Rev. Sang Ling (1886-1953)
Sang Lingcu Zathang hrin (Sangpi chung) a si i, Za Thang in chan sarihnak That Cin upa bik Lian Khuai le Zokhua bawi, Khengmual phun (Tluangchawn chung) Sai Hliang (Za Hu le Chan Ceu a rak thlatu) i an fapa hniang a si.
Amah cu 1886 kumchung ah Hakha khua ah a chuak i a unau le a farle hna cu: Dar Cia, Lal Er, Than Hniar, Ngun Cin, Chan Cung, Sang Ci le amah Sang Ling cu an si.
Sang Ci le Sang Ling cu an i cih i hnuk aa hrawmmi ṭafar an si. Sang Ling a ngakchiat liote ah an pa Lian Khuai nih cun a thihtak hna caah ngakṭah in an nu Sai Hliang nih cun a hmeihpi hna caah Sang Lingcu a ule a farle nih an dawt khun.
1899 kum March 15 ni ah Rev. Arthur E. Carson le Lauru cu Hakha khua an hung phan i Khrihfa sianginn cu 1900 kum June thla in an tuah i an hun i kaipimi Karen tlangval San Win cu saya an ṭuanter i Kawl ca in an cawng.
Mah sianginn ah cun Sang Ling zong cu a u Pu Than Hniar (S.I.P.) nih a rak cawnter ve i mah sianginn ah cun thlacamnak, hlasaknak le Thawngṭha cawnpiaknak te hna hi Kawl ca an cawn hlanah an rak cawnpiak tawn hna caah Sang Ling cu a lungthin tak in Pathian cu a rak zumh i 1907 kum November 10 ni ah Rev. Carson nih tipilnak a rak pek.
Sianginn cu ṭhate in a kai lengmang i Kawl ca tang li a hung awng ve. Amah cu Kawl ca tang li a awn hnu cun a u Than Hniar nih Tum Tlik he Rangoon Cushing Christian High School ah ca a rak cawnter hna i 1914 kum ah Tang sarih a rak awng. Amah cu Hakha in Rangoon ah ca a cawng i tang sarih a awng hmasa bik a rak si.
Sang Ling cu Pathian nih pahrang (talent) a pekmi cu holh phunphun chimthiamnak hi a si. Kawl holh, Mirang holh, Pali le Kala… te hna nalte in a chim khawh. Thil a hngalhmi hi philh ti a um lo, aa cinken peng.
Biachim ah ralṭhatnak le biachim thiamnak Pathian nih a pek. Cucaah Sang Ling nih ruat ciammamte in a chim cangmi bia cu al awk zeihmanh a um lo, a tlarite zungzal a si ko. Nal le lihchim hi a huat bikmi a si.
Sang Ling cu 1916 kum ah raisekhan chunh rian a cawng i Pu That To he an ṭuanṭi. Mah rian a ṭuan hlan deuhte ah cun Carson bawinu le Cope bawipa nih Pathian rianṭuan dingah an vung leem tikah Sang Ling cu aa lawm ko nain a ule nih an duh hrimhrim lo caah an thlauh i raisekhan chunh rian tu a ṭuannak zong cu a si.
Mah rian a ṭuan lioah cun a rianṭuan a ṭhat le felte in a ṭuan caah Hakha Vuanthok Fisher nih a duhcaah a auh i cazi (head clerk) rian cu a pek. A thlahlawh cu Rs. 80/- a si i aa lawm tuk.
Sang Ling cu nupiṭhit a hung cutzat cang caah Zathang phun (Sangte chung) Pu Khar Cem le Pi Nu Cin i an fanu Nu Sai Pen cu an hampiak i 1918 kum May 25, Zarhteni ah Laiphungte in ṭhitumhnak an rak tuah.
A sul le lam cu Hakha khua ah siibawi le Vuanthok a rak kemhmi Mr. Peter nih Sang Ling cu nupi ṭhit zau dingah a rak forh. “Na lahkhah a cheu hi na nupi kan run pek lai i, na thih sual a si ahcun na pensen cu na nupi kan run pek hnga.
German ram ah na kal ve ko lai,” tiah a rak leem caah a si. Asinain Nu Sai Pen lei chungkhar nih German ram kal cu an rak duh hrimhrim lo. Sang Ling le Sai Pen cu Laiphungte in ṭhitumnak an rak tuah hnuah Rev. Cope nih Shia Khaw le a nupi le Hreng Hnin le a nupi he hmunkhat ah Khrihfaphung in kutsih thlacamnak a rak tuahpiak hna i Rev. Cope le Carson bawinu nih lakphakti le changreu an rak dangh hna.
Mah hnu caan tlawmpal ah Sang Ling cu a rian in an run phuah. A sul le a lam cu hitihin a si. Vawleicung ralpi pahnihnak a thawh lai ahhin German mi nih ahohmanh ralkap ah luh duh hna hlah seh, tiah ralkap ṭuan a harning le ṭih a nunning vialte cu baisakup in an thlak i thlitte in Hakha khua ah cun an hung piah.
Mah lioah cun holhlettu hohmanh an um lo caah Sang Ling nih cun holh cu a lehpiak hna. Mah kongah cun Vuanthok bawipa sinah report an tuah. Cun Lairal a tho lai ti a hngal nate in Vuanthok bawipa sinah report a pek lo, tiah konglam phun hnih in report an tuah caah Sang Ling cu a rian in an phuahnak cu a si.
Sang Ling cu a rian in an phuah hnu tlawmpal ah Rev. Cope le Carson bawinu nih an leen i Pathian rianṭuan ding ah an sawm. Sang Ling nih, “Kei cu misual ka si, ka ṭuan kho lai lo,” tiah a hmasa ah cun a rak al hna.
A u Than Hniar nih le Pathian rianṭuan cu a duh hrimhrim lo caah Sang Ling nih, “Inn dang ah kan chuah ah a ṭha lai,” tiah a ruah caah Innral sang ah inn cu Rs.150/- in a cawk i an i ṭhial.
Mah hnu cun Carson bawinu le Rev. Cope bawipa nih cun tu le tu an leen hna i Baibal ca zong laksawng ah an ṭhenh. A hnu bik tuarh loah Pathian rianṭuan ding cun a lung aa thle i mah hnu i Carson bawinu le Cope bawipa nih an rung leen ṭhan tik hna ah cun,
“Bawinu le Bawipa, nan ka fialningte in Pathian rian cu ka ṭuan ko lai,” tiah a ti hna caah an i lawm tuk i a kut an tlaih i Pathian rian cu 1918 kum July 1 ni in ṭuan hram aa thawk i thlahlawh cu Rs.12/- an rak pek. Mah hnu cun Sang Ling cu Saya Sang Ling run ti a si cang.
Saya Sang Ling cu Cope bawipa nih, Hakha peng (Hakha, Thantlang, Matupi), Falam peng le Tedim peng (Tedim, Tonzang) ah Thawngṭha chim dingah ṭuanvo a phawt.
Saya Sang Ling cu pawfah a ngei i saupipi a paw cu a fak zungzal tawn. Zan khat cu a pawfah a zual tuk i aa tengtale lengmang. Mah lioah cun a ihnak cun amahte in a hung ṭhu i Pathian sinah, “Bawipa Pathian, na rian ṭuantu dingah na ka auh lioah kei cu misual ka si, ka rak in ti nain na ka fial chih lengmang ruangah na bia al ngam loin “iai” ka rak in ti.
A tuning bang ka si ahcun na rian ṭuan khawh ding ka si ṭung lo. Sihmanhsehlaw zeizong vialte ser khotu na si i na rianṭuantu i na ka thim taktak asiahcun na duhning bangin run ka hmang ko,” tiah lungtakte in thla a cam i a vun dihkhap ahkhin a pawfah cu a daidep i herha zangte in a ṭhu. “Pathian nih ka pawfah cu mitchung hmunthur bang a chuah ko hih,” tiah Saite cu a chimh i an i lawm tuk.
Saya Sang Ling cu tukforhnak atu le atu a ing. Zan hlat loin an inn cu lung in an cheh i zuri pawl nih an auhnawh hna. Ni khat cu Saya Sang Ling nih, “Pathian rianṭuan seh nan ka ti ahcun Baibal sianginn ah kai ka hau lai lo maw? tiah siangbawite cu a hal hna.
“Nang cu Mirang ca le holh, Kawl ca le holh a thiam tukmi na si caah Mirang le Kawl in an ṭialmi Baibal ca le hrilhfiah na rel khawh dih caah Baibal Sianginn kai na hau lai lo,” tiah an ti caah Baibal Sianginn nikhat hmanh kai hin lote in Pastor rian a ṭuan hmasa bik a si. Cucaah amah cu hmasa bik Evangelist Chin ramchung ah a ṭuanmi a si.
Voikhat ah Saya Sang Ling cu Thawngṭha chim ah a tlawng i Aibur khua a phan. Mirang ralbawi (Major) pa he an i tong i Mirang holh in an i chawn i ral bawipa cu a khuaruah a har.
Mah tlukin Mirang holh a thiam cu a ti i ralbawi pa nih cun,”Na rian in i phuak law a tu senthum kaan benh lai. Cun Rangoon ah na kal lai i bawi ah kan in kaiter lai,” a ti. Hakha a phanh tikah Carson bawinu le Cope bawipa cu a chimh hna i an duh naisai lo caah a kir ko.
Nikhat ah Saya Sang Ling cu zudahnak hmun, mitampi an umnak hmun ah a vung kal i Thawngṭha cu a chimh hna. Pakhat pa nih, “Hruh bia a nawnnok ko lo hlah i; na Pathian cu vun chuah law i pai tuah usih,” tiah a ti i Sang Ling cu “lak” tiah a chuak i pakhat pa he cun an i pai.
Sang Ling nih cun fak lakin a tengh i, i nolh rih, an ti len cu aa nolh ngam ti lo. Mah cun a u pa pakhat nih, “Sang Ling” na vaa thawnter ve dah ngai cu. Zei na va si te hngamaw cu,” tiah a nihpah khin a vun ti.
Sang Ling nih, “Ka u, na ludomh le ka ludomh hi aa khat mei, kei cu pu dahkaw kaa domh hih,” a hei ti i a u pa cu a ludomh a chiat caah a ning a zak i a dai ziar.
Nikhat cu Hakha upa vialte an i tong i Sang Ling cu tazacuai awk in an i ceih. Falam Zipeng Colonel Burne sinah taza cu an cuai. Zipeng bawipa cu Hakha ah a rak tlung i an bia cu a ceih.
Sang Ling dawi nan duh a si ahcun a duhnak hmun ah a inn cu a tuningte khin nan sakpiak lai, a ti hna caah innṭhial i sakpiak cu an duh lo caah dawi khawh loin an umter ṭhan. Saya Sang Ling cu Saya Heng Cin te hna he Zotung, Zophei le Matupi ah khual an tlawng lengmang i serhsatnak a phunphun an ing.
1923 kumchung ah Saya Sang Fen cu Thantlang peng Lungler khua ah Rev. Cope nih a chiah i Saya Sang Ling cu rianṭuantu hawi pakhat a hun ngei. Cun 1924 kum ah Saya Van Lo le Saya Nawl Tling an hung ṭuan ve i an hung i nuam deuh ngai cang.
Saya Sang Fen cu 1926 kum October 26 ni ah ordination cu Saya Van Lo he Rev.Dr. Strait nih a pek hna i Saya Sang Ling cu 1932 kum March 3 ni ah an pek ve. Saya Nawl Tling tu cu 1933 kum June 13 ni ah an pek.
Mah hnu cun Rev. Sang Fen, Rev. Van Lo, Rev. Sang Ling le Rev.Nawl Tling tiah run ti an si i an unau rualte Pathian phungchim ah khuakip le a ramkip ah an vaak.
Carson bawinu nih Baibal Cathar (Thawngṭha pali) a leh dih lomi cu Rev. Dr. Strait nih Rev. Sang Ling he an leh i 1934 kum ah uk 5000 an chuah. Rev. Sang Ling cu Mirang holh le ca a thiam caah le Hakha holh tu cu zeidah chim awk a um hnga, siangbawite rian cu luhlinhte in a bawmh hna i Hla cauk le Sunday School cawn awk zong tam lakte an rak chuah. Mi ṭhahnem a si.
Rev. Sang Ling le Rev. Sang Fen cu an unaute Pathian Phungchim ah cun an vak tawn i Mi Ee peng Rinpi khua ah arti pumkhat an i hoihnak te hna, arpi pumkhat sa Rev. Sang Ling nih a thlim dihnak te hna, Falam peng Dihai khua i an unaute bapum kheh loin an eiternak te hna,
Zamual khua mi nih an i cit rang hauka lungdonh i an hren ruangah Rs.2/- dan an tatnak hna te hna, Matu peng Aika khua ah rawldangh loin zan an riahnak te hna, Lotaw ah an lan i an rawl a ṭaam tuk caah mi mangkalong an firnak te hna, Tingsi khua mi nih an fale pariat tipil an pek hna ruang ah thah an zalhnak hna te hna,
an kirlei ah Lotaw le Aika kar tiva, Paiva nih a rak fenhnak hna te hna, Hakha peng Dongva khua mi nih an rak donh hna caah khua hauka ah rawl lo le ti lo in puan loin zankhat an rak riahnak te hna…. ti in Chin ram chungah an unaute thih ah thih khat, nun ah nun khat tiah Pathian Ramkauhnak caah harnak phunkip tuar in hmawngṭhiamtu hmasa an rak si.
Rev. Sang Ling nih Pathian rian a ṭuan lioah khuaruahhar thiltete Bawipa min in a rak tuah tawn. Nikhat cu Zephai khua i phung a chim lioah misilo pahnih an ra ve i thla a camh hna i an dam.
Cun Khuabung ah fa a ngei lomi Saya Za Uk te nupa thla a camh hna i fapate an ngei. Cun Khuabe Pa Kawi nu le Farhual Vai Dum nu cu khuavang ngei an si i thla a camh hna i an khuavang cu a ṭhawlpiak hna i Khrihfa ah an lut colh.
Cun Hrinthang khua ah kum saupi a ngor cangmi thla a campiak i a hung dam. Mizaw dang zong nih mah thawng an theih cun an fuh lulh cio i thla cu a camh cio hna i a dammi tampi an um. Cun Khuabung ah mitcaw pakhat thla a campiak i a mit cu khua a hmu ṭhan.
Rev. Sang Ling le Rev. Sang Fen cu Zokhua peng Hrawngvun khua ah Rev. Strait he tiah phung an chim i Pa Rawm nih ral in a rak dirh hna caah Rev. Strait cu Bangla ah a le.
Caan khat cu Gangaw peng Vadonglei ah an tlawng i Kawl ram Komiunis hruaitu Thakhin Shoe zong nih an phungchim cu a ngeih ve. Cun an pahnihte Mizo ram Thingsai Civuipi ah an rak kal i phung zong an chim len ve.
Nikhat cu Hakha khuathar Man Thluai cu saupi a zeng cang i Khrihfa ah a lut ve. Tipil in a duh caah maihum nganpi chungah tipil cu 1936 kum chung ah a rak pek.
Japan ral cu 1943 kum November 13 ni ah Hakha khua cu an lak i an uk. Rev. Sang Ling le chungkhar cu Mahnepchah hmun ah an rol. Mah lioah cun a fapa Ṭial Cung le a tupa Kep Tu cu Japan nih an tlaih hna i Japan bawi pawl a vung ton hna tikah amah tu an rak tlaih i a fale tu cu an thlah hna.
Zarh thum tluk an tlaih i Gangaw in an thlah ṭhan i Mahnepchah ah cun a hung kir, an i lawm hringhran. Rev.Sang Ling te chungkhar dihlak cu Saya Heng Cin nih a lak hna i Hmawngtlang khua ah a umter hna.
Japan ral cu 1945 kum August 14 ni in a thiang i ral zaammi vialte cu Hakha an panh dih ṭhan i anmah le an inn cioah an lut. Khrismas caan a hung phan i an lunglawmh tuk ah Khrismas a dongtu hi a peh in an i peh.
Rev. Sang Ling le Rev. Za Ling cu Calcutta khua i tuahmi Baibal Conference ah kal an i tim i 1947 kum June 12 ni in an pok i Tamu an phan i an rak donh hna caah Rangoon ah an lan i, “Ra duh hna hlahseh,” an ti hna caah an cam i General Aung San a ton i bia tampi an i ruah.
Cun 1948 kum April 19 ni ah Falam khua ah Kawl ram Tamada Saw Shwe Taik he bia an i ruah. Cun Kawl ram Vuancichoke U Nu he zong Falam ah an i tong.
Hakha Khrihfabu cu an hung karh chin lengmang caah an Biakinn hlunte nih cun a zawi ti hna lo caah Biakinn thar a tung pe 60, a vang pe 30, dot 2 in an sak i 1953 kum June 21 ni ah Biakinn luhnak puai cu an tuah i minung 525 reng lo an i pum.
Rev. Sang Ling nih phung a chim i minutes 50 khengte a chim i Rev. Johnson siangbawipa nih, “Phungchim ka theihmi ah a sau bik pawl a si lai,” a ti.
1953 kum chung ah hin Maymyo khua ah Baibal Conference a rak um i Rev. Sang Ling cu Rev. Sang Fen he an rak kal. Rev. Nawl Tling fapa Siang Ling cu Insein Baibal sianginn a kai lio a si i mah Baibal Conference ah cun a hung kai ve i ti aa kholhnak ah ti ah a tla i a thi. A ruak cu anmah nih an fim.
Rev. Sang Ling cu Maymyo cun Rev. Sang Fen he cun an tlung i Hakha an phanh hnu tlawmpal ah a hlan i a rak ngeihmi a pawfah kha a puang ṭhan. Kawl sii thiampa zong nih a tuah len i a dam lo caah siizung ah an kal pi.
Siizung zongah cun siibawite nih a phunphun in an i zuam len nain ṭhat lei panh loin zualchinlei a panh caah inn ah an ṭinpi. A rianṭuan hawi vialte nih an tlunhnawh i an zoh cio, a kaa an biak dih.
Rev. Sang Ling cu a nunnak nih a celh ti lo caah 1953 kum December 13 ni deilei ah a nunnak a dong. Mah ni cu Zarhpini a si i Biakinn ah i pumh loin a ruak cu an humh dih.
A thaizing December 14 ni ah a inntual ah an vui. Amah cu kum 67 ah a thi i Pathian rian kum 35 a ṭuan. Pathian rian a ṭuan chungah tipil a pekmi dihlak 888 an si. Pi Sai Pen he fapa pa nga le fanu pasarih, an dihlak ah fale 12 an ngei i tule 49 le tuchin 40 an ngei.
Sayaci Dr. Bawi Hu nih Chin Hmaisuang Hna Tuanbia Section 2 chung ta ka tarmi a si.
Cattialtu Sayaci Dr. Bawi Hu Tuanbia hika ahhin rel khawh a si.
Chin Hmaisuang Hna Tuanbia Biahmaitthi rel na duh ahcun Hika catlang hi click
- 1. Rev.Sang Ling Diamond Jubilee (1918-1995).
- Rev. Sang Fen Tlakum Chung Lungvar Mansung.
EmoticonEmoticon