in cu bantuk hlasaknak an tuah tikah cun milung thin aa hliphlau tuk i, Khrismas thawngthanhnak hlasak timi (Chrismas Carol singing) hi cuka cun a rak i thawk hmasa bik ti a si.
Atu ah cun zan tu ah Khrismas zanvah tiin kan hman cang hih. Cu lio i an rak sakmi Khrismas hla cu atu i, kan sakmi Khrihfa hlabu No.88 “Khika lam hla Cawrawl einak kuang chungah (Away in a Manger)” timi hla te khi a rak si.
Asinain, a aw (tune) le a bia hi tlamtling tein a rak ṭial rih lo, AD 1530 ceo ah tlamtling tein a ṭial i, a fapa te Hans (John) le a hawile a sakter hna i, Khrismas thawngthanhnak caan fate an sakmi a rak si.
Cucaah, hi hla te hi, a hmasa bik Khrismas hla (The first Chrismas Carol) a rak si. Martin Luther nih Biaknak lei dohdalhnak le thlennak (Reformation) a tuah hnu lawngah, zapi nih biakinn chungah mah le holh tein hlasaknak le biaknak caan hmannak ngeih khawh hram i thawk a si.
Martin Luther nih a no lioah a phanmi hla hi fung 4 te lawng a rak si i, a hawile nih an phanpimi hi fung 4 a rak si. Cu hla fung 8 te cu Germany ram Wittenberg khuapi ah an kalpi i, AD 1524 kum ah seh in a nam i, mizapi sak awk in a chuak.
Cucu a hmasa bik Khrihfa hlabu (hymnal) a rak si. Hi hla fung 8 hla cauk te hi Nitlak lei ram vialte ah a phan dih i, hla fung 8 te fom cu zohlo in (byheart) an thiam dih caah, lo kal pah ah siseh, thingphorh pah in siseh, chawdawr le zalampi i i chawhpah in siseh mizapi nih nuam ngaiin an sak tawn hna ti a si.
Cu lawng hmanh si loin, ralkap hmanh nih an i cer pah in an sak ve tawn ti a si. Cu hnu ah hla thar tam deuh phan khawh aa zuam i, a hawi le he an phanmi hla fung 117 cu kum 20 a rauh hnuah an hun nam ṭhan i, Khrihfami nih hla cauk ngan deuh hun i ngeih a si cang. Cucu Germany ram i Pathian biaknak hlasakning le caan hmanning a rak i thlennak hrampi a rak si.
England ram le a pawngkam ram vialte tu ah hin cun i thlennak ngaingai a rak um rih lo. Martin Luther a thih hnu kum 200 hrawng ah Isaac Watts an timi tlangvalpa hi minthang ah a hung lang ve i, Isaac Watts nih cun Martin Luther keneh cu a zulh caah, England ram ah hin thlennak nganpi a hung chuak ve.
Isaac Watts cu AD 1674 kum ah a chuak. A pa cu Pastor pakhat a si i, hruaitu ṭha pakhat a si nain, thlennak a chuahpi khotu a si lo. Latin holh thiang in Pathian biak hi a hmaan tiah a rak ruattu lehlam a rak si.
A fapa Isaac Watts hi aw ṭha, hla phan thiam, tingtang tum thiam le minthang a rak si i, zapi nih an uarmi hla ṭhaṭha a chuahpi caah, mizapi hi an i lawm tuk.
Pathian hla lawngte an sa fawn i, milung thin a laa tuk. Cucaah, biakinn chung i zapi nih sak khawhnak nawl a hung umnak lai heh tiah aa zuam.
Kum tam nawn a rauh hnu ceo ah cu aa tinhmi cu a hung chuak i, cozahpi nih theihhngalhpimi le cohlanmi a hung si tikah, minthannak a hun ngei chin i, mizapi nih an um kalnak kip ah an sak caah, Khrihfa hla aw (hymn-tune) timi hi America ram tiang a phan dih, culdih a si caah Cowboy hla te hna tiang ngaih nuam taktak in a hung chuak ti a si.
A hla phanmi hi AD 1707 kum ah nam a rak si i, fung 210 a rak si. Cucu Mirang Khrihfa Hlabu hmasa bik (The first English hymnal) a rak si.
Cu hnu cun hlaphan thiam cu an hung karh lengmang i vawlei pumpi cul in Khrihfa hla cu a karh chin lengmang. Charles Wesley, Ira David Sankey le a dangdang minthang tampi an hung um.
Isaac Watts cu cozah hmanh nih an upatmi hlaphan thiam a si caah, a thih kum AD 1748 kum ah, England ram Westminster Abbey ah hin philh lonak lungphun nganpi (monument) an ser i, cuka ah cun, Isaac Watts milem nganpi, Vanmi pahnih nih a hnakhaw ah biathli an chimh i, hla a phan lio khan an ser chih.
Cu bantuk mithmai ngeihnak le min ṭhatnak cu, Mirang minthang taktak hmanh tuahpiak khawhnak a um bal lomi a si. Pathian min in thil sining hmaan chuahpitu a sinak kha Pathian nih a langhter an ti cio.
Cucaah, atu biakinn chung i zapi nih luat tein, zapi hlasaknak le hlaremh dawhdawh saknak le mah le holh tein Pathian biaknak nawl kan hun ngeih khawh hi fawi tein a rak i thawkmi a si lonak kha ruat buin, a hmasa bik Khrismas hla “Khika lam hla cawrawl einak kuang chungah” timi hla te hi hmaizahnak he sa cio u si tiah, Khrismas donnak ah kaan sawm hna.
Reference:
(1) The Stories Of Hymns We Love
(2) The Christian Hymnody
(3) Hymns and the Faith
+++
EmoticonEmoticon