FIAKFAIROK
Kan pupa Lai tuanbia ṭawn, kan nu kan pa nih an kan chimh tawnmi ah, fiakfairok kong cu hitihin a si: Pathian nih zingnu cu, “kaiva khi au hna law, minung sin le rul sinah thawngthanhter hna; mi caah kum vui ṭha seh; rul thi in mi i hlip hna seh; rul cu fakhat ngeih in thi hna seh, a ti.
Cun zingnu nih fiakfairok cu a auh i, “Minung sinah vung zuang law, ‘kum vui law, kum vui law, kum vui law, kiar, kiar, kiar ṭhan, kiar ṭhan lengmang vung ti; cun na hung ka chimh ṭhan lai,” a ti. Cuticun fiakfairok nih cun a vung ti i, zingnu cu a chimh ṭhan.
Cun zingnu nih zingtiding (Va min) cu a auh i, “Minung sinah vung zuang law, “Mi hlip, rul thi, tiah na ti dih in, rul sinah, ‘fa khat ngeih ah thi,’ tiah na ti dih in hung ka chim ṭhan,” a ti ve.
Zingtiding cu aa palap tukmi a si i, minung sinah, “Mithi, rul hlip,” a ti; cun rul cu a vun auh ah khin bia a ngaimi banhla tu nih a hun hawi i, ‘fa khat ngeih ah thi,’ a vun ti ai.
Cu ning cun zingnu cu a hung chimh tikah, zingnu cu a thin a hung i, “cuticun kaan fialmi a si ṭung lo, chimhngai lo nu,” a ti i, a or awng ko in a sih ti a si.
Fiakfairok nih cun, kum ṭha vuinak thluachuah hal in caan a rel i, i khirh ṭhan lengmang zong a fial caah, ṭhaal chuah ka te khin a awnh aa thawk ve ti a si.
Zingtiding tu nih cun a bia a lettalam in a chim lawng si loin miping banhla tu kha a chimh caah, mi tu kan thi i, rul tu an i hlip; cun banhla tu hi voi khat tlak ah thih aa huah ve ti a si fawn.
Laimi hi khuahrum a biami kan si nain, Pathian le khuazing le vancung mi a rak zummi kan sinak cu tuanbia ṭawn nih hin a langhter. Hi tuanbia ṭawn hi Khirhfa kan si hlanpi i a rak um cangmi a rak si.
Fiakfairok timi va phun hi, kaiva (ramthlekkai) a si i, amah tein bu ser lo in, chiaṭhin va bu chungah ti tit a hmangmi a si. Chiaṭhin cu va hmete a si i, a ti zong a hme tete an si.
Chiaṭhin ti lak ah a nganmi pi a um ahcun, mah cu fiakfairok ti cu a si i, a keuh tik zongah a ngan hlei pi khin a um. A hung ṭhang i, a hawi le tete cu a dolh hna i, amah pi lawng a taang.
Cun a tlah tiang chiaṭhin nuva nih cun an cawm i, a tlah in a hawi fiakfairok sinah a zuang ruahmah i, a nu le a pa cu ngaihchia in an rung ṭaang.
Hi sining hi kan pupa hna nih an ngiat vening a si i, a hmaan ko ti kha, an fa le nih mit hmuh in kan hngalhpimi hna a si.
Kan Lai pupa tuanbia ṭawn ruang theng zongah si loin, fiakfairok cu, pau chuah kum vui hnu a hmasa bik ṭhaal chuah ka ah, caan reltu a si i, mi lungthin a hlautu le a nuamhtertu, minthang caanrelva a si caah, CACC cazual te zong hi “fiakfairok” tiah min sak a sinak a si.
+++++
HBC SMD nih Pu G. Biak Nawl Philh lonak caah Article a ṭialmi cauk in an chuah mi chung in ka tar chinmi a si. A cauk ning piin a rauh hlan ah Chin Library timi app chung ah a um te lai. Cauk chuahtu, a ngeitu sin ah hnatlaknak hal a si cang. Lai holh, bia theihtlei tete tampi a um rak bawh ko.
Pu G. Biak Nawl Tuanbia zong hika ahhin ka chiah nak ka Web a bon lo i on khawh a si dik maw?
EmoticonEmoticon