U Thant Tuanbia PART - I
3rd Secretary - General
November 30, 1961-December 31, 1971.
U Thant cu 1909 kum January 22 Cacawn ni 5 ni ah a pa ဦးဘိုးနှစ် (U Boo Hnit) le a nu ဒေါ်နန်းသောင်း (Daw Nan Taung) nih Pantanaw khua ah zanṭim hnu minit 5 (12:05 zamṭim) caan ah an hrin. Pantanaw khua cu fur caan ah ti nih a nip tawn hna lengah rul an tam caah a pa nih an inn cu cungcawi dot saangpi dot hnih in a ser i tlor thing lawngte in a sak.
An inn pawngah cun haikung nganpipi an um i mangkalong kung te hna le ungkung kung khat zong an um. Culengah inn dang inn 4 zong an ngei fawn. Anmah cu Buddhist an si.
[caption id="" align="alignnone" width="1024"]
U Thant te chungkhar[/caption]Naute cu a chuahnak in zarh khat a rauh hnuah min sak ding a si caah cingla rualchan le innpa chakthlang an chuak i naute cu a nu nih aa pom i mi zapi lakah cun an pa he an ṭhutpi. Anmah lakah kum upa bik tarpa pakhat nih, “Cacawn 5 ni chuak a si caah ‘Maung Thant’ tiah a min cu sak siseh,” tiah a sak i an dihlak an hna a tla cio. Mah ni hramthawk cun ‘Maung Thant’ tiah an auh. Maung Thant cu nau le pathum Maung Khanh, Maung Taung le Maung Tin Maung a ngeih hna.
(a) Cacawnnak le Rianṭuan nak :
Maung Thant pa ဦးဘိုးနှစ် cu Calcutta Hunter College ah ca a cawng i I.A. a awng. Maung Thant cu kum 6 a hung si i Pantanaw Kawl sianginn ah ca a cawng. Mah Kawl sianginn ah cun kum 2 le a cheu a kai hnuah English - Burmese Middle Snhool ah aa ṭhial. Maung Thant cu a pa nih inn ah Mirang ca le Mirang holh a cawnpiak tawn caah a hawile nakin ca le holh cu a thiam deuh ngaingai.
[caption id="" align="alignnone" width="469"]
1955 U Thant[/caption]A kutṭial zong aa dawh i a fiang. Maung Thant cu Mirang holh a thiam caah an sianginn i Mirang an rat tikah biachimtu ah an hman tawn. Amah cu carel a huam ngaingai i leentecelh zong a zuam. Zarhteni le Zarhpini paohah meng tam nawn lam a leeng zungzal. Mah bantukin lam a leen le leente aa celh zungzal caah Maung Thant cu a zaw bal lo; a dam zungzal.
Maung Thant cu ziaza a ṭha lomi ngakchia dang he zong aa kom khomi a si. A nau le zong siseh, mi dang a hawile zong si hna seh, an thin a hun tikah mileem a thiammi a si. Mi dang he i sik le i velh zong a hrial thiammi a si. Amah cu kum 14 tiang Pantanaw National High School ah ca a cawng i Judson Burmese – English Dictionnary a hman zungzal. A pa cu hi sianginn i ca a cawn lioah a thihtak hna i amah nih a nu he an innchungkhar khuasaknak cu ṭuanvo an lak.
[caption id="" align="alignnone" width="734"]
1927 lio a hmanthlak[/caption]Maung Thant cu 1926 kum chungah Pantanaw National High School cun Matric camipuai cu a tuah i a awng. Mah hnu cun Rangoon Univercity ah cacawn ah cun aa thawh i I.A (i) a cawng. Camipuai cu a tuah i I.A (i) cu a awn hnuah I.A(ii) a cawng ṭhan. I.A (ii) cu 1928 kum chungah camipuai cu a tuah i a awng ko nain B.A( i ) cawn khawh ti loin innlei khuasaknak an har ruangah Pantanaw khua ah cun a tlung.
Pantanaw khua i a phanh hnu cun Maung Thant cu saya rian an pek i National High School ah cun S.A.T (အထက်တန်းပြ) a ṭuan. Mah sianginn i saya rian a ṭuan lioah Mirang cauk tampi a rel i mah hna lakah cun ‘The Fox and the Raven,’ ‘The Piper of Hamelin’ le ‘She stoops to Conquer’ timi Mirang cauk hna cu Kawl holh in a leh i a cauk in a chuah hna. Caṭialnak a min ah ‘သီလဝ’ tiah aa sak. Mah cauk hna a chuah ruangah hin laksawng zong tampi an pek. Amah cu ca a relmi paoh hi a diary ah a ṭial i a cheu cu Magazine zongin a chuah tawn hna. A diary cu kumfatin aa changtete in (နှစ်အလိုက်) a chiah diahmah hna. Saya U Thant cu S.A.T a ṭuan lioah Tamaing, English, Thilri (ပြည်သူ့နီတိ) le Kanan a chimh hna i cachimh a thim ngaingai.
Saya U Thant cu Pantanaw National High School i saya a ṭuan lioah Sayaci U Nu cu Headmaster a ṭuan. Cucaah Sayaci U Nu le Saya U Thant cu an i daw i an rianṭuan zong an i nuam. Saya U Thant cu 1929 kum in 1930 kum tiang S.A.T cu a ṭuan i mah caan chungah cun Kawl ram sianginn lei Cozah nih S.A.T saya rian a ṭuanmi vialte cu camipuai an tuah hna i mah camipuai cu a phi ve.
Camipuai awng sung cazin cu a hung chuah tikah saya U Thant cu Kawl ram pumpi ah pakhatnak in a awng. Cucaah Pantanaw khua mi vialte cu an i lawm dih. Cun saya U Thant cu cozah nih 1931 kum in Pantanaw National High School ah cun sayaci an pek i High School Headmaster cu Sayaci U Nu zaka ah a ṭuan.
Mah lioah cun mah sianginn ah School Administrator rian a lawng i Sayaci U Nu cu an ṭuanter. Sayaci U Thant cu a kum 22 lawng a si rih nain saya rian cu felfaite in a ṭuan. Mah sianginn ah cun Sayaci rian cu amah kum 30 leng a si tiang a ṭuan.
Sayaci U Thant cu nupiṭhit ding a si caah Pantanaw khua i sihni U Khin fanu Daw Thein Tin an halpiak. Bedin saya nih 1934 kum November thla chungah leh i thah ding tiah a ti hna caah mah caan ah cun leh cu an i thah. Leh an i thah lioah cun Saya U Thant cu kum 26 lawng a si rih. Mah caan lioah cun Kawl ram cu Japan nih a rak uk i anmah Japan ca cawn dingin a sianginn kipah an rak ti hna. Asinain Sayaci U Thant nih cun Japan ca cu cawn loin a rak um i an hal tikah, ‘Cawnpiaktu saya kan ngei lo’ tiah Japan cu a ti hna. Mah hnu tlawmpal ah cun Japan cu ral an sungh caah Kawl ram in an kir dih.
(b) Nainganzi a ṭuannak :
Japan ral cu Kawl ram in an kir dih cangkate cun Bochoke Aung San nih Kawl ram cu mahte i uknak lam cu a phunphun in a kawl. Sayaci U Thant le chungkhar zong cu Yangon khua i um awkah Patanaw khua cun 1947 kum July 9 ni in an chuak. Yangon an phanh hnu ni tlawmpal ah Bochoke Aung San le a hawile cu U Saw nih a thah dih hna caah Kawl ram uktu Sir Hoe Brand nih U Nu cu a auh i Cozah thar ser dingin ṭuanvo a pek.
Cucaah U Nu nih Cozah thar cu a ser zokzok i U Thant cu Phahsahpalah Party ah ပြန်ကြားရေးတာဝန်ခံ ah ṭuanvo a pek colh. Mah ni hramthawk cun U Thant cu Nainganzi chungah U Nu nih a khumh i rian a ṭuanter. Cu lengah U Thant cu 1948 kum Kawl ram luatnak a hmuh hnu June thla in Information Department (ပြန်ကြားရေးဌာန) ah General Director an ṭuanter i tlawmpal ah mah Department ah cun Deputy Secretary (ဒုတိယအတွင်းဝန်) ah an kaiter. Mah rian a ṭuanpah cun Broadcasting Department ah General Director a kemhchih.
1949 kum January 4 ni, Kawl ram luatnak hmuh ni ah Kawl ram Cozah nih U Thant cu Wunnah Kyaw Htin Bweh an pek.
1951 kum chungah Kawl ram Tamaing Commission le Holhlehnak Bu ah aa tel i 1952 kum chungah Kawl ram Baisakup Tawlreltu Ohkathah zong a ṭuan. Mah kum cun Kawl ram Cozah nih kum 8 simanking cu an suai i mah a suaitu hna lakah cun U Thant zong aa tel ve.
1953 kum chungah U Thant cu Vuancichoke zung ah Simanking General Secretary ah an chiah. Mah lioah cun U Nu cu Kawl ram Vuancichoke a ṭuan lio caan a si. U Thant cu 1955 kum chungah vuancichoke i General secretary le Sipuazi le nunphung Board ah General Secretary rian tiah rian hnih a kemh i Vuancichoke biachim hngami vialte cu amah nih a ṭialpiak dih tawn.
(c) UNO kusale :
U Thant cu Vuancichoke General Secretary rian cun Vawleicung ram kip a phan. Kawl ram cu Ram Zakomh Bu ah 1948 kum in a lut i 58nk member a si. Amah cu 1952 kum chungah UN General Conference ah Kawl ram in a kaimi kuzale pawl hruaitu in a kai. 1954 kum chungah Seviet Russia ram a va phan i Krushehev he an i tong.
Tuluk ram zongah a va tlawng i Mao Tse Tung le Chou En Lai hna he zong an i tong. Kawl ram cu 1956 kum ah i thimnak a um i U Ba Shwe cu Vuancichoke ah a kai i U Thant cu amah riankel Vuancichoke General Secretary ah aa chiah ṭhan.
U Thant cu 1957 kum chungin Ram Zakomh Bu ah Kawl ram in Parmanent Ambassador ah an chiah. 1958 kum cun U Thant cu Ram Zakomh Bu i Ambassador vialte lakah a min a lang ngaingai. 1960 kum chungin Ram Zakomh Bu Fund Kawlnak Committee ah Ohkathah a ṭuan. 1961 kum chungah Yogoslav ram Belgrade khua i tuahmi ṭanh ngei lo (ဘက်မလိုက်) ram vialte meeting ah a va kai.
(d) Ram Zakomh Bu Secretary - General rian:
Dag Hammarkjold a thih hnuah Ram Zakomh Bu chungah ahodah amah zaka ah thim ah a ṭhat hnga, tiah anmah chung i a laarmi hna minung an zoh tikah Beigium ram in Ramdang Vuancichoke Henry Spat le India ram in Defence Minister Krisna Minon hna an si.
Mah lioah cun Soviet Cozah nih Ram Zakomh Bu i Secretary - General cu pakhat lawng thim loin minung pathum in thim sisehlaw, tiah ruahnak a hun chuahpi. Mah bantuk Soviet Cozah nih mi pathum thim siseh, tiah a chuahpinak sullam cu- Ram phunthum nih anmah ram aiawh cio in thimnak nawl hmu hna seh. Mah ram hna cu – အရင်းရှင်နိုင်ငံ၊ ဆိုရှယ်လစ်နိုင်ငံ၊ le ကိုလိုနီလက်အောက်ခံနိုင်ငံသားဘဝမှ လွတ်လပ်ရေးရလာသောနိုင်ငံ an si, tiah Krushchev nih a Record cauk chungah a ṭial.
Mah caan lioah cun Dag Hammarskjold cu Nobel Peace Prize pektlak a si tiah Kawl ram kuzale U Thant nih Ram Zakomh Bu Conference ah a chim. Mah bantuk a chim ruangah cun Soviet Kuzale Yorin le American Kuzale Stevenson hna nih U Thant thangṭhatnak bia an chim.
1961 kum September 20 ni i Ram Zakomh Bu Conference ah Secretary - General caah cun Kawl ram in kuzale U Thant cu thim dingah ram tam deuhpi nih an duh.
Asinain Soviet nih Troika timi Secretary - General pathum khanh ding tiah a chuahpimi cu buainak a hung um. Soviet nih Secretary - General pathum in khanh siseh, tiah a chuahpinak sullam cu – Dag Hammarskjold nih Congo buainak a tlangtlak tikah kap khatlei hoih lawngin a chim a relmi cu Soviet nih an lung a tlin lo caah Secretary - General pakhat lawng cungah aana chuan dih cu a hmaan lo, tiah a tinak cu a si. Asinain mah Soviet nih a chuahpimi asu (biatungdirh) cu American Cozah nih a lung a tling lo. Ram Zakomh Bu, UN biachah ciami cu zeibantuk kongkau a chuah zongah remh ṭhan ding a si ti lo, tiah American cozah nih a chim ve.
1961 kum November 3 ni ah U Thant cu a thimi Dag Hammarsjold zaka ah Acting Secretary - General (ယာယီ) caah an thim i Russia, American le UN chungtel ram vialte nih kanhkuatu um loin an thohkhan dih. Mah rian cu 1962 kum November thla tiang ca lawng a si.
1962 kum a hung phanh tikah Soviet Cozah nih biatung a rak dirhmi Secretary - General pathum chiah ding timi cu a awngmin lo i Secretary - General cu UN biachah cia ning in pakhat lawng khanh ding ti a si caah U Thant le Norway ram in kuzale Sulbat Nelson le Ireland ram in kuzale Frederick Bolan hna cu an min a hung thang.
1962 kum November 30 ni ah Ram Zakomh Bu Secretary - General cu hun thim a si i U Thant cu an hun thim. Amah cu a voithumnak UN Secretary - General a hung si cang i a ṭuan caan cu 1966 kum November 3 ni tiang a si. U Thant cu Dag Hammarskjold ṭuan lio i Congo buainak remhchunhtu Commission Ohkathah a si. Amah nih a dih lomi Congo buainak cu a run maimilh, a run remhchun.
U Thant nih UN Secretary - General a ṭuan chungah Vawleicung buainak vialte a ṭuanmi cu tlawmtuai an si lo. U Thant cu UN Secretary - General ṭuanvo cu caan khat a hun ṭuan hnuah a caan hnihnak zong cu an hun pehter ṭhan. Mah caan hnihnak cu 1966 kum December 2 ni in 1971 kum December 31 ni tiang a si.
U Thant nih a biachimmi (မိန့်ခွန်း) chung i a chimmi bia cu, “UN nih a tonmi buainak kipah ho sin hmanh ṭang loin (ကြားနေ) um awkah UN i rian a ṭuanmi pakhat nih a har ngaingai. UN Secretary - General pakhat nih ho mithmai zoh lo, ho sin hmanh ṭang loin um awkah a herh lo. Biaceih bawi pakhat bantukin biaduhtu (တရားလို) le biaingtu (တရားခံ) hna cu ṭhenchun thiam an hau. Sualnak a tuahtu cu zei ruangah dah a tuah, tiah hngalhfiang a hau. Hika zawn ahhin ṭanhmi ngei loin ṭuan ding a si kho lo,” tiah a chim.
(e) Vawleicung I remlonak pawl :
U Thant nih UN Secretary - General rian a ṭuan chungah Vawleicung buainak tampi a ummi lakah a lang ngaimi hnahnawhnak hna cu –
- Cuba buainak,
- Saiprus buainak,
- Indonesia le Irian Tikulh buainak le
- Vietnam buainak hna an si.
(f) Cuba buainak : A Term 2 nak a ṭuannak le a thihnak kong Kan peh ṭhan te lai… Part 2 hika ahhin rel khawh a si.
Hi tuanbia cu Sayaci Dr. Bawi Hu nih Secretary - General a ttuanmi hna tuanbia chung in a tam cem kan lakmi a si.
Sayaci Dr. Bawi Hu Kong rel na duh ahcun a tanglei >>> Cauk Biahmaithi rel na duh ahcun hika hi click te.
Cattialtu Sayaci Dr. Bawi Hu Tuanbia hika ahhin rel khawh a si.
EmoticonEmoticon