ZUAMNAK IN ṬHANCHONAK LEI AH…
Rev. Dr. Ceu Sang Kung (Bethel)
Biahmaiṭhi
Vawlei cungah a ṭhangchomi ram an tuanbia le an
sining zoh tik ah pumpak, chungkhar zuamnak in a rak i thawk hmasa. Cun an
khua, an ram le vawleipi tiangah minthang le zohchunh tlak ah an rak chuahnak
hi kan hmuh khawhmi a si. Laimi phun zong ṭhancho kan duh, rum kan duh, hawi
tluk kan duh na in kan pumpak, chungkhar, miphun le ram kan daw taktak rua lo
tiah khua ka ruat tawn. A ruang cu nun remh kan i tim hrimhrim lo. Thinlung put
remh kan i tim lo, ruahnak thar lak le cohlan kan duh hrimhrim lo mi hi ṭhanchonak
dawntu kan si nak a si.
Japan ram an sining in kan cawn khawhmi
An
thinlung put a pi puam
Asia ram ah Japan miphun cu vawleipi
theih in a ṭhangcho tiah ti mi le theihmi an si. An ram ah thilchuak mi vawlei
tang thil le a dangdang cu um lo nain an thinlung put, ruahnak le nun remh an
duh caah a si kan ti khawh. An i zuamnak le an rian ṭuan ning nih ṭhanchonak
lei ah a hruai hna. An palh cun ka palh ti hi an i fawih ngaingai. Rianṭuan
caan ah duada le zangzel in um an duh
hrimhrim lo.
Full heart
in rian an ṭuan
Rian an ṭuanmi cio ah biatak tein teimak
le thazaang dihlak chuah in an ṭuan. Biadang in chim ah cun rianṭuan teimak nak
in an ram an dawt kan ti khawh. Keimah caṭialtu hi zing Sml 10:00-3:00 pm tiang
Sml. 5 chung ka ṭuan ve. Rian kan luh lai ah ready in thil kan i thlen dih hnu
ah caan fehternak te kha seh ah thlak a si. Ka ṭuan ka a si tikah kawlram
bantuk in daithlang in ka um. Zing sml 10:01 ah ka thlak i rian cu ka awt ve,
cun zanlei ah sml 2:59 ah ka thlak i rian kaa din ve ṭhan. Zing ah minute 1 ka
tlai, zanlei ah minute 1 ka ṭuan caah zingah minute 15, zanlei ah minute 15 a
ka zuh diam ko. Nikhat chung ka ṭuan caan Sml 5:00 dingah sml cheu ka sung i sml 4:30 lawng ṭuan ah ka
cang. Sungh kha cu um ko sehlaw caan upat lo tiin sik kaa huahmi ko kha tu
tiang hi ka ning a zak. Yan 1,000 hi sml pakhat ṭuan ah kan hmuh khawh i kawl
phaisa cun ks. 15,000 hrawng a si. Caan an khello dingah cun tar pipi zong hi a
tlik bak hin an tli hna.
Caan an
upat
Caan upatnak nih ṭhanchonak a chuahpi.
Caan an rak upat tuknak le zuamnak in ṭhanchonak ah nunnak an hman. A kal cia
mi caan cu dawi khawh a si ti lo caah kan hman lio mi le a ralai mi caan tu hi
man ngei tein hman thiam le rian kan ṭuan ding zat ṭuan a hau tihi an lungput a
si. Cu nih cun an thinlung, ruahnak le lungput a remh hna. An thinlung in ram
an dawt tuk nak cu hnawm fate, tahchunhnak ah muṭhai an ei, a hawng kha an zal
chung te ah an i sanh ko. An kal i a hlawnhnak hmun an phak lawngah an hlawnh.
Rian hi pakhat le khat an i bawm dih bantuk a si. Cu nih cun an khua a
thianter, a dawhter, a ṭhanchoter pinah thinlung a damter.
Dingrep an
ngei
Inn kipte hnawm hlawnh caan zong hi
nikhat ni ah rawlṭhing, mehṭhing le thingthei phunphun, nihnih ni ah
puanchia/thilchia le palasitic, nithum ni ah thlalang kuai le thlalang dur
phunphun, nili ni ah canphio dur le thir phunphun, ninga ni ah thing in sermi a
chiami tiin a ni tete ah hnawm kha hlawnh an si. Khua chungah rimnam le a thu thengmi
rim a nam bal lo. Cu tikah tho phunphun le fikfa, hmaisem tibantuk a um ti lo
caah a nuam tuk cang. Khiangthawng cawk ding Japan ram ah kawl law a um lai lo,
a ruang cu an zuar lo. Fikfa um lo caah a si.
Biadonghnak
Japan ram cu an ngan a dam i an nun a nuam.
Chungkhar, pumpak cio nih dingrep an ngeih dih tikah Japan ram cu minung nih
kal duh mi le phak duh mi ram ah aa chuahnak a si.
EmoticonEmoticon