Christmas Ṭamhnak: 1 (Christmas Thingkung, Christmas zaanvah)

Christmas Ṭamhnak: 1

(Christmas Thingkung, Christmas zaanvah)

HBA Hmurka; Vol 18, No. 4; 2020 December thla i chuahmi Pastor Van Tling Thang nih Christmas ṭamhnak tete tiah a ṭialmi chung in a part 1 nak kan van ṭial chinmi a si.

Christmas thingkung

Rev.Boniface hi German ram, khua pakhat ah Thawngṭha phuangtu (Missionary) a si. Cu khuami hna nih cun an khualeng i a ummi thingkung nganpi pakhat an biak. An biakmi pathian umnak biakinn a si ti in an zumh caah kum fatinte tuu le meheh in cu thingkung tang ah cun rai an thawi tawn.

Boniface nih khuami hna cu a auh hna i nan pathian le ka Pathian hi kan zuamter hna lai a ti hna. Cun thingkung pi cu a hau i Biakinn a sak. Khuami hna nih cun an innchungkhar chan sarih tiang an thi lai tiah an ti. Ka biakmi ka Pathian cu a ṭhawngmi le a ka khamhtu a si tiah a ti hna. Cun Christmas lai ah farkung kha a hram te in a hau i biakinn kulh chung ah cun a phun hna. Ei awk phunphun le theitlai dawh tete kha farkung ah cun a thlai hna. Cu zoh chih in le farkung cu a uai a har bik a si caah Jesuh naute cu zungzal nunnak petu a si tiin Christmas hmelchunhnak ah kan hman ve.

Kan Lairam zongah Christmas thingkung cu kan tuah ve i mi thinlung a hliphlau ter hringhran.

Christmas zaanvah

Christmas zaanvah hi mirang holh in "Christmas caroling" ti a si. Italy ram ah Pathian a hngal lomi hna nih Carolore timi puai an ngeih caan ah mino pawl an i khawm i, hla an sa i an vak tawn. Cucu zoh chih in Khrihfa a si cangmi hna zong nih Christmas caah hlasak i vah kan hun tuah ve. AD 1710 ah hin Fransis Assisi nih biatak te in a rak tuahpi hna i Christmas caan ah tuah lan a hung si.

Kannih Lairam zongah Christmas Carol cu biatak tein kan tuah. Kan mino hna nih, “Khamhtu A Chuak Cang” ti inn khat hnu inn khat thawng an kan thanh ahcun lung a hmui tuk hringhran.