CHUNCHA A DAWIMI KHRIHFA SI LO IN Rev. Dr. Lal Pek Lian
HBA hmurka nih hin Laimi zumtu hna a lam tampi in bia a kan ruah, a kan ton, hawikomhnak a kan ngeih khawh caah kan lung aa lawm hringhran. Hi calei rian ṭuannak hi Pathian nih hmang chinchin ko seh ti hi kan thlacamnak a si ve. Siaherh mi tete zong chimnak caanṭha kan hmuh caah kan i lunghmuih khun. Tutan ahhin kan zumhnak kha thlalang bih in hun i bih ta duak usih ti sawm kan duh hna i Chuncha kong ruah ti ding in kan sawm hna.
Tuanbia Ngeimi Kan Si
Laimi kan van a ṭhat tuknak le kan thluachuahnak nganbik pakhat cu tuanbia a ngeimi miphun kan simi hi a si. Kan Bawipa Jesuh Khrih hi vawlei tuanbia ah tuanbia a ngeimi a si i Baibal ah record ṭha tein rel khawh a si. ABC, USA nih Laimi caah ramthar rian (mission) an kan ṭuan piakmi hi tuanbia a ngei bakmi a si. Tawn chommi a si lo. Laimi nih tuanbia a ngeih lawng hmanh si lo in biahrennak le biakamnak zong Khrih zumhnak ah a ngei vemi miphun ah Pathian nih a sersiammi kan si.
Baibal kha kan chirhchan ṭha bik a hung si kho i Pathian nih a zohkhenh vemi miphun kan si tiah miphun hna lakah a lu a tung ngammi kan si ve. Tla bulbal in khua a sami, muihnak nih a ukmi miphun si ti loin, ning le cang a ngei i ceunak nih a hruaimi miphun kan hung si ve cang! Kum 100 leng ceunak nih lam a kan hruainak ah lunghmuihnak tampi a um bantukin ningzah mualphonak tete zong Satan rap ah kan i foih ruang ah kan ton ve ko. Kan tuanbia hmanthlak hi zohṭhan a herh ve lengmang.
Noah Sin Biakamnak (Genesis 9:8-17)
Buanchukcho in vawlei cu ṭawl a si lio ah khan Noah sinah Pathian nih chuncha in biakamnak hmelchuhnak a rak pek. Minung ca lawng hmanh si lo in thilnung vialte ca tiang in biakamnak cu a rak ser. Nihin ni tiang chuncha kan hmuh paoh ah biakamnak kong tuanbia kha kan lungthin mitthlam ah a cuang kho ve. Vawlei cu ti in a ṭawl ti lai lo ti kha a fiang. Chuncha cu a mui aa dawh hringhran. Zumhnak le lawmhnak mit in cuanh le bang ahcun aa dawh chinchin, dawh a tlinh. Chuncha a chuak kan ti lo i chuncha a kheu tiah Laimi nih cun kan ti. Ngakchia nih an hmuh ve tik ah aa dawh ngaingai i tongh le tlaih an duh tawn. “Ka pa, chuncha khi ka laak piak,” an ti ṭheu. Aa dawhnak kha aa dawh ngai dah kaw ti hrilhfiah hau lo in ngakchia hmanh nih aa dawh tuk ti kha an hngalh ko.
Kan Bawipa Jesuh nih a dawtnak cu kan thinlung chungah chuncha bang a kheuh khawh zungzal naklai “Bawipa Zanriah” sunglawi in biakamnak a kan tuah piak ve (cf. Jn. 13:1-35). A nun a kan hrawmhnak hi dawh a tling i lawmhnak in a khatmi a si. Cucu tuchan holh in kan chim ahcun “khamhnak” kan ti lengmangmi hi a si. Pathian nih a Fapa in remnak (reconciliation) lam kha a ser i cu remnak chungah cun umter a kan duh zungzal.
Satan nih cu remnak cu hrawh a timh zungzal ve. Zungzal le zungzal an i tonnak hi minung kan lungthin chungah a si zungzal ve i Thiang Thlarau nih bia a kan khiahtermi kha Amah duhning in a si khawh ahcun kan thinlung chungah chuncha a kheu kho i Amah lungthin cheuhning a si lo ahcun chuncha a dawimi, zeitik hmanh i a va tlai kho in a tawng kho lomi ah kan nun kha a phan ve. Cohlannak kong ah minung kan biakhiahnak kha a rak biapi tuk ve i cu kan biakhiahnak cu Bawi Jesuh daihnak nih lam a hruaimi a si maw si lo ti hi a biapi tukmi cu a si.
Chuncha Dawi Hi Satan Fialmi A Si Ko Rua
Khrihfami hi Khrih thisen thawngin kan nun ah chuncha a kheu vemi kan si. Aruang cu kan ti-hna a simi Khrih ah aa pehmi kan si caah kan thinlung chungin chuncha a kheuh khawhnak hi a si ve. Asinain chuncha kha a tongh in tongh khawh a si ti bantukin cawnpiaknak le cawlcanghnak (movement) phunphun kha kan lak ah a hung chuak ve. Baibal ah hrihhram fek le chirhchan ṭha ngei huaha lo in “thlarau nih a ka chimh,” ti bantukin chuncha dawi le tonghpi kha an kan timhpi peng.
Ngakchia bang, “chuncha tongh khawh cu zeidah a lawh hnga?” ti kha kan uar ngaingai ve i kan i relhlo karlak ah Satan rap ah mitampi kan i foih. Chuncha hi hmuh khawh cu a si ko nain tongh khawh a si lo kha kan i philh ter cio i a pingpang kan su len ko. Thantlang peng Tio le Tipi kap um pawl nih cun nihin ni ah an i fian tuk ve cangmi cu “Mizo ram lei in chuncha an rak kan dawipi mi hi cu a dik lomi a si,” ti hi a si.
Kan lungchung in a kheu vemi chuncha tu hi Thiang Thlarau theitlai taktak (cf. Gal. 5:22-24) a simi cu a si i cucu kan Bawipa Jesuh nih biakamnak in a nun a kan hrawmhmi a si kha lungpem cio a si ko cang. Cucaah cawlcanghnak (movement) tete hi Baibal ah hram a ngei maw ngei lo, Noah le Bawi Jesuh sin biakamnak phun a si maw si lo ti hi kan zoh ṭhan lengmang a herhmi a si. Chuncha ah kan thlalang i bih ṭhan hna usih ti kha hi capar tawite nih hun langhter a duhmi cu a si.
Biatlangkawmnak
Johan Cakuat Pakhatnak nih hin aa dawh tukmi chuncha kong a kan chimh peng. “Pakhat le pakhat nan i dawtnak ah Pathian dawtnak tling hi lang seh,” a kan ti. Khrihfa nun cu lungthin chungin aa semmi chuncha duhnung kha midang nih aa dawhnak an i hrawm khawh ve dingmi hi a si.
Tuanbia ah fek tuk in chuncha a ngeimi miphun ah Pathian nih a kan sersiamnak tehte kan ngei ko cang i, chuncha kha va dawi len kan herh ti lo. Kanmah thin lungchung tu ah a kheumi a si kha philh hna hlah usih. Laihla ah kan sak tawn bang: “Kamlo Chuncha Bang Kan Dir Lai,” timi hi uar bak ko hna usih.
Hi capar hi HBA Hmurka (Thla 3 dan ah voikhat @ Kumkhat voi 4 chuahmi) Vol. 18, No. 1 March (Vaute) 2020 i chuahmi chung in tar chinmi a si.
EmoticonEmoticon