HRUAITU: LUNGPUT ṬHA MI by Rev. Stephen Soe Paing
Pyramid (ပီရမစ်) pakhat saknak caah vawlei arce 13 a kau i lungtlap 2,300,000 in sak a si. Lungtlap pakhat hi ton 2 tluk a rit mi a si. Pyramid pakhat a san hi pe 500 a sang i a vang hi pe 756 a sau. Pyramid pakhat lim lak tiang tlamtling tein saknak ding caah minung singkhat nih kum 20 an ṭuan a hau. Cu bantuk in minung a sing in kumpi kum 20 ca ṭhut-umnak, eidinnak le rianṭuannak vialte tlangtlak, khuakhan le hruai hi a fawimi rian a si lo hlei ah zaran siangpahrang le hruaitu sawhsawh nih a pen in a uk kho hna lai lo, ti cu a fiangmi a si. Kawl nih လူမှန်နေရာမှန် an timi hi a biapi ngaingai. A tulio cu 2020 kum rampi thimnak (Election) caah cawlcangh cuahmah a si. Bawipa thim piakmi hruaitu ṭha kan herh ko!
Vawlei cungah minung kan i dawh biknak cu kan muisam
hi a si lo, kan pum kan rua zong a si lo i kan rumnak zong a si fawn lo.
Sihmanhsehlaw kan “lungput” hi a si deuh. Profet Samuel nih Israel Siangpahrang
caah aa tlak, aa rem, aa za, aa dawh
tiah a hmuh mi hna cu a muisam le a pumrua a ṭha mi hna Eliab, Abinadab
le Shammah le David chim lo a dang a unau poah kha an si. Asinain Pathian nih
cun “lungthin
a zoh” tiah a ti. A unau lak ah a hme bik cem le a pum rua zong a dawh
lo bik cem a si mi tuukhal David kha Chiti thuh ding ah Bawipa nih Samuel kha a
fial i Israel miphun hruaitu ah a thim.
“Small is Beautiful” timi cauk ka rak rel mi nih Pathian rian ka ṭuannak ah thazaang a ka pek ngaingai. Hi cauk ka rel hnu hin minung hi ‘Ngan’ lei ah kan i cuh deuhdeuh tikah kan hme deuhdeuh ti kha ka lung a fiang chin lengmang. Zeicahtiah minung a kan nganter tu le a kan hmet tertu cu Pathian hi a rak si. Kan Bawipa Jesuh Khrih chan lio Jeim le Johan cu Bawipa awrh lei le keh lei ah a um mi ṭhutdan ṭha kha a rak kawl mi an si. Asinain, kan Bawipa Jesuh nih a rak timi hna cu, hi bantuk ruahnak hi nan lak ah um ter hlah u. Mi ngan si a duh mi cu mi sinum a si awk a si. Bawi cem si a duh mi cu nan sal a si awk a si. Zeicahtiah, Mi Fapa hmanh hi rianṭuanpiakmi si awk ah ka rat ṭung lo, mi dang rianṭuan piak awk ah pei ka rat cu, tiah a ti hna. Cucu Bawipa nih kan ram, kan miphun le kan Khrihfabu i ṭhit-hruainak caah a kan duhpiak mi lungput le dirhmun cu a si. Bawipa nih thluachuahnak pe ko seh!
EmoticonEmoticon