KAN PHUN AA DANG LO KAN PHUNG AA DANG.
Pa Ceu le Gracy an i duhnak cu tukum cun kumthum sang a si cang. Zanlei suimilam panga hrawng ahkhin Inya tili kamah an ṭhu i, dawtnak bia cu an hei i ruah lengmang, University ngaknu le tlangval pawl cu an zanriah khim ka si kaw lam an leng hna i, an pawngah a runrun in an i zulkhalh lio caan te a si.An ṭhutnak tanglei vun zohah Prome Road i, Mingladon le Yangon kar a chokmi Mawṭawka dawhte te cu vingving thla in, thalkah in khuai ṭio bang an i kap.
Ni a nem cang nain a sa ṭhiamṭhiam rih. Pau kate, November thla a si i, thinghnah hna cu an rau pah hna. University i lawng zap pawl hna cu, a phuphu in, ngaknu dawhdawh hna zong nih tawhrolh tawi le banian banching cio an i hruk i, dumdeidui pi a ummi Inya tili cung ahcun zoh len an tlak ko. Heh… heh… heh… tiah an au thawng nih cun Economic Institute le Degree laknak convocation Hall pi cu a hrawn ruahmah hna.
Puan zarmi phun tilawng in chung ramh, chung ramh in tili cung i a lengmi hna zong, an puanzar sen le rang, a mui a phunphun hna le an thiam ti chung i a langmi hna cu zohlen zoh cim an ti hrim lo. Ngaknu dawhdawh hna an powder le an zihmui an pangpar tonhmi rim hna cu zanlei thlizil nem sin ahcun hmui viahmah in an hung nam. Tili cung ahcun vate hna zong nih arualrual tete in an zuang i, kawp ngei lo leng le val pawl caah cun thin si a vang cukmak ko.
Tili kam ah cun an ṭhu i, Pa Ceu le Gracy vial cu, lung tekep in ti hna cu an hei cheppah lengmang. Gracy nihcun a thawh i, “Laitlang hi an chimnak ah fing le tlang, khuaram a dawh ko, tiah an ti lengmang i, hmuh lai ka ngaihtuk hrinhran cang ko,” tiah Pa Ceu khatang tein chozoh in a hun zoh i a ti. Lai mi ṭheu cu din in cun i la kaw, a hmai a chia rup. A thaw fakpi in a chuah phunman. Gracy nih a hmuh tikah a ning a zak nawn.
“Oh…. Sorry ka ngaithiam, ka bia chimmi na lung a tling lo ti, Laitlang ah rat ter na ka sianh lo ti….., lo ti,… “Na ka daw ne lo maw?. Kan dawt tuk na ka ti ṭung.”…. tiah hmai chia ngai in a ti. Pa Ceu nih cun Gracy kut nem te cu a vun lak i a ṭangah fak pi in a beh chih. Gracy nih cun zeidah a chim lai tiah, zenh ngai pah ṭung le hngah hlap ngai in a zoh khiukrao ko .
“Kan dawttuk ko. Garcy, hi kong hi tukar hrawng cu zanzong ah it lo in ka ruah zungzalmi a si i, a phi ka chuah kho hrim lo, nangmah zong nih ṭha tein na ka ruah pi ve lai.” Gracy cu a hmai a hung sen nawn i, duk duk ….duk…tiah a thin a tur ukmak.
“U…U…. zei rilmal ko dah a si hung ka chim hnik ca…”
“Atu i keimah kan dawtnak hi cu nga nih ti lo i a um khawh lo bantuk khin nangmah lo hin cun suimilam pakhat hmanh ka tlei kho hin lo, ka dawt a sinain, mah tluk kan dawtnak hi ka lung a ka lawmh tertu lei si loin. Ka lung hi nam te bang a ka can dih tu hna a si sual hnga maw? ti ka ruah ahhin zan zong ah ka hngilh kho lo i, ka rawl ei ka hmanh a thaw ti lo.
“Ai….zei rilmal ko dah a si e …. ka ṭih tuk ai…. chim zokzok cang ko….maw…. zeidah a si .?
“Kan mah le kan mah kan i duhnak lam cu chim hau lo a si ko cang i, sihmanhsehlaw hmun khat teah ngaihchiatnak le lunglawmhnak a hrawm ding le cing le la, rual le chan vialte hlawt dih in khuasak tintuk ṭinak ding ahhin cun kan pawngkam le kan ningcang hna zong hi biapi ngaingai an si lai ka ti.
A ngaite ahcun kan nih cu, khoi ka hmun le zei bantuk phung le lam he dah, Zei bantuk inn chungkhar in a chuah ti zong kan i hngal lem lo. Hi ka ah kan i ngalhmi cu kan mui sam, kan ziaza le kan lungthin lawnglawng a si ko rih.
Miphun dang veve kan si caah hin kan nu le kan pa le zong nih an kan sianh lai maw? hung kan sianh hna sehlaw tah, kan mah khuasak tintuknak ah zeitluk harnak hna dah an um hnga ti hi ka ruah lengmang mi le ka um a ka nuamh ter lo tu cu a si”
“Aw…. Uu ziah… Miphun dang kan si ṭung lo kan phung lawng pei a dang ko cu na lungre a theih zong cu na mawh lo. A phu ko, a sinain kei cu mah te hna cu a fawituk ko ka ti, hlanpi khan ka ruah diam cang mi a si. Dawtnak lawnglawng hi biapi a si, dawtnak kan ngeih paoh ahcun zei paoh a tuah khawh lo le a remh khawh lomi a um lo. Na ka daw ko lo maw? tiah nih pah in a ti.
“Daw e…. nangmah kan dawt tuk caah cun dahkaw mah tluk cun a si fam cu.”
Suimilam an van zoh i, panga le minit sawm li le panga a si cang. Zanlei suimilam 6:00 pm tiang lawnglawng nu cu lengchuahnak nawl an ngeih caah an tho i, Inya Hall lei ah cun an kal. Kutka an phanh khap ah suimilam paruk cu a hung tling taktak. Lut dih cang ulaw mileng zong ṭin dih cang u, tiah bia ruah tlam a tling lomi hna le mah tiin ṭian aa siang lomi hna ṭhen tu ding ah, killing….kiling….kiling.., tiah zaiṭha hlei darkhing cu a ring riangmang.
Thir innka cu an van khar i, Pa Ceu le Gracy lawng lo, khuah dang hna zong bia tiam a tling rih lomi hna cu inn khar chung le leng in bia cu an i ruah rih i, zoh ah hri le hreng bia bang zangfak te an si hna. Cun ni khua nih a maw chiamai i, kan ṭian siang hrim lo, ti zong ah “A caan cu zangfah a thiam lo,” an ti bang in minung sermi upadi pin ah Pathian sermi caan cu al awk a ṭha hrim ti hlah kaw, mangṭha cikcek ko ne law? …. tiah an za te an i hlan i Pa Ceu zong cu a ṭin ve.
Cu ti cun sianginn khar caan te hna ah Gracy nih Baisakup lehmah te hna a rak cawk tawn i, an zoh ṭi tawn. Library i ca an zoh caan hmanh ahhin hmun khat te ah an ṭhu zungzal. A caan an ngeih chung paoh cu hmunkhat te ah an um zungzal i, an caah nikhat hi suimilam pakhat a can bal lo.
Hi ti i. Gracy nih laimi pa, tlangval a ngehmi hi a nu le a pa nih an rak theih tikah, an thin a hung ngaingai i, a phunphun in nun an chimh len. Gracy cu kawl pakka te a si. Pa Ceu zong nih cun a nu le a pa tu cu Pa Ceu rian a tlaih rih lo le a no tuk rih dah ti lo ahcun zeihmanh a duhmi khenkham cu a tim lo. Luat tein a mah duhmi te ṭhit ter a duh ko. A nu tu cu a ngaih a chia ngaingai. Hawi fa pa ngeihchun nih maw cu bantuk miphun dang a ṭhit ko lai. Ka fapa lo ko cang cu ta, a ti i, a lung a fak ko. Ṭhit lo ding in a nu nih cun ca a kuat.
Sihmanhsehlaw Pa Ceu le Gracy duhnak nih cun tlang le rawn zong a tuak lo i, khen le kham zong hi a poi ah a ruat lo. An i dawtnak lithal hmual nih cun fing le tlang kai cawk lo le ṭum cawk lo, meng in tah cawk lo hmunrawn pi cu a thoih tha ruam lo.
Cu cun an sianginn kai a dih le cang ka tein. Yangon City Civil Court ah an hawi kom pahnih le tin an min an va ṭhut i an i um.
An nu pa te cun Laitlang ah an hung tlung i, an i nuam ngaingai. Gracy cu mifim, miṭha, midawh a si. Pa Ceu cingla, rualchan pawl zong hi a dawt ngaingai hna. Laimi bantuk tein um a zuam i, Seiphawrh le nau puak te hna zong a thiam ko. Hi bantukin khuati a dan ruang le hawikom, hmuh ballo mi hna, pawngkam thil umtu ning ziaza a thlengmi kongah lungrawhnak a ngeibal hngin lo. A tu cu fapa te zong an ngei cang.
A sinain ni in thla in kum tiang a hung ruah lengmang tikah a ruah ballonak zawn tete in phungdangmi an sinak cu a hung lang lengmang i, hlanlio i, a nu, a pa, a u le a nau hna he nuam tein an rak um lio kha a lungah puan bang thar ṭhan cang. Meng i tah cawk lo, tlangkhat tlanghnih dan men hmanh si lo, hi tluk ram hlatnak ram ahhin zawtfah le thihlohnak hawi nih hung ka phan sehlaw mui i hmuh le ka i ton zong a um ti hnga lo.
Ka dawtmi ka nu le ka pa le ka u nau vialte zong kha ka hmuh lo kar ah an thi dih ko lai mu….a ti ….ee. Yangon khua i ka hawikom ṭha vialte hna zong kha tiah a ngaihchiat caan ah hmanthlak a zoh i a ṭap lengmang tawn.
A bia bang cun, a hung zaw, thlop bultu reptak an um ti lo. A caancaan ahcun Pa Ceu zong nih cun a dawttuk ko nain, a sik tawn. An chungkhar khuasaknak ah cun nuamhnak a tam ko nain, mah bantuk thin nuamh lonak a ngeih caan ahhin cun a lung hi a rawk tuk. Aho tal kha ka bochan lai ti awk hi aa um ti lo. Aho sin tal ah ka ngaihchiat le ka thin hunnak hi ka damh tuah hnik seh ti awk zong um lo. A thla a sang ko cang.
A nu Pa Ceu nu nihhin a nautat tuk fawn i; Nangmah uico nu hi, khua zei in si maw na ra chuah ee … Kawl chia aw….” tiah a phunphun in a riam len tawn.
Sihmanhsehlaw Gracy cu ca thiammi le ruahnak sang a ngeimi, mi nunṭha le mifim a si caah, a nu bia cu a thei lo te a lawh ter. Tar le ruahnak bi mi, hlan lio lungthin a ngeimi a si. kha a ruah piak zia a thiam ko.
A cungah mithmai chia le lungthin ṭhalo zongin a cungah a um bal lo. A upat i a dawt ṭhiamṭhiam ko. A sinain a caah ahcun amah chung chuak a fate he hmanh an thleidan hna a hmuh tikah hin cun a lungthli te cun a ngaih a chia ṭhiamṭhiam ve ko.
Minung hen pei a si ve cu Pa Ceu lung a ṭha sual lai lo ti phan ah hin a ngaihchiatnak le a nu nih a tuah taunak te hna zong cu Pa Ceu sin zongah a chim ballo i, a ziaza zong in a langhter bal lo.
Asinain a lungthli a tuarnak hi cu a lung le a thin hi nam tein can piak dih hna seh law cu bang a tluk. Dawtnak ti a liam thluamah lioah khan cun a dawtmi a va lawng lo in, a pawngkam vialte hi ṭuan remhkhawhnak thazaang a rak ngei ko nain dawt nak ti a hung reu hnu ahcun an pawngkam a thlengmi, lamhlatnak, nu le pa, u le nau he i ṭhennak le phung lam dangmi sinak te hna cu a caah lungdo hma tuar a tluk cang.
Pa Ceu cu a rian a tam caan i, a thluanh marh khawh lo caan le, aw ka sang deuh i a chonh caan, a mah lawngte in lam a len caan te hna ah hin cun a lung hi a fak tuk i, amah ram kan phan cang i, zei ah a ka rel ti rua lo.
A kan zahpi cang rua, tiah a phunphun in a ruat dih. Hmai lei ahcun a mak zong a ka mak te lai, titiang in a ruat cang. Hi ti hin a si i, hlan lio ah, “A fawi tuk ko, dawtnak kan ngeih ahcun zei paoh a cang kho dih ko,” tiah a ti mi, phungdang sinak cu, a tu cu, khua nih van dawm kiang lak a choih bang zei zong a hliah thlar in a lang dih cang.
Pa Ceu nih hin hung ka ma sehlaw, a si loah a thih zong ruah lo piah hung ka thih tak sehlaw, kan nih nu fa te hi, zei tin hen kan um hnga ? mah vialte khua letlang hna kha kan tan ṭhan a herh ko cang hnga mu?.... tiah a ruat i a lung a der chin thluahmah ko.
Gracy cu laimi a si lo caah, a cheu nih a upat mi le a chimthiammi rak um len hmanh sehlaw, a rak nautat tawk le zei ah a rel lomi zong an rak tlawm lai lo cu a phung a si ko.
Mi cheu nih anmah phun ah anmah bawi cio an si, phun in nautat le zomhtaih hman cu lungthin ruahnak hman lo a si, tiah an ruat ko nain, a cheu cu mah phun a si lomi cu nautat a hmangmi zong an rak um ṭhiamṭhiam ve.
Mah ti cun mei cu thliharnnak lei ahcun a alh chin lengmang i, a hnu bik ah a ruahmi cu, “kawlram ah kirṭhan hi a ṭha bik rua lai.” ti a si. Pa Ceu tu cu a nu le a pa duhmi le lungtling mi te, anmah laimi an hun ṭhit piak lai i, kan nih nufa hi cu a kan philh zau ko lai, a ti. Asinain Pa Ceu cu a rak dawt tukmi a si ve caah khan ṭhen lai ngaingai cu a sing hrimhrim lo.
Cuticun Gracy lung cu hri zelh in a zel i, khat lei ah a dawtmi Pa Ceu hmai, khat leiah a dawtmi a nu a pa hmai kar lak ah khuazei panh awk hngal loin a lung cu thiamphei fung chawh in a chok len ko.
“Ka dawt….. Uu, Lai tlang ah ka ra ve ko lai mu, timi kha, a tu cu ,
“Ka dawt… u…Uu, Kawlram ah ka kir òhaan ne lai mu” tiin a dong òhan.
“Thihnak lo nih cun zeihmanh nih hung kan ṭhen hlah seh mu,” timi cu,
“Laicung caan cu mah vial hin, dong ko kun seh,” ti a si cang.
Pa Ceu nih cun kalemyo tiangin a vung thlah hna. A hlan kumthum lio i nuam tein an hung tlun ṭinak vanlawng dinh hmun ah cun atu cu dairial mitthli neh cawk loin a luang ṭhan cang. A hmun cu amah ningte a si ko i, vanlawng zong cu an rak tlun lio i an i cit miphun kha a si ko. Asinain hlan lio kha le a tu cu a dangtuk cang ai ee.
Suimilam hleihnih nih a hung tling i, Vanlawng cu a thawh hnik cang. An zoh i an hromhawl a faktuk ah ahohmanh bia an chim kho ti lo. An fate nih, zeihngal loin, a nu le a pa tak cu lunglawm tein a thleng lengmang.
Yangon University i dawtnak a rak i thok nak hmun ah mah lawng vung kir lai le an rak tlonlen ṭinak vialte kha mah lawng neh zunṭhing vung khirh ṭhan lai a ruat kho hrimhrim lomi Gracy cu naute cu a hruai i, “Ka dawt, kan kal cang ne lai mu, kan i ṭhen hlan ahhin, na hmaite hi cim tein zoh ta ninglaw ka d…da….daw…. dawt….
tiah vun ka au ta,” a ti i, Pa Ceu kut cu a donghnak bik le hmannung bik ca ding ai a tlaih i, a biangno te ahcun a mitthli cu a rualrual in a tolh thuahmah. An bia le an holh vialte, an tlon le an len nak hmun Inya tili kam le University hrawng vialte a mitthlam ah puan bang a hung thar ṭhan vemi Pa Ceu zong cu a celh ve hrim lo i a mitthli cu a luang thluahmah ve.
“Pa te” a ti i, an fa te cu a van hnamh, anu cu a vun zoh i, “Ka dawt vawlei cung dawtnak cu mah vial lawng hi mu a si ko,… vawlei caan dongh tikah vancung khua ah i tong te ko ne sih mu…” a ti i, an nu fa te cun vanlawng kai cu aa i tim.
Vanlawng dinh hmun i a ummi vialte cu an lung a suk tuk cio hna i, an rak tuarpi cio ko hna. Vanlawng cungah cun an hung kai i, an luh lai ah, an rak i mer i, an za an hnu hlanh.
Pa Ceu zong nih a hei hlanh ve hna. Cucu an chan chung ah an i hmuh hmanung bik caan a si cang. Vanlawng innka cu an van khar i, a thawh vuaimai colh. Pa Ceu nih cun an liam hlan te a chuanh peng hna i, an liam in laitlang lei ah a tlung ve.
Caan a rem ahcun "BIAKNAK" Timi tlangtar kan peh tthan te lai.
Caṭialtu Rev. Carson Hniar Kio Tuanbia rel na duh ahcun hika catlang hi click
EmoticonEmoticon