Vawlei cung scientists mifim bik ah ruah mi Albert Einstein cu, "vawilei ralpi pathumnak chuak sehlaw zeidah a cang hnga," tiah bia an rak hal. Ral pi pathumnak chuak sehlaw zeidah a cang lai ti ka chim kho lo nain ralpi pali nak chuak sehlaw minung hman ding hriam-nam cu lungtum le thingtan a si hnga i minung hi lungchan (Stone Age) ah kan kirṭhan hnga," tiah a rak ti.
Huatnak, ralnak le i dohnak nih hin hmailei ṭhanchonak le ṭhatnak phakpi loin hnulei kir i zorchuknak, sungh zatlaknak le rawhralnak tu a chuahpi zungzal tihi Einstein chimmi nih hin a fianter ngai tiah ka ruah. Laimi khuakip ah buainak le harnak hnahnawhnak a chuak cang ti ah cun zeidang kongah si loin Khrihfabu kong lengmang a si. Khua pakhat a hrawktu le Khrihfabu a buaiter tawntu thil hi Khrihfa ṭhiamṭhiam kan si, a hlei in Khrihfabu hruaitu deuh hi kan si tawn.
Mah hmuhnak le hlawhtlinnak (mah zawn lawng ruahnak) ah cun hriamnam le vainam i thlir hmanh kan ngamh men lai nain Bawi Jesuh biacah Nawlbiathar dawtnak le zawnruahnak tu cu vawlei ah kan thlak ta tawn.
Jesuh Khrih nih a zultu hna caah rumnak, liannak, ngamdamnak, chansaunak le a dang thluachuahnak hna a halpiak bal hna lo. Amah Khrih ah nun i hrawm in pumkhat sinak tu hi a halpiak tawn hna, Zeicah tiah pumkhat sinak cu teinak thazaang a si.
Thailand ram Thamlung lungkua ah ngakchia 13 kong thawngpang nih vawlei a hninh dih. Thai mipi lawng si hlah, vawleipi lung re a theihter. Hi ngakchia hna chanhchuahnak caah Thai cozah pi nih biatak tein rian a ṭuan, Cozah phaisa zeitluk dih zongah an nun dam kha biapi ah an ruah, chunzan hlan in rian an ṭuan. Thai Prime minister hrimhrim hi lungkua ah rat in thazaang a pek hna.
Mipi nih thla an campiak hna, lungkua chung an dawp mi ti a luangmi nih leithuang hna lei le cintlak tampi a hrawh. Sihmanhsehlaw, leithuang hna nih “Ngakchia hna nungdam tein an chuahnak a si paoh ah cun, kan lei le cintlakmi cu rawk ko seh” an ti. Zeitluk in dah nun an ni hrawm le lungput dawh an ken, an lungput dawh ruangah Thai cozah pi nih leituang ekah pakhat ah Bath 1,000 pek a timh hna, cozah nih Batt 50,00,000 budget an suai.
Ngakchia chanhchuahnak caah vawleipi nih thla an campiak hna i ramkip nih an chuah hnawh hna. A ruang cu, thil an tonmi kongah nun an ni hrawmnak thinlung ah khan a rak si. Hi thil thamtham cu an ti hrimhrim lo, keimah ka chung chuak, ka cingla, ka miphun, kan rammi le kan biaknak aa tel lemlo an ti hrimhrim lo, nun hloh in rian an ṭuan.
A dawhtuk mi nun hrawmnak, pumkhat sinak le lungthin khat tein an ni zuamnak hna nih ngakchia an zatein nithum chung ah an chuah khawh hna. Cu lungput le sining cu kannih HBA ram chung zumtu dihlak nih nunpi le cawn awk tlak taktak a si tiah ka ruah. Ho nih rak theih theng bal tuk lomi Thamlung lungkua cu nihin ah vawleipi theih mi "Interesting place" ah a hung si. Zeicahtiah pumkhat sinak cu teinak thazaang le thluachuah hmuh hi a si.
Paul nih, “Pakhat le pakhat i bawm u law (nan thilrit i chang u), cuticun nan i dawtnak kha langhter u.” Pumkhat sinak, Thlarau nih an pekmi hna kha, ngeih peng awkah an funtu hna daihnak hri khan fek tein i tem u,” a ti. (Efesa 4:2-3)
Hi Capar hi HBA Hmurka August 2018 Vol. 16 No. 3 i chuahmi chung in lak chommi a si.
EmoticonEmoticon