Efesa 4:5 chungah Mithiang Paul nih zumhnak pakhat lawng a um a timi khi Pathian nih a thisen le a nunnak in vailamtah cungah a ka khamh cang ti kan zumh khi a si. Hi ah hin Khrihfami vialte kan i khat dih. Zumhnak kan phak hlanah hin Paul nih Rom 10:14 ah chimtu an um loah zeitin dah an theih khawh hnga, an theih loah zeitin dah an zumh khawh hnga tiah a ti bang chimtu a um lawngah theih khawh a si, theih hnu lawngah zumh khawh a si.
Nihin Khrihfami hi khamhnak kong thawngṭha chim cu kan thiamtuk. Ngaih zong kan thiam tuk. Thiam ah hin mitampi kan taang, kan i zaa. A chimtu nih chim kan thiam tuk, a ngaitu nih ngaih kan thiam tuk cang caah kan i fiang tuk cang fawn. Kan chimmi le kan theihmi kan i fian tuk tiang hi zumh a si rih lo, a phan rih lo. Jesuh Khrih kong hi cu Khrihfa a si lo mi zong nih an theih tuk ko, an fiang tuk ve ko. James 2: 19 khuachia hmanh nih an theih i an i fiang tuk, an ṭih tuk hmanh ah a ther in an ther a ti.
Tukhaltu le thawngṭha chimtu hna zong hi chim cu an thiam tuk ko nain zumhnak a phan rih lo mi an tam ngai ko rua tiah ka ruat tawn. Khrihfabu chungah thawngṭha ngaitu hna zong hi kan i fiang tuk kan ti i cu tiang lawng cun dahra kan tan ko cang ti khi ka ruat tawn. Bawi Jesuh Khrih nih Luke 6: 46 chungah “zeicadah nan nih nih, ‘Bawipa, Bawipa, nan ka ti len ko i kan chimhmi hna cu nan tuah tung lo? Ka sin ah a ra i ka bia a ngai i a zulmi cu a hram thukpi a cawh i lungpi cungah inn a sa mi bantuk an si, a ti. Pathian thawngṭha cu an chim, an chimmi cu kan ngaih, kan ngaih cun kan i fiang, kan i fian cun kan zumh, a zummi nih cun a bia kha kan zulh hrimhrim lai.
Heb. 11: 1ff chungah Abraham nih Pathian cu a zumh. Pathian nih na ngeihmi vialte kaltak law kan kamhmi ram ah kal a ti tikah Pathian bia bangin aa thawh i a kal ko. A tar hnu ah a ngeihmi fapa ka pe a ti a pek ko. Noah, Moses, Joshep….an tampi kha mu. Pathian cu an zumh caah Pathian nih tuah a timi cu an tuah bak ko, tuah hlah a ti mi cu an i sum i an hrial bak ko mu. Khrihfa nun cu chim, ngeih, theih, fian, zumh, zulh tiang hi a si. Khuika zawn tiang hi dah kan phak cio hnga. Khuachia he aa tlukmi zong kan um men lai, khrihfa a si lomi he aa khat mi zong kan um men lai, aa fiang bak i a zum rih lomi zong kan um kho men, a zum bak i a dir ṭhup mi zong kan um men kho, a zum bak i Pathian bia thiang zulh aa zuam peng cang mi zong kan um kho ko.
Jesuh Khrih zultu hna lak ah Judah Iskariah nih kumthum chung cu a nunnak dihlak in Jesuh hnu a zulh i a zumh ve ko. A donghnak ah thil ṭha lo a tuah i a bawipa kha tangka sawmthum ah a zuar ko. Jesuh nih a nu nih hrim lo in rak um sehlaw a caah a ṭha deuh (Mark 14:21) tiah chiat a serh. Thomas zong Jesuh cu a tho tiah a hawi le nih an ti ko nain a zum bak lo. Kum thum chung Jesuh Khrih hnu a zulh lio ah Jesuh nih ka thi lai i ka tho ṭhan lai tiah a chim cu a theih lengmang ko nain a zum kho bak lo. Jesuh cu a sin ah a ra i ka kut hi tawng ka hnak hi tawng a ti hnu lawng ah ka Bawipa le ka Pathian a ti. Jesuh nih mit hmuh in a ka zummi nakin mithmuh lo in a ka zummi caah thluachuah a um deuh tiah a mawhchiat kha.
Luke 10: 38-42 chung ah Jesuh kha Bethany khua ah Mary le Martha sin ah leng. Jesuh bia kha Mary nih ṭha te in a ngaih. Martha nih an ei ding rawl a chuan tikah, Martha nih Jesuh kha, Saya ka nau khan na u rian va bawm tiah ka chimhpiak, tiah a ti. Jesuh nih Martha, na nau nih hin pei a hman mi a thim cang hi tiah a ti.
Asinain Johan 11: 1-44 chung kan zoh tikah Martha le Mary an ṭa Lazaruh a thih lio ah Jesuh cu Bethany khua Martha le Mary sin a phan. Martha nih Jesuh a phan ti a theih tikah a tli zokzok i Jesuh cu a va don. John 11:28 ah Martha cu a kir i Mary kha Saya pa nih an hlam tiah a va chimh. Pathian bia chim thiam ngai, ngaih huam ngai, theih peng fawn, i fian tuk ṭung i zumh khawh lo nun khi Jesuh nih kan umnak hmun theih lo in hlam mi si a fawi tuk tawn.
Mark 4: 35-41chung zongah hin Jesuh nih mizapi kha a cawnpiak hna cuahmah lio ah i dinh a duh caah a zultu hna kha, “Rili khattelei ral ah khin va kal uh sih, tiah a ti hna. Luke 8:23 ah cun lawng in an kal lio ahcun Jesuh cu aa hngilh tiah a ti. Thli a hran tuk zongah aa hngilh ko. Tilet a thawh i lawng chungah ti a khah deng zongah aa hngilh ko. Zeicatiah a bia cu zeitik hmanhah a rawk kho lo. Thlichia a hran zongah khatleiral cu an phan hrimhrim lai.
Tilet a thawh i lawng a khah deng zongah khattelei ral cu an phan hrimhrim lai. zeicaah ti ahcun an i thawh lai ah pei khattelei ral ah khin va kal uh sih a ti cang cu. Asinain a zultu pawl cu Jesuh hi ho a si zong an theih ko. A bia zong nifitin an theih peng ko, an ngai peng ko, a tuahmi zong an hmuh peng ko. An cung i harnak taktak a tlun i an ton tikah cun an thin a phang, an tih, Jesuh aa hngilh ko mi kha an va ṭhangh. Jesuh nih nan ka bochan tuk, nan ka kawl, nan ka ṭhangh, nan ka hlam tiah a lawm bak hna lo. Khuazei ah dah nan zumhnak cu a um kun (Luke 8:25), Zeicadah nan thin a phan, zeicadah zumhnak nan ngeih lo (Mark 4: 40) tiah a mawhchiat hna i a sik hna. An i thawh lai i Jesuh bia kha harnak an ton tikah an philh diam.
Kan Bible cauk chungah Pathian nih a bia a kan chiahtak dih cang. John 19: 30 chung ah,” aa lim cang”, tiah a ti. Kan sualnak vialte a kan ngaihthiam ( Luke 23: 34), Nan sin ah caan dongh hlan tiang kan umpi hna lai (Matt 28:20), vawlei nih harnak an pek hna lai ṭih hlah uh vawlei cu ka tei cang ( John 16: 33), a zummi poh cu an thi lai lo zungzal nunnak an ngei lai. Lawmh caan ah, har caan ah Jesuh Khrih bia kan zulh kho rih lo ahcun kan zumhnak hi i zoh ṭhan lengmang a hau.
Thiam tuk ṭung, i fian tuk ṭung, theih tuk ṭung konain chiatserhmi, mawhchiatmi, hlammi, sikmi si sual lo ding in biatak in zum hna uh sih law, kan zumhnak cu a Bai kan zulh nakin langhter ko hna uh sih.
Hi capar hi HBA Hmurka (Thla 3 dan ah voikhat @ Kumkhat voi 4 chuahmi) Vol. 18, No. 2 June (Pur) 2020 i chuahmi chung in tar chinmi a si.
EmoticonEmoticon